Fɩlɩpɩ Sɛbɛ 2 - A NAAŊMƖN PƲLƖ̃-TA-PAALAA

A KIRISI MƖ̃Ɛ WURFƲ NƖ A Ʋ YO-YIFƲ

¹ A mɩnɛ nyɩ na be a *Kirisi pʋɔ nyɩ pɔw na a kpɛ̃w mɩɩ? A ʋ nʋfʋ kʋ nyɩ na a ꞌlafʋ mɩɩ? Nyɩ lãw na taa nɩ a Naaŋmɩn Sɩɛ mɩɩ? A nʋfʋ nɩ a nã-bɔ̃wfʋ be na a nyɩ sɔ̃w mɩɩ?

² A ala ɩ lɛ ʋ, ɩ̃ sʋɔr nyɩ na nyɩ́ tɛrɛ tɩɛrʋ̃ bõ-ƴen, maalʼɩ̃ ma a nʋ̃ɔ ƴala ma, mɩ bɔ̃w nʋnɔ nɩ taa, tɛrɛ nɩ su-bõ-ƴen, nɩ nɔ-bõ-ƴen.

³ Nyɩ taa wa maala bom kãw bʋɔrɔ nɩ a yuor, mɩɩ bʋɔrɔ nɩ a ju-kpɛ̃ɛ wa, ɩ̃ nyɩ́ ɛ̃ɛ wur a nyɩ mɩ̃ɛ a nɩbɛ jie de nɩ ba a ba ɩ bom gãw nyɩ.

⁴ Nyɩ taa mɩ bʋɔrɔ a nyɩ mɩ̃ɛ son tɛw wa, ɩ̃-cɛ nyɩ́ mɩ tɩɛrɛ nɩ a nɩŋmɛɛ ben.

⁵ Nyɩ́ tɛrɛ a maal-bie ala a *Jeeju-Kirisi na dãa tɛrɛ:

⁶ “A ʋlɔ na wɔ̃ a mɩnɛ a Naaŋmɩn na wɔ̃ a korĩ-cɛ jaa, ꞌwaa dãa de a ʋ bõ-ƴen ɩfʋ nɩ a Naaŋmɩn ʋ ɩ ʋ bom na sɛw ʋ cɩm tɛɛlɛ wa,

⁷ ɩ̃ ʋ ɛ̃ɛ na lɔb a ʋ mɩ̃ɛ bar, ɩ̃ lɩɛb wɔ̃ a mɩnɛ a tʋ̃tʋnɔ na wɔ̃. Ʋ lɩɛbʼã wɔ̃ a nɩrɛ kaarɩ̃. Ba nyɛ ʋ na ʋ ɩ a nɩrɛ,

⁸ naa ʋ wur a ʋ mɩ̃ɛ tɛrɛ nɩ a toor wõfʋ wa ta nɩ a ʋ kũu daar, a ʋ kũu a nɩ-kʋ-daa juu ʋ na kpi.

⁹ Ala-ɩ̃-sɔ a Naaŋmɩn jɛw ʋ ʋ do gãw a yele a jaa, ɩ̃ mɩ kʋ ʋ a yuor na gãw a yoe a jaa,

¹⁰ a mɩnɛ a bala ba jaa na be a saa juu, nɩ a bala na mɩ be a tẽw pʋɔ, nɩ a bala na mɩ lɛ be a tẽw pulẽe wa wõ a ba bʋɔl a *Jeeju yuor, ba jaa fɛw na gburĩ na a dume a ʋ nii-sɔw,

¹¹ ɩ̃ a ba jaa na sɔw na ɩ̃ yel áa Jeeju-Kirisi ɩ̃ ɩ a Nɩ-kpɛ̃ɛ, maala nɩ a Sãa Naaŋmɩn yuor ʋ yire.”

NYƖ́ NYƖLƐ A SAꞌLON ŊMARBIE KAARƖ̃

¹² Nyɩ́ tɛrɛ a ƴɔ̃wfʋ ɓĩɓine nɩ a tʋmɔ pʋɔ a mɩnɛ a nyɩ faafʋ na ta baar,

¹³ a-na-ɩ a Naaŋmɩn ɩ̃ ɩ a ʋlɔ na tʋnɔ a ʋ tʋmɔ a nyɩ sɔ̃w, a nyɩ na tʋɔ tɛrɛ a bɔfʋ na maalʼɩ̃ a ala ʋ na bʋɔrɔ.

¹⁴ Nyɩ́ maala a yele a jaa kɔ̃ hũhune nɩ taa mɩɩ cɩɩrɛ nɩ taa wa,

¹⁵ a nyɩ na tʋɔ ɩ nɩbɛ bala na ma tɛrɛ cɛfʋ jie nɩ sãwfʋ jie wa, ɩ̃ nyɩ́ ɛ̃ɛ ɩ a Naaŋmɩn bibi-cɛcɛ a tẽw na nɩbɛ sɔ̃w na ɩ a nɩ-gõgolĩsɩ nɩ a burbur nɩbɛ, nyɩlɛ nɩ a ba sɔ̃w a saꞌlon ŋmarbie kaarɩ̃

¹⁶ a mɩnɛ nyɩ na miile ba a baafʋ ƴɛrɩ̃. A nyɩmɩ maal a lɛ, ɩ̃ na barʼã a tɩɛrʋ̃ a nyɩ ɩnɛ a *Kirisi waa bibir áa ɩ̃ jɛb nɩ a ɩ̃ tʋmɔ ma lo wa.

