Nɩ-tʋnɩsɩ tʋmɔ Sɛbɛ 7 - A NAAŊMƖN PƲLƖ̃-TA-PAALAA

A ƳƐRƖ̃ A ƖTƖƐN NA ƳƐRƐ

¹ A *baar-lo-nɩ-kpɛ̃ɛ soorʼã a Ɩtɩɛn: “Sɩrɛ ʋ mɩɩ?”

² A Ɩtɩɛn yel ba: “Ɩ̃ yɛɛr nɩ a ɩ̃ sãa nʋmɔ, nyɩ́ cɛlɛ! A Naaŋmɩn ʋlɔ na yi a yuor nyɩrʼã a sɩ sãa-kʋmɔ Abʋraham a lɛ ʋ na cãa be a Mesopotamɩ ɩ̃ ma cen a Saarã sɛr wa,

³ ɩ̃ yel ʋ: ‘Yi a fʋ tẽw pʋɔ nɩ a fʋ nɩbɛ jie ɩ̃ cen a tẽw ʋlɔ pʋɔ ɩ̃ na miile fʋ.’

⁴ Ala-ɩ̃-sɔ a Abʋraham yi na a Kalide wɩɛr ɩ̃ cen na jɛ a Saarã. Ɩ̃ a lɛ a ʋ sãa na kpi baar, a Naaŋmɩn lɛ ɩ na ʋ yi a be ɩ̃ wa a tẽw na pʋɔ nyɩ na be a ƴɛ̃ƴɛrɩ̃ na.

⁵ Ɩ a Naaŋmɩn ma kʋ ʋ wɩɛr kãw a be wa. ꞌWaa mɩ kʋ ʋ jie fɩ̃ɩ a gbɛr nɛfʋ jie kaarɩ̃ wa, ɩ̃-cɛ ʋ pʋlɩ̃ nɩ ʋ na a ʋ na kʋ ʋ na a tẽw, a ʋlɔ nɩ a ʋ bal par jaa. Ɩ̃ a ʋna daarʼãa, ꞌwaa dãa tɛrɛ bie sɛr wa.

⁶ Nyɩ́ nyɛ a mɩnɛ a Naaŋmɩn na yel a Abʋraham, áa ʋ bal par nɔɔ ɩ na sáanba tẽ-kpee pʋɔ, á ba na lɩɛb ba na a ba ɩ gbãgbaar, a ba kpow ba yomo kɔɔr anaan pʋɔ.

⁷ A Naaŋmɩn lɛ yelʼã: ‘Ɩ nɔɔ guorʼã a ʋna tẽw naa ba na ɩrɛɛ a gbãgbaar ƴɛrɩ̃, ɩ̃ ba na yi na a be ɩ̃ wa a wɩɛrʼã pʋɔ na puoro ma.’

⁸ Ɩ̃ a Naaŋmɩn kʋ na a Abʋraham a yʋɔr ŋmaafʋ a ɩ a *pʋlɩ̃-taa jɩbaa. Ala-ɩ̃-sɔ a lɛ a Abʋraham na dɔw a Ɩjakɩ, ʋ ŋmaa ʋ na a yʋɔr a bibie anuu nɩ ata pʋɔ. A lɛ a Ɩjakɩ mɩ maal a Jakɔb, ɩ̃ a Jakɔb mɩ maal a lɛ a ʋ bibiir pie-nʼayi jie na ɩ a sɩ sãa-kʋnbɔ.

⁹ “A sɩ sãa-kʋnbɔ bala tɛrɛ na nyuur a ba yɛbɛ Jojɛfʋ jie, ɩ̃ nyɔw ʋ da, a ba cen nɩ ʋ a Ejibti-tẽw ʋ ɩ a gbãgbaa a be, ɩ̃-cɛ a Naaŋmɩn be nɩ ʋ na,

¹⁰ ɩ̃ faa ʋ a ʋ won a jaa pʋɔ. Ɩ̃ a lɛ ʋ na ɩraa a Ejibti-tẽw jamana *Faarɔ̃ nii-sɔw, a Naaŋmɩn kʋ ʋ na a yɛ̃ ʋ maalʼɩ̃ a tʋmɔ a nʋmɔ a jamana. Ɩ̃ a Faarɔ̃ ƴɔ̃w na a Jojɛfʋ ʋ ꞌwuoro a Ejibti-tẽw ʋ jaa, nɩ a ʋlɔ jamana yir yele a jaa.

