Ɛfɛɛsɩ Sɛbɛ 6 - A NAAŊMƖN PƲLƖ̃-TA-PAALAA

A BIBIIR NƖ A BA DƆƆRBƆ WÕ-TAA

¹ Bibiir, a nyɩ tʋn a Nɩ-kpɛ̃ɛ pʋɔ ɩ na a nyɩ na wono a nyɩ dɔɔrbɔ a toor, a-na-ɩ a lɛ ɩ̃ tor.

^2-3 A mɩnɛ a Naaŋmɩn Sɛbɛ na yel: “Ƴɔnɔ a fʋ sãa nɩ a fʋ mã”. A naa ɩ̃ ɩ a dãdãw ƴɛr-kpɛ̃w na tɛrɛ a pʋlɩ̃fʋ: “A mɩnɛ a fʋ na tɛrɛ nʋ̃ɔ, mɩ kam ka a tẽw pʋɔ”.

⁴ Saanba, nyɩ taa wa maala a nyɩ bibiir a ba nyɛrɛ suur wa, ɩ̃-cɛ nyɩ́ guolo ba, jaana nɩ ba, mana ba a yɛ̃ ala na yi a Nɩ-kpɛ̃ɛ jie.

A GBÃGBAAR NƖ A NƖ-BƐRƐ KPÃKPANFƲ

⁵ Gbãgbaar, nyɩ́ jɔrɔ a nyɩ nɩ-bɛrɛ a ka a tẽw na pʋɔ, wono nɩ ba a toor nɩ su-vɩlaa, a mɩnɛ nyɩ na maal a *Kirisi jie.

⁶ Nyɩ taa ma maala a lɛdaar tɛw ba na ma jʋʋrɔ nyɩ a na nʋmɔ ba wa, ɩ̃-cɛ nyɩ́ tʋnɔ a mɩnɛ nyɩ na ɩ a Kirisi gbãgbaar, maala nɩ a Naaŋmɩn pʋ-tɩɛrʋ̃ nɩ a nyɩ suur ʋ jaa.

⁷ Nyɩ́ sɔw nɩ pʋɔ ɩ̃ tʋnɔ a nyɩ gbãgba-tʋmɔ wɔ̃ taa nɩ a Nɩ-kpɛ̃ɛ nyɩ tʋnɔ kʋrɔ, ɩ̃ a kɔ̃ ɩ nɩbɛ tɛw ʋ wa.

⁸ A-na-ɩ nyɩ bɔ̃w ka a bala na ɩ a gbãgbaar mɩɩ a bala na sɔ a ba mɩ̃ɛ, sɩ jaa bõ-ƴene-ƴene na pɔw na a yar a Nɩ-kpɛ̃ɛ jie tu nɩ a vɩlaa lɛ sɩ na maala.

⁹ A nyɩmɩ nɩ-bɛrɛ, nyɩ́ mɩ maala a lɛ a nyɩ gbãgbaar jie. Nyɩ́ bar ba a pirfʋ, a-na-ɩ nyɩ bɔ̃w ka Nɩ-kpɛ̃-bõ-ƴen nyɩ tɛrɛ nɩ a bala, a ʋlɔ na be a saa juu na ma ꞌwuoro a nɩbɛ kpee kpee wa.

A POPUORO JƐB YELE

¹⁰ A ala na cɛ ɩ na, nyɩ́ bʋɔrɔ a nyɩ fãgã a Nɩ-kpɛ̃ɛ pʋɔ, a-na-ɩ a ʋ kpɛ̃w nyɩrɩ̃ na waa.

¹¹ Nyɩ́ de a Naaŋmɩn jɛb yele a jaa ʋ na kʋ nyɩ tɛrɛ, a mɩnɛ a nyɩ na tʋɔ ɩraa gu a Satã a ʋ kpɩɩlʋ̃ʋ tʋmɔ pʋɔ.

¹² A-na-ɩ aa ɩ nɩsaa-salba sɩ jɛbɛ nɩ wa, ɩ̃-cɛ a sɩ-kpansɩ na be a saꞌlon, a tʋɔfʋ nɩ a fãgãsɩ, nɩ a bala na tɛrɛ a tẽw naa na be a libe pʋɔ sɩ jɛbɛ nɩ.

