Ɛfɛɛsɩ Sɛbɛ 2 - A NAAŊMƖN PƲLƖ̃-TA-PAALAA

A KŨU PƲƆ SƖ NA IR PƆW A BAAFƲ

¹ A nyɩmɩ, nyɩ dãa na kpi a sɩɛ pʋɔ a nyɩ bɩɛfʋ nɩ a nyɩ maal-faar ɩnɛ.

² A ala pʋɔ nyɩ dãa be, maala a tẽw na nɩbɛ kaarɩ̃, jɔrɔ nɩ a nɩ-kpɛ̃ɛ ʋlɔ na be a sɛsɛb pʋɔ, a sɩɛ ʋlɔ na tɔwrɔ a nɩbɛ bala na wõw a toor a Naaŋmɩn jie.

³ A lɛ a sɩ jaa mɩ dãa be, mɩ maala a ala a sɩ ɩ̃gan buur na bʋɔrɔ, a ba kaarɩ̃. Sɩ dãa na de a sɩ mɩ̃ɛ ƴɔ̃w a ala a sɩ ɩ̃gan buur nɩ a sɩ pʋ-tɩɛrʋ̃ na bʋɔrɔ. Ɩ̃ a mɩnɛ sɩ na dãa wɔ̃ a lɛ, su-tuo ɩ̃ dãa gu sɩ a mɩnɛ ʋ na gu a nɩbɛ bala na mɩ wɔ̃ a lɛ.

⁴ Ɩ̃-cɛ a Naaŋmɩn nã-bɔ̃wfʋ nyɩrɩ̃ na bɛrmɛ, ɩ̃ ʋ mɩ nyɩrɩ̃ nʋ sɩ,

⁵ ala-ɩ̃-sɔ, a lɛdaar sɩ na dãa kpi a sɩ bɩɛfʋ ɩnɛ ʋ lɛ maal sɩ na a sɩ lãa irʼɩ̃ a *Kirisi a kũu pʋɔ. (A Naaŋmɩn wɩɛfʋ ɩ̃ saa a nyɩ pɔw a faafʋ.)

⁶ A mɩnɛ sɩ na be a *Jeeju-Kirisi jie, a Naaŋmɩn lãa na ir sɩ a kũu pʋɔ ɩ̃ ƴɔ̃w sɩ a sɩ lãa jɛ nɩ ʋ a saa juu.

⁷ A Naaŋmɩn maalʼã a lɛ bʋɔrɔ ʋ tʋɔ miil a daar ala na tuure pʋɔ a mɩnɛ a ʋ sũofʋ na nyɩrɩ̃ bɛrmɛ a ʋ yɛ̃ ʋlɔ ʋ na bɔ̃w nɩ sɩ a Jeeju-Kirisi jie.

⁸ A-na-ɩ a Naaŋmɩn wɩɛfʋ ɩ̃ saa a nyɩ pɔw a faafʋ a nyɩ ƴɔ̃w-nyãa ɩnɛ. Aa yi a nyɩ jie wa; Naaŋmɩn bom ʋ, ʋ kʋ nyɩ pɔrɔ.

⁹ Aa ɩ tʋmɔ nyɩ tʋ̃ pɔw ʋ wa, a mɩnɛ a nɩrɛ nɔɔ bʋɔrɔ yuor wa.

¹⁰ A-na-ɩ a Naaŋmɩn ɩ̃ maal sɩ, ɩ̃ ir sɩ a sɩ be a Jeeju-Kirisi jie, a sɩ na tʋɔ maala a tʋ̃-vɛlɛ ala ʋ na dãa de nĩe cɔɔrɩ̃ bar sɩ.

BÕ-ƳEN SƖ Ɩ A KIRISI PƲƆ

¹¹ Ala-ɩ̃-sɔ nyɩ́ cãa bɔ̃w nɩ a mɩnɛ ba na dɔw nyɩ a nyɩ ɩ a nɩ-bʋlsɩ, a nyɩmɩ a Jufisɩ na ma bʋɔlɔ a nɩ-pɔrsɩ. A-na-ɩ a bala, ba ma ɩ na a ba ŋmaa ba a yʋɔr, ɩ̃-cɛ a nyɩmɩ, nyaa tɛrɛ a jɩbaa ʋlɔ a nyɩ ɩ̃gan pʋɔ wa. Nyɩ́ tɩɛrʼɩ̃ a ala nyɩ na dãa ɩ a korĩ-cɛ.

