Galatɩ Sɛbɛ 1 - A NAAŊMƖN PƲLƖ̃-TA-PAALAA

A PUORFƲ

¹ A maa Pol na ɩ a *nɩ-tʋnaa ɩ̃ tɩɩrɛ a Naaŋmɩn Sɛbɛ na kʋrɔ nyɩ. Aa ɩ nɩbɛ ɩ̃ vɛl ma ir mɩɩ nɩrɛ jie a yi ɩ̃ ɩ a nɩ-tʋnaa wa. Ɩ̃-cɛ a yi na a *Jeeju-Kirisi jie nɩ a Sãa Naaŋmɩn jie na maal ʋ ʋ ir a kũu pʋɔ.

² Sɩ ɓã na taa nɩ a yɛɛr bala ba jaa na be nɩ ma na sɩ puor a nyɩmɩ *duo-puorbo na be a Galatɩ-tẽw pʋɔ.

³ A sũofʋ nɩ a pɩɛnfʋ na yi a sɩ Sãa Naaŋmɩn nɩ a Nɩ-kpɛ̃ɛ Jeeju-Kirisi jie á be a nyɩ jie.

⁴ A *Kirisi ʋlɔ de na a ʋ mɩ̃ɛ ƴɔ̃w a kũu pʋɔ na ʋ faa sɩ a sɩ maal-faar pʋɔ a mɩnɛ ʋ na tʋɔ wɩɛ sɩ a daarʼãa yel-kpansɩ pʋɔ, tu nɩ a sɩ Sãa Naaŋmɩn pʋ-tɩɛrʋ̃.

⁵ A ʋlɔ sɔ a pɛwfʋ a daar a jaa. *Amɛn.

ƳƐR-SON BÕ-ƳEN TƐW Ɩ̃ BE

⁶ Nʋɔr tɩɩ na kpaa ma a mɩnɛ nyɩ na bara a Naaŋmɩn a lɛ a pʋpʋr na ɩ a ʋlɔ na bʋɔl nyɩ nɩ a ʋ sũofʋ a *Kirisi pʋɔ, ɩ̃ na nyɩ lɛ sɔwrɔ a ƴɛr-kpee ba na hiere.

⁷ Ɩ̃ ƴɛr-son ma lɛ be be kpee go wa, ɩ̃-cɛ nɩbɛ ŋmɛɛ be na a nyɩ sɔ̃w nyanyaana a nyɩ tɩɛrɩ̃sɩ bʋɔrɔ ba lɩɛb a Kirisi ƴɛrɩ̃.

⁸ A ala ɩ̃ ɩ nɩrɛ wa wa na a nyɩ sɔ̃w, a ala ɩ̃ saarɩ̃ ɩ a sɩmɩ mɩ̃ɛ ʋ mɩɩ sɩ-tʋnaa na yi a saa juu, ɩ̃ wa ƴɛr nyɩ ƴɛr-kpee ɩ̃ ma ɩ a ala sɩ na ma ƴɛrɛ nyɩ ʋ wa, a Naaŋmɩn pɔfʋ ú nyɔw ʋ!

⁹ Ɩ̃ dãa na de nĩe yel nyɩ, ɩ̃ lɛ bɔ̃w yele nyɩ a ƴɛ̃ƴɛrɩ̃ go: a nɩrɛ wa ƴɛr nyɩ ƴɛr-kpee nyɩ na ma dãa wõ sɛr wa, a Naaŋmɩn pɔfʋ ú nyɔw ʋ!

¹⁰ A lɛ bʋɔrɔ na a yel áa nɩbɛ ɩ̃ bʋɔrɔ ba kpiire ma mɩɩ? Kpee! A Naaŋmɩn ɩ̃ bʋɔrɔ ʋ kpiire ma. Ɩ̃ cãa na bʋɔrɔ a nɩbɛ ba pɛwrɛ ma mɩɩ? A maa dãa cãa bʋɔrɔ a nɩbɛ ba pɛwrɛ ma, ɩ̃ kɔ̃ɔ dãa ɩ a Kirisi tʋ̃tʋnɔ wa.

