Eburo Sɛbɛ 6 - A NAAŊMƖN PƲLƖ̃-TA-PAALAA

A CĨCĨ ƖRAAFƲ A NAAŊMƖN SƆR PƲƆ

¹ Ala-ɩ̃-sɔ, nyɩ́ ɩ a sɩ bar a dãdãw yele a *Kirisi ƴɛrɩ̃ pʋɔ ɩ̃ lana nɩ a ala na maala sɩ a sɩ karɛɛ. Saa lɛ bʋɔrɔ sɩ lɛ lɩɛb nyɩ wa nɩ a nyɔwfʋ jie go wa. A-na-ɩ nyɩ gɔrʼã bɔ̃w a mɩnɛ a na sɛw a nyɩ na lɩɛb a yɛ̃ a yel-pɔrsɩ ɩnɛ, nɩ a ƴɔ̃w-nyãa nyɩ na sɛw na tɛrɛ nɩ a Naaŋmɩn.

² Sɩ dãa na man nyɩ a kʋ̃ɔ so-bʋrɔ bʋrɔ ƴɛrɩ̃, nɩ a nur dɔɔlfʋ a nɩrɛ juu ƴɛrɩ̃, nɩ a kũusɩ kũu-pʋɔ-irfʋ ƴɛrɩ̃, nɩ a ƴɛrɩ̃ guorfʋ ʋlɔ nɔɔ waara a daar a jaa ɩnɛ ƴɛrɩ̃.

³ Ɩ̃-cɛ nyɩ́ ɩ a sɩ lana cere, na sɩ pɔw a nɩ-bɛrɛ jaanfʋ. A ala ɩ a Naaŋmɩn sɔw na, a lɛ sɩ na maal.

^4-6 A bala na dãa pɔw a Naaŋmɩn cãa, ɩ̃ lɛ ŋmaa yi, sɔr ma lɛ be be a ba na wa nɩ ba, a ba lɛ lɩɛb a ba yɛ̃ wa. A-na-ɩ ba ꞌlɛmʼã a Naaŋmɩn yel-sono, ɩ̃ mɩ be tɔ a bala pʋɔ na pɔw a Naaŋmɩn Sɩɛ, ma mɩ bɔ̃w ka a Naaŋmɩn ƴɛrɩ̃ ɩ na bõ-son, ɩ̃ mɩ bɔ̃w nɩ a tʋ̃-kpɛn ala nɔɔ tara a daar kãw, ɩ̃ jaar ɩ̃ ŋmaa yi. A bala mɩ̃ɛ ma lɛ lɩɛbʼã kpara a Naaŋmɩn Bie a nɩ-kʋ-daa juu, maala nɩ a nɩbɛ ba jaa kpɛrɛ ʋ.

⁷ A Naaŋmɩn maal-vɩlaa ma be na a ʋna tene na nyu a sa-kʋ̃ɔ na wa a mɩnɛ na sɛw, ɩ̃ bɔ̃w bɩ a ci kʋ a ʋlɔ na kɔ ʋ.

⁸ Ɩ̃-cɛ a Naaŋmɩn pɔ-ƴɔ̃wfʋ ma pɩɛlʼã a ʋna tene na bul a gʋʋr nɩ a mɔ-ure, a-na-ɩ ꞌwaa ɩ bom wa, ɩ̃ a ʋ baarfʋ daar, vũu na dɩ ʋ na.

⁹ Ɩ̃ badɛɛ, a mɩnɛ sɩ na saarɩ̃ ƴɛrɛ a nɔhɔ̃, ɩ̃-cɛ sɩ barʼã tɩɛrʋ̃ a nyɩ ɩnɛ, a-na-ɩ sɩ bɔ̃w ka nyɩ be na a sɔr vɩlaa pʋɔ na ɩ a faafʋ sɔr.

¹⁰ Naaŋmɩn ma ɩ burbur sʋbɔ wa. ꞌWaa hiine a nyɩ tʋmɔ nɩ a nyɩ nʋfʋ nyɩ na nʋ ʋ wa. A-na-ɩ nyɩ sũo na a ʋ bibiir, ɩ̃ lɛ cãa sũono ba.