¹² A ʋna daarʼãa nyaa dãa bɔ̃w *Kirisi wa. Sáanba nyɩ dãa ɩ, ma be tɔ a *Ɩsɩrayɛl nɩbɛ pʋɔ wa. Nyaa mɩ dãa be tɔ a pʋlɩ̃-tar ala pʋɔ a Naaŋmɩn na pʋlɩ̃ nɩ a ʋ nɩbɛ wa. Nyaa mɩ dãa tɛrɛ tɩɛrɩ̃-son, ɩ̃ ma mɩ dãa tɛrɛ Naaŋmɩn ka a tẽw pʋɔ wa.

¹³ Ɩ̃-cɛ a ƴɛ̃ƴɛrɩ̃ na nyɩ na be a *Jeeju-Kirisi pʋɔ, a nyɩmɩ na dãa jãa taa nɩ a Naaŋmɩn lɛ pɩɛlʼɩ̃ ʋ na a Kirisi kũu ɩnɛ.

¹⁴ A-na-ɩ a ʋlɔ mɩ̃ɛ na maal a Jufisɩ nɩ a nɩ-bʋlsɩ a ba lɩɛb ɩ bõƴen ɩ̃ ɩ a sɩ pɩɛnfʋ. A mɩnɛ ʋ na tɩɩr a ʋ mɩ̃ɛ, ʋ wɛlʼã a dacin ʋlɔ bar na dãa var ba a kpee kpee a ba ɩ a sama-deme,

¹⁵ ɩ̃ mɩ sãw a ƴɛr-kpɛn nɩ a ƴɛr-ciirsɩ a jaa bar na be a Mowisi sɛbɛ pʋɔ, a mɩnɛ ʋ na maal a nɩ-kpee kpee bala a ba lɩɛb ɩ bõ-ƴen a ʋ jie, a pɩɛnfʋ na pãa be.

¹⁶ A ʋ kũu ʋ na kpi a nɩ-kʋ-daa juu ɩnɛ ʋ sãw na a ba ꞌlaarfʋ bar, ɩ̃ ɓaalɩ̃ ba a ba ɩ bõ-ƴen nɩ a Naaŋmɩn.

¹⁷ Ʋ wa nɩ na a pɩɛnfʋ ƴɛr-son hier kʋ a nyɩmɩ nɩ-bʋlsɩ na dãa jãa nɩ a Naaŋmɩn, nɩ a Jufisɩ bala na dãa pɩɛlʼɩ̃ ʋ.

¹⁸ A ala ɩ Jufisɩ mɩɩ nɩ-bʋlsɩ sɩ ɩ, sɩ tɛrɛ na sɔr a Kirisi ɩnɛ na kpɛ a Naaŋmɩn nii-sɔw nɩ a ʋna Sɩ-bõ-ƴen ʋ na kʋ sɩ.

¹⁹ Ala-ɩ̃-sɔ nyaa lɛ cãa ɩ sáanba mɩɩ tẽ-kpee nɩbɛ wa, ɩ̃-cɛ nyɩ be na tɔ a Naaŋmɩn nɩbɛ pʋɔ, ɩ a ʋ yir deme.

²⁰ Ba mɩ mɛ nyɩ na dɔɔl a yir ʋlɔ a Naaŋmɩn na kparʼɩ̃ a *nɩ-tʋnɩsɩ nɩ a ʋ pʋ-tɩɛrʋ̃-bʋʋrbɔ. Ɩ̃ a Jeeju-Kirisi mɩ̃ɛ ɩ̃ ɩ a kubir ʋlɔ ba na de ƴɔ̃w a dacin gbɛr pʋɔ.

²¹ A ʋlɔ ɩ̃ sɔ a yir ʋ jaa fãgã, ʋlɔ ɩ̃ mɩ maala ʋ ʋ dɔɔlɔ taa ɩrɛ a ʋ yir cɛcɛ ʋ na kpɛɛrɛ.

²² A nyɩmɩ mɩ, a mɩnɛ nyɩ na be a Kirisi jie, ʋ mɩ de nyɩ na ƴɔ̃w a ʋna yir pʋɔ, a sɩ na lãa ɩ a jie ʋlɔ a Naaŋmɩn na kpɛɛrɛ nɩ a ʋ Sɩɛ.