Nɩ-tʋnɩsɩ tʋmɔ Sɛbɛ 15 - A NAAŊMƖN PƲLƖ̃-TA-PAALAA

A POPUORBO NA DUO TAA A JERUJALƐM

¹ A nɩbɛ ŋmɛɛ yi na a Jude ɩ̃ wɩ a Ãtɩyɔsɩ na jaana a yɛɛr a ƴɛrɩ̃ na yele nɩ: “A Naaŋmɩn ma faara nyɩ wa, a ala ma ɩ nyɩ ɩ na a ba ŋma a nyɩ yɔɛ a mɩnɛ a Mowisi ƴɛr-kpɛn na yel wa.”

² Ɩ̃ a Pol nɩ a Banabasɩ ma sɔw fɩ̃ɩ wa, a ba faa taa nɩ kpɛ̃w a ʋna ƴɛrɩ̃ ɩnɛ. Ala-ɩ̃-sɔ a yɛɛr mɩɩnʼã taa ɩ̃ yel áa Pol nɩ a Banabasɩ nɩ a Ãtɩyɔsɩ nɩbɛ ŋmɛɛ ba cen a Jerujalɛm na man taa nɩ a *nɩ-tʋnɩsɩ nɩ a duo-puor-ni-dierbe a ʋna ƴɛrɩ̃ je kãa.

³ Ɩ̃ a *duo-puorbo tɔw ba na ƴɔ̃w a sɔrɩ̃, a ba cen yi a Fenisi nɩ a Samari tẽw pʋɔ, na ba mɩɩnɛ a mɩnɛ a nɩ-bʋlsɩ na lɩɛb ɩ a Naaŋmɩn nɩbɛ. A ʋna ƴɛrɩ̃ naa kʋ na a yɛɛr ba jaa nʋɔ kpɛ̃ɛ.

⁴ A lɛ ba na ta a Jerujalɛm, a duo-puorbo nɩ a nɩ-tʋnɩsɩ, nɩ a ni-dierbe de ba na, ɩ̃ a bala na yi a Ãtɩyɔsɩ man ba na a ala a jaa a Naaŋmɩn na de ba maalʼɩ̃.

⁵ Ɩ̃-cɛ a *Farɩsɩ nɩbɛ ŋmɛɛ na ɩ a popuorbo irʼã ɩ̃ yel: “A sɛw na a ba na mɩ ŋma a nɩ-bʋlsɩ a yɔɛ, ɩ̃ ƴɔ̃w ba a ba jɔrɔ a Mowisi ƴɛr-kpɛn.”

⁶ A nɩ-tʋnɩsɩ nɩ a duo-puor-ni-dierbe duo na taa mana taa a ʋna ƴɛrɩ̃.

⁷ A lɛ ba na man taa kam, a Pɩɛr irʼã ɩ̃ yel: “Yɛɛr! Nyɩ bɔ̃w na bɔ̃w ka a Naaŋmɩn ɩ̃ vɛl ma ir a nyɩ sɔ̃w a korĩ-cɛ, ɩ̃ na ƴɛrɛ a ʋ ƴɛr-son kʋrɔ a nɩ-bʋlsɩ, a ba na wonaa ɩ̃ sɔw de.

⁸ A Naaŋmɩn na bɔ̃w a nɩbɛ sube, ʋ miilʼã a mɩnɛ ʋ na sɔw de ba, a-na-ɩ ʋ kʋ ba na a ʋ Sɩɛ a mɩnɛ ʋ na mɩ dãa kʋ sɩ.

⁹ ꞌWaa maal bom kpee a ba jie nɩ a sɩ jie wa, a-na-ɩ ʋ maalʼã a ba sube a ɩ cɛcɛ a ba ƴɔ̃w-nyãa ba na tɛrɛ nɩ ʋ ɩnɛ.

¹⁰ Ala-ɩ̃-sɔ bõ ɩ̃ ɩ a ƴɛ̃ƴɛrɩ̃ na a nyɩ bɩɩrɛ a Naaŋmɩn bʋɔrɔ nyɩ tuo a popuorbo a tuor ʋlɔ a sɩ sãa-kʋnbɔ nɩ a sɩmɩ mɩ̃ɛ na ma tʋɔ tuo wa?

¹¹ Sɩ ɛ̃ɛ na tɩɛr bɔ̃w ka a ɩ na a Nɩ-kpɛ̃ɛ *Jeeju-Kirisi wɩɛfʋ ɩnɛ a Naaŋmɩn faa sɩ, a mɩnɛ ʋ na mɩ faa ba.”