¹¹ Ɩ̃-cɛ sɩ tɩɩ na bʋɔrɔ a nyɩ jaa bõ-ƴene-ƴene, nyɩ́ tɛrɛ a ʋna ɓĩɓinfʋ wa ta nɩ a baarfʋ daar, a mɩnɛ a nyɩ na sɩrɩ̃ pɔw a ala a jaa nyɩ na tɩɛrɛ a nyɩ gufʋ tɩɛrʋ̃ son pʋɔ.

¹² Saa bʋɔrɔ nyɩ bal wa, ɩ̃-cɛ nyɩ́ tɔɔnɔ a bala na dãa tɛrɛ a ƴɔ̃w-nyãa, tɛrɛ nɩ a su-nyɔwraa, wa pɔw nɩ a ala a Naaŋmɩn na dãa pʋlɩ̃ nɩ ba.

A PƲLƖ̃FƲ NA MA Ɩ BÕ-BAALAA WA

¹³ A mɩnɛ a Naaŋmɩn na pʋlɩ̃ nɩ a Abʋraham, a ʋ yuor ʋ de pʋlɩ̃ nɩ ʋ, a-na-ɩ nɩrɛ ma lɛ be be gãw ʋ, ʋ na de a ʋ yuor pʋlɩ̃ nɩ wa.

¹⁴ Ʋ yelʼã: “Maa ɩ̃ pʋlɩ̃ nɩ fʋ a maal-vɩlaa maalfʋ ɩnɛ, maalʼɩ̃ a fʋ bal parvʋɔr a ba na paal.”

¹⁵ Ala-ɩ̃-sɔ a Abʋraham dãa na tɛrɛ a su-nyɔwraa wa pɔw nɩ a ala a Naaŋmɩn na pʋlɩ̃ nɩ ʋ.

¹⁶ A ala ɩ nɩrɛ bʋɔrɔ na ʋ pʋlɩ̃, nɩrɛ ʋlɔ na gãw ʋ yuor ʋ ma de pʋlɩ̃ nɩ, a mɩnɛ a pʋlɩ̃fʋ na jɛ jom kɔ̃ tɛrɛ cɩɩrɩ̃fʋ wa.

¹⁷ Ala-ɩ̃-sɔ a Naaŋmɩn de na a ʋ mɩ̃ɛ yuor pʋlɩ̃ nɩ, a-na-ɩ ʋ bʋɔrɔ na a ʋ miil cãa pʋɔ a bala nɔɔ pɔwrɔ a ʋ pʋlɩ̃fʋ bom, a ꞌwaa lɔɔ lɩɛbɛ a ʋ ƴɛr-bir fɩ̃ɩ wa.

¹⁸ A nɔhɔ̃ a Naaŋmɩn de na a yele ayi na ma tɛrɛ lɩɛbfʋ wa, a ʋ pʋlɩ̃fʋ nɩ a ʋ yuor ʋ na de pʋlɩ̃ nɩ ɩnɛ. A-na-ɩ Naaŋmɩn ma tʋɔrɔ ŋmaara jiri a ʋ ƴɛrɩ̃ ɩnɛ wa. Ala-ɩ̃-sɔ, a sɩmɩ na jɔ sɔɔlɩ̃ a ʋ pʋɔ, sɩ pɔw na a ꞌlafʋ yaw nyɔw nɩ a sɩ gufʋ tɩɛrʋ̃ son cĩcĩ, a tɩɛrʋ̃ son ʋlɔ sɩ na tɛrɛ gure nɩ a ala a Naaŋmɩn na gbɛɛrɩ̃ a sɩ ɩnɛ.

¹⁹ A ʋna tɩɛrʋ̃ son lũ na a sɩ sɩɛ tɛɛlɛ cĩcĩ, gu nɩ sɩ a sɩ kɔ̃ dama wa. Ʋ cenʼã na va a cẽcen pɔwraa bar,

²⁰ ɩ̃ kpɛ a die ʋlɔ pʋɔ a *Jeeju na dãa de nĩe kpɛ a sɩ ɩnɛ. A-na-ɩ ʋ lɩɛbʼã ɩ a daar a jaa *baar-lo-nɩ-kpɛ̃ɛ, tu nɩ a mɩnɛ a Mɛkisedɛkɩ na dãa maala.