Nɩ-tʋnɩsɩ tʋmɔ Sɛbɛ 5 - A NAAŊMƖN PƲLƖ̃-TA-PAALAA

A ANANƖYA NƖ A SAFƖRA ƳƐRƖ̃

¹ Daba dãa na be be na dɩ Ananɩya, ɩ̃ a ʋ pɔw dɩ Safɩra. Ba de na a ba puo da

² ɩ̃ gor taa a bala ayi ɩ̃ ŋmaa a libie sɔɔlɩ̃. A Ananɩya de na a libi-ŋmãa na cɛ cenʼɩ̃ na bin a *nɩ-tʋnɩsɩ nii-sɔw.

³ A Pɩɛr yel ʋ: “Ananɩya, bõ ɩ a Satã kpɛ sɛw a fʋ suur a fʋ bɛlɩ̃ a Naaŋmɩn Sɩɛ ɩ̃ sɔɔlɩ̃ a puo libi-ŋmãa?

⁴ A puo ɩ̃ dãa cãa be be, ʋ kɔ̃ɔ ɩ a fʋ ben wa mɩɩ? Ɩ̃ a lɛ fʋ na da ʋ baar, a libie ma ɩ a fʋ ben wa mɩɩ? Bõ ɩ̃ ƴɔ̃w a maal-bir ʋlɔ tɩɛrʋ̃ a fʋ suur pʋɔ? Aa ɩ nɩrɛ fʋ bɛlɩ̃ wa. Naaŋmɩn fʋ bɛlɩ̃.”

⁵ A mɩnɛ a Ananɩya na wõ a ƴɛrɩ̃ ʋlɔ ʋ lo na kpi, a dãbɩ̃ɛ nyɔw a nɩbɛ bala ba jaa na wonaa.

⁶ A polbil irʼã a ba sɔ̃w ɓɔw a kũu lũ tuo yi nɩ na ũu.

⁷ A ɩ na fɩ̃ɩ a ʋ pɔw wɩ, ɩ̃ ꞌwaa bɔ̃w a ala na dãa ta wa.

⁸ A Pɩɛr soor ʋ: “Man ma a amɩnɛ nyɩ na da a nyɩ puo. A nɔhɔ̃ nyɩ da mɩɩ?” A pɔw sɔw áa lɛ ba da.

⁹ A Pɩɛr yel ʋ: “Bõ ɩ̃ ɩ a nyɩ man taa ɩ̃ bɩɩrɛ a Nɩ-kpɛ̃ɛ Sɩɛ? Nyɛ, a bala na ũu a fʋ sɩrɛ tara na be a dɔ̃dɔr nʋɔr. Ba na mɩ ɓɔw fʋ na tuo yi nɩ.”

¹⁰ A jie naan ʋ lo na kpi a Pɩɛr nii-sɔw, a polbil bala kpɛ nyɛ a kũu ɩ̃ ɓɔw yi nɩ na ũu pɩɛlʼɩ̃ a ʋ sɩrɛ,

¹¹ a dãbɩ̃ɛ nyɩrɩ̃ nyɔw a *duo-puorbo nɩ a bala ba jaa na wõ a ala.

A NƆ-KOFƲ TƲMƆ ƳƐRƖ̃

¹² A *nɩ-tʋnɩsɩ maala na a nɔ-kofʋ tʋ̃-yaw na miile a Naaŋmɩn kpɛ̃w a nɩbɛ sɔ̃w. A popuorbo ba jaa ma tiw na taa a Salʋmɔ̃ jɛ̃bɛrɩ̃ pʋɔ,

¹³ ɩ̃ a mɩnɛ a nɩbɛ ba jaa na saarɩ̃ kpiire ba, a nɩ-kpeesɩ maa ꞌlara tara lãa jɩnɛɛ nɩ ba wa.

¹⁴ Ɩ̃-cɛ a nɩ-yaw, a dabsɩ nɩ a pɔɔbɔ, ma sɔw na a Nɩ-kpɛ̃ɛ ƴɛrɩ̃ ɩ̃ wɩɛrɛ dɔɔlɔ a popuorbo juu.

¹⁵ A na wɔ̃ a lɛ, a nɩbɛ ma de na a ba wʋlɩ̃sɩ deme ƴɔ̃w a da-gbarɩ̃sɩ juu nɩ a cẽcene pʋɔ cenʼɩ̃ na bin a sɔɛ nɔɛ, a mɩnɛ a Pɩɛr ɩ̃ wa tɔlɔ a ʋ dãadiile ʋ pɔw a ŋmɛɛ.