¹¹ A kɔ̃ kpɛ̃ɛ lo na a Ejibti-tẽw ʋ jaa, nɩ a Kanãa-tẽw, a wono ba yaw, a sɩ sãa nʋmɔ ma nyɛrɛ a dɩb dɩrɛ wa.

¹² A lɛ a Jakɔb na wõ á ci be na a Ejibti-tẽw, ʋ de na nĩe tʋ̃ a sɩ sãa nʋmɔ a be,

¹³ ɩ̃ a gbɛɛ ayi pʋɔ ba na cen, a Jojɛfʋ maalʼã a ba bɔ̃w ʋ ʋ ɩ a ba yɛbɛ, ɩ̃ a lɛ, a Faarɔ̃ mɩ bɔ̃w na a Jojɛfʋ yifʋ jie.

¹⁴ A ala na yi tɔ, a Jojɛfʋ tʋ̃ na bʋɔl a ʋ sãa Jakɔb nɩ a ʋ yir deme ba jaa na ta nɩbɛ lɩjaayi ŋmaaʼnuu,

¹⁵ a ba cen a Ejibti. Be a Jakɔb kpi, nɩ a sɩ sãa-kʋnbɔ mɩ,

¹⁶ a ba de ba cenʼɩ̃ a Sɩsɛm na ũu a yaa ʋlɔ pʋɔ a Abʋraham na dãa da a Emoor bi-dabsɩ sɛ̃ a be a Sɩsɛm.

¹⁷ “A lɛ a Naaŋmɩn pʋlɩ̃fʋ ʋlɔ ʋ na dãa pʋlɩ̃ nɩ a Abʋraham maalfʋ daar na tara, a sɩ nɩbɛ lɛ nyɩrɩ̃ na waa dɔɔl a Ejibti-tẽw pʋɔ,

¹⁸ lɛɛ wa ta nɩ a daar ʋlɔ a jaman-paalaa na de a Ejibti-tẽw ꞌwuoro, ɩ̃ ꞌwaa bɔ̃w a Jojɛfʋ ƴɛrɩ̃ wa.

¹⁹ A jamana ʋlɔ bɛlɩ̃ na a sɩ sãa-kʋnbɔ ɩ̃ kpowro ba fɛrɛ nɩ ba a ba lɔbɔ a ba bi-pɩɩlsɩ bara a ba kpiire.

²⁰ A ʋna daarʼãa pʋɔ ba dɔw a Mowisi ʋ ɩ bi-vɩlaa a Naaŋmɩn nii-sɔw, a ba guol ʋ a ʋ sãa yir cur ata.

²¹ Ɩ̃ a lɛ ba na lɔb ʋ bar, a Faarɔ̃ bi-pɔw de ʋ na guol, ʋ lɩɛb ɩ a ʋ bie.

²² Ɩ̃ ba jaanʼã a Mowisi ʋ bɔ̃w a Ejibti-tẽw yɛ̃ a jaa, na ʋ ɩ gãdaa a ʋ ƴɛrɩ̃sɩ pʋɔ nɩ a ʋ tʋmɔ pʋɔ.

²³ “A lɛ ʋ na pɔw a yomo lɩjaayi, tɩɛrʋ̃ wa ʋ na ʋ bʋɔrɔ ʋ cen na nyɛ a *Ɩsɩrayɛl nɩbɛ na ɩ a ʋ yɛɛr.

²⁴ A mɩnɛ ʋ na ta a be, ʋ nyɛ na a ʋ yɛbɛ ƴen sʋbɔ a Ejibti nɩrɛ na hʋɔlɔ, ɩ̃ cen na sũo ʋ, na ʋ kú a Ejibti nɩrɛ ʋlɔ yaw a san.

²⁵ A Mowisi tɩɛrʼã beeka a ʋ yɛɛr na bɔ̃w na bɔ̃w ka a ʋlɔ a Naaŋmɩn na de faa nɩ ba. Ɩ̃-cɛ baa bɔ̃w a lɛ wa.

