Nɩ-tʋnɩsɩ tʋmɔ Sɛbɛ 12 - A NAAŊMƖN PƲLƖ̃-TA-PAALAA

A JAKƖ KƲFƲ NƖ A PƖƐR KASU PƲƆ ƳƆ̃WFƲ

¹ A ʋna daarʼãa, a jamana *Ɛrɔdɩ nyɔw na ɩ̃ hʋɔlɔ a *duo-puorbo ŋmɛɛ.

² Ʋ ɩ na a ba kú a Jakɩ na ɩ a Jã yɛbɛ nɩ a bãjɩnɛ.

³ Ɩ̃ a lɛ ʋ na nyɛ bɔ̃w ka a nʋmɔ na a Jufisɩ, ʋ lɛ ƴɔ̃w na a ba nyɔw a Pɩɛr. A ɩ na a Bur-pʋɔr fɛtɩ daar.

⁴ A mɩnɛ ʋ na nyɔw ʋ, kasu pʋɔ ʋ ƴɔ̃w ʋ ɩ̃ ɩ a sɔdaalsɩ anaan jiir anaan a ba ꞌwuoro ʋ jewre taa, a-na-ɩ a Ɛrɔdɩ dãa na bʋɔrɔ ʋ bar a *Pakɩ fɛtɩ tɔl baar, ɩ̃ ʋ yuo a Pɩɛr guor a ʋ ƴɛrɩ̃ a nɩbɛ nii-sɔw.

⁵ Ala-ɩ̃-sɔ ba gu na a Pɩɛr a kasu pʋɔ, ɩ̃-cɛ a duo-puorbo sʋɔrɔ na a Naaŋmɩn nɩ kpɛ̃w ƴɔnɔ ʋ.

A PƖƐR CƖ̃ƐFƲ

⁶ A tɩsɔw ʋlɔ na vɩɛrɛ a bio a *Ɛrɔdɩ na guoro a Pɩɛr ƴɛrɩ̃, a Pɩɛr gã na gure a sɔdaalsɩ ayi sɔ̃w a kasu pʋɔ. Bɔ̃jɔrɩ̃sɩ ayi ba lũ nɩ ʋ, ɩ̃ a sɔdaalsɩ ŋmɛɛ mɩ be a kasu dɔ̃dɔrɩ̃ gu.

⁷ A jie naan, a Nɩ-kpɛ̃ɛ sɩ-tʋnaa ɩraa na be a ʋ sɛ̃, ɩ̃ a kasu die caarɩ̃. A sɩ-tʋnaa tɔ na a Pɩɛr lõboorɩ̃ sɩ̃w ʋ ɩ̃ yel ʋ: “Ir fɔfɔw!” A bɔ̃jɔrɩ̃sɩ ꞌlorʼã a ʋ nurɩ̃ lo,

⁸ ɩ̃ a sɩ-tʋnaa yel ʋ: “Sɛ a fʋ sɩɛ gan, ɩ̃ su a fʋ nafaba,” ʋ maal a lɛ, a sɩ-tʋnaa lɛ yel ʋ: “Va a fʋ gãw ɩ̃ tuure ma.”

⁹ A Pɩɛr irʼã tuure a sɩ-tʋnaa, ɩ̃-cɛ ꞌwaa tɩɛr bɔ̃w ka a ala a sɩ-tʋnaa na maal ɩ na sɩrɛ wa. Ʋ tɩɛrʼã beeka a sɩɛ bom ʋ nyɛ.

¹⁰ Ba ta na po a dɔ̃dɔr ʋlɔ a dãdãw sɔdaalsɩ na gu ɩ̃ lɛ tɔl po a nɩŋmɛɛ go, ɩ̃ pãa wɩ a dɔ̃dɔr ʋlɔ na be a yẽw na ɩ a kur pan. A pan ʋlɔ yuo na ʋ yẽ a ba yi, a sɩ-tʋnaa tɔw a Pɩɛr ta nɩ a sɔr cara pʋɔ, ɩ̃ bar ʋ a be ɩ̃ cen a jie naan.

¹¹ A Pɩɛr tɩɛrʼã bɔ̃w a ala na ta ʋ ɩ̃ yel: “A ƴɛ̃ƴɛrɩ̃ na, ɩ̃ sɩrɩ̃ na bɔ̃w ka a Nɩ-kpɛ̃ɛ ɩ̃ tʋ a ʋ sɩ-tʋnaa ʋ wa faa ma a Ɛrɔdɩ nuumɩ nɩ a ala a jaa ɩnɛ a Jufisɩ na dãa bʋɔrɔ ba maal ma.”

