Nɩ-tʋnɩsɩ tʋmɔ Sɛbɛ 10 - A NAAŊMƖN PƲLƖ̃-TA-PAALAA

A PƖƐR NA CEN A KƆRNƐƐ SƐ̃

¹ Daba dãa na be be a Sejare a ba bʋɔlɔ Kɔrnɛɛ. Ʋ ɩ na a sɔdaal-nɩ-kpɛ̃ɛ a Orom sɔdaalsɩ bala pʋɔ ba na bʋɔlɔ a Ɩtalɩ sɔdaalsɩ.

² Ʋ puoro na a Naaŋmɩn ɩ̃ mɩ jɔrɔ ʋ, a ʋlɔ nɩ a ʋ yir deme ba jaa. Ʋ ma irʼã libi-yayaw sũono nɩ a Jufisɩ ɩ̃ mɩ sʋɔrɔ a Naaŋmɩn ma gala wa.

³ Bibir kãw a mɔtɔ̃w gɔrfʋ daar, ʋ nyɛ na a Naaŋmɩn sɩ-tʋnaa gbelẽgbelẽ ʋ kpɛ a ʋ sɛ̃ sɩɛ bom kaarɩ̃ ɩ̃ yel ʋ: “Kɔrnɛɛ!”

⁴ A Kɔrnɛɛ ꞌwuor ʋ kir-kir-kir ɩ̃ a dãbɩ̃ɛ nyɔw ʋ ʋ yel: “Boolo ʋ, Nɩ-kpɛ̃ɛ?” A sɩ-tʋnaa yel ʋ: “A Naaŋmɩn sɔw na a fʋ sʋɔrfʋ nɩ a fu sũofʋ fʋ na sũono a nãw deme, ɩ̃ cãa tɛrɛ a fʋ tɩɛrɛ.

⁵ A ƴɛ̃ƴɛrɩ̃ na, tʋ nɩbɛ a ba cen a Jope na bʋɔl a daba ʋlɔ na dɩ a Sɩmɔ̃ ba na mɩ bʋɔlɔ a Pɩɛr.

⁶ Ʋ be na a ʋ yuor Sɩmɔ̃ yir pʋɔ na ɩ a gan-cɔɔrɔ, a ʋ yir na be a man gbẽgbere nʋɔr.”

⁷ A lɛ a sɩ-tʋnaa na ƴɛrʼɩ̃ a Kɔrnɛɛ ɩ̃ cen baar, ʋ bʋɔlʼã a ʋ tʋ̃tʋnbɔ ayi nɩ a sɔdaalaa ƴen sʋbɔ ʋ na barʼɩ̃ a nyãa na mɩ puoro,

⁸ na ʋ miil ba a ala a jaa ʋ na nyɛ, ɩ̃ tʋ̃ ba a Jope.

⁹ A dɩvɩɛ bio, a mɩnɛ a bana nɩbɛ na cãa be a sɔr pʋɔ pɩɛlɛ a Jope, a Pɩɛr do na a garɩ̃ a mɔtɔ̃-tuo a Naaŋmɩn sʋɔrfʋ ɩnɛ,

¹⁰ a kɔ̃ nyɔw ʋ ʋ bʋɔrɔ a dɩb. Ɩ̃ a lɛ ba na cãa maala a dɩb, ʋ nyɛ na sɩɛ bom.

¹¹ Ʋ nyɛ na a saꞌlon ʋ yuo ɩ̃ a bom yi a be ɩ̃ suure wɔ̃ taa nɩ gã-kpɛ̃ɛ ba na nyɔw a jiir anaan ɩ̃ ture ʋ suure pɩɛlɛ a tene.

¹² A wɛ-yel-bʋrɔ bʋrɔ ba jaa be na a gãw pʋɔ: a gbɛɛ anaan deme, a yel-vurisɩ, nɩ a pɩrɛ deme.

¹³ Ɩ̃ ʋ wõ na kɔkɩr na yel ʋ: “Pɩɛr, ir kú ꞌwɔb!”

¹⁴ Ɩ̃-cɛ a Pɩɛr yel ʋ na: “Nɩ-kpɛ̃ɛ, maa tʋɔrɔ wa! A-na-ɩ a yel-ciirsɩ nɩ a yel-kpansɩ maa kpɛ a ɩ̃ nʋɔr pʋɔ wa.”

¹⁵ Ʋ lɛ wõ na a kɔkɩr na lɛ yel ʋ: “A ala a Naaŋmɩn na yel áa ɩ na yel-sono, taa yele áa ɩ na yel-kpansɩ wa.”

¹⁶ A ta na gbɛɛ ata a na maal a lɛ, ɩ̃ a jie naan, ba lɛ de na a ana yele do nɩ a saꞌlon.

