Nɩ-tʋnɩsɩ tʋmɔ Sɛbɛ 26 - A NAAŊMƖN PƲLƖ̃-TA-PAALAA

A POL NA MAN A Ʋ YEL-MƖ̃Ɛ KƲ A AGƖRƖPA

¹ A Agɩrɩpa yelʼã a Pol: “Fʋ tɛrɛ na sɔr na ƴɛr a fʋ ƴɛrɩ̃.” A Pol tur a nuu ɩ̃ man a ʋ yel-mɩ̃ɛ na ʋ yel:

² “Jamana Agɩrɩpa, a nʋmɔ ma na ɩ̃ na miil a ɩ̃ yel-mɩ̃ɛ a fʋ nii-sɔw a dɩnaa, a ana ƴɛrɩ̃sɩ a jaa ɩnɛ a Jufisɩ na ƴɔ̃w ma.

³ A-na-ɩ fʋ bɔ̃w na a Jufisɩ sɔɛ a jaa nɩ a ala ba na ma cɩɩrɛ nɩ taa, ala-ɩ̃-sɔ ɩ̃ sʋɔr fʋ na a fʋ na cɛlɛ ma nɩ su-nyɔwraa.

⁴ “A Jufisɩ ba jaa bɔ̃w na a ɩ̃ maalfʋ, a ɩ̃ bibile daar wa ta nɩ a ƴɛ̃ƴɛrɩ̃ na; ba bɔ̃w na a mɩnɛ ɩ̃ na dãa be a korĩ-cɛ a ɩ̃ mɩ̃ɛ nɩbɛ sɔ̃w, nɩ a Jerujalɛm-tẽw pʋɔ.

⁵ A kamʼã ba na bɔ̃w ma, ɩ̃ a bala ɩ̃ bʋɔrɔ, ba na tʋɔ na yel a mɩnɛ ɩ̃ na dãa be a Farɩsɩ ji-gbulĩ ʋlɔ pʋɔ na nyɩrɩ̃ cɛ̃pɛrɛ a sɩ puorfʋ ƴɛr-kpɛn.

⁶ Ɩ̃ a ƴɛ̃ƴɛrɩ̃ na go, ba ƴɔnɔ ma na a ƴɛrɩ̃ a-na-ɩ ɩ̃ tɩɛrɛ na a pʋlɩ̃fʋ ʋlɔ a Naaŋmɩn na dãa pʋlɩ̃ nɩ a sɩ sãa-kʋnbɔ.

⁷ A ʋna pʋlɩ̃fʋ naa a sɩ bal pie-nʼayi bʋɔrɔ ba pɔw, ala-ɩ̃-sɔ a ba nyɩrɩ̃ tʋnɔ a puorfʋ tʋmɔ a tɩsɔw nɩ a mɔtɔ̃w. Ɩ̃ jamana, a ʋna pʋlɩ̃fʋ ɩnɛ a Jufisɩ ƴɔnɔ ma a ƴɛrɩ̃.

⁸ Bõ ɩ a nyɩmɩ na ɩ a Jufisɩ maa sɔw áa Naaŋmɩn ma irʼã a kũusɩ yi nɩ a kũu pʋɔ wa?

⁹ “A maa mɩ̃ɛ, ɩ̃ dãa na tɩɛr bɔ̃w ka a sɛw na ɩ̃ na maal yele yayaw na sãw nɩ a Najarɛtɩ *Jeeju yuor.

¹⁰ A lɛ ɩ̃ dãa maal a Jerujalɛm. A *baar-lo-nɩ-bɛrɛ kʋ ma na sɔr ɩ̃ nyɔwrɔ a Naaŋmɩn nɩbɛ yayaw ƴɔnɔ a kasu pʋɔ, ɩ̃ a bala ɩ̃ kʋrɔ ba, ɩ̃ ma mɩ sɔw na.

