Nɩ-tʋnɩsɩ tʋmɔ Sɛbɛ 16 - A NAAŊMƖN PƲLƖ̃-TA-PAALAA

A TIMOTE NA LÃA YƲƆRƆ NƖ A POL NƖ A SƖLASƖ

¹ A Pol ta na a Dɛrbɩ nɩ a Lɩsɩtɩ. A be popuoro kãw dãa na be be ba na bʋɔlɔ Timote. A ʋ mã ɩ na Jufi ɩ̃ puoro a *Jeeju-Kirisi, ɩ̃-cɛ a ʋ sãa ɩ na Gɩrɛkɩ nɩrɛ.

² A yɛɛr na be a Lɩsɩtɩ nɩ a Ɩkɔnɩyɔ̃ bʋɔlɔ ʋ na yo-vɩlaa.

³ A Pol bʋɔrɔ na ʋ tɛrɛ ʋ, ʋ ɩ a ʋ lãa-yʋɔrɔ, ɩ̃ de ʋ ŋmaa a yʋɔr a Jufisɩ ɩnɛ na be a be a ana ten naa pʋɔ, a-na-ɩ a nɩbɛ ba jaa bɔ̃w na áa ʋ sãa ɩ na Gɩrɛkɩ nɩrɛ.

⁴ A ten ala ba na tɔlɔ yire, ba miile na a popuorbo a ala a Jerujalɛm *nɩ-tʋnɩsɩ nɩ a duo-puor-ni-dierbe na guor taa, yele nɩ ba a ba jɔrɔ a ana ƴɛrɩ̃sɩ.

⁵ A lɛ, a *duo-puorbo pɔwrɔ na a fãgã a ba ƴɔ̃w-nyãa pʋɔ, ɩ̃ a nɩbɛ waara dɔɔlɔ a bibie a jaa.

A POL NA NYƐ A SƖƐ BOM A TOROWASƖ

⁶ A Naaŋmɩn Sɩɛ mɔ̃w na a Pol nɩ a Sɩlasɩ nɩ a Timote a Naaŋmɩn ƴɛrɩ̃ ƴɛrfʋ bar a Ajɩ-tẽw pʋɔ, a ba tɔl yi a Fɩrɩjɩ nɩ a Galatɩ wɩɛr.

⁷ A lɛ ba na ta pɩɛl a Mɩsɩ ba dãa na bʋɔrɔ ba cen a Bitini, ɩ̃-cɛ a *Jeeju Sɩɛ ma kʋ ba sɔr wa.

⁸ Ala-ɩ̃-sɔ a ba tɔl yi a Mɩsɩ, ɩ̃ cen a Torowasɩ na be a man nʋɔr.

⁹ A tɩsɔw, a Pol nyɛ na sɩɛ bom. Ʋ nyɛ na a Masɛdɔn nɩrɛ ʋ ɩraa ɩ̃ sʋɔrɔ ʋ yele nɩ: “Gãw wa ka a Masɛdɔn na sũo sɩ bɩlɛ!”

¹⁰ A lɛ a Pol na nyɛ a ʋna sɩɛ bom baar, sɩ tɔɔ na bʋɔrɔ a Masɛdɔn cenfʋ, a-na-ɩ sɩ bɔ̃w ka a Naaŋmɩn ɩ̃ bʋɔl sɩ a sɩ na cen na ƴɛr a ʋ ƴɛr-son kʋ a ʋna tẽw naa nɩbɛ.

A LƖDƖ NA SƆW A NƖ-KPƐ̃Ɛ ƳƐRƖ̃ A FƖLƖPƖ-TẼW

¹¹ A Torowasɩ sɩ kpɛ a gbor naa sɩ cen dẽdẽ na ta a Samotɩrasɩ-tẽw, ɩ̃ a bio na vɩɛ sɩ ta na a Neyapoli.

¹² A be sɩ yi ɩ̃ kpɛ a Masɛdɔn dãdãw wɩɛr ta a Fɩlɩpɩ-tẽw ʋlɔ a Orom nɩbɛ na sɔ, na sɩ jɛ a be maal bibie fɩ̃ɩ.

¹³ A *bibi-ciiraa dayen sɩ yi na a tẽw pʋɔ ɩ̃ cen a kʋlaa nʋɔr, a jie ʋlɔ sɩ na tɩɛr bɔ̃w ka puorfʋ jie be na, na sɩ jɛ ƴɛrɛ nɩ a pɔɔbɔ na tiw taa a be.