¹² A nɩbɛ ba jaa na duo taa, ba sine na ɩ̃ cɛlɛ a Banabasɩ nɩ a Pol na mana a mɩnɛ a Naaŋmɩn na de ba maalʼɩ̃ a nɔ-kofʋ tʋmɔ na miile a ʋ kpɛ̃w a nɩ-bʋlsɩ sɔ̃w.

¹³ A lɛ ba na ƴɛr baar, a Jakɩ yelʼã: “Yɛɛr! Nyɩ́ cɛlɛ.

¹⁴ A Sɩmɔ̃ manʼã a mɩnɛ a Naaŋmɩn na tɩɛrʼɩ̃ a nɩ-bʋlsɩ a korĩ-cɛ, bʋɔrɔ ʋ vɛl ir a nɩbɛ a ba pʋɔ, a ba ɩ a ʋ ben.

¹⁵ A ƴɛr-hierbe ƴɛrɩ̃sɩ mɩ ɩ na bõ-ƴen nɩ a ƴɛrɩ̃ na. A-na-ɩ a yelʼã a Naaŋmɩn Sɛbɛ pʋɔ:

¹⁶ ‘A Nɩ-kpɛ̃ɛ yelʼã: A ala ɩ̃ baar, ɩ̃ nɔɔ wa na na mɛ a Davɩtɩ yir ʋlɔ na dãa lo. Ɩ̃ na lɛ mɛ na a ʋ dacine ala na wɛl, ɩ̃ lɛ gbɛɛrɩ̃ a ir ɩraa,

¹⁷ maalʼɩ̃ a nɩ-bʋlsɩ ba jaa a ba na bʋɔrɔ a Nɩ-kpɛ̃ɛ, lãa nɩ a ten nɩbɛ ba jaa ɩ̃ na bʋɔl a ba na ɩ a ɩ̃ ben.

¹⁸ Lɛ a Nɩ-kpɛ̃ɛ yel, a ʋlɔ na miilʼɩ̃ a nɩbɛ a ana yele a korĩ-cɛ jaa a ba bɔ̃w.’ ”

¹⁹ A Jakɩ lɛ yelʼã: “Ala-ɩ̃-sɔ ɩ̃ tɩɛrʼã bɔ̃w ka aa sɛw a sɩ na ƴɔ̃w a nɩ-bʋlsɩ bala na lɩɛb ɩ a Naaŋmɩn nɩbɛ a ƴɛrɩ̃sɩ ala na kpɛmɛ wa.

²⁰ Ɩ̃-cɛ, sɩ́ maal a sɛbɛ tɩɩr kʋ ba, ɩ̃ yel ba, á ba taa wa dɩrɛ a tɩɩb bom wa, ɩ̃ bá tɛrɛ a ba mɩ̃ɛ a pebfʋ ɩnɛ, a ba taa wa mɩ ꞌwɔbɔ a dʋ̃ɔ ʋlɔ ba na cɩm kú wa, a ba taa wa mɩ ꞌwɔbɔ jɩ̃ɩ wa.

²¹ A-na-ɩ wa nyɔw nɩ a tẽkorĩ, ba ma ƴɛrɛ na a Mowisi ƴɛr-kpɛn a ten a jaa pʋɔ, ɩ̃ mɩ ꞌwuoro a ʋ sɛbɛ a *puorfʋ yie pʋɔ, a bibi-ciirsɩ a jaa.”

A SƐBƐ BA NA TUR KƲ A POPUORBO NA Ɩ A NƖ-BƲLSƖ

²² A be jie, a *nɩ-tʋnɩsɩ nɩ a duo-puor-ni-dierbe nɩ a *duo-puorbo ba jaa ɩ na nɔ-bõ-ƴen a ba vɛl ir nɩbɛ a ba pʋɔ, tʋ ba a ba lãa cenʼɩ̃ a Pol nɩ a Banabasɩ a Ãtɩyɔsɩ. Ba vɛlʼã ir a Judi ba na mɩ bʋɔlɔ a Basabasɩ, nɩ a Sɩlasɩ, na ɩ a ni-dierbe a yɛɛr jie.

²³ Ba ƴɔ̃w ba na a ba de a sɛbɛ na cenʼɩ̃: “A sɩmɩ nɩ-tʋnɩsɩ nɩ a duo-puor-ni-dierbe na ɩ a nyɩ yɛɛr, sɩ puorʼã a nyɩmɩ nɩ-bʋlsɩ na ɩ a sɩ yɛɛr, na be a Ãtɩyɔsɩ nɩ a Sɩrɩ nɩ a Sɩlɩsɩ ten pʋɔ.

²⁴ Sɩ wõ na a ba yel a nɩbɛ yi na a sɩ jie ɩ̃ wɩ dama nyɩ nɩ a ba ƴɛrɩ̃sɩ, bʋɔrɔ ba sãw a nyɩ jur, ɩ̃ saa kʋ ba sɔr a be jie wa.

