Nɩ-tʋnɩsɩ tʋmɔ Sɛbɛ 27 - A NAAŊMƖN PƲLƖ̃-TA-PAALAA

A POL BA NA CERE NƖ A OROM

¹ A lɛ ba na ƴɔ̃w sɩ a sɩ kpɛ a gbor kpɛ̃ɛ pʋɔ cere a Ɩtalɩ, ba de na a Pol nɩ a kasu deme ŋmɛɛ kʋ a sɔdaal-nɩ-kpɛ̃ɛ ba na bʋɔlɔ a Juliisi, na ɩ a Orom jaman-kpɛ̃ɛ sɔdaalsɩ ƴen sʋbɔ.

² Sɩ kpɛ na a gbor kpɛ̃ɛ kãw na yi a Adɩramɩtɩ na sɛw ʋ lara a Ajɩ man, na sɩ cere. Ɩ̃ a Arɩsɩta na ɩ a Tɛsaloniki-tẽw nɩrɛ na be a Masɛdɔn wɩɛr pɔw sɩ na lãa cenʼɩ̃.

³ A dɩvɩɛ bio sɩ ta na a Sɩdɔ̃, ɩ̃ a Juliisi na maala a Pol a vɩlaa, kʋ ʋ na sɔr ʋ cen a ʋ badɛɛ jie a ba sũo ʋ.

⁴ A lɛ sɩ na yi a be, sɩ lara na a Sɩpɩr-tẽw lõboor a-na-ɩ a sɛsɛb tuoro sɩ na.

⁵ Sɩ kpɛ na a man sɔ̃w tɔl yi a Sɩlɩsɩ nɩ a Pãfɩlɩ ɩ̃ ta a Mɩɩra na be a Lɩsɩ wɩɛr.

⁶ A be, a sɔdaal-nɩ-kpɛ̃ɛ nyɛ na a gbor kpɛ̃ɛ na yi a Alɛsãdiri ɩ̃ cere a Ɩtalɩ, ɩ̃ ɩ a sɩ kpɛ.

⁷ A bibie waa na sɩ na cere a vɛrɛtɛtɛ a wõ sɩ, ɩ̃ a sɩ pãa ta a Sɩnɩdɩ-tẽw. A mɩnɛ a sɛsɛb na ma kʋrɔ sɩ sɔr a sɩ cere a dẽdẽ wa, sɩ tɔlʼã kolĩ a Salmɔne-tẽw naa sɩ nyɛ a pĩfʋ jie a Kɩrɛtɩ-tẽw lõboorɩ̃.

⁸ Sɩ lara na a ʋna tẽw lõboor cere a wõ sɩ, ɩ̃ a sɩ pãa ta a gbor-bɛrɛ ɩraafʋ jie ba na bʋɔlɔ a Gbor ɩraafʋ ji-vɩlaa na pɩɛl a Lase-tẽw.

⁹ Sɩ kamʼã a sɔr pʋɔ, a lɩɛb ɩ sɩ jãjĩ a gbor cenɩfʋ, a-na-ɩ a *nʋɔr lũfʋ bibir mɩ tɔlʼã po. Ala-ɩ̃-sɔ a Pol kpãkpan ba,

¹⁰ yel: “Ɩ badɛɛ, ɩ̃ nyɛ na bɔ̃w ka a sɩ cenfʋ na na ɩ sɩ na bier yayaw. A gbor nɩ a yele na wɛ na, nɩ a sɩmɩ mɩ.”

¹¹ Ɩ̃-cɛ a sɔdaal-nɩ-kpɛ̃ɛ cɛlʼã a gbor-vɛlɛ nɩ a gbor sʋbɔ ƴɛrɩ̃sɩ gãw a Pol ƴɛrɩ̃.

¹² Ɩ̃ a mɩnɛ a gbor ɩraafʋ jie na ma vɩɛlɛ a ba na ɩraa a be a sɩ̃ɛw wa, a nɩbɛ yaw jie a gbor pʋɔ yele na á bá yi a be ɩ̃ dɩ tuo ta a Fenikisi na ba jɛ a be a sɩ̃ɛw. A-na-ɩ a Fenikisi ɩ na a Kɩrɛtɩ-tẽw gbor ɩraafʋ jie na be a mɔtɔ̃w mʋrfʋ jie gʋbaa nɩ a dʋrɩ̃ lõboorɩ̃.

A SƐSƐB KPƐ̃Ɛ NA IRE A MAN PƲƆ

¹³ A mɩnɛ a sɛsɛb bile na yi a tẽw parɩ̃ ɩ̃ fure, ba tɩɛrʼã bɔ̃w ka ba na tʋɔ na maal a ala ba na bʋɔrɔ, ɩ̃ na ba nyɔw a kur ʋlɔ na nyɔw a gbor ɩraa nɩ for bar ɩ̃ na ba lara a Kɩrɛtɩ-tẽw cere.