¹² A mɩnɛ ʋ na tɩɛr bɔ̃w a par, ʋ cenʼã a Maarɩɩ ʋlɔ na ɩ a Jã Markɩ mã yir. A be, a nɩ-yaw duo na sʋɔrɔ a Naaŋmɩn.

¹³ A Pɩɛr ŋme na a yẽw pan, ɩ̃ a tʋtʋ̃-poole na dɩ a Orodi cen a pan yuofʋ.

¹⁴ A lɛ ʋ na wõ a Pɩɛr kɔkɩr bɔ̃w, nʋ̃ɔ ƴala ʋ na ʋ bar a pan yuofʋ, ɩ̃ lɩɛb jɔ kpɛ a die pʋɔ na yel áa Pɩɛr ɩraa na be yẽw.

¹⁵ A ba yel ʋ: “Fʋ yaara na mɩ?” Ɩ̃-cɛ ʋ jaar ɩ̃ cãa yele á sɩrɛ jaa ʋ. A ba yel: “A ala ɩ̃ ɩ lɛ ʋ, a ʋ sɩɛ ʋ.”

¹⁶ Ɩ̃-cɛ a Pɩɛr cãa na ɩraa ŋmeere a pan. Ɩ̃ a lɛ ba na pãa yuo nyɛ ʋ, nʋɔr ko ba na.

¹⁷ Ʋ tur ba na a nuu a ba bar a gɔn, ɩ̃ ʋ man ba a mɩnɛ a Nɩ-kpɛ̃ɛ na tɔw ʋ yi nɩ a kasu pʋɔ. Ɩ̃ ʋ mɩ yelʼã: “Nyɩ́ yel kʋ a Jakɩ nɩ a yɛɛr,” ɩ̃ na ʋ bar ba ɩ̃ yi cen ji-kpee.

¹⁸ A mɩnɛ a bio na vɩɛ, a sɔdaalsɩ tɩɛrɩ̃sɩ nyɩrɩ̃ na dama ba, a ba sooro taa a ala na ta a Pɩɛr.

¹⁹ A Ɛrɔdɩ ƴɔ̃w na a bá bɔ ʋ faa, ɩ̃ a lɛ ʋ na soor a sɔdaalsɩ faa, ʋ ƴɔ̃w na á bá kú ba. A ala na yi tɔ, a pɩɛr yi na be a Jude ɩ̃ cen a Sejare na jɛ.

A ƐRƆDƖ KŨU

²⁰ A *Ɛrɔdɩ nyɩrɩ̃ na nyɛ suur ƴɔ̃w a Tɩɩr-tẽ-deme nɩ a Sɩdɔ̃-tẽw nɩbɛ, a ba man taa ɩ̃ cen a ʋ sɛ̃. Ba dɔrʼã a Bɩlasɩtɩ na ɩ a Ɛrɔdɩ yir tʋ̃tʋnɔ pɔw ʋ, ɩ̃ cen a jamana baalɩ̃fʋ jie, a-na-ɩ a jamana tẽw a ba dɩb yire.

²¹ A bibir ʋlɔ a Ɛrɔdɩ na ƴɔ̃w ba ta na, ʋ su a ʋ jamana cẽcene jɛ nɩ a ʋ naa-dakɔw juu ɩ̃ ƴɛrɛ a ƴɛrɩ̃,

²² a nɩbɛ hele yele: “ꞌWaa ƴɛrɛ wɔ̃ taa nɩ nɩrɛ wa, Naaŋmɩn kaarɩ̃ ʋ ƴɛrɛ!”

²³ A mɩnɛ a Ɛrɔdɩ na de a Naaŋmɩn pɛwfʋ ƴɔ̃w a ʋ mɩ̃ɛ pʋɔ, a Nɩ-kpɛ̃ɛ sɩ-tʋnaa ŋme ʋ na a jie naan, ɩ̃ a jãajule vʋr ʋ ʋ kpi.

²⁴ Ɩ̃-cɛ a Naaŋmɩn ƴɛrɩ̃ yɛrɛ na pɔwrɔ cere.

²⁵ A lɛ a Banabasɩ nɩ a Sol na tʋ̃ a ba tʋmɔ baar a Jerujalɛm, ba taw na a Jã ʋlɔ ba na mɩ bʋɔlɔ a Markɩ lãa cenʼɩ̃