Nɩ-tʋnɩsɩ tʋmɔ Sɛbɛ 4 - A NAAŊMƖN PƲLƖ̃-TA-PAALAA

A PƖƐR NƖ A JÃ NA ƖRAA A JUFISƖ ƳƐR-GUORBO NII-SƆW

¹ A lɛ a Pɩɛr nɩ a Jã na ƴɛrɛ nɩ a nɩbɛ, a Naaŋmɩn baar-lorbo nɩ a Naaŋmɩn yir-gurbe nɩ-kpɛ̃ɛ nɩ a Saduse nɩbɛ ta na a ba sɛ̃,

² ɩ̃ nyɛ suur a-na-ɩ ba jaana na a nɩbɛ, ɩ̃ de a *Jeeju kũu-pʋɔ-irfʋ ƴɛrɩ̃ miile nɩ ba áa nɩbɛ na mɩ irʼã a kũu pʋɔ.

³ Ba nyɔɔr ba na ɩ̃ a-na-ɩ a wɩɛr liwre na, ba ƴɔ̃w ba na a kasu pʋɔ a ba jɛ a be vɩɛ nɩ a bio.

⁴ Ɩ̃-cɛ a bala na dãa wõ a Pɩɛr ƴɛrɩ̃ nɩ-yaw sɔw na, ɩ̃ a lɛ, a popuorbo tara na dabsɩ ture anuu.

⁵ A bio vɩɛ na a Jufisɩ ni-dierbe nɩ a ba tẽ-ꞌwuorbo nɩ a ba *ƴɛr-kpɛn-bɔɔnbɔ duo taa a Jerujalɛm.

⁶ A An na ɩ a Naaŋmɩn *baar-lo-nɩ-kpɛ̃ɛ dãa na be be, nɩ a Kayifi, nɩ a Jã, nɩ a Alɛsãdɩrɛ, lãa nɩ a baar-lo-nɩ-kpɛ̃ɛ nɩbɛ ba jaa.

⁷ Ba taw na a Pɩɛr nɩ a Jã wɩ nɩ a ba nii-sɔw na sooro: “Nyɩnɛ nyɩ pɔw a fãw maalʼɩ̃ a tʋn na? Mɩɩ ala yuor nyɩ de maalʼɩ̃?”

⁸ Ɩ̃ a Pɩɛr sɛw nɩ na a Naaŋmɩn Sɩɛ ɩ̃ yel ba: “A nyɩmɩ na ɩ a tẽ-ꞌwuorbo nɩ a nyɩmɩ ni-dierbe,

⁹ nyɩ sooro sɩ na a dɩnaa a maal-vɩlaa ʋlɔ na maal a gbɛr jie, nɩ a mɩnɛ ʋ na pɔw a kpɛ̃w.

¹⁰ A nyɩmɩ nyɩ jaa nɩ a *Ɩsɩrayɛl nɩbɛ ba jaa, a sɛw na nyɩ bɔ̃w ka a Najarɛtɩ *Jeeju-Kirisi ʋlɔ nyɩ na dãa kpa a nɩ-kʋ-daa juu, ɩ̃ a Naaŋmɩn maal ʋ ʋ ir a kũu pʋɔ, a ʋ ɩnɛ a daba na ɩraa nɩ a ɩ̃gan kpɛ̃w a nyɩ nii-sɔw a dɩnaa.

¹¹ A Jeeju ʋlɔ, ʋlɔ ɩ̃ ɩ ‘a kubir a nyɩmɩ mɛmɩɛrbɛ na dãa jaar bar, ɩ̃ ʋ lɛ lɩɛbʼã ɩ a kubir ʋlɔ ba na de ƴɔ̃w a dacin gbɛr pʋɔ.’

¹² A-na-ɩ nɩ-kpee ma be be na tʋɔrɔ faara a nɩbɛ wa. A-na-ɩ yo-kpee ma be be a Naaŋmɩn na kʋ a nɩbɛ a ka a tẽw pʋɔ ʋ na tʋɔ faa ba wa.”

