Ɛfɛɛsɩ Sɛbɛ 3 - A NAAŊMƖN PƲLƖ̃-TA-PAALAA

A TƲN ƲLƆ A POL NA TƐRƐ A NƖ-BƲLSƖ JIE

¹ Ala-ɩ̃-sɔ, a maa Pol na ɩ a *Jeeju-Kirisi kasu sʋbɔ ma sʋɔrɔ na a Naaŋmɩn ƴɔnɔ a nyɩmɩ nɩ-bʋlsɩ.

² Ɩ̃ bɔ̃w na bɔ̃w ka nyɩ wõ na a ba ƴɛr a tʋɔfʋ ʋlɔ a Naaŋmɩn na kʋ ma a ʋ maal-vɩlaa ɩnɛ ɩ̃ tʋnɔ nɩ a nyɩ jie.

³ A Naaŋmɩn dãa na miil ma bom ɩ̃ na bɔ̃w a ʋ tʋ̃-sɔɔlaa, a mɩnɛ ɩ̃ na de nĩe sɛb a ŋmãa yel nyɩ.

⁴ A nyɩmɩ wa ꞌwuor a be, nyɩ na nyɛ na bɔ̃w ka ɩ̃ bɔ̃w na bõ-sɔɔlaa a *Kirisi ɩnɛ.

⁵ A Naaŋmɩn ma dãa miil a ʋna bõ-sɔɔlaa a korĩ-cɛ nɩbɛ wa, ɩ̃-cɛ a ƴɛ̃ƴɛrɩ̃ na, ʋ de na a ʋ Sɩɛ miilʼɩ̃ a ʋna bom a ʋ *nɩ-tʋnɩsɩ nɩ a ʋ pʋ-tɩɛrʋ̃-bʋʋrbɔ sono.

⁶ A ɩ na a mɩnɛ a nɩ-bʋlsɩ na pɔw a Jufisɩ a ba be tɔ a yele ala pʋɔ a Naaŋmɩn na gbɛɛrɩ̃ a ʋ nɩbɛ ɩnɛ, ɩ̃ mɩ ɓã taa ɩ a ɩ̃gan bõ-ƴen, mɩ lãa pɔwrɔ a pʋlɩ̃fʋ bom ʋlɔ a Naaŋmɩn na pʋlɩ̃ nɩ ba a Jeeju-Kirisi pʋɔ.

⁷ Ɩ̃ lɩɛbʼã ɩ a Naaŋmɩn tʋ̃tʋnɔ mana a ʋna ƴɛr-son, tu nɩ a tʋɔfʋ ʋlɔ ʋ na kʋ ma a ʋ maal-vɩlaa ɩnɛ, nɩ a ʋ kpɛ̃w na tʋnɔ a ɩ̃ pʋ̃ɔ.

⁸ A Naaŋmɩn nɩbɛ pʋɔ, maa ɩ̃ ɩ a par-pɔwrɔ a ba jaa jie, ɩ̃-cɛ a Naaŋmɩn kʋ ma na a tʋɔfʋ ʋlɔ ɩ̃ mana nɩ a ʋ ƴɛr-son na ɩ a Kirisi yel-vɛlɛ na ma tɛrɛ baarfʋ wa, kʋrɔ a nɩ-bʋlsɩ,

⁹ ɩ̃ na mɩ tɔw a nɩbɛ ba jaa a ba na tʋɔ bɔ̃w a mɩnɛ a Naaŋmɩn pʋ-tɩɛrʋ̃ na sɛw a maal. A ʋna tɩɛrʋ̃ naa sɔɔlɩ̃ na a korĩ-cɛ jaa a Naaŋmɩn ʋlɔ na maal a yele a jaa pʋ̃ɔ,

¹⁰ a mɩnɛ a ƴɛ̃ƴɛrɩ̃ na ʋ na tʋɔ maal a tʋɔfʋ nɩ a fãgãsɩ a jaa na be a saa juu a ba nyɛ a ʋ kpaarfʋ bʋrɔ bʋrɔ a *duo-puorbo jie.

¹¹ A ala a jaa maalʼã tu nɩ a Naaŋmɩn pʋ-tɩɛrʋ̃ ʋ na dãa tɛrɛ a korĩ-cɛ jaa ɩ̃ pãa de a sɩ Nɩ-kpɛ̃ɛ Jeeju-Kirisi maalʼɩ̃.

¹² A ʋna Kirisi jie sɩ na be, tɛrɛ nɩ ʋ a ƴɔ̃w-nyãa, sɩ tɛrɛ na sɔr na bar nyãa ɩraa nɩ a Naaŋmɩn nii-sɔw.

¹³ Ala-ɩ̃-sɔ ɩ̃ sʋɔr nyɩ na, nyɩ taa ɩ a sube sãw nyɩ a won ala ɩ̃ na nyɛrɛ a nyɩ ɩnɛ wa. A ɩ na a nyɩ yo-yifʋ bom.

A MƖNƐ A KIRISI NƲFƲ NA WƆ̃

¹⁴ Ala-ɩ̃-sɔ, ɩ̃ ma gburĩ na a dume ɩ̃ puoro a Sãa Naaŋmɩn

¹⁵ ʋlɔ na ꞌwuoro a yir bʋrɔ bʋrɔ nɩbɛ ba jaa na be a saa juu nɩ a tẽw pʋɔ,

¹⁶ sʋɔrɔ nɩ ʋ a ʋ de a ʋ Sɩɛ fãgã kʋ nɩ nyɩ a suur pʋɔ kpɛ̃w, a yi a ʋ na-yele na be a yo-yifʋ pʋɔ.

¹⁷ Ɩ̃ mɩ sʋɔrɔ ʋ na a mɩnɛ a *Kirisi na tʋɔrɔ beree a nyɩ suur pʋɔ a nyɩ ƴɔ̃w-nyãa ɩnɛ, a nyɩ na ba ɩraa cĩcĩ a ʋ nʋfʋ pʋɔ,

¹⁸ ɩ̃ mɩ tʋɔ lãa bɔ̃w nɩ a Naaŋmɩn nɩbɛ ba jaa a mɩnɛ a Kirisi nʋfʋ na yalɩ̃, ɩ̃ womo, ɩ̃ mɩ do, ɩ̃ mɩ kpɛ a pʋ̃ɔ.

¹⁹ Ɩ̃ sʋɔrfʋ ɩ na a nyɩ na tʋɔ bɔ̃w a ʋ nʋfʋ ʋlɔ na gãw a bɔ̃wfʋ a jaa, a mɩnɛ nyɩ na tʋɔ sɛw nɩ a Naaŋmɩn ʋlɔ a bom kãw na ma ɓɔr wa.

²⁰ Naaŋmɩn sɔ pɛwfʋ, ʋlɔ na tʋɔrɔ maala a yele a jaa a gãwna a ala a jaa sɩ na sʋɔrɔ ʋ mɩɩ sɩ na tɩɛrɛ nɩ, tuure nɩ a mɩnɛ a ʋ kpɛ̃w na tʋnɔ a sɩ pʋ̃ɔ.

²¹ Ʋlɔ ɩ̃ sɔ a yo-yifʋ a *duo-puorbo sɔ̃w nɩ a *Jeeju-Kirisi jie, a daarʼãa pʋɔ nɩ a daar a jaa. *Amɛn.