Nɩ-tʋnɩsɩ tʋmɔ Sɛbɛ 17 - A NAAŊMƖN PƲLƖ̃-TA-PAALAA

A POL NƖ A SƖLASƖ NA CEN A TƐSALONIKI

¹ A Pol nɩ a Sɩlasɩ tɔlʼɩ̃ na a Ãfipoli nɩ a Apoloni ten, ɩ̃ cen na ta a Tɛsaloniki, a jie ʋlɔ a Jufisɩ *puorfʋ yir na be.

² A Pol cenʼã a puorfʋ yir a mɩnɛ ʋ na mɩlɩ̃ nɩ. Ʋ de na bibi-ciirsɩ ata na ʋ man ba a ƴɛrɩ̃sɩ ala na be a Naaŋmɩn Sɛbɛ pʋɔ.

³ Ʋ jaana ba na miile nɩ ba áa sɛw na a *Kirisi na nyɛ won ɩ̃ kpi, ɩ̃ ir a kũu pʋɔ. Ʋ lɛ yele ba na go: “A *Jeeju ʋlɔ ɩ̃ na miile nyɩ, ʋlɔ ɩ̃ ɩ a Kirisi.”

⁴ A nɩbɛ ŋmɛɛ a ba sɔ̃w sɔw na ɩ̃ pɔw a Pol nɩ a Sɩlasɩ. A Gɩrɛkɩ yaw jie na puoro a Naaŋmɩn mɩ sɔw na lãa nɩ a pɔɔ-nɩ-bɛrɛ yaw jie.

⁵ Ɩ̃-cɛ a nyuur nyɔw na a Jufisɩ, a ba gbɛɛrɩ̃ a bɩcɩɩr deme ba na nyɛ a daa pʋɔ, a ba dama a nɩbɛ a tẽw ɩrɛ wilewile. Ba cenʼã a Jasɔ̃ yir na bʋɔrɔ a Pol nɩ a Sɩlasɩ aa ba nyɔɔr ba cenʼɩ̃ a nɩbɛ nii-sɔw.

⁶ Ɩ̃ a mɩnɛ ba na ma nyɛ ba wa, ba nyɔw na a Jasɔ̃ nɩ a yɛɛr ŋmɛɛ, taw cenʼɩ̃ a tẽw nɩ-bɛrɛ nii-sɔw, ɩ̃ wuure yele: “A nɩbɛ na damʼã a ten a jaa yɔ nɩ, ɩ̃ a ƴɛ̃ƴɛrɩ̃ na, ba mɩ ta na a sɩ tẽw,

⁷ a Jasɔ̃ de ba kulʼɩ̃ a ʋ yir. A nɩbɛ bala ba jaa maala na a ala a sɩ jamana ƴɛr-kpɛn na ciire, a-na-ɩ ba yele na a jaman-kpee be na be a ba bʋɔlɔ Jeeju.”

⁸ A ʋna ƴɛrɩ̃ damʼã a nɩbɛ nɩ a tẽw nɩ-bɛrɛ ba jaa,

⁹ a nɩ-bɛrɛ ƴɔ̃w a Jasɔ̃ nɩ a yɛɛr bala a ba ya libie bin, ɩ̃ a ba pãa bar ba a ba cen.

A POL NƖ A SƖLASƖ A BEERE-TẼW

¹⁰ A lɛ a wɩɛr na liw, a yɛɛr tɔw na a Pol nɩ a Sɩlasɩ bar a jie naan a ba cen a Beere. A mɩnɛ ba na ta a be, ba kpɛ na a Jufisɩ puorfʋ yir pʋɔ.

¹¹ A Jufisɩ bala a be tɛrɛ na yɛ̃ vɩlaa gãw a Tɛsaloniki deme. Ba cɛlʼã a Pol ƴɛrɩ̃ nɩ ɓĩɓinfʋ, ɩ̃ ma ꞌloro a Naaŋmɩn Sɛbɛ a bibie a jaa, bʋɔrɔ ba bɔ̃w a ala ɩ a ala a Pol na yel ɩ na a lɛ.

¹² Nɩ-yaw a ba sɔ̃w sɔw na, lãa nɩ a Gɩrɛkɩ pɔɔ-naabsɩ nɩ a ba dabsɩ yaw.