²⁵ Ala-ɩ̃-sɔ, sɩ manʼã taa nɔ-bõ-ƴen, ɩ̃ ir a nɩbɛ tʋ a nyɩ jie á ba bɩɛl a sɩ badɛɛ Banabasɩ nɩ a Pol

²⁶ na ɩ a nɩbɛ bala na sɔw a kũu a sɩ Nɩ-kpɛ̃ɛ *Jeeju-Kirisi ɩnɛ.

²⁷ Sɩ tʋ na a Judi nɩ a Sɩlasɩ, a ba ƴɛrʼɩ̃ a ba nɔɛ kʋ nyɩ, a ala sɩ na sɛb a ka.

²⁸ A-na-ɩ a Naaŋmɩn Sɩɛ nɩ a sɩmɩ mɩ̃ɛ nyɛ na bɔ̃w ka aa sɛw a sɩ na tuo nyɩ a tuor kãw dɔɔl a yele ala na vɩɛlɛ juu wa.

²⁹ A ɩ na: nyɩ taa dɩrɛ a tɩɩb bom wa. Nyɩ taa mɩ ꞌwɔbɔ a jɩ̃ɩ, mɩɩ a dʋɔ ʋlɔ ba na cɩm kú wa. Nyɩ taa mɩ pebe taa wa. A nyɩmɩ tɛrɛ a nyɩ mɩ̃ɛ a ala ɩnɛ, a na ɩ na vɩlaa a nyɩ jie. Naaŋmɩn ú be nɩ nyɩ.”

³⁰ A duo-puorbo barʼã a nɩbɛ bala ba na ir tʋ a ba cen a Ãtɩyɔsɩ na kpaarɩ̃ a popuorbo ba jaa, ɩ̃ de a sɛbɛ kʋ ba.

³¹ A lɛ ba na ꞌwuor baar, ba jaa cɩlɛ na, a-na-ɩ ba barʼã tɩɛrʋ̃ a ala ba na wõ ɩnɛ.

³² A Judi nɩ a Sɩlasɩ tɔr jaa na mɩ ɩ a Naaŋmɩn pʋ-tɩɛrʋ̃-bʋʋrbɔ, ƴɛrʼã a ƴɛrɩ̃ kamʼɩ̃ kʋrɔ nɩ a yɛɛr a ꞌlafʋ a ba na nyɩrɛ cere nii-sɔw.

³³ Ba jɛ na be fɩ̃ɩ ɩ̃ a yɛɛr kʋ ba a sɔr nɩ su-ɓaar a ba lɩɛb kul a bala na tʋ ba jie. [

³⁴ Ɩ̃-cɛ a Sɩlasɩ ʋlɔ jɛ na a be.]

³⁵ A Pol nɩ a Banabasɩ mɩ jɛ na a be a Ãtɩyɔsɩ, a bala nɩ a nɩ-yaw ɓã taa jaana a nɩbɛ ƴɛrɛ nɩ a Nɩ-kpɛ̃ɛ ƴɛr-son.

A POL NƖ A BANABASƖ NA ŊMA A KPEE KPEE

³⁶ A kamʼã fɩ̃ɩ, ɩ̃ a Pol yel a Banabasɩ: “Ɩ a sɩ lɩɛb cen a ten ala a jaa sɩ na dãa ƴɛr a Nɩ-kpɛ̃ɛ ƴɛrɩ̃ naa ꞌwuor a yɛɛr je kãa, bɔ̃w a mɩnɛ ba na be.”

³⁷ A Banabasɩ dãa na bʋɔrɔ ʋ mɩ tɛrɛ a Jã ʋlɔ na dɩ a Markɩ a ba lãa cen.

³⁸ Ɩ̃-cɛ a Pol nyɛ na a aa sɛw a ba na tɛrɛ ʋ wa, a-na-ɩ ʋ dãa na ŋmaa yi a ba pʋɔ a Pãfɩlɩ-tẽw ɩ̃ maa lɛ cãa pɔw ba cenʼɩ̃ a ba tʋmɔ jie wa.

³⁹ Ba faa na taa ŋma kpee kpee, a Banabasɩ tɛrɛ a Markɩ a ba kpɛ a gbor cere a Sɩpɩr.

⁴⁰ Ɩ̃-cɛ a Pol vɛlʼã ir a Sɩlasɩ, ɩ̃ a yɛɛr de ba ƴɔ̃w a Nɩ-kpɛ̃ɛ nuumɩ a ʋ maal-vɩlaa na be nɩ ba, a ba cen.

⁴¹ A Pol tɔlʼã yi a Sɩrɩ, nɩ a Sɩlɩsɩ sũo a *duo-puorbo a ba na nyɩrɛ cere a nii-sɔw.