²⁶ A bio vɩɛ na a Mowisi tuorʼɩ̃ a ʋ yɛɛr ayi na jɛbɛ taa, ɩ̃ bʋɔrɔ ʋ ɓaalɩ̃ ba, ɩ̃ yel ba: ‘Nyɩ ɩ na yɛɛr, ɩ̃ bõ ɩ̃ ɩ a nyɩ hʋɔlɔ taa?’

²⁷ Ɩ̃-cɛ a ʋlɔ na hʋɔlɔ a ʋ tɔ sʋbɔ, daa na a Mowisi bar ɩ̃ yel ʋ: ‘Ala ɩ̃ ƴɔ̃w fʋ a fʋ ɩ a sɩ nɩ-kpɛ̃ɛ nɩ a sɩ ƴɛr-guoro?

²⁸ Fʋ bʋɔrɔ na fʋ mɩ kú ma a mɩnɛ fʋ na kú a Ejibti nɩrɛ a jamɩ mɩɩ?

²⁹ A lɛ a Mowisi na wõ a ʋna ƴɛrɩ̃, ʋ jɔ na cen a Madɩyã-tẽw na jɛ a be dɔw dabil ayi.

³⁰ “Ɩ̃ a lɛ a yomo lɩjaayi na tɔl baar, a Naaŋmɩn sɩ-tʋnaa nyɩrʼã a Mowisi a tɩ-bile pʋɔ na ꞌlere a vũu a be a wɛkar pʋɔ a Sɩnayɩ-tãw loor.

³¹ A lɛ ʋ na nyɛ a ala, nʋɔr ko ʋ na ɩ̃ a mɩnɛ ʋ na ta pɩɛl ɩ̃ ꞌwuoro, ʋ wõ na a Nɩ-kpɛ̃ɛ kɔkɩr na yel ʋ:

³² ‘Ɩ̃ ɩ na a fʋ sãa-kʋnbɔ Abʋraham nɩ a Ɩjakɩ nɩ a Jakɔb Naaŋmɩn,’ a dãbɩ̃ɛ nyɔw a Mowisi ʋ mine ɩ̃ ma ꞌlara ꞌwuoro wa.

³³ A Nɩ-kpɛ̃ɛ lɛ yel ʋ: ‘Yaa a fʋ nafaba bar a-na-ɩ a jie ʋlɔ fʋ na ɩraa ɩ na ji-ciiraa.

³⁴ Ɩ̃ nyɛ na a mɩnɛ ba na kpowro a ɩ̃ nɩbɛ a Ejibti-tẽw pʋɔ, ɩ̃ mɩ wõ a mɩnɛ ba na pɛnɛ, ɩ̃ na ɩ̃ suu a ba faafʋ ɩnɛ. Ƴɛ̃ƴɛrɩ̃ na, wa ɩ̃ tʋ̃ fʋ a Ejibti.’

³⁵ “A ʋna Mowisi a Ɩsɩrayɛl nɩbɛ na dãa jaar ɩ̃ yel ʋ á ala ɩ̃ ƴɔ̃w ʋ ʋ ɩ a ba nɩ-kpɛ̃ɛ nɩ a ba ƴɛr-guoro, a ʋlɔ a Naaŋmɩn tʋ̃ ʋ ɩ a nɩ-kpɛ̃ɛ nɩ a fafaara nɩ a sũofʋ ʋlɔ ʋ na pɔw a sɩ-tʋnaa jie na dãa nyɩr ʋ a tɩ-bile pʋɔ.

³⁶ A ʋna Mowisi ɩ̃ tɔw a Ɩsɩrayɛl nɩbɛ yi nɩ a Ejibti-tẽw, tʋ̃ nɩ a nɔ-kofʋ tʋmɔ na miile a Naaŋmɩn kpɛ̃w a ʋna tẽw pʋɔ, nɩ a Man Jɩ̃ɛw pʋɔ, nɩ a wɛkar pʋɔ a yomo lɩjaayi.

³⁷ A ʋna Mowisi naa yelʼã a Ɩsɩrayɛl nɩbɛ: ‘A Naaŋmɩn nɔɔ kʋ nyɩ na a ƴɛr-hiere a ɩ̃ kaarɩ̃ na ɩrɛɛ a nyɩ mɩ̃ɛ nɩrɛ ƴen sʋbɔ.’