¹⁶ A nɩ-yaw mɩ yi na a Jerujalɛm tẽ-bil pʋɔ ɩ̃ jɔ ta nɩ a baalsɩ nɩ a bala a kɔ̃tɔnsɩ na tɛrɛ, ɩ̃ a ba jaa pɔw na a kpɛ̃w.

A JUFISƖ NI-DIERBE NA KPOWRO A NƖ-TƲNƖSƖ

¹⁷ A *baar-lo-nɩ-kpɛ̃ɛ nɩ a ʋ tɔ deme ba jaa na ɩ a *Saduse nɩbɛ, nyuur kpɛ na sɛw ba,

¹⁸ a ba ir nyɔɔr a *nɩ-tʋnɩsɩ ƴɔ̃w a kasu pʋɔ.

¹⁹ Ɩ̃ a Nɩ-kpɛ̃ɛ sɩ-tʋnaa wɩ na a tɩsɔw na yuo a kasu pana ɩ̃ taw ba yi nɩ ɩ̃ yel ba:

²⁰ “Nyɩ́ cen a Naaŋmɩn puor-yir kpɛ̃ɛ na ɩraa ƴɛrɛ a baa-paalaa na ƴɛrɩ̃ kʋrɔ a nɩbɛ ba jaa.”

²¹ A lɛ a bio na vɩɛ, a nɩ-tʋnɩsɩ cenʼã a Naaŋmɩn puor-yir kpɛ̃ɛ na jaana a nɩbɛ, a mɩnɛ a sɩ-tʋnaa na yel ba. A baar-lo-nɩ-kpɛ̃ɛ nɩ a bala na lãa be nɩ ʋ bʋɔlʼã a Jufisɩ ni-dierbe ba jaa a ba duo taa a ƴɛrɩ̃ guorfʋ ɩnɛ. Ba tʋ̃ na á ba ir a nɩ-tʋnɩsɩ a kasu pʋɔ wa nɩ.

²² Ɩ̃-cɛ a mɩnɛ a parsãdiele bala na ta a kasu yir, baa nyɛ ba wa, ɩ̃ lɩɛb wa na yel:

²³ “Sɩ nyɛ na a kasu pan ʋ kpal vɩlaa, ɩ̃ a dɔ̃dɔr-gurbe mɩ ɩraa a be a dɔ̃dɔrɩ̃ gu, ɩ̃-cɛ a mɩnɛ ba na yuo a pan, saa nyɛ nɩrɛ be a diem wa.”

²⁴ A mɩnɛ a Naaŋmɩn yir-gurbe nɩ-kpɛ̃ɛ nɩ a *baar-lo-nɩ-bɛrɛ na wõ a ala ba na yel, a ba tɩɛrɩ̃sɩ dama ba na a nɩ-tʋnɩsɩ ɩnɛ, a ba sooro taa a mɩnɛ a ƴɛrɩ̃ ʋlɔ par na be.

²⁵ Ɩ̃ a nɩrɛ wɩ na na yel ba: “Nyɩ́ nyɛ, a nɩbɛ bala nyɩ na dãa pɔw a kasu pʋɔ, ba ɩraa na be a Naaŋmɩn puor-yir kpɛ̃ɛ pʋɔ jaana a nɩbɛ.”

²⁶ Ala-ɩ̃-sɔ a Naaŋmɩn yir-gurbe nɩ-kpɛ̃ɛ taw na a parsãdiele cenʼɩ̃ na taw nɩ a nɩ-tʋnɩsɩ jom wɩ nɩ. Aa ɩ fãgã ba taw nɩ ba wa, a-na-ɩ ba jɔrɔ na a dãbɩ̃ɛ a mɩnɛ a nɩbɛ nɔɔ lɔbʼɩ̃ ba a kubie.

²⁷ A lɛ ba na ta nɩ ba a ƴɛrɩ̃ guorfʋ jie baar, ba ƴɔ̃w ba na a *ƴɛr-guor-nɩ-bɛrɛ nii-sɔw, a baar-lo-nɩ-kpɛ̃ɛ yel ba:

²⁸ “Sɩ dãa na kpãkpan nyɩ a nyɩ taa lɔɔ ƴɛrɛ bʋɔlɔ nɩ a ʋna daba yuor go wa. Ɩ̃ nyɩ́ nyɛ, nyɩ sɛw na a Jerujalɛm-tẽw nɩ a nyɩ jaanfʋ, ɩ̃ nyɩ bʋɔrɔ na nyɩ de a ʋ kũu ƴɛrɩ̃ dɔɔl a sɩ juu.”

