Nɩ-tʋnɩsɩ tʋmɔ Sɛbɛ 28 - A NAAŊMƖN PƲLƖ̃-TA-PAALAA

A POL A MALTƖ-TẼW

¹ A mɩnɛ sɩ na cɩ̃ɛ baar, ba yel sɩ na a Maltɩ a tẽw ʋlɔ dɩ.

² A ʋna tẽw naa nɩbɛ maal sɩ na a vɩlaa a wa po. A mɩnɛ a saa na waara a aar ɩrɛ, ba gbɔw na vũu ƴɔ̃w sɩ a sɩ ꞌwuoro.

³ A Pol vaarʼã a dali wa nɩ ƴɔnɔ a vũu pʋɔ, a dɔ̃pan be a dali pʋɔ, a vũu susuur kpɛ ʋ ʋ vilĩ a Pol nuu mar tɛɛlɛ.

⁴ A lɛ a ʋna tẽw naa nɩbɛ na nyɛ a waab ʋ gbɛ̃ɛgbɛɛlɛ a Pol nuumɩ, ba yele na taa: “A daba na sɩrɩ̃ na ɩ nɩ-kúrɔ. Ʋ saarɩ̃ na cɩ̃ɛ a man pʋɔ ɩ̃-cɛ a Torfʋ Sʋbɔ ma sɔw bar ʋ ʋ na baa wa.”

⁵ Ɩ̃-cɛ a Pol mɩrʼã a waab kpar a vũu pʋɔ ɩ̃ aa ɩ ʋ bier wa.

⁶ A nɩbɛ ꞌwuoro na cɛlɛ nɩ a Pol nuu mɔrfʋ, mɩɩ a mɩnɛ ʋ na loro kpiire a jie naan. Ɩ̃ a mɩnɛ ba na ꞌwuor kam ɩ̃ ma nyɛ a ɩ ʋ bier wa, ba lɩɛbʼã a ba tɩɛrɩ̃sɩ ɩ̃ yel á naaŋmɩn kãw ʋ ɩ.

⁷ A ʋna tẽw naa nɩ-kpɛ̃ɛ ba na bʋɔlɔ a Pibiliisi wɩɛr pɩɛlʼã a be. Ʋ de sɩ na vɩlaa a sɩ gã a ʋ yir bibie ata.

⁸ A Pibiliisi sãa ɩ̃gan dãa na kpor ʋ ʋ gã ɩ̃ a kʋnfʋ nyɔw ʋ, ɩ̃ a Pol kpɛ na a ʋ sɛ̃, na dɔɔl ʋ a nur ɩ̃ sʋɔr a Naaŋmɩn ƴɔ̃w ʋ ʋ kpɛmɛ.

⁹ A mɩnɛ a ala na yi tɔ, a wʋlɩ̃sɩ deme bala na be a tẽw ʋlɔ pʋɔ mɩ wa na na nyɛ a kpɛ̃w.

¹⁰ Ala-ɩ̃-sɔ ba wa nɩ na a yel-bʋrɔ bʋrɔ na puorʼɩ̃ sɩ, ɩ̃ a daar ʋlɔ sɩ na yire diere a sɔr, ba kʋ sɩ na a yele ala na dãa sɛw nɩ sɩ.

A POL NA TA A OROM-TẼW

¹¹ A lɛ a cur ata na tɔl baar, sɩ de na a gbor kpɛ̃ɛ ʋlɔ ba na bʋɔlɔ “A Naaŋmɩ̃-yɩb” na yi a Alɛsãdiri ɩ̃ dãa ɩraa a be a tẽ-bile ʋlɔ pʋɔ a sɩ̃ɛw.

¹² Sɩ ta na a Sɩrakisi maal bibie ata,

¹³ ɩ̃ yi a be lara a tẽw kolo na ta a Eresio. A dɩvɩɛ bio, a tẽw parɩ̃ sɛsɛb fure na a sɩ maal bibie ayi a sɔr pʋɔ ɩ̃ ta a Pujɔl.

¹⁴ Sɩ nyɛ na a yɛɛr a be a ʋna tẽw naa pʋɔ a ba sʋɔr sɩ a sɩ jɛ maal bibie anuu-nʼayi a ba sɛ̃. A lɛ sɩ maala wa ta nɩ a Orom.

¹⁵ Ɩ̃ a yɛɛr na be a Orom wõ na a sɩ ƴɛrɩ̃ ɩ̃ yi tuor sɩ a Apiisi daa pʋɔ, nɩ jie ʋlɔ ba na bʋɔlɔ a Sáanba-yie-ata. A mɩnɛ a Pol na nyɛ ba, ʋ pɛwrɛ na a Naaŋmɩn ɩ̃ a ꞌlafʋ lɛ wa ʋ.

¹⁶ A mɩnɛ sɩ na ta a Orom, ba kʋ na a Pol a sɔr ʋ kpɛɛrɛ ʋ yẽ, nɩ a sɔdaala ʋlɔ na gure ʋ.