³⁸ A ʋna Mowisi mɩ dãa na be nɩ a Ɩsɩrayɛl nɩbɛ na duo taa a wɛkar pʋɔ. Ʋ be nɩ na a sɩ sãa-kʋnbɔ nɩ a Naaŋmɩn sɩ-tʋnaa na dãa ƴɛrɛ nɩ ʋ a Sɩnayɩ-tãw juu, ɩ̃ ʋ pɔw a Naaŋmɩn baafʋ ƴɛrɩ̃sɩ na ʋ kʋ sɩ.

³⁹ “Ɩ̃-cɛ a sɩ sãa-kʋnbɔ ma sɔw cɛl ʋ wa. Ba jaar ʋ na bar ɩ̃ bʋɔrɔ ba lɛ lɩɛb cen a Ejibti.

⁴⁰ Ba yelʼã a *Aarɔ̃: ‘Maal bʋtɩbɛ kʋ sɩ a ba ɩ a sɩ naaŋmɩnsɩ naa ba de sɩ nĩe, a-na-ɩ saa bɔ̃w a ala na ta a ʋna Mowisi na yi nɩ sɩ a Ejibti wa.’

⁴¹ Ba mɛ na bʋtɩɩb a ʋna daarʼãa ʋ wɔ̃ taa nɩ nale ɩ̃ kú a yele ƴɔ̃w ʋ, ɩ̃ na ba ɓolo cɩlɛ nɩ a ala ba na maalʼɩ̃ a ba nur ɩnɛ.

⁴² Ɩ̃-cɛ a Naaŋmɩn ŋmelĩ na puo-sɔw ƴɔ̃w ba ɩ̃ bar ba a ba puoro a saꞌlon ŋmarbie a mɩnɛ a na yel a ƴɛr-hierbe sɛbsɩ pʋɔ: ‘Ɩsɩrayɛl nɩbɛ! A maa Naaŋmɩn nyɩ dãa kú a dʋn ƴɔ̃w a wɛkar pʋɔ a yomo lɩjaayi mɩɩ? Aa ɩ maa ʋ wa.

⁴³ Ɩ̃-cɛ a nyɩ naaŋmɩn Mɔlɔkɩ gan yir nyɩ dãa tɛrɛ yʋɔrɔ nɩ, nɩ a nyɩ naaŋmɩn Arafã bʋtɩɩb na wɔ̃ a ŋmarbir kaarɩ̃. A ana bʋtɩbɛ naa, nyɩmɩ dãa maalʼɩ̃ a nyɩ nur na nyɩ puoro. Ala-ɩ̃-sɔ ɩ̃ na diw nyɩ na bar, a nyɩ cen a *Babɩlɔ̃-tẽw puo-sɔw.’

⁴⁴ “A be a wɛkar pʋɔ, a sɩ sãa-kʋnbɔ dãa na tɛrɛ a gan yir ba na maal bine a pʋlɩ̃-taa ƴɛr-kpɛn a Mowisi na sɛb ƴɔ̃w a kʋsɩ-pɛrɩsɩ jur. Ba mɛ na a yir ʋlɔ a mɩnɛ a Naaŋmɩn na yel a Mowisi, a-na-ɩ ʋ yel ʋ na á ʋ maal a wɔ̃ a mɩnɛ ʋ na dãa miil ʋ.

⁴⁵ Ba de na a ʋna gan yir naa kʋ a ba bibiir na mɩ ɩ a sɩ sãa-kʋnbɔ, a ba de cere nɩ a daar ʋlɔ a Jojie na tɛrɛ ba kpɛ fa nɩ a nɩ-bʋlsɩ ten, a-na-ɩ a Naaŋmɩn ɩ̃ de ba nĩe diw a nɩ-bʋlsɩ bar. A be a gan yir ʋlɔ be wa ta nɩ a jamana Davɩtɩ daar.

⁴⁶ A ʋ ben nʋmɔ na a Naaŋmɩn, ʋ sʋɔr sɔr a ʋ jie á ʋ mɛ yir-kpɛɛraa kʋ a ʋna Naaŋmɩn na mɩ ɩ a Jakɔb Naaŋmɩn.

⁴⁷ Ɩ̃ a Salʋmɔ̃ ɩ̃ ɛ̃ɛ mɛ a yir kʋ ʋ.