A MƖNƐ A POL NA LƖƐB Ɩ A NƖ-TƲNAA

¹¹ Yɛɛr, ɩ̃ yel nyɩ na, a ƴɛr-son ɩ̃ na ma hiere ma yi nɩrɛ sɛ̃ wa.

¹² Maa pɔw ʋ nɩrɛ jie wa, ɩ̃ aa mɩ ɩ nɩrɛ ɩ̃ jaan ma wa, ɩ̃-cɛ a *Jeeju-Kirisi mɩ̃ɛ ɩ̃ miil ma.

¹³ Nyɩ wõ na a ba ƴɛr a mɩnɛ a ɩ̃ maalfʋ na dãa be a lɛdaar ɩ̃ na dãa puoro a Jufisɩ puorfʋ, a mɩnɛ ɩ̃ na mɩ dãa nyɩrɩ̃ kpowro a Naaŋmɩn *duo-puorbo, bʋɔrɔ ɩ̃ wɛl ba bar.

¹⁴ Ɩ̃ vɩɛ na a ɩ̃ tɔ deme bala sɩ na ɩ nɩ a bõ-ƴen a Jufisɩ puorfʋ pʋɔ bar, a mɩnɛ ɩ̃ na dãa tʋlɔ gãw ba a ɩ̃ sãa-kʋnbɔ maal-bie pʋɔ.

¹⁵ Ɩ̃-cɛ a Naaŋmɩn de na nĩe vɛl ma ir ɩ̃ a ba wa bɩɛr dɔw ma. A ʋ pʋ-pɩlaa ɩnɛ ʋ bʋɔl ma ƴɔ̃w a ʋ tʋmɔ pʋɔ,

¹⁶ ɩ̃ a lɛdaar ʋ na nyɛ a vɩɛlɛ ʋ na miil ma a ʋ Bie a mɩnɛ ɩ̃ na tʋɔ mana a ʋ ƴɛrɩ̃ kʋrɔ a nɩ-bʋlsɩ, maa cen nɩrɛ jie na soor ʋ bom wa.

¹⁷ Maa mɩ cen a Jerujalɛm na nyɛ a bala na de nĩe ɩ ma a *nɩ-tʋnɩsɩ wa, ɩ̃-cɛ ɩ̃ irʼã cen a Arabɩ wɩɛr ɩ̃ pãa lɩɛb wa a Damasɩ-tẽw.

¹⁸ Yomo ata a maal ɩ̃-cɛ ɩ̃ cen a Jerujalɛm na bɔ̃w a Pɩɛr, ɩ̃ jɛ a be maal bibie pie-nʼanuu a ʋ sɛ̃.

¹⁹ Maa nyɛ *nɩ-tʋnaa kpee ɩ̃ a ala ma ɩ a Jakɩ na ɩ a Nɩ-kpɛ̃ɛ yɛbɛ ʋ wa.

²⁰ A ala ɩ̃ na yel nyɩ, a Naaŋmɩn bɔ̃w na ka a maa ŋmaa jiri wa.

²¹ A ala ɩ̃ baar ɩ̃ cenʼã a Sɩrɩ nɩ a Sɩlɩsɩ wɛɛ.

²² A ʋna daarʼãa pʋɔ, a *Kirisi duo-puorbo na be a Jude wɩɛr pʋɔ ma dãa bɔ̃w ma wa.

²³ Ba dãa na wõ a ala a nɩbɛ na ƴɛrɛ a ɩ̃ ɩnɛ tɛw, áa ʋlɔ na dãa kpowro ba a korĩ-cɛ lɛ lɩɛbʼã ƴɛrɛ a Naaŋmɩn ƴɛrɩ̃ ʋlɔ ʋ na dãa bʋɔrɔ ʋ sãw bar,

²⁴ ɩ̃ na ba pɛwrɛ a Naaŋmɩn a ɩ̃ ɩnɛ.