Nɩ-tʋnɩsɩ tʋmɔ Sɛbɛ 24 - A NAAŊMƖN PƲLƖ̃-TA-PAALAA

A ƳƐRƖ̃ A JUFISƖ NA ƳƆNƆ A POL

¹ A lɛ a bibie anuu na tɔl baar, a Ananɩya na ɩ a *baar-lo-nɩ-kpɛ̃ɛ ta na a Sejare, nɩ a ni-dierbe ŋmɛɛ, nɩ a ƴɛr-kpɛn-mana ba na buɔlɔ a Tɛtiil. Ba cenʼã a tẽ-ꞌwuoro Felisi nii-sɔw na mana a ba ƴɛrɩ̃sɩ ba na tɛrɛ ƴɔnɔ a Pol.

² Ba buɔlʼã a Pol kpɛ nɩ a be, a Tɛtiil nyɔw a ƴɛrɩ̃ ɩ̃ yel a nɔhɔ̃: “Ɩ̃ nɩ-kpɛ̃-vɩlaa, a nʋmɔ sɩ na a mɩnɛ a tẽw na ɓãa ɩ a vɩlaa a fu ɩnɛ. A fu yɛ̃ vɩlaa fu na tɛrɛ ꞌwuoro nɩ a tẽw, ala ɩnɛ a tẽw cɔɔrɩ̃ lɩɛb ɩ a vɩlaa.

³ A nʋmɔ sɩ na a sɩ puoro fu vɩlaa a ala a jaa ɩnɛ sɩ na nyɛ a jiir a jaa.

⁴ Ɩ̃-cɛ maa buɔrɔ ɩ̃ vɔw fu wa. Ala-ɩ̃-sɔ ɩ̃ suɔr fu na a fu na cɛl sɩ fɩ̃ɩ nɩ a fu pʋ-pɩlaa fu na tɛrɛ.

⁵ Sɩ nyɛ na a daba na ʋ sãwna a nɩbɛ jur yʋɔrɔ nɩ. Ʋ ma nyanyaana na a Jufisɩ a ten a jaa a ba dama taa, ɩ̃ ʋ ɩ na a Najarɛtɩ nɩbɛ ni-diere.

⁶ Ʋ mɩ dãa na buɔrɔ ʋ sãw a sɩ Naaŋmɩn puor-yir kpɛ̃ɛ, a sɩ nyɔw ʋ [buɔrɔ sɩ guor a ʋ ƴɛrɩ̃ a mɩnɛ a sɩ ƴɛr-kpɛn na yel.

⁷ Ɩ̃-cɛ a sɔdaalsɩ nɩ-kpɛ̃ɛ Lɩsɩyasɩ wa na na jal ʋ a sɩ nuumɩ,

⁸ ɩ̃ na ʋ ƴɔ̃w a sɩmɩ na ɩ a ʋ ƴɛr-ƴɔnbɔ a sɩ wɩ a fu sɛ̃.] Fʋ̃ʋ soor ʋ, a fu mɩ̃ɛ na tʋɔ na bɔ̃w a ala a jaa sɩ na ƴɔnɔ ʋ par.”

⁹ A Jufisɩ mɩ sɔw na áa ƴɛrɩ̃sɩ ala ba na ƴɔnɔ ʋ ɩ na yel-mɩ̃ɛ.

A POL NA MIIL A Ʋ YEL-MƖ̃Ɛ A FELISI NII-SƆW

¹⁰ A tẽ-ꞌwuoro kʋ na a Pol sɔr a ʋ ƴɛr, ʋ yel: “Ɩ̃ bɔ̃w ka a yomo waa na fu na ꞌwuoro a tẽw na, ala-ɩ̃-sɔ a nʋmɔ ma na ɩ̃ na miil a ɩ̃ yel-mɩ̃ɛ a fu nii-sɔw.

¹¹ Ɩ̃ na ta a Jerujalɛm a Naaŋmɩn puorfʋ ɩnɛ, aa po bibie pie-nʼayi wa. Fu na tʋɔ na soor bɔ̃w.

¹² Baa dãa nyɛ ma ɩ̃ cɩɩrɛ taa nɩ nɩrɛ a Naaŋmɩn puor-yir kpɛ̃ɛ pʋɔ wa, mɩɩ ɩ̃ dama a nɩbɛ a ba *puorfʋ yie, mɩɩ a tẽw pʋɔ wa.

¹³ A ala a nɩbɛ na ƴɔnɔ ma a ƴɛ̃ƴɛrɩ̃, baa tʋɔrɔ miile a ɩrɛɛ yel-mɩ̃ɛ wa.

¹⁴ Ɩ̃-cɛ ɩ̃ na tʋɔ na miil fu a ala na ɩ a yel-mɩ̃ɛ: a sɩ sãa-kʋnbɔ Naaŋmɩn tʋn ɩ̃ tʋnɔ tuure nɩ a sɔr paalaa ʋlɔ ba na yel a jiri sɔr ʋ. Ɩ̃-cɛ ɩ̃ sɔw na a ala a jaa na sɛb a *Naaŋmɩn ƴɛr-kpɛn sɛbɛ pʋɔ, nɩ a ʋ ƴɛr-hierbe sɛbsɩ pʋɔ.