⁴⁸ Ɩ̃-cɛ a saꞌlon iin Naaŋmɩn ma kpɛɛrɛ a yie ala pʋɔ a nɩbɛ na mɛ nɩ a ba nur wa, a mɩnɛ a ƴɛr-hiere na yel áa Naaŋmɩn yelʼã:

⁴⁹ ‘A saꞌlon ɩ na a ɩ̃ naa-dakɔw, ɩ̃ a tẽw ɩ a ɩ̃ gbɛɛ dɔɔlfʋ jie. Yir wɔ̃ mɩnɛ nyɩ na mɛ kʋ ma? Mɩɩ ji-wɔ̃ mɩnɛ pʋɔ ɩ̃ na jɛ pɩɛn?

⁵⁰ Aa ɩ a ɩ̃ nur ɩ̃ maal a ala a jaa wa?’

⁵¹ “A nyɩna su-kpɛn deme, na ma jaar a Naaŋmɩn bar ɩ̃ maa sɔwrɔ cɛlɛ a ʋ ƴɛrɩ̃ wa, a daar a jaa nyɩ ma vara na a Naaŋmɩn Sɩɛ tʋmɔ! A mɩnɛ a nyɩ sãa-kʋnbɔ na dãa maala, a lɛ nyɩ mɩ maala.

⁵² Yɛr-hier-buor a nyɩ sãa-kʋnbɔ ma dãa hʋɔl wa? Ba kú na a bala na dãa de nĩe ƴɛr a Torfʋ Sʋbɔ wafʋ ƴɛrɩ̃, ɩ̃ a ƴɛ̃ƴɛrɩ̃ na, nyɩmɩ de ʋ a juu na nyɩ kú ʋ.

⁵³ A nyɩmɩ na pɔw a *Naaŋmɩn ƴɛr-kpɛn a sɩ-tʋnɩsɩ na kʋ nyɩ, nyaa jɔrɔ a ana ƴɛr-kpɛn wa!”

A ƖTƖƐN KƲFƲ

⁵⁴ A mɩnɛ a *ƴɛr-guor-nɩ-bɛrɛ na wõ a ʋna ƴɛrɩ̃ naa, suur nyɔw ba na po nɩ a ba nyɩr nyɩmɛ ƴɔ̃w a Ɩtɩɛn.

⁵⁵ Ɩ̃-cɛ a Ɩtɩɛn sɛw nɩ na a Naaŋmɩn Sɩɛ ɩ̃ ꞌwuor a saꞌlon nyɛ a Naaŋmɩn cãa kpɛ̃ɛ nɩ a *Jeeju na ɩraa a Naaŋmɩn dʋrɩ̃ loor,

⁵⁶ ɩ̃ yel: “Nyɩ́ cɛlɛ, ɩ̃ nyɛ na a saꞌlon ʋ yuo nɩ a *Nɩbɛ Bie na ɩraa a Naaŋmɩn dʋrɩ̃ loor.”

⁵⁷ A mɩnɛ ba na wõ a ƴɛrɩ̃ ʋlɔ, ba wuurʼã nɩ kpɛ̃w ɩ̃ ɓʋr a ba tobo ɩ̃ sɩlɩ̃ ʋ ba jaa

⁵⁸ nyɔw taw yi nɩ a tẽw cɛ̃cɛ̃w, lɔbɔ nɩ ʋ a kubie bʋɔrɔ ba kú ʋ. A ƴɛr-manba binʼã a ba cẽcene a polbile ʋlɔ ba na bʋɔlɔ a Sol gbɛɛ pulẽe.

⁵⁹ Ba lɔbɔ na a Ɩtɩɛn ɩ̃ ʋ sʋɔrɔ a Naaŋmɩn yele: “Nɩ-kpɛ̃ɛ Jeeju, de a ɩ̃ sɩɛ!”

⁶⁰ Ɩ̃ ʋ lo na gburĩ a dume ɩ̃ wuurʼɩ̃ kpɛ̃w yel: “Nɩ-kpɛ̃ɛ, taa de a fãa na ba na maala ma dɔɔl a ba juu wa!” A lɛ ʋ na ƴɛr a ʋna ƴɛr-bir baar, ʋ ŋmaa na a vʋʋrʋ̃. Ɩ̃ a Ɩtɩɛn kʋfʋ nʋmɔ na a Sol.