¹³ A mɩnɛ a Jufisɩ nɩ-bɛrɛ na nyɛ a Pɩɛr nɩ a Jã ꞌlafʋ, nʋɔr kpaw ba na, a-na-ɩ ba bɔ̃w ba na a ba ɩ nɩ-pɔrsɩ na ma dãa bɔ̃w a sɛbɛ wa. Ba mɩ bɔ̃w ba na a ba dãa be taa nɩ a Jeeju.

¹⁴ Ɩ̃ a mɩnɛ ba na nyɛ a daba ʋlɔ na kpɛmɛ ʋ lãa ɩraa nɩ ba, baa lɛ tʋɔ ƴɛr ƴɛrɩ̃ wa,

¹⁵ ala-ɩ̃-sɔ a ba yel a Pɩɛr nɩ a Jã a ba yi ɩraa be yẽw, ɩ̃ a bala *ƴɛr-guor-nɩ-bɛrɛ man taa.

¹⁶ Ba yele na taa: “Mɩnɛ sɩ na ɩ a nɩbɛ na? A-na-ɩ a Jerujalɛm nɩbɛ ba jaa nyɛ na a mɩnɛ ba na maal a nɔ-kofʋ tʋ̃-kpɛ̃ɛ a saa lɛ tʋɔrɔ cɩɩrɛ wa.

¹⁷ Ɩ̃-cɛ a mɩnɛ a ƴɛrɩ̃ na kɔ̃ɔ yɛr pɔw a tẽw wa, nyɩ́ ɩ a sɩ per ba a ba kɔ̃ lɔɔ de a ʋna yuor ƴɛrʼɩ̃ a ƴɛrɩ̃ kʋ a nɩrɛ lɛ wa.”

¹⁸ A mɩnɛ ba na bʋɔl ba a ba kpɛ, ba kpãkpan ba na a ba taa lɔɔ diere a Jeeju yuor ƴɛrɛ nɩ ƴɛrɩ̃ mɩɩ jaana nɩ a nɩbɛ go wa.

¹⁹ Ɩ̃-cɛ a Pɩɛr nɩ a Jã yel ba na: “Nyɩ́ tɩɛr je kãa a ala ɩ a sɛw na a Naaŋmɩn nii-sɔw a sɩ na jɔrɔ nyɩ gãw a Naaŋmɩn.

²⁰ A-na-ɩ a ala sɩ na nyɛ ɩ̃ wõ, sɩ kɔ̃ tʋɔ vã a ƴɛrfʋ wa.”

²¹ A ƴɛr-guor-nɩ-bɛrɛ lɛ perʼã a Pɩɛr nɩ a Jã ɩ̃ bar ba a ba cen, a-na-ɩ a mɩnɛ a nɩbɛ ba jaa na pɛwrɛ a Naaŋmɩn a ala na ta ɩnɛ, baa dãa bɔ̃w a mɩnɛ ba na ɩrɛ ɩ̃ kpãana ba wa.

²² A-na-ɩ a daba ʋlɔ ba na maal a tʋ̃-kpɛ̃w ʋ kpɛmɛ, ʋ dãa na tɛrɛ yomo lɩjaayi nɩ dɔɔlaa.

A ꞌLAFƲ A POPUORBO NA SƲƆRƆ

²³ Ba barʼã a Pɩɛr nɩ a Jã a ba cen a ba nɩbɛ jie na mɩɩn ba a ala a jaa a *baar-lo-nɩ-bɛrɛ nɩ a ni-dierbe na yel ba.

²⁴ A lɛ a popuorbo na wõ a ʋna ƴɛrɩ̃, ba jaa lãa na puoro a Naaŋmɩn yele nɩ: “Nɩ-kpɛ̃ɛ, fʋ̃ʋ maal a saꞌlon nɩ a tene nɩ a man nɩ a yele a jaa na be a ba pʋɔ.

²⁵ Fʋ̃ʋ dãa ƴɔ̃w a fʋ Sɩɛ ʋ de a sɩ sãa-kʋmɔ Davɩtɩ na ɩ a fʋ tʋtʋnɔ nʋɔr ƴɛrʼɩ̃: ‘Bõ ɩ a nɩ-bʋlsɩ gbono a dab-lʋ̃ʋ a fʋ nii-sɔw, ɩ̃ bõ ɩ a nɩ-bʋrɔ bʋrɔ mɩ goro taa a pɔrɔ?