¹¹ Gbɛɛ yayaw ɩ̃ cenʼã a *puorfʋ yie na kpãa ba, bʋɔrɔ ɩ̃ fɛr ba a ba sãw a *Jeeju-Kirisi yuor. A suur ɩ̃ na nyɩrɩ̃ nyɛ nɩ ba maal ma na ɩ̃ hʋɔl ba wa ta nɩ a nɩ-bʋlsɩ ten pʋɔ.

A POL NA MIIL A Ʋ YƐ̃ LƖƐBFƲ PAR

¹² “A ala ɩ̃ dãa maala a lɛdaar a *baar-lo-nɩ-bɛrɛ na kʋ ma a sɔr, ɩ̃ tʋ̃ ma ɩ̃ cere a Damasɩ.

¹³ Ɩ̃ jamana, a mɩnɛ ɩ̃ na be a sɔr pʋɔ cere a mɔtɔ̃-tuo, a cãa yi na a saꞌlon caarɩ̃ kolĩ ma nɩ a bala ɩ̃ na lãa cere nɩ, ɩ̃ nyɩnyɩlɛ gãw a mɔtɔ̃w.

¹⁴ A sɩ jaa lo na a tene ɩ̃ ɩ̃ wõ na a kɔkɩr na ƴɛrɛ nɩ ma a Eburo ƴɛrɩ̃: ‘Sol, Sol, bõ ɩ̃ ɩ a fʋ hʋɔlɔ ma a lɛ? Fʋ̃ʋ lɩɛb maala a fʋ mɩ̃ɛ bier wɔ̃ taa nɩ a naab na lɩɛb jɛbɛ nɩ a gʋraa ba na kpara nɩ ʋ.’

¹⁵ Ɩ̃ soor ʋ: ‘Nɩ-kpɛ̃ɛ, ala fʋ ɩ?’ A Nɩ-kpɛ̃ɛ yel ma: ‘Ɩ̃ ɩ na a *Jeeju fʋ na hʋɔlɔ.

¹⁶ Ɩ̃-cɛ, ir ɩraa. Ɩ̃ nyɩr fʋ na na ƴɔ̃w fʋ a fʋ na ɩ a ɩ̃ tʋ̃tʋnɔ, naa fʋ mana a ala fʋ na nyɛ a dɩnaa kʋrɔ a nɩbɛ, ɩ̃ mɩ mana ba a ala ɩ̃ na lɔɔ miile fʋ.

¹⁷ Ɩ̃ na faa fʋ na a Jufisɩ jie nɩ a nɩ-bʋlsɩ bala jie ɩ̃ na tʋnɔ fʋ.

¹⁸ Ɩ̃ tʋnɔ fʋ na a fʋ na yuo ba a mimie, a ba na yi a libe pʋɔ ɩ̃ kpɛ a cãa pʋɔ, ɩ̃ mɩ yi a Satã fãw pʋɔ ɩ̃ kpɛ a Naaŋmɩn fãw pʋɔ, a ba na sɔw de ma, a Naaŋmɩn na de a ba maal-faar bar kʋ ba, ɩ̃ a ba kpɛ a Naaŋmɩn nɩbɛ pʋɔ nyɛ a jɩnaafʋ jie.’

¹⁹ “Jamana Agɩrɩpa! A ala ɩnɛ, maa jaar a saꞌlon sɩɛ bom ɩ̃ na nyɛ wa.

²⁰ Ɩ̃-cɛ ɩ̃ de na nĩe ƴɛr a ʋna ƴɛrɩ̃ kʋ a Damasɩ-tẽw nɩbɛ, nɩ a Jerujalɛm tẽ-deme, ɩ̃ mɩ ƴɛr kʋ a Jude nɩbɛ ba jaa lãa nɩ a nɩ-bʋlsɩ a ba lɩɛb a ba yɛ̃ ɩ̃ tuure a Naaŋmɩn, maala nɩ a tʋmɔ ala na miile a ba *yɛ̃ lɩɛbfʋ.

²¹ A ala ɩnɛ a Jufisɩ nyɔw ma a Naaŋmɩn puor-yir kpɛ̃ɛ pʋɔ bʋɔrɔ ba kú ma.