¹⁴ Ɩ̃ a ɩ na fɩ̃ɩ, a sɛsɛb kpɛ̃ɛ ba na bʋɔlɔ a Erakɩlɔ̃ yi na a tãw juu ɩ̃ suu

¹⁵ de a gbor cere nɩ, a ꞌwaa lɛ tʋɔrɔ toro a sɛsɛb wa, a sɩ bɩl faa ɩ̃ bar a sɛsɛb ʋ de sɩ cere nɩ.

¹⁶ A mɩnɛ sɩ na ta a tẽ-bile ba na bʋɔlɔ a Kiloda, ʋ pĩ sɩ na fɩ̃ɩ a sɩ ƴɔ̃w fãw ɩ̃ bɔw a gbor bile sɩ na dãa tawra

¹⁷ ƴɔ̃w a gbor kpɛ̃ɛ pʋɔ, ɩ̃ su a mibe kolĩ a gbor kpɛ̃ɛ ɩ̃ lũ. Dãbɩ̃ɛ dãa na nyɔw sɩ a mɩnɛ sɩ na cere na kpara a biire ʋlɔ na be a Lɩbɩ-tẽw lõboorɩ̃. Ala-ɩ̃-sɔ a ba lɔb a cẽcen kpow ƴɔ̃w a kʋ̃ɔ pʋɔ a tawra ba ɩ̃ bar a sɛsɛb ʋ tɔrɔ ba cere nɩ.

¹⁸ A dɩvɩɛ bio, a mɩnɛ a sɛsɛb na cãa dama sɩ a yaw, ba ire na a gbor yele lɔbɔ bara a kʋ̃ɔ pʋɔ.

¹⁹ A datɛrɛ daar, a gbor deme mɩ̃ɛ ire na a gbor tʋmɔ yele lɔbɔ ƴɔnɔ a kʋ̃ɔ pʋɔ.

²⁰ A bibie waa na sɩ na ma nyɛ a mɔtɔ̃w mɩɩ a ŋmarbie wa, ɩ̃ a sɛsɛb cãa fure nɩ a kpɛ̃w a bibie a jaa, a sɩ pãa bɔ̃w ka cɩ̃ɛfʋ jie ma lɛ be be wa.

²¹ A mɩnɛ ba na be a be kam ɩ̃ ma dɩrɛ bom wa, a Pol irʼã ɩraa a ba sɔ̃w ɩ̃ yel ba: “Ɩ̃ badɛɛ, a sɛw na a nyɩ naa dãa cɛl ma, a sɩ kɔ̃ɔ dãa bar a Kɩrɛtɩ-tẽw wa; a won na kɔ̃ɔ ta wa ɩ̃ a yele asɩmɛ kɔ̃ɔ mɩ wɛ wa.

²² Ɩ̃-cɛ a ƴɛ̃ƴɛrɩ̃ na, ɩ̃ yele nyɩ na, nyɩ́ bar nyãa. Nɩ-bõ-ƴen ma bɔrɔ wa, a gbor tɛw ɩ̃ na wɛ.

²³ A-na-ɩ a jamɩ tɩsɔw, a Naaŋmɩn ʋlɔ na sɔ ma ɩ̃ mɩ tʋnɔ a ʋ tʋn barʼã a ʋ sɩ-tʋnaa ʋ wa

²⁴ yel ma: ‘Pol, taa jɔrɔ dãbɩ̃ɛ wa! A sɛw na a fʋ na ɩraa a jaman-kpɛ̃ɛ nii-sɔw; ɩ̃ a fʋ ɩnɛ, a Naaŋmɩn na mɩ kʋ na a baafʋ a bala na lãa be nɩ fʋ a gbor pʋɔ.’

²⁵ Ala-ɩ̃-sɔ ɩ̃ badɛɛ, nyɩ́ bar nyãa, a-na-ɩ ɩ̃ tɛrɛ na ƴɔ̃w-nyãa a Naaŋmɩn jie áa na maalʼã a mɩnɛ ʋ na yel ma.

²⁶ Ɩ̃-cɛ sɩ na kpa na tẽ-bile kãw pʋɔ na be a man sɔ̃w.”

²⁷ Sɩ maalʼã bibie pie-nʼanaan, a sɛsɛb cãa diere sɩ cere nɩ, ɩ̃ a tɩsɔw porɩ̃, a gbor deme tɩɛrʼã beeka a sɩ tara na a tẽw kãw gbẽgbere,

²⁸ ɩ̃ lɔb a miir a kʋ̃ɔ pʋɔ bʋɔrɔ ba bɔ̃w a mɩnɛ a kʋ̃ɔ na be, a ɩ mɛɛtɩr lɩjaayi. Ba lɛ cenʼã fɩ̃ɩ ɩ̃ lɛ lɔb, a ɩ mɛɛtɩr lɩjɛrʼɩ̃-pie.