¹⁷ A lɛ a Pɩɛr na cãa pɛrɛ a sɩɛ bom ʋlɔ par ʋ na nyɛ, a dabsɩ bala a Kɔrnɛɛ na tʋ̃ sooro na a Sɩmɔ̃ yir wa ta nɩ a dɔ̃dɔrɩ̃.

¹⁸ Ba bʋɔlʼã soor: “Ka a Sɩmɔ̃ ʋlɔ ba na bʋɔlɔ a Pɩɛr be?”

¹⁹ Ɩ̃ a lɛ a Pɩɛr na cãa pɛrɛ a sɩɛ bom ʋlɔ par, a Naaŋmɩn Sɩɛ yel ʋ na: “Sɩmɔ̃, nɩbɛ ata be na be bʋɔrɔ fʋ.

²⁰ Ir suu pɔw ba a nyɩ lãa cen. Taa baala wa, a-na-ɩ maa ɩ̃ tʋ̃ ba a ba wa.”

²¹ A Pɩɛr suu a bana nɩbɛ sɛ̃ na yel ba: “Maa ɩ̃ ɩ a ʋlɔ nyɩ na bʋɔrɔ. A nʋmɔ na a nyɩ wa ka?”

²² A ba yel ʋ: “A sɔdaal-nɩ-kpɛ̃ɛ ʋlɔ ba na bʋɔlɔ a Kɔrnɛɛ ɩ̃ tʋ̃ sɩ. Ʋ ɩ na a nɩ-toraa na jɔrɔ a Naaŋmɩn, ɩ̃ a Jufisɩ ba jaa mɩ ƴɔnɔ ʋ. A Naaŋmɩn sɩ-tʋnaa yel ʋ na a ʋ bʋɔl fʋ a fʋ wɩ a ʋ yir ʋ cɛl a ala fʋ na tɛrɛ mana ʋ.”

²³ Ala-ɩ̃-sɔ a Pɩɛr ɩ na a ba kpɛ gã a be. A bio vɩɛ, ʋ ir de a sɔr a ba lãa cere, a yɛɛr ŋmɛɛ na be a Jope pɔw ba cenʼɩ̃.

²⁴ A dɩvɩɛ bio a Pɩɛr ta na a Sejare nyɛ a Kɔrnɛɛ nɩ a ʋ yir deme nɩ a ʋ badɛɛ ʋ na bʋɔl a ba jɛ gu ʋ.

²⁵ A lɛ a Pɩɛr na ta kpɛɛrɛ, a Kɔrnɛɛ irʼã tuor ʋ ɩ̃ gburĩ a dume a ʋ nii-sɔw puoro ʋ.

²⁶ Ɩ̃ a Pɩɛr nyɔw ʋ na ʋ ir ʋ yel ʋ: “Ir ɩraa, a-na-ɩ a maa mɩ, nɩrɛ ɩ̃ mɩ ɩ.”

²⁷ Ʋ ƴɛrɛ nɩ na a Kɔrnɛɛ a ba kpɛ, ʋ nyɛ a nɩ-yaw na duo

²⁸ ʋ yel ba: “Nyɩmɩ mɩ̃ɛ bɔ̃w na a sɩmɩ Jufisɩ puorfʋ ƴɛrɩ̃ pʋɔ, sɔr ma be be a sɩ na lãa gbɛbɛ taa nɩ a nɩ-bʋlsɩ wa, wa yele nɩ a ba yir kpɛfʋ wa. Ɩ̃-cɛ a Naaŋmɩn man ma na a ɩ̃ taa wa ꞌwuoro nɩrɛ ʋ wɔ̃ taa nɩ nɩ-kpana mɩɩ nɩ-sãwnaa wa.

²⁹ Ala-ɩ̃-sɔ a mɩnɛ nyɩ na tʋ̃ bʋɔl ma, maa dãa baalɩ̃ wa. Ɩ̃ wa na. Ƴɛ̃ƴɛrɩ̃ na, ɩ̃ sʋɔrɔ nyɩ na, nyɩ́ man ma a ala ɩnɛ nyɩ na bʋɔl ma.”

³⁰ A Kɔrnɛɛ yel: “A ɩ na bibie ata a dɩnaa ɩ̃ na be a ɩ̃ yir pʋɔ a nɔhɔ̃-wen, na ɩ̃ puoro a jaanʋɔr puorfʋ. A be a jie naan, ɩ̃ nyɛ na daba na su cẽcẽ-nyɩlaa ʋ ɩraa a ɩ̃ nii-sɔw

³¹ ɩ̃ yel ma: ‘Kɔrnɛɛ, a Naaŋmɩn wõ na a fʋ sʋɔrfʋ, ɩ̃ ꞌwaa hiin a fʋ sũofʋ a nãw deme jie wa.