²² Ɩ̃-cɛ a Naaŋmɩn sũo ma na wa ta nɩ a dɩnaa ɩ̃ na cãa ɩraa a ka, mana a ɩ̃ yel-mɩ̃ɛ ƴɛrɩ̃ kʋrɔ a nɩ-kɔmsɩ nɩ a nɩ-bɛrɛ jaa. Maa ƴɛrɛ bom kpee ɩ̃ ma ɩ a ala a ƴɛr-hierbe nɩ a Mowisi na dãa yel áa na ta na wa.

²³ Ba yelʼã áa *Kirisi sɛw na na nyɛ a hʋʋr ɩ̃ ɩ a dãdãw sʋbɔ na ire a kũu pʋɔ, na ʋ miile nɩ a faafʋ ƴɛrɩ̃ ʋ ɩrɛɛ cãa a sɩ nɩbɛ jie nɩ a nɩ-bʋlsɩ jie.”

A POL NA BƲƆRƆ A AGƖRƖPA Ʋ MƖ SƆW DE A JEEJU

²⁴ A mɩnɛ a Pol na cãa mana a ʋ ƴɛrɩ̃ a lɛ, a Fɛsɩtɩsɩ ƴɛrʼã nɩ kpɛ̃w yel: “Pol, fʋ yaara na! A bɔ̃wfʋ fʋ na nyɩrɩ̃ tɛrɛ maal fʋ na a fʋ bɔr juu!”

²⁵ Ɩ̃-cɛ a Pol yel ʋ: “Ɩ̃ nɩ-kpɛ̃ɛ, maa bɔr juu wa. A ala ɩ̃ na ƴɛrɛ ɩ na a yɛ̃ ƴɛrɩ̃ nɩ a yel-mɩ̃ɛ ƴɛrɩ̃.

²⁶ A jamana bɔ̃w na a ana tʋmɔ par, ala-ɩ̃-sɔ ɩ̃ bar nyãa ɩ̃ ƴɛrɛ a ʋ nii-sɔw. Ɩ̃ bɔ̃w na bɔ̃w ka bom ma be be ʋ na ma bɔ̃w wa, a-na-ɩ a ana yele ma dãa maal a lõkor pʋɔ wa.

²⁷ Jamana Agɩrɩpa, fʋ sɔw na a ala a ƴɛr-hierbe na sɛb mɩɩ? Ɩ̃ bɔ̃w ka fʋ sɔw na.”

²⁸ A Agɩrɩpa yel a Pol: “Fʋ bʋɔrɔ na fʋ tɔɔ lɩɛb ma a lɛ a daadaa ɩ̃ ɩ a *Kirisi nɩrɛ mɩɩ?”

²⁹ A Pol yel: “A ala ɩ a daadaa ʋ, mɩɩ a na kamʼã, Naaŋmɩn ɩ̃ sʋɔrɔ, ɩ̃ aa ɩ a fʋ̃ʋ fʋ yẽ ɩnɛ ʋ wa, ɩ̃-cɛ a nyɩ jaa na cɛlɛ ma a dɩnaa, a nyɩ na tʋɔ lɩɛb wɔ̃ a mɩnɛ ɩ̃ na wɔ̃. Ɩ̃-cɛ a bɔ̃jɔrɩ̃sɩ na tɛw, maa bʋɔrɔ ba ƴɔ̃w nyɩ a ɩ̃ kaarɩ̃ wa.”

³⁰ A jamana nɩ a tẽ-ꞌwuoro nɩ a Berenisi lãa nɩ a bala ba jaa na dãa jɛ a be irʼã

³¹ ɩ̃ a mɩnɛ ba na yi baar ba yele na taa: “A daba na ma maal fãa a ba na ƴɔ̃w ʋ a kũu pʋɔ mɩɩ a kasu pʋɔ wa.”

³² A Agɩrɩpa yel a Fɛsɩtɩsɩ: “A daba na ɩ̃ ma dãa sʋɔr a ba cenʼɩ̃ ʋ a jaman-kpɛ̃ɛ jie wa, sɩ naa tʋɔ na bar ʋ.”