¹⁴ Ɩ̃ a pɔɔbɔ bala ƴen sʋbɔ dɩ na Lɩdɩ na yi a Tɩyatɩɩr, ɩ̃ ƴaba cẽcẽ-ɓɔmɔ, ɩ̃ puoro a Naaŋmɩn. Ʋ cɛlɛ na a sɩ ƴɛrɩ̃, a Nɩ-kpɛ̃ɛ yuo a ʋ tɩɛrɩ̃sɩ, ʋ sɔw de a ala a Pol na yele.

¹⁵ A lɛ ba na mʋr ʋ a kʋ̃ɔ pʋɔ, lãa nɩ a ʋ yir deme baar, ʋ sʋɔr sɩ na a sɩmɩ nyɛ bɔ̃w ka ʋ ɩ na a Nɩ-kpɛ̃ɛ ben sɩrɛ jaa, a sɩ wa jɛ a ʋ yir. Ɩ̃ na ʋ fɛr sɩ a sɩ sɔw.

A POL NƖ A SƖLASƖ BA NA ƳƆ̃W A KASU PƲƆ

¹⁶ A bibir kãw sɩ cere na a puorfʋ jie, na sɩ tuorʼɩ̃ gbãgba-poole a kɔ̃tɔn na tɛrɛ ma maala ʋ ʋ ƴɛrɛ a ala na be a nii-sɔw waara, pɔwrɔ a libi-yaw kʋrɔ a ʋ nɩ-bɛrɛ,

¹⁷ ʋ ma tɔɔ tuure sɩ a sɩmɩ nɩ a Pol, ɩ̃ wuure yele: “A nɩbɛ na ɩ na a saa juu Naaŋmɩn tʋtʋnbɔ. A faafʋ sɔr ba miile nyɩ.”

¹⁸ A bibie waa na ʋ na maala a lɛ, a wa pãa nyaw a Pol, ʋ lɩɛb yel a kɔ̃tɔn: “A *Jeeju-Kirisi yuor ɩ̃ de ƴɛrɛ nɩ fʋ! Yi ɩ̃ cɛ a poole na!” A kɔ̃tɔn tɔɔ yi ɩ̃ cɛ a poole a jie naan.

¹⁹ Ɩ̃-cɛ a mɩnɛ a poole nɩ-bɛrɛ na nyɛ bɔ̃w ka baa lɛ tʋɔrɔ pɔwrɔ a libie a ʋ jie wa, ba nyɔw na a Pol nɩ a Sɩlasɩ taw cenʼɩ̃ a jie a tẽw nɩbɛ na ma kpaara taa a fãgã deme nii-sɔw,

²⁰ na ba miilʼɩ̃ a *ƴɛr-guor-nɩ-bɛrɛ ɩ̃ yel: “A nɩbɛ na, Jufisɩ ba ɩ, ɩ̃ dama sɩ a tẽw.

²¹ Ba jaana na a nɩbɛ a ala a sɩmɩ Orom nɩbɛ na ciire, a ala sɩ na ma tʋɔrɔ sɔwrɔ mɩ maala wa.”

²² A nɩbɛ mɩ lɩɛbʼã nyɛ nɩ ba a suur, ɩ̃ a fãgã deme yaa a Pol nɩ a Sɩlasɩ cẽcene ɩ̃ ƴɔ̃w a ba fɔb ba nɩ a kpaarsɩ.

²³ A mɩnɛ ba na fɔb ba sɛw, ba nyɔw ba na ƴɔ̃w a kasu pʋɔ, ɩ̃ yel a kasu-gure, a ʋ bɔ̃w ꞌwuoro ba.

²⁴ A lɛ a kasu-gure na wõ a ʋna ƴɛrɩ̃, ʋ nyɔw na a Pol nɩ a Sɩlasɩ ƴɔ̃w a kasu di-baaraa pʋɔ, ɩ̃ de a ba gbɛɛ carɩ̃ a daa pʋɔ ɩ̃ lũ.

²⁵ A tɩsɔw porɩ̃, a Pol nɩ a Sɩlasɩ sʋɔrɔ na a Naaŋmɩn, cɩɛrɛ nɩ a yele pɛwrɛ nɩ ʋ, a kasu nɩbɛ cɛlɛ.

²⁶ A jie naan, a tẽw damʼã nɩ kpɛ̃w, a kasu yir dam de nɩ a dacin-kparaa, ɩ̃ a pana a jaa tɔɔ yuo a jie naan, a kasu deme bɔ̃jɔrɩ̃sɩ ꞌlor a jaa lo.