³² Ala-ɩ̃-sɔ tʋ̃ nɩbɛ a ba cen a Jope na bʋɔl a Sɩmɔ̃ ʋlɔ na mɩ dɩ a Pɩɛr ʋ wa. Ʋ be na a ʋ yuor Sɩmɔ̃ ʋlɔ yir na ɩ a gan-cɔɔrɔ na be a man gbẽgbere nʋɔr.’

³³ Ɩ̃ tʋ̃ na bʋɔl fʋ a jie naan a lɛ, ɩ̃ fʋ pɛlɩ̃ na pʋɔ ɩ̃ wa. Ɩ̃ a ƴɛ̃ƴɛrɩ̃ sɩ be na ka a Naaŋmɩn nii-sɔw sɩ jaa bʋɔrɔ sɩ cɛl a ala a jaa a Nɩ-kpɛ̃ɛ na ƴɔ̃w fʋ a fʋ na ƴɛr sɩ.”

A ƳƐRƖ̃ A PƖƐR NA ƳƐR A KƆRNƐƐ YIR

³⁴ A Pɩɛr nyɔw na a ƴɛrɩ̃ ɩ̃ ƴɛrɛ yele: “A ƴɛ̃ƴɛrɩ̃ na, ɩ̃ nyɛ na bɔ̃w ka a Naaŋmɩn ma ꞌwuoro a nɩbɛ kpee kpee wa,

³⁵ ɩ̃ a nɩ-bʋrɔ bʋrɔ ba jaa sɔ̃w, a nɩrɛ lɛ na jɔrɔ ʋ ɩ̃ maala a ala na tor, ma nʋmɔ ʋ na.

³⁶ A Naaŋmɩn turʼã a ƴɛr-son kʋ a *Ɩsɩrayɛl nɩbɛ miile ba a pɩɛnfʋ ʋlɔ na yi a *Jeeju-Kirisi jie, na ɩ a nɩbɛ ba jaa Nɩ-kpɛ̃ɛ.

³⁷ Nyɩ bɔ̃w na a ala na maal a Jude wɩɛr ʋ jaa wa nyɔw nɩ a Galile, a daar ʋlɔ a Jã na dãa ƴɛr a kʋ̃ɔ mʋrfʋ ƴɛrɩ̃ baar.

³⁸ Ɩ̃ nyɩ mɩ bɔ̃w na a mɩnɛ a Naaŋmɩn na vɛl ir a Najarɛtɩ *Jeeju ɩ̃ de a ʋ Sɩɛ nɩ a ʋ fãw kʋ ʋ, nɩ a mɩnɛ a Jeeju na dãa yʋɔrɔ maala a vɩlaa kpɛmɛɛ nɩ a bala a Satã na hʋɔlɔ, a-na-ɩ a Naaŋmɩn be nɩ ʋ na.

³⁹ A sɩmɩ, sɩ nyɛ na a ala a jaa ʋ na maal a Jerujalɛm nɩ a Jufisɩ tẽw ʋ jaa pʋɔ, ɩ̃ mana kʋrɔ a nɩbɛ. Ɩ̃ ba nyɔw ʋ na kpa yaal a daa juu ʋ kpi,

⁴⁰ ɩ̃-cɛ a Naaŋmɩn ir ʋ na a kũu pʋɔ a bibie ata dayen ɩ̃ maal ʋ ʋ nyɩr sɩ.

⁴¹ Ɩ̃ aa ɩ a nɩbɛ ba jaa ɩ̃ nyɛ ʋ wa, ɩ̃-cɛ ʋ nyɩrʼã a sɩmɩ a Naaŋmɩn na de nĩe vɛl ir a sɩ ɩ a yel-mɩ̃ɛ ƴɛr-manba, a sɩmɩ na dãa lãa dɩ nɩ ʋ mɩ lãa nyu nɩ ʋ a lɛ ʋ na ir a kũu pʋɔ baar.

⁴² Ʋ yel sɩ na a sɩ hiere kʋrɔ a nɩbɛ miile nɩ ba a ʋlɔ a Naaŋmɩn biin ʋ ɩ a nɩ-mimie nɩ a kũusɩ ƴɛr-guoro.

⁴³ A Jeeju ʋlɔ a Naaŋmɩn ƴɛr-hierbe ba jaa dãa miile yele nɩ áa nɩrɛ lɛ na sɔw de ʋ, áa Naaŋmɩn na de na a ʋ yuor barʼɩ̃ a sʋbɔ ʋlɔ maal-faar kʋ ʋ.”

A NƖ-BƲLSƖ MƖ PƆW NA A NAAŊMƖN SƖƐ

⁴⁴ A lɛ a Pɩɛr na cãa ƴɛrɛ, a Naaŋmɩn Sɩɛ suu na pɔw a bala ba jaa na cