Nɩ-tʋnɩsɩ tʋmɔ Sɛbɛ 25 - A NAAŊMƖN PƲLƖ̃-TA-PAALAA

A POL NA SƲƆR A BA CENʼƖ̃ Ʋ A JAMAN-KPƐ̃Ɛ SEJAAR SƐ̃

¹ A mɩnɛ a Fɛsɩtɩsɩ na de a ʋ tʋmɔ maal bibie ata, ʋ yi na a Sejare, ɩ̃ cen a Jerujalɛm.

² A be, a Jufisɩ ni-dierbe nɩ a *baar-lo-nɩ-bɛrɛ man ʋ na a ƴɛrɩ̃sɩ ala ba na tɛrɛ ƴɔnɔ a Pol.

³ Ba sʋɔrʼã a Fɛsɩtɩsɩ a ʋ maal bom kʋ ba: a ʋ ɩ a ba wa nɩ a Pol a Jerujalɛm, a-na-ɩ ba goro ʋ na bʋɔrɔ ba kú ʋ a sɔr pʋɔ.

⁴ Ɩ̃-cɛ a Fɛsɩtɩsɩ yel ba na áa Pol be na a kasu pʋɔ a Sejare, ɩ̃ a ʋlɔ Fɛsɩtɩsɩ mɩ, áa be ʋ lɩɛbɛ cere.

⁵ Ʋ yel ba na: “Nyɩ́ ɩ a nyɩ ni-dierbe a ba pɔw ma a sɩ lãa cen a Sejare, ɩ̃ a ala ɩ a daba ʋlɔ sãw na, bá ƴɔ̃w ʋ a ƴɛrɩ̃.”

⁶ A Fɛsɩtɩsɩ maalʼã bibie anuu-nʼata mɩɩ bibie pie a ba sɛ̃, ɩ̃ lɩɛb cen a Sejare. A dɩvɩɛ bio, ʋ jɛ na a ƴɛrɩ̃ guorfʋ jie, ɩ̃ ɩ a ba taw a Pol wɩ nɩ.

⁷ Ɩ̃ a lɛ a Pol na ta, a Jufisɩ bala na yi a Jerujalɛm tiw na kolĩ ʋ, ɩ̃ ƴɔnɔ ʋ a ƴɛrɩ̃sɩ yaw na bɛlɩ̃, ɩ̃-cɛ baa tʋɔrɔ miile a ɩrɛ yel-mɩ̃ɛ wa.

⁸ Ɩ̃-cɛ a Pol ma sɔw wa, ɩ̃ de a ʋ yel-mɩ̃ɛ miile yele nɩ: “Maa sãw a Jufisɩ ƴɛr-kpɛn, mɩɩ a Naaŋmɩn puor-yir kpɛ̃ɛ, mɩɩ a jaman-kpɛ̃ɛ ƴɛrɩ̃ wa.”

⁹ A Fɛsɩtɩsɩ bʋɔrɔ na ʋ maal a nʋmɔ a Jufisɩ, ala-ɩ̃-sɔ ʋ soor a Pol: “Fʋ bʋɔrɔ na fʋ cen a Jerujalɛm a fʋ ƴɛrɩ̃ na guor a ɩ̃ nii-sɔw a be mɩɩ?”

¹⁰ A Pol yel: “Ɩ̃ be na ka a jaman-kpɛ̃ɛ ƴɛr-guoro nii-sɔw. A ka ɩ̃ sɛw a ba na guor a ɩ̃ ƴɛrɩ̃. A ala ɩ a Jufisɩ ʋ, maa sãw a ba jie wa, a fʋ mɩ̃ɛ mɩ bɔ̃w na vɩlaa.

¹¹ A ala ɩ ɩ̃ sãw na, mɩɩ ɩ̃ maalʼã a bom jaa lɛ na sɛw a ba na kú ma, maa jaara a kũu wa. Ɩ̃-cɛ a ala ɩ a ƴɛrɩ̃sɩ ala ba na ƴɔnɔ ma ɩ na pɔrɔ, nɩrɛ ma tɛrɛ sɔr na ƴɔ̃w ma a ba nuu pʋɔ wa. Ɩ̃ bʋɔrɔ na a ɩ̃ ƴɛrɩ̃ a guor a jaman-kpɛ̃ɛ jie.”

¹² A lɛ a Fɛsɩtɩsɩ na man taa nɩ a ʋ yɛ̃ deme baar, ʋ yelʼã a Pol: “Fʋ yelʼã a ba cenʼɩ̃ fʋ a jaman-kpɛ̃ɛ jie. A be fʋ na cen.”

A POL NA ƖRAA A AGƖRƖPA NƖ A BERENISI NII-SƆW

¹³ A ɩ na fɩ̃ɩ, a jamana ʋlɔ na dɩ a Agɩrɩpa, lãa na wɩ nɩ a Berenisi a Sejare-tẽw a Fɛsɩtɩsɩ puorfʋ.

¹⁴ Ɩ̃ a-na-ɩ ba na jɛ na be kam fɩ̃ɩ, a Fɛsɩtɩsɩ de na a Pol ƴɛrɩ̃ man a Agɩrɩpa. Ʋ yel ʋ na: “Kasu sʋbɔ be na ka a Felisi na bar.