¹⁷ A nyɩ ƴɔ̃w-nyãa ɩ na a baar-lo-bom a Naaŋmɩn jie, ɩ̃ a ala ɩ a ɩ̃ jɩ̃ɩ wa deerʼã ƴɔ̃w a ʋna bom juu, a na ɩ ma na nʋ̃ɔ, ɩ̃ nyɩ na pɔw ma na cɩlɛ nɩ.

¹⁸ A nyɩmɩ mɩ, nyɩ mɩ sɛw na na cɩlɛ, a sɩ lãa tɛrɛ a nʋ̃ɔ.

A TIMOTE NƖ A EPAFURODI ƳƐRƖ̃

¹⁹ A Nɩ-kpɛ̃ɛ *Jeeju wa sɔw, ɩ̃ bʋɔrɔ na ɩ̃ tʋ̃ a Timote be a nyɩ sɛ̃, ʋ na wõ a nyɩ ƴɛrɩ̃ lɩɛb wa nɩ man ma, ɩ̃ na tɛrɛ nʋ̃ɔ.

²⁰ Ʋlɔ tɛw ɩ̃ be ka na tɛrɛ nɩ ma a tɩɛrʋ̃ bõ-ƴen ɩ̃ mɩ sɩrɩ̃ cɛlɛ a nyɩ jie.

²¹ Ɩ̃ a bala ba jaa na cɛ, a ba mɩ̃ɛ yele tɛw ba ꞌwuoro, ɩ̃ bar a *Jeeju-Kirisi ben.

²² Nyɩmɩ mɩ̃ɛ bɔ̃w na a mɩnɛ ɩ̃ na jʋʋr a Timote nyɛ ʋ ɩ a dẽdẽ, nɩ a mɩnɛ sɩ na lãa tʋ̃ taa a Naaŋmɩn ƴɛr-son tʋmɔ a sãa nɩ a bie kaarɩ̃.

²³ Ala-ɩ̃-sɔ, a ʋlɔ ɩ̃ bʋɔrɔ ɩ̃ tʋ̃ a nyɩ sɛ̃, a lɛdaar ɩ̃ nɔɔ bɔ̃wnɔ a ala na tara ma baara.

²⁴ Ɩ̃ mɩ bɔ̃w na bɔ̃w ka a Nɩ-kpɛ̃ɛ wa sɔw, ka nɩ fɩ̃ɩ pʋɔ, a maa mɩ̃ɛ na mɩ wɩ na ꞌwuor nyɩ je kãa.

²⁵ Ɩ̃ nyɛ na á vɩɛlɛ ɩ̃ na mɩ ƴɔ̃w a sɩ yɛbɛ Epafurodi ʋlɔ nyɩ na dãa ir bar ʋ wɩ sũo ma a ɩ̃ won pʋɔ, ʋ lɛ lɩɛb wɩ a nyɩ sɛ̃. Ʋ dãa na lɩɛb ɩ a ɩ̃ lãa-tʋnɔ mɩ pɔw nɩ ma a jɛb jɛbfʋ pʋɔ,

²⁶ ɩ̃ a ƴɛ̃ƴɛrɩ̃, ʋ tɩɩ na bʋɔrɔ ʋ lɛ nyɛ nyɩ nyɩ jaa, a-na-ɩ a dama ʋ na a mɩnɛ nyɩ na wõ áa ꞌwɔbɔ ʋ na.

²⁷ A dãa na sɩrɩ̃ ꞌwɔbɔ ʋ ʋ ta a kũu, ɩ̃-cɛ a Naaŋmɩn bɔ̃w ʋ na nãw. Ɩ̃ aa ɩ a ʋlɔ tɛw ʋ bɔ̃w a nãw wa. Ʋ mɩ bɔ̃w na a maa mɩ a nãw, a mɩnɛ a tɩɛrɩ̃sɩ kɔ̃ lɛ dɔɔl ma wa.

²⁸ Ala-ɩ̃-sɔ ɩ̃ bʋɔrɔ na ɩ̃ tɩɩr ʋ pʋpʋr kʋ nyɩ, a mɩnɛ a nyɩmɩ wa nyɛ ʋ, nyɩ lɛ tɛrɛ nʋ̃ɔ ɩ̃ a ɩ̃ suur na mɩ ɓãa.

²⁹ Nyɩ́ sɔw de ʋ nɩ nʋ̃ɔ kpɛ̃ɛ a Nɩ-kpɛ̃ɛ ɩnɛ. Nyɩ́ sɛw na nyɩ ƴɔnɔ a nɩ-nɔhɔ̃ nʋmɔ,

³⁰ a-na-ɩ fɩ̃ɩ cɛ ʋ naa kpi na a *Kirisi tʋmɔ ɩnɛ. Ʋ sɔw na a kũu ɩ̃ sũo ma a sũofʋ ʋlɔ a nyɩ mɩ̃ɛ na ma dãa be be maala wa.