²⁹ A Pɩɛr nɩ a nɩ-tʋnɩsɩ yel ba: “A sɛw na a sɩ na jɔrɔ a Naaŋmɩn gãw a nɩbɛ.

³⁰ A sɩ sãa-kʋnbɔ Naaŋmɩn maalʼã a *Jeeju ʋlɔ nyɩ na dãa kpa yaal a nɩ-kʋ-daa juu ʋ ir a kũu pʋɔ.

³¹ A Naaŋmɩn de ʋ na biin a ʋ dʋrɩ̃ lõboorɩ̃ a saa juu ʋ ɩ a Jamana nɩ a Fafaara, a mɩnɛ a *Ɩsɩrayɛl nɩbɛ na tʋɔrɔ lɩɛbɛ a ba yɛ̃, a Naaŋmɩn diere a ba maal-faar bara kʋrɔ ba.

³² A sɩmɩ, sɩ nyɛ na a ana yele ɩ̃ mana nyɩ, lãw nɩ a Sɩɛ ʋlɔ a Naaŋmɩn na kʋ a bala na jɔrɔ ʋ.”

³³ Ɩ̃ a mɩnɛ a Jufisɩ ni-dierbe na wõ a ʋna ƴɛrɩ̃, suur nyɩrɩ̃ na nyɔw ba a ba bʋɔrɔ ba kú ba.

³⁴ Ɩ̃-cɛ a *ƴɛr-guor-nɩ-kpɛ̃ɛ ƴen sʋbɔ na ɩ a Farɩsɩ nɩrɛ ba na bʋɔlɔ a Gamalɩɛl, na ɩ a *Naaŋmɩn ƴɛr-kpɛn-jaana a nɩbɛ ba jaa na jɔrɔ irʼã ɩraa a ba sɔ̃w ɩ̃ yel a ba ɩ a nɩbɛ na a ba yi sɛr.

³⁵ A ala ɩ̃ baar, ʋ yel ba na: “Ɩsɩrayɛl nɩbɛ, nyɩ́ tɛrɛ nyɩ mɩ̃ɛ a ala nyɩ na ƴɔ̃w nyãa nyɩ maal a nɩbɛ na.

³⁶ Nyɩ bɔ̃w na a daar ʋlɔ a Tedasɩ na dãa ir ƴɛr a dab-ƴɛrɩ̃ yel a nɩ-kpɛ̃ɛ ʋ ɩ, a nɩbɛ kɔɔr anaan dãa tuure ʋ. Ɩ̃ a lɛ ba na kú ʋ, a bala na tuure ʋ jɔ na ba jaa yɛ̃yɛlɩ̃, a ʋ ben baar.

³⁷ A ala na yi tɔ, a Judasɩ na ɩ a Galile nɩrɛ mɩ irʼã ir a nɩbɛ a sɔrfʋ yuon a ba tuure ʋ. Ɩ̃ ba mɩ kú ʋ na, a bala ba jaa na dãa sɔw a ʋ ƴɛrɩ̃ jɔ ŋma kpee kpee.

³⁸ Ala-ɩ̃-sɔ a ƴɛ̃ƴɛrɩ̃ na, ɩ̃ yele nyɩ na, nyɩ́ ir a nyɩ nur a nɩbɛ na jie ɩ̃ cɛ ba, a-na-ɩ a ala ɩ a nɩrɛ jie a ƴɛrɩ̃ na nɩ a tʋn na yi, a na bũburĩ na.

³⁹ Ɩ̃-cɛ a ala ɩ a Naaŋmɩn jie a yi, nyaa tʋɔrɔ bũburaa wa.”

⁴⁰ A ƴɛr-guor-nɩ-bɛrɛ sɔw na a Gamalɩɛl nʋɔr ɩ̃ bʋɔl a nɩ-tʋnɩsɩ fɔb ɩ̃ kpãkpan ba a ba taa lɔɔ ƴɛrɛ ƴɛrɩ̃ bʋɔlɔ nɩ a Jeeju yuor go wa, ɩ̃ bar ba a ba cen.

⁴¹ Ba yi na a be a ƴɛrɩ̃ guorfʋ jie, a nʋɔ ƴala ba a mɩnɛ a Naaŋmɩn na nyɛ a ba sɛw nɩ a kpɛfʋ a Jeeju yuor ɩnɛ.

⁴² Ɩ̃ a bibie a jaa, ba ma jaana na a nɩbɛ a Naaŋmɩn puor-yir kpɛ̃ɛ pʋɔ, nɩ a nɩbɛ yie pʋʋr ma gala wa, hiere nɩ áa Jeeju ɩ na a *Kirisi.