²⁶ A tẽw pʋɔ jamansɩ gbɛɛrɩ̃ na taa a jɛb ɩnɛ, ɩ̃ a fãgã deme mɩ duo na taa bʋɔrɔ ba jɛbʼɩ̃ a Nɩ-kpɛ̃ɛ Naaŋmɩn nɩ a ʋlɔ ʋ na vɛl ir.’

²⁷ A-na-ɩ sɩrɛ jaa ʋ, a *Ɛrɔdɩ nɩ a Pɔ̃sɩ *Pɩlatɩ duo na taa nɩ a nɩ-bʋlsɩ, nɩ a *Ɩsɩrayɛl nɩbɛ a tẽw na pʋɔ a fʋ tʋ̃tʋ̃-son *Jeeju fʋ na vɛl ir ɩnɛ,

²⁸ áa ba maal a ala a jaa a fʋ fãw nɩ a fʋ pʋ-tɩɛrʋ̃ na dãa de nĩe gbɛɛrɩ̃ a na ta.

²⁹ Nɩ-kpɛ̃ɛ, a ƴɛ̃ƴɛrɩ̃ na, ꞌwuor nyɛ a ba pufʋ ɩ̃ maal a fʋ tʋ̃tʋnbɔ a ba tɛrɛ ꞌlafʋ ƴɛrɛ nɩ a fʋ ƴɛrɩ̃.

³⁰ Tur a fʋ nuu a wʋlɩ̃sɩ deme na kpɛmɛ, ɩ̃ de a fʋ tʋ̃tʋ̃-son Jeeju yuor tʋ̃ nɩ a nɔ-kofʋ tʋmɔ na miile a fʋ kpɛ̃w.”

³¹ A lɛ ba na puor baar, a jie ʋlɔ ba na duo taa damʼã, a ba jaa sɛw nɩ a Naaŋmɩn Sɩɛ ɩ̃ nyɔw a Naaŋmɩn ƴɛrɩ̃ ɩ̃ ƴɛrɛ nɩ ꞌlafʋ.

A POPUORBO NA SŨONO TAA NƖ A BA YELE

³² A popuorbo ba jaa tɛrɛ na nɔ-bõ-ƴen nɩ tɩɛrʋ̃ bõ-ƴen. Nɩrɛ ma be be a ba pʋɔ na yele aa ala ʋ na tɛrɛ ɩ na a ʋ mɩ̃ɛ tɛw ben wa, ɩ̃ a bala ɩ̃ tɛrɛ, a ma ɩ na a ba jaa ben.

³³ A *nɩ-tʋnɩsɩ tɛrɛ na fãw yaw mana nɩ a Nɩ-kpɛ̃ɛ *Jeeju kũu-pʋɔ-irfʋ ƴɛrɩ̃, ɩ̃ a Naaŋmɩn sũofʋ be na be yaw a ba jaa fɛw jie.

³⁴ Bom ma dãa ɓɔr nɩrɛ kãw a ba pʋɔ wa, a-na-ɩ a bala na tɛrɛ a por nɩ a yie, ba ma da na, de a libie

³⁵ cenʼɩ̃ na bin a nɩ-tʋnɩsɩ sɛ̃, a ba po nɩ a nɩbɛ tu nɩ a mɩnɛ a ba yele ɓɔrfʋ na be.

³⁶ Daba be na be na yi a Sɩpɩr-tẽw ɩ̃ ɩ a *Levi bal nɩrɛ. A ʋ yuor dɩ na Jojɛfʋ ɩ̃ a nɩ-tʋnɩsɩ mɩ bʋɔlɔ ʋ Banabasɩ, a lɛ yelʼã a “*ɓaɓaala.”

³⁷ A daba ʋlɔ de na a ʋ puo da, de a libie cenʼɩ̃ na bin a nɩ-tʋnɩsɩ sɛ̃.