Eburo Sɛbɛ 1 - A NAAŊMƖN PƲLƖ̃-TA-PAALAA

A NAAŊMƖN NA DE A Ʋ BIE ƳƐRʼƖ̃ SƖ

¹ A korĩ-cɛ a Naaŋmɩn dãa na de a ƴɛr-hierbe ƴɛrʼɩ̃ a sɩ sãa-kʋnbɔ a gbɛɛ yayaw nɩ a yel-bʋrɔ bʋrɔ,

² ɩ̃-cɛ a ƴɛ̃ƴɛrɩ̃ na, na ɩ a baarfʋ daar, ʋ de na a ʋ Bie ƴɛrʼɩ̃ sɩ, a ʋlɔ ʋ na dãa de irʼɩ̃ a tẽw ʋ jaa, ɩ̃ mɩ vɛl ʋ ir, ʋ ɩ a ʋ gã-diere.

³ A Bie ʋlɔ, a Naaŋmɩn yo-yifʋ cãa kpɛ̃ɛ ʋ miilʼɩ̃ a nyɩr, ɩ̃ ʋ mɩ wɔ̃ na taa nɩ a Naaŋmɩn a lɛ a ꞌle. A ʋ ƴɛrɩ̃ na tɛrɛ a kpɛ̃w ʋ tɩɛ nɩ a yele a jaa. A mɩnɛ ʋ na pɛɛr a nɩbɛ maal-faar bar baar, ʋ do na jɛ a ʋlɔ na ɩ a Fãw ʋ jaa Sʋbɔ dʋrɩ̃ lõboorɩ̃ a saa juu.

A MƖNƐ A BIE NA Ɩ A KPƐ̃Ɛ GÃW A SƖ-TƲNƖSƖ

⁴ A mɩnɛ a Bie na ɩ a kpɛ̃ɛ gãw a sɩ-tʋnɩsɩ, ala-ɩ̃-sɔ ʋ pɔw na a yuor na gãw a ba ben.

⁵ Sɩ-tʋ̃-buor a Naaŋmɩn wa dãa yel á ʋlɔ ɩ a ʋ bie; á wa nyɔw nɩ a dɩnaa á ʋ ɩ na a ʋ Sãa? Mɩɩ yel, á ʋ na ɩ na a ʋ Sãa, ɩ̃ ʋ ɩ a ʋ bie?

⁶ Ɩ̃ a lɛdaar a Naaŋmɩn na dãa bʋɔrɔ ʋ tʋ̃ a ʋ Bie na ɩ a dãdãw ʋ wa a ka a tẽw pʋɔ, ʋ yelʼã áa sɛw na a Naaŋmɩn sɩ-tʋnɩsɩ ba jaa na puoro ʋ.

⁷ Ɩ̃ a ala a Naaŋmɩn Sɛbɛ na yel a sɩ-tʋnɩsɩ ɩnɛ ɩ na: “A Naaŋmɩn maalʼã a ʋ sɩ-tʋnɩsɩ a ba wɔ̃ sɛsɛb kaarɩ̃, ɩ̃ a bala na ɩ a ʋ tʋ̃tʋnbɔ, ʋ maal ba na a ba wɔ̃ vũu-ꞌlere kaarɩ̃.”

⁸ Ɩ̃-cɛ a Bie ɩnɛ, a Naaŋmɩn Sɛbɛ yelʼã: “Naaŋmɩn, a fʋ naa-dakɔw jɛ na be daadaa kor, ɩ̃ a fʋ torfʋ wɔ̃ na taa nɩ a naa-dagʋraa a fʋ tɔwrɔ nɩ a tẽw.

⁹ Fʋ nʋ na a ala na tor, ɩ̃ ꞌlaar a burbur. Ala-ɩ̃-sɔ a Naaŋmɩn, na ɩ a fʋ Naaŋmɩn, de fʋ na gãw a fʋ tɔ deme, ɩ̃ biin fʋ a fʋ ɩ a jamana, bolĩ fʋ a kãa a juu pʋɔ a ɩ fʋ a nʋ̃ɔ.”

¹⁰ A Naaŋmɩn lɛ yelʼã: “Fʋ̃ʋ Nɩ-kpɛ̃ɛ, fʋ irʼã a tẽw a korĩ-cɛ jaa, ɩ̃ a fʋ nur ɩ̃ maal a saꞌlon.

¹¹ A saꞌlon nɩ a tene na wɛlʼã, ɩ̃-cɛ a fʋ̃ʋ na cãa na be. Ba na korʼã cẽcene kaarɩ̃

¹² ɩ̃ fʋ na pilĩ ba na wɔ̃ taa nɩ kparʋ. Fʋ na lɩɛr ba na wɔ̃ taa nɩ cẽcen ba na lɩɛr, ɩ̃-cɛ a fʋ̃ʋ, fʋ na cãa na a lɛ, kɔ̃ tɛrɛ kũu daar wa.”

¹³ Sɩ-tʋ̃-buor a Naaŋmɩn wa dãa yel á ʋ wa jɛ a ʋ dʋrɩ̃ lõboorɩ̃, ɩ̃ ʋ maal a ʋ sama-deme a ba lɩɛb ɩ a ʋ gbɛɛ dɔɔlfʋ jie?

¹⁴ Ɩ̃-cɛ a sɩ-tʋnɩsɩ ba jaa ɩ na a Naaŋmɩn tʋ̃tʋnbɔ ʋ na tʋ̃ a ba na sũono a bala na sɛw ba pɔw a faafʋ.