¹³ Ala-ɩ̃-sɔ nyɩ́ de a Naaŋmɩn jɛb yele a jaa, a mɩnɛ a nyɩ na tʋɔ bɔ̃w ɩraa gu a san-sʋbɔ a bibi-tuo dayen, ɩ̃ a lɛdaar nyɩ na jɛb a jɛb, ta a baarfʋ daar, a nyɩ na cãa ɩraa cĩcĩ.

¹⁴ Ala-ɩ̃-sɔ nyɩ́ bɔ̃w ɩraa cĩcĩ. Nyɩ́ de a yel-mɩ̃ɛ ʋ ɩ sɩɛ gan a nyɩ sɛ a sɩɛ pʋɔ, ɩ̃ mɩ de a torfʋ ʋ ɩ a nyã-piwraa,

¹⁵ ɩ̃ mɩ ɓĩɓine a su-ɓaar ƴɛr-son ƴɛrfʋ ɩnɛ, a wɔ̃ taa nɩ nafaba nyɩ na su.

¹⁶ A daar a jaa nyɩ́ bɔ̃w nyɔw a nyɩ bõ-piwraa na ɩ a nyɩ ƴɔ̃w-nyãa nyɩ na tʋɔrɔ kpiine nɩ a Fãa Sʋbɔ vũu pime bara.

¹⁷ Nyɩ́ sɔw de a faafʋ na ɩ a nyɩ kur sapi, nɩ a Naaŋmɩn ƴɛrɩ̃ na ɩ a ʋ Sɩɛ bãjɩnɛ.

¹⁸ Nyɩ́ maala a ala a jaa puoro nɩ a Naaŋmɩn, sʋɔrɔ nɩ ʋ. A daar a jaa nyɩ́ puoro ʋ a mɩnɛ a ʋ Sɩɛ na tɔwrɔ nyɩ, na nyɩ bɔ̃w jʋʋrɔ kɔ̃ gala wa, ɩ̃ mɩ sʋɔrɔ ƴɔnɔ a Naaŋmɩn deme ba jaa.

¹⁹ Nyɩ́ mɩ sʋɔrɔ ƴɔnɔ ma, ʋ na kʋ ma a ƴɛr-bie ala na sɛw a lɛdaar ɩ̃ na ƴɛrɛ, ɩ̃ na ƴɛrʼɩ̃ ꞌlafʋ, miilʼɩ̃ a bõ-sɔɔlaa ʋlɔ na ɩ a ƴɛr-son.

²⁰ A ʋlɔ ɩnɛ a Naaŋmɩn ƴɔ̃w ma ɩ̃ ɩ a ʋ tʋ̃tʋnɔ, a mɩnɛ ɩ̃ na saarɩ̃ be a kasu pʋɔ. Ala-ɩ̃-sɔ nyɩ́ sʋɔrɔ a Naaŋmɩn ƴɔnɔ ma ɩ̃ na ma ƴɛrʼɩ̃ ꞌlafʋ a mɩnɛ a na sɛw.

A ƳƐR-BAARAA

²¹ A Tɩsɩkɩ na ɩ a sɩ yɛb-nʋnaa nɩ a sɩ sõsũo-dẽdẽ a Nɩ-kpɛ̃ɛ tʋmɔ pʋɔ, na man nyɩ na a yele a jaa, a mɩnɛ nyɩ na tʋɔ wõ a ɩ̃ ƴɛrɩ̃, nɩ a ala ɩ̃ na maala.

²² Ʋlɔ ɩ̃ tʋnɔ a nyɩ sɛ̃ a nyɩ na tʋɔ bɔ̃w a mɩnɛ a sɩ yele na be, ɩ̃ mɩ tʋɔ kʋ nyɩ a ꞌlafʋ.

²³ A su-ɓaar, a nʋfʋ nɩ a ƴɔ̃w-nyãa ala na yi a Sãa Naaŋmɩn nɩ a Nɩ-kpɛ̃ɛ *Jeeju-Kirisi sɛ̃, á be a yɛɛr ba jaa jie.

²⁴ A Naaŋmɩn sũofʋ ú be a bala ba jaa jie na tɛrɛ a nʋfʋ nɩ a sɩ Nɩ-kpɛ̃ɛ Jeeju-Kirisi, na ɩ a nʋfʋ ʋlɔ na ma baara wa.