¹³ Ɩ̃-cɛ a lɛ a Jufisɩ bala na be a Tɛsaloniki na wõ áa Pol mɩ ƴɛrɛ na a Naaŋmɩn ƴɛrɩ̃ a Beere-tẽw, ba cenʼã a be na ƴɛrɛ a su-ƴɛrɩ̃sɩ dama nɩ a nɩbɛ.

¹⁴ Ala-ɩ̃-sɔ a yɛɛr ƴɔ̃w a Pol a man sɔr a jie naan ʋ cen, ɩ̃ cɛ a Sɩlasɩ nɩ a Timote bar a ba jɛ a Beere.

¹⁵ A bala na tɔwrɔ a Pol cenʼɩ̃ ʋ na na ta nɩ a Atɛn, ɩ̃ a mɩnɛ ba na lɩɛb kule, ʋ tʋ̃ ba na a Sɩlasɩ nɩ a Timote sɛ̃, a ba yel ba a ba wɩ a ʋ sɛ̃ fɔfɔw.

A POL A ATƐN-TẼW

¹⁶ A daar ʋlɔ a Pol na jɛ a Atɛn-tẽw gu a Sɩlasɩ nɩ a Timote, a suur nyɩrɩ̃ na dɩrɛ ʋ, a mɩnɛ ʋ na nyɛ a tɩbɛ a sɛw a ʋna tẽw naa.

¹⁷ Ala-ɩ̃-sɔ ʋ ma mana na taa a be a *puorfʋ yir pʋɔ nɩ a Jufisɩ nɩ a nɩ-bʋlsɩ bala na mɩ puoro a Naaŋmɩn, ɩ̃ ma mɩ mana taa nɩ a nɩbɛ bala ʋ na tuoro nɩ a daa pʋɔ a bibie a jaa.

¹⁸ A tɩɛrɩ̃-yaw nɩbɛ ba na bʋɔlɔ a Epikiri nɩbɛ nɩ a Sitoyisi-nɩbɛ nyɔw na ɩ̃ cɩɩrɛ taa nɩ a Pol. A ŋmɛɛ soorʼã: “Bõ a ƴɛr-kɔ̃-pi sʋbɔ na mɩ bʋɔrɔ ʋ yel?” A ŋmɛɛ yel: “A wɔ̃ na taa nɩ a naaŋmɩn paala ƴɛrɩ̃ ʋ hiere.” Ba yelʼã a lɛ a-na-ɩ a Pol ƴɛrɛ na a *Jeeju ƴɛrɩ̃, nɩ a kũu-pʋɔ-irfʋ ƴɛrɩ̃.

¹⁹ Ala-ɩ̃-sɔ ba tɛrɛ na a Pol cenʼɩ̃ a ƴɛrɩ̃ ƴɛrfʋ jie ʋlɔ ba na bʋɔlɔ a Aropasɩ, ɩ̃ yel ʋ: “Fʋ na tʋɔ na man sɩ a ƴɛr-paalaa ʋlɔ fʋ na ƴɛrɛ a sɩ na mɩ wonaa mɩɩ?

²⁰ A-na-ɩ sɩ wõ na ƴɛrɩ̃sɩ a fʋ jie sɩ na ma dãa wõ wa. Ala-ɩ̃-sɔ a sɩ bʋɔrɔ sɩ bɔ̃w a par.”

²¹ A-na-ɩ a Atɛn-tẽw nɩbɛ ba jaa nɩ a sáanba na be a ba tẽw pʋɔ, a ba ben ɩ na ba ƴɛrɛ a yel-paala cɛlɛ nɩ tɛw.

²² A Pol ir ɩraa a nɩbɛ bala na be a Aropasɩ nii-sɔw ɩ̃ yel: “Atɛn nɩbɛ! Ɩ̃ nyɛ na a nyɩ tʋmɔ a jaa bɔ̃w ka nyɩ sɩrɩ̃ na puoro a ŋmɩn-yaw.

²³ A-na-ɩ a mɩnɛ ɩ̃ na yʋɔrɔ ꞌwuoro a nyɩ ŋmɩn-puor-yele, ɩ̃ nyɛ na baar lofʋ jie kãw a ba sɛb ƴɔ̃w: ‘A naaŋmɩn ʋlɔ sɩ na ma bɔ̃w wa.’ Ala-ɩ̃-sɔ, a ʋlɔ nyɩ na puoro ɩ̃ ma bɔ̃w wa, ʋlɔ ɩ̃ wa miile nyɩ.