²⁹ Ba jɔrɔ na dãbɩ̃ɛ a sɩ gbor na wa ŋme kubir ɩ̃ na ba lɔb kure anaan a nyɔw a gbor a parvʋɔrɩ̃ ɩraa nɩ, ɩ̃ a ba bʋɔrɔ a bio ʋ vɩɛ.

³⁰ A gbor deme bʋɔrɔ na ba yi a gbor pʋɔ jɔ faa a ba mɩ̃ɛ. Ala-ɩ̃-sɔ ba ꞌlorʼã a gbor bile bar ʋ suure a kʋ̃ɔ pʋɔ maala nɩ wɔ̃ taa nʋ a gbor kpɛ̃ɛ kur-nyɔɔrsɩ ba lɛ lɔbɔ a nii-sɔw.

³¹ Ɩ̃-cɛ a Pol yelʼã a sɔdaal-nɩ-kpɛ̃ɛ nɩ a sɔdaalsɩ: “A ala ɩ a nɩbɛ na ma ɩraa ka a gbor pʋɔ wa, nyaa tʋɔrɔ cɩ̃ɛnɛ wa.”

³² Ala-ɩ̃-sɔ a sɔdaalsɩ ŋmaa a mibe ala na nyɔw a gbor bile bar, ʋ lo.

³³ A cɛ na fɩ̃ɩ a bio na vɩɛ, ɩ̃ a Pol bʋɔrɔ na ʋ ɩ a nɩbɛ ba jaa a ba dɩ a dɩb. Ʋ yelʼã: “Bibie pie-nʼanaan nɩ a dɩnaa nyɩ na cãa jɛ ɩ̃ ma dɩ a bom wa.

³⁴ Ɩ̃ sʋɔr nyɩ na, nyɩ́ dɩ a dɩb a-na-ɩ a be jie nyɩ na tʋɔ cɩ̃ɛ. Nɩrɛ kãw jukɔbir bõ-ƴen ma bɔrɔ wa.”

³⁵ A mɩnɛ a Pol na ƴɛr a lɛ baar, ʋ de na a buru puorʼɩ̃ a Naaŋmɩn a nɩbɛ ba jaa nii-sɔw ɩ̃ ŋmaa ꞌwɔbɔ,

³⁶ a ba jaa pãa bar nyãa ɩ̃ mɩ ꞌwɔb.

³⁷ A sɩ jaa na be a gbor pʋɔ ɩ na nɩbɛ kɔɔr ayi dɔɔl lɩjaanaan ŋmaaʼnuu nɩ bõ-ƴen.

³⁸ A lɛ ba na dɩ pi baar, ba lɔbʼã a buru bie ƴɔ̃w a kʋ̃ɔ pʋɔ ɩ̃ cɛ a gbor ʋ pe gẽe.

A GBOR SÃWFƲ

³⁹ A lɛ a bio na vɩɛ, a gbor deme ma bɔ̃w a tẽ-buor ba na ta wa, ɩ̃-cɛ ba nyɛ na a man gɔraa a jie a biire na be, ɩ̃ bʋɔrɔ a ala ɩ ba tʋɔ na, ba maal a gbor ʋ do ɩraa a be.

⁴⁰ Ba ꞌlorʼã a kur-nyɔɔrsɩ lɔb bar a man pʋɔ, ɩ̃ mɩ ꞌlor a vulsɩ ala na gɔrɔ a gbor, ɩ̃ pãa yɛr a cẽcen bar a gbor nii-sɔw a sɛsɛb tɔrɔ ba cere nɩ a biire par.

⁴¹ Ɩ̃-cɛ ba ta na a jie na a kʋ̃ɔ na maal a biire a duo, a gbor kpa a be. A gbor nii-sɔw kpɛ na baar ma tʋɔrɔ dama wa, ɩ̃ a kʋ̃ɔ sɛsɛb ŋmeere a gbor parvʋɔr wɛlɛ.

⁴² A sɔdaalsɩ bʋɔrɔ na ba kú a kasu deme, a bõ-ƴen kɔ̃ duur jɔ cɩ̃ɛ wa.

⁴³ Ɩ̃-cɛ a-na-ɩ a sɔdaal-nɩ-kpɛ̃ɛ bʋɔrɔ na ʋ faa a Pol, ʋ mɔ̃w na a sɔdaalsɩ bar a ba taa maal a lɛ wa. Ɩ̃ ʋ yelʼã a bala na bɔ̃w a duurfʋ a ba de nĩe aar lo a kʋ̃ɔ pʋɔ duur cen na yi a gbẽgbere juu,

⁴⁴ ʋ̃ ƴɔ̃w a bala na cɛ á bá nyɔɔr a gbor daar mɩɩ a gbor yele na ba pe tuure. A lɛ ba maal, na ba ta a gbẽgbere juu faa a ba mɩ̃ɛ ba jaa.