A POL NA ƳƐRƐ A NAAŊMƖN ƳƐRƖ̃ A OROM

¹⁷ A lɛ a bibie ata na tɔl baar, a Pol bʋɔlʼã a Jufisɩ ni-dierbe a ba wɩ. A mɩnɛ ba na duo baar, ʋ yel ba na: “Yɛɛr, maa maal fãa a sɩ nɩbɛ jie wa, maa mɩ sãw a sɩ sãa-kʋnbɔ sɔɛ wa, ɩ̃-cɛ ba nyɔw ma na a Jerujalɛm kʋ a Orom nɩbɛ,

¹⁸ a ba soor ma, ɩ̃ bʋɔrɔ ba bar ma, a-na-ɩ ba nyɛ na a ɩ maa maal fãa a sɛw a ba na kú ma wa.

¹⁹ Ɩ̃-cɛ a mɩnɛ a Jufisɩ na ma sɔw wa, ɩ̃ bɩlʼã faa ɩ̃ sʋɔr a ba cenʼɩ̃ ma a jaman-kpɛ̃ɛ jie, ɩ̃-cɛ aa ɩ ƴɛrɩ̃ ɩ̃ tɛrɛ ƴɔnɔ a ɩ̃ nɩbɛ wa.

²⁰ A ala ɩnɛ ɩ̃ bʋɔrɔ ɩ̃ nyɛ nyɩ, na ɩ̃ ƴɛrʼɩ̃ nyu A-na-ɩ ba lũ nɩ ma na a bɔ̃jɔrɩ̃sɩ asɩmɛ a ʋlɔ ɩnɛ a *Ɩsɩrayɛl nɩbɛ na gure a ʋ waa.”

²¹ A ba yel ʋ: “A Jude-tẽ-deme ma tɩɩr sɛbɛ kãw a sɩ wõ a fʋ ƴɛrɩ̃ wa. A sɩ yɛbɛ kãw ma mɩ yi a be ɩ̃ wa man sɩ a fʋ ƴɛrɩ̃, mɩɩ ƴɛr sɩ a fʋ fãa wa.

²² Ɩ̃-cɛ sɩ bʋɔrɔ na fʋ man sɩ fʋ mɩ̃ɛ a ala fʋ na tɩɛrɛ, a-na-ɩ sɩ bɔ̃w na bɔ̃w ka a jiir a jaa ba ꞌlaarʼã a nɩbɛ bala pʋɔ fʋ na be.”

²³ Ba ƴɔ̃w na a Pol a bibir ba na lɛ waara, ɩ̃ a ʋna dayen, a nɩbɛ waa na na wɩ pɔw ʋ a jie ʋlɔ ʋ na be. Ʋ de na a Mowisi ƴɛr-kpɛn nɩ a ƴɛr-hierbe ƴɛrɩ̃sɩ mana ba miile nɩ ba a Naaŋmɩn fãw ƴɛrɩ̃, a dʋ̃ꞌwʋlɩ̃ wa ta nɩ a jaanʋɔr, bʋɔrɔ ʋ lɩɛbʼɩ̃ a ba sube a *Jeeju ɩnɛ.

²⁴ A ŋmɛɛ lɩɛbʼã sɔw a ala ʋ na ƴɛr ba, ɩ̃-cɛ a ŋmɛɛ ma sɔw wa.

²⁵ A lɛ ba na yire ɩ̃ ma tɛrɛ a nɔ-bõ-ƴen wa, a Pol ƴɛr ba na a ƴɛr-birʼã yel: “A ƴɛrɩ̃ ala a Naaŋmɩn Sɩɛ na ƴɔ̃w a ƴɛr-hiere Ejayi ʋ yel a nyɩ sãa-kʋnbɔ ɩ na yel-mɩ̃ɛ:

²⁶ ‘Cen a nɩbɛ na jie na yel ba: Nyɩ na sɩrɩ̃ na wonaa, ɩ̃ nyaa bɔ̃wnɔ a par wa. Nyɩ na sɩrɩ̃ na ꞌwuoro, ɩ̃ nyaa nyɛrɛ wa.

²⁷ A-na-ɩ a bana nɩbɛ tɩɛrɩ̃sɩ lɩɛbʼã ɩ dãbol tɩɛrɩ̃sɩ. Ba ɓʋrʼã a ba tobo, ɩ̃ mɩ pɔw a ba mimie, a mɩnɛ a ba tobo kɔ̃ wa wõ bom wa, a ba mimie kɔ̃ɔ mɩ nyɛ wa, a ba kɔ̃ mɩ bɔ̃w a par, ɩ̃ lɩɛb wa a ɩ̃ jie ɩ̃ faa ba wa.’

²⁸ A Pol lɛ yel ba na: “Nyɩ́ bɔ̃wnaa bɔ̃w ka a Naaŋmɩn de na a ʋ faafʋ ƴɛrɩ̃ na tɩɩr kʋ a nɩ-bʋlsɩ. A bala, ba na cɛlɛ ʋ na!” [

²⁹ A lɛ a Pol na ƴɛr a ʋna ƴɛrɩ̃ baar, a Jufisɩ wɛlʼã kule na ba faara taa.]

³⁰ A Pol jɛ na a ʋna yir ʋ na dãa yara maalʼɩ̃ yomo ayi. Ʋ ma de na a bala ba jaa na wɩɛrɛ a ʋ sɛ̃,

³¹ ƴɛrɛ ba a Naaŋmɩn fãw ƴɛrɩ̃, jaana nɩ ba a Nɩ-kpɛ̃ɛ *Jeeju-Kirisi ƴɛrɩ̃ nɩ ꞌlafʋ, a mɩnɛ ʋ na ƴɔ̃w nyãa.