Eburo Sɛbɛ 8 - A NAAŊMƖN PƲLƖ̃-TA-PAALAA

A SƖ BAAR-LO-NƖ-KPƐ̃Ɛ NA BE A SAA JUU

¹ Nyɛ a ala na nyɩrɩ̃ ɩ a kpɛ̃ɛ a asɩmɛ sɩ na ƴɛrɛ ɩnɛ: a ɩ na a mɩnɛ sɩ na tɛrɛ a *baar-lo-nɩ-kpɛ̃ɛ a nɔhɔ̃, na jɩnaa a Fãw ʋ jaa Sʋbɔ naa-dakɔw juu, a ʋ dʋrɩ̃ lõboorɩ̃ a saa juu.

² A be, ʋ ma tʋnɔ na a ʋ tʋmɔ a Naaŋmɩn ji-cɛcɛ pʋɔ, a lɛ yelʼã, a gan-yir ʋlɔ pʋɔ na ɩ a gan-yir son, a nɩbɛ nuu na ma ƴɔ̃w wa, ɩ̃-cɛ a Nɩ-kpɛ̃ɛ mɩ̃ɛ na ƴɔ̃w.

³ A *baar-lo-nɩ-bɛrɛ ba jaa, a yele tɩɩrfʋ nɩ a baar lofʋ ɩnɛ ba biin ba. Ala-ɩ̃-sɔ a sɩ baar-lo-nɩ-kpɛ̃ɛ mɩ, mɩ sɛw na na tɛrɛ bom ʋ na tɩɩrɛ kʋrɔ a Naaŋmɩn.

⁴ A ala dãa ɩ a ka a tẽw pʋɔ ʋ be, ʋ kɔ̃ɔ ɩ baar-loro wa, a-na-ɩ baar-lorbo be na ka na tɩɩrɛ a yele tuure nɩ a Mowisi ƴɛr-kpɛn.

⁵ A bala, a ba tʋmɔ ba na tʋnɔ a ji-cɛcɛ pʋɔ ɩ na bõ-tɔɔnaa na ɩ a ala na be a saa juu dãadiile. A wɔ̃ na taa nɩ a mɩnɛ a Naaŋmɩn na dãa man a Mowisi a lɛdaar ʋ na dãa bʋɔrɔ ʋ ƴɔ̃w a gan-yir. Ʋ yelʼã: “Nyɛ! Bɔ̃w maal a yele a jaa, tu nɩ a bom ʋlɔ ɩ̃ na dãa miil fʋ a tãw juu.”

⁶ Ɩ̃-cɛ a ƴɛ̃ƴɛrɩ̃ na, a *Jeeju tɛrɛ na a tʋmɔ na vɩɛlɛ gãw a ba ben, tu nɩ a mɩnɛ a pʋlɩ̃-ta-paalaa na mɩ vɩɛlɛ gãw a korĩ-cɛ ben, a-na-ɩ ʋ dɔɔlʼã a pʋlɩ̃fʋ ƴɛrɩ̃sɩ na vɩɛlɛ gãw a ala na dãa tɔl, ɩ̃ a Jeeju mɩ̃ɛ ɩ̃ ɩ a *lɔlʋɔrɔ.

⁷ A ala ɩ a dãdãw *pʋlɩ̃-taa ma dãa tɛrɛ cɛfʋ jie wa, ba kãa dãa lɩɛr ʋ nɩ bõ-kpee wa.

⁸ Ɩ̃-cɛ a Naaŋmɩn nyɛ na a ʋ nɩbɛ a ba tɛrɛ a cɛfʋ jie, ʋ yel: “Nyɩ́ nyɛ! A daar tara na ɩ̃ nɔɔ cɔɔrɔ a pʋlɩ̃-ta-paalaa a *Ɩsɩrayɛl nɩbɛ nɩ a Juda nɩbɛ jie. Lɛ a Nɩ-kpɛ̃ɛ yel.

⁹ Ʋ kɔ̃ wɔ̃ taa nɩ a ʋlɔ ɩ̃ na dãa pʋlɩ̃ nɩ a ba sãa-kʋnbɔ wa, a daar ʋlɔ ɩ̃ na nyɔw ba a nuu taw yi nɩ a Ejibti-tẽw pʋɔ. A mɩnɛ ba na ma dãa ɩraa dẽdẽ a ʋna pʋlɩ̃-taa pʋɔ wa, ala-ɩ̃-sɔ ɩ̃ mɩ bar ba. Lɛ a Nɩ-kpɛ̃ɛ lɛ yel.”

¹⁰ A Nɩ-kpɛ̃ɛ lɛ yelʼã go: “Nyɩ́ nyɛ a pʋlɩ̃-taa yele ɩ̃ nɔɔ cɔɔrɔ nɩ a Ɩsɩrayɛl nɩbɛ a lɛdaar a ana bibie nɔɔ tɔlɔ baara. Ɩ̃ na ƴɔ̃w na a ɩ̃ ƴɛrɩ̃sɩ a ba tɩɛrɩ̃sɩ pʋɔ, ɩ̃ mɩ sɛb a ɩ̃ ƴɛr-kpɛn ƴɔ̃w a ba sube pʋʋr. Ɩ̃ na ɩ na a ba Naaŋmɩn, ɩ̃ ba na mɩ ɩ na a ɩ̃ nɩbɛ.

¹¹ Nɩrɛ kãw ma lɔɔ ire jaana a ʋ tẽw nɩrɛ, mɩɩ a ʋ yɛbɛ yele nɩ á ú bɔ̃w a Nɩ-kpɛ̃ɛ wa. A-na-ɩ a ba jaa nɔɔ bɔ̃w ma na, wa nyɔw nɩ a bala na pab, wa ta nɩ a nɩ-bɛrɛ.

¹² Ɩ̃ na de na a ba cɛfʋ jiir bar kʋ ba. Maa lɔɔ tɩɛrɛ nɩ a ba maal-faar go wa.”

¹³ A mɩnɛ a Naaŋmɩn na ƴɛrɛ a pʋlɩ̃-ta-paalaa ƴɛrɩ̃, ʋ nyɛ na a dãdãw ben ʋ ɩ bõ-kʋraa. Ɩ̃ a ʋlɔ na kor ɩ a bõ-kʋraa maa yaarɩ̃ bɔr wa.