²⁴ A Naaŋmɩn ʋlɔ na maal a tẽw nɩ a yele a jaa na be a tẽw pʋɔ, ʋlɔ ɩ̃ ɩ a Nɩ-kpɛ̃ɛ a saꞌlon nɩ a tẽw pʋɔ. ꞌWaa gana a yie ala a nɩbɛ na mɛ nɩ a ba nur kʋ ʋ wa.

²⁵ ꞌWaa mɩ bʋɔrɔ a nɩbɛ nuu ʋ maal bom kʋ ʋ, wɔ̃ taa nɩ bom ɩ̃ ɓɔr ʋ wa, a-na-ɩ a ʋlɔ mɩ̃ɛ ɩ̃ kʋrɔ a nɩbɛ ba jaa a vʋʋrʋ̃ nɩ a baafʋ, nɩ a yele a jaa.

²⁶ A dab-bõ-ƴen jie a Naaŋmɩn nyɔw ɩ̃ mɛ a nɩ-bʋrɔ bʋrɔ ba jaa, ɩ̃ ƴɔ̃w ba a ba jɛ a ten ten a jaa pʋʋr. Ʋ dãa na de nĩe ƴɔ̃w a nɩbɛ a daar ʋlɔ nɩ a jiir ala ba na beree ka a tẽw pʋɔ.

²⁷ Ʋ maalʼã a ala, a ba na tʋɔ bẽbene bʋɔrɔ ʋ, ɩ̃ a ba bɔfʋ ɩnɛ, a nʋmɔ wa sɔw ba nyɛ ʋ. Ɩ̃-cɛ, sɩrɛ jaa ʋ, a Naaŋmɩn ma jãa nɩ a sɩ jaa bõ-ƴene-ƴene wa.

²⁸ A-na-ɩ ‘a ʋ jie a sɩ baafʋ yi, ʋlɔ ma maal sɩ a sɩ cere, ɩ̃ a ʋlɔ ɩnɛ sɩ be a ka a tẽw pʋɔ.’ A ɩ na a mɩnɛ a nyɩ yɛ̃ deme ŋmɛɛ na dãa yel: ‘Sɩ mɩ ɩ na a Naaŋmɩn bibiir.’

²⁹ “A-na-ɩ sɩ ɩ na a Naaŋmɩn bibiir, aa sɛw a sɩ na tɩɛr beeka a Naaŋmɩn wɔ̃ na taa nɩ tɩɩb ba na maalʼɩ̃ sɛlmɛ mɩɩ kur-pɩlaa mɩɩ kubir ba na maalʼɩ̃ a ba bɔ̃wfʋ nɩ a ba mɩ̃ɛ yɛ̃ wa.

³⁰ A Naaŋmɩn ma cãa goro nɩ a daar ʋlɔ a nɩbɛ na ma dãa bɔ̃w a buon wa, ɩ̃-cɛ a ƴɛ̃ƴɛrɩ̃ na ʋ bʋɔlɔ na a nɩbɛ ba jaa a jiir a jaa a ba lɩɛb a ba yɛ̃.

³¹ A-na-ɩ a Naaŋmɩn ƴɔ̃w na a bibir ʋlɔ ʋ na diere a nɩ-bõ-ƴen ʋlɔ ʋ na biin mana nɩ a ten a jaa nɩbɛ ƴɛrɩ̃sɩ tuure nɩ a torfʋ. Ʋ miilʼã a nɩbɛ ba jaa áa ʋna ƴɛrɩ̃ ɩ na yel-mɩ̃ɛ, a mɩnɛ ʋ na jaw a ʋna nɩrɛ naa a kũu pʋɔ yi nɩ.”

³² A lɛ ba na wõ a Pol ʋ ƴɛr a kũu-pʋɔ-irfʋ ƴɛrɩ̃, a ŋmɛɛ laara ʋ na, ɩ̃ a ŋmɛɛ yel: “Sɩ bʋɔrɔ na fʋ lɛ bɔ̃w ƴɛr sɩ a ƴɛrɩ̃ naa bibir kãw go.”

³³ A lɛ, a Pol bar ba na ɩ̃ yi cen.

³⁴ A ŋmɛɛ pɔw ʋ na ɩ̃ sɔw de a *Kirisi. A ba pʋɔ, a Denisi be na be na ɩ a Aropasɩ nɩbɛ ni-diere, nɩ a pɔw na dɩ a Damari, nɩ a ŋmɛɛ go.