²⁷ A kasu-gure jaw ir, ɩ̃ a lɛ ʋ na nyɛ a kasu pana a yuo, ʋ vʋ̃ɔ na a ʋ bãjɩnɛ bʋɔrɔ ʋ kú nɩ a ʋ mɩ̃ɛ, a-na-ɩ ʋ beeka a kasu deme jɔ na.

²⁸ Ɩ̃-cɛ a Pol wuurʼã nɩ kpɛ̃w yel: “Taa maal a fʋ mɩ̃ɛ bier wa! Sɩ be na ka sɩ jaa.”

²⁹ A kasu-gure sʋɔrʼã a lãpa, pɔw kpɛ nɩ a kasu diem, ɩ̃ na ʋ lo gburĩ dume mine nɩ a Pol nɩ a Sɩlasɩ gbɛɛ pulẽe.

³⁰ Ʋ taw ba na yi nɩ ɩ̃ soor ba: “Ɩ̃ nɩ-bɛrɛ! Bõ ɩ̃ na maal ɩ̃ nyɛ a faafʋ?”

³¹ A ba yel ʋ: “Sɔw de a Nɩ-kpɛ̃ɛ *Jeeju, ɩ̃ a Naaŋmɩn na faa fʋ na, a fʋ̃ʋ nɩ a fʋ yir deme.”

³² Ɩ̃ ba ƴɛrʼã a Nɩ-kpɛ̃ɛ ƴɛrɩ̃ kʋ a ʋlɔ nɩ a ʋ yir deme ba jaa.

³³ A kasu-gure de ba na a ʋna tɩsɔw naa na ʋ pɛw ba a natɩɛ, ɩ̃ ɩ a ba tɔɔ mʋr ʋ a kʋ̃ɔ pʋɔ nɩ a ʋ yir deme ba jaa.

³⁴ Ʋ tɛrɛ na a Pol nɩ a Sɩlasɩ kpɛ nɩ a ʋ yir, kʋ ba bõ-dɩraa, ɩ̃ a nʋ̃ɔ ƴala a ʋlɔ nɩ a ʋ yir deme ba jaa, a Naaŋmɩn ba na sɔw de ɩnɛ.

³⁵ A lɛ a bio na vɩɛ, a ƴɛr-guor-nɩ-bɛrɛ tʋ̃ na a ba sõsũonbo yel a kasu-gure, a ʋ bar a nɩbɛ bala a ba cen.

³⁶ A kasu-gure cen na man a Pol a mɩnɛ ba na tʋ̃ yel ʋ yele nɩ: “A ƴɛr-guor-nɩ-bɛrɛ tʋ̃ na a ɩ̃ bar nyɩ a nyɩ cen. Nyɩ na tʋɔ na yi cenʼɩ̃ su-ɓaar.”

³⁷ Ɩ̃-cɛ a Pol yelʼã a sõsũonbo bala: “A sɩmɩ na ɩ a Orom nɩbɛ, ba fɔb sɩ na a pɔrɔ a nɩbɛ nii-sɔw, ɩ̃ baa dãa guor a sɩ ƴɛrɩ̃ nyɛ a fãa ʋlɔ sɩ na maal wa, ɩ̃ na ba lɛ ƴɔ̃w sɩ a kasu pʋɔ. A ƴɛ̃ƴɛrɩ̃ na, ba bʋɔrɔ na ba sɔɔlɩ̃ yuo sɩ bar mɩɩ? Saa sɔw a lɛ wa. A sɛw na a bala mɩ̃ɛ ba wa na yuo sɩ bar.”

³⁸ A sõsũonbo cenʼã na man a lɛ kʋ a ƴɛr-guor-nɩ-bɛrɛ, a dãbɩ̃ɛ nyɔw ba a mɩnɛ ba na wõ áa Pol nɩ a Sɩlasɩ ɩ na a Orom nɩbɛ.

³⁹ Ba cenʼã na ɓaalɩ̃ ba yi nɩ a kasu pʋɔ, ɩ̃ sʋɔrɔ ba a ba yi a tẽw ʋlɔ pʋɔ.

⁴⁰ A lɛ a Pol nɩ a Sɩlasɩ na yi a kasu pʋɔ, ba cenʼã a Lɩdɩ yir, na ba lɛ nyɛ a yɛɛr, ɩ̃ ƴɛr a ꞌlafʋ ƴɛrɩ̃ kʋ ba, ɩ̃ pãa yi a tẽw ʋlɔ pʋɔ.