¹⁵ Ɩ̃ tɛrɛ na a tɩɛrʋ̃ daadaa a Naaŋmɩn jie, a mɩnɛ a bala mɩ̃ɛ na mɩ tɛrɛ: áa nɩbɛ jaa, a nɩ-sono nɩ a nɩ-faar na irʼã a kũu pʋɔ.

¹⁶ Ala-ɩ̃-sɔ ɩ̃ ma ƴɔ̃w na fãw ɩ̃ tɛrɛ a ɩ̃ suur cĩcĩ a daar a jaa ɩ̃ na ɩ cɛcɛ a Naaŋmɩn nii-sɔw nɩ a nɩbɛ nii-sɔw.

¹⁷ “A yomo waa na ɩ̃ na yi a Jerujalɛm, ɩ̃-cɛ ɩ̃ lɛ wa nɩ na a libie na sũo nɩ a nãw deme na be a ɩ̃ tẽw pʋɔ, ɩ̃ mɩ lo a baar kʋ a Naaŋmɩn.

¹⁸ A ala ɩ̃ maala a Naaŋmɩn puor-yir kpɛ̃ɛ pʋɔ a ba nyɛ ma. Ɩ̃ dãa na pɔlɩ̃ a ɩ̃ mɩ̃ɛ baar, ɩ̃ nɩ-yaw ma dãa be be wa, damfʋ ma mɩ dãa be be wa.

¹⁹ A Jufisɩ ŋmɛɛ na yi a Ajɩ dãa na be be. A ala ɩ ba tɛrɛ na ƴɛrɩ̃ ƴɔnɔ ma, bala ɩ̃ dãa sɛw ba wa a ka a fʋ nii-sɔw na ba ƴɛr.

²⁰ Mɩɩ a nɩbɛ basɩmɛ, bá yel a sãwfʋ ʋlɔ ba na nyɛ a ɩ̃ jie a lɛdaar ɩ̃ na be a ba *ƴɛr-guor-nɩ-bɛrɛ nii-sɔw,

²¹ ɩ̃ a ala ma ɩ a ƴɛr-bir ʋlɔ ɩ̃ na dãa ɩraa a ba sɔ̃w ɩ̃ ƴɛrʼɩ̃ a kpɛ̃w yel: ‘Ɩ̃ sɔw na a kũu-pʋɔ-irfʋ ƴɛrɩ̃, ala-ɩ̃-sɔ ɩ̃ be ka a nyɩ nii-sɔw a ƴɛrɩ̃ guorfʋ pʋɔ a dɩnaa!’ ”

²² A Felisi na bɔ̃w a *Kirisi sɔr ƴɛrɩ̃ vɩlaa wɛl ba na bar ɩ̃ yel ba: “A sɔdaalsɩ nɩ-kpɛ̃ɛ Lɩsɩyasɩ ɩ̃ wa wa, ɩ̃ na guorʼã a nyɩ ƴɛrɩ̃,”

²³ ɩ̃ na ʋ ƴɔ̃w a sɔdaal-nɩ-kpɛ̃ɛ ʋ ɩ a sɔdaalsɩ a ba ꞌwuoro a Pol, ɩ̃ ma mɩ kʋ ʋ sɔr, ɩ̃ mɩ bar a ʋ badɛɛ a ba ma wɩ sũo ʋ.

A POL NA IRAA A FELISI NƖ A Ʋ PƆW NII-SƆW

²⁴ A bibie fɩ̃ɩ tɔlʼã, a Felisi lɛ wa nɩ a ʋ pɔw Dɩrɩsɩl na ɩ a Jufi nɩrɛ. Ʋ ɩ na a ba wa nɩ a Pol ʋ cɛlɛ a *Jeeju-Kirisi puorfʋ ƴɛrɩ̃ ʋ na ƴɛrɛ kʋrɔ ba.

²⁵ Ɩ̃-cɛ a mɩnɛ a Pol na cãa ƴɛrɛ a ala na ɩ a torfʋ ƴɛrɩ̃, nɩ a mɩnɛ a nɩrɛ na mɩ sɛw ʋ tɛrɛ a ʋ mɩ̃ɛ, nɩ a mɩnɛ a ƴɛrɩ̃ guorfʋ bibir nɔɔ tara, dãbɩ̃ɛ nyɔw na a Felisi, ʋ yel ʋ: “A ƴɛ̃ƴɛrɩ̃ na, fʋ na tʋɔ na cen, ɩ̃ a maa wa nyɛ vuo, ɩ̃ na lɛ bʋɔl fʋ na.”

²⁶ Ɩ̃ ʋ mɩ tɩɛrʼã beeka a Pol na kʋ ʋ na libie, ala-ɩ̃-sɔ ʋ ma bʋɔlɔ ʋ tɔ̃tɔ̃tɔ̃ a ba ƴɛrɛ taa.

²⁷ A lɛ a yomo ayi na tɔl baar, a jaman-kpee na dɩ a Pɔrsɩ Fɛsɩtɩsɩ wa na jew a Felisi. Ɩ̃-cɛ a-na-ɩ a Felisi bʋɔrɔ na ʋ maal a nʋmɔ a Jufisɩ, ʋ barʼã a Pol a kasu pʋɔ.