¹⁵ Ɩ̃ a lɛ ɩ̃ na dãa cen a Jerujalɛm, a *baar-lo-nɩ-bɛrɛ nɩ a Jufisɩ ni-dierbe ƴɔ̃w ʋ na a ƴɛrɩ̃ ɩ̃ mɩ sʋɔr ma a ɩ̃ ƴɔ̃w ʋ a kũu ƴɛrɩ̃.

¹⁶ Ɩ̃-cɛ, ɩ̃ yel ba na áa Orom nɩbɛ ma ƴɔnɔ nɩrɛ kũu ƴɛrɩ̃, ɩ̃ a ala ma ɩ ba taw na a nɩrɛ ʋlɔ yi nɩ a ʋ ƴɛr-ƴɔnbɔ nii-sɔw ʋ miilʼɩ̃ a ʋ yel-mɩ̃ɛ wa.

¹⁷ Ala-ɩ̃-sɔ ba pɔw ma na a sɩ lãa wa a ka. Maa bar a ƴɛrɩ̃ ʋ kam wa, ɩ̃-cɛ a dɩvɩɛ bio ɩ̃ jɛ na a ƴɛrɩ̃ guorfʋ jie, ɩ̃ ɩ a ba taw a daba ʋlɔ wa nɩ.

¹⁸ Ɩ̃ a lɛ a ʋ ƴɛr-ƴɔnbɔ na ir ɩraa, baa ƴɔ̃w ʋ a ƴɛr-faar ala ɩ̃ na dãa tɩɛrɛ wa.

¹⁹ Ɩ̃ a ba puorfʋ ƴɛrɩ̃ tɛw ba cɩɩrɛ nɩ taa, nɩ a nɩrɛ kãw na kpi ba na bʋɔlɔ a *Jeeju, ɩ̃ a Pol yele a ʋ ɩ na nɩ-mimir.

²⁰ Maa bɔ̃w a mɩnɛ ɩ̃ na ɩrɛ ɩ̃ mana a ƴɛr-nɔhɔ̃ wa, ala-ɩ̃-sɔ ɩ̃ soor a Pol a ala ɩ̃ ɩ ʋ bʋɔrɔ na ʋ cen a Jerujalɛm a ba na guor a ʋ ƴɛrɩ̃ a be.

²¹ Ɩ̃-cɛ a Pol yelʼã a ʋ bʋɔrɔ na a ʋ ƴɛrɩ̃ a guor a jaman-kpɛ̃ɛ nii-sɔw. Ala-ɩ̃-sɔ ɩ̃ ƴɔ̃w a ba tɛrɛ ʋ wa ta nɩ a lɛ ɩ̃ na tɩɩrɛ ʋ a ba cere nɩ ʋ a Sejaar jie.”

²² A Agɩrɩpa yel a Fɛsɩtɩsɩ: “A maa, ɩ̃ mɩ bʋɔrɔ na ɩ̃ wõ a ʋna daba ƴɛrɩ̃.” A Fɛsɩtɩsɩ yel ʋ: “A bio, fʋ na wõ na a ʋ ƴɛrɩ̃.”

²³ A dɩvɩɛ bio, a Agɩrɩpa nɩ a Berenisi wɩ na kpɛɛrɛ a ƴɛrɩ̃ ƴɛrfʋ die pʋɔ miile a ba mɩ̃ɛ a ba pɛwrɛ ba. A sɔdaalsɩ nɩ-bɛrɛ nɩ a tẽw nɩ-bɛrɛ mɩ pɔw ba na kpɛ nɩ, ɩ̃ a Fɛsɩtɩsɩ ƴɔ̃w a ba taw a Pol wɩ nɩ.

²⁴ A Fɛsɩtɩsɩ yel: “A fʋ̃ʋ jamana Agɩrɩpa nɩ a nyɩmɩ nyɩ jaa sɩ na lãa be nɩ a ka, nyɩ nyɛ na a daba na, a ʋlɔ a Jufisɩ ba jaa ƴɔnɔ a ƴɛrɩ̃, a be a Jerujalɛm nɩ a ka mɩ, wuure nɩ kpɛ̃w yele nɩ a ꞌwaa sɛw na cãa ɩ nɩ-mimir wa.

²⁵ Ɩ̃-cɛ a maa, ɩ̃ nyɛ na bɔ̃w ka ꞌwaa maal fãa a sɩ na ƴɔ̃w ʋ a kũu pʋɔ wa, ɩ̃ a-na-ɩ ʋ sʋɔrʼã a ba cenʼɩ̃ ʋ a jaman-kpɛ̃ɛ jie, ɩ̃ yelʼã áa be ba na cenʼɩ̃ ʋ.

²⁶ Ɩ̃ a mɩnɛ ɩ̃ na ma bɔ̃w vɩlaa a ala na sɛw ɩ̃ na sɛb kʋ a jaman-kpɛ̃ɛ a ʋ ɩnɛ wa, ɩ̃ taw ʋ na wa nɩ a fʋ̃ʋ jamana Agɩrɩpa nii-sɔw, nɩ a nyɩmɩ nyɩ jaa nii-sɔw, a mɩnɛ a nyɩmɩ wa soor ʋ baar, ɩ̃ bɔ̃w a ala na sɛw ɩ̃ sɛb tɩɩr.

²⁷ A-na-ɩ ɩ̃ tɩɛrʼã bɔ̃w ka aa vɩɛlɛ a sɩ na tɩɩr a kasu sʋbɔ ɩ̃ ma tɩɩr sɛbɛ miilʼɩ̃ a ƴɛrɩ̃sɩ ala sɩ na ƴɔ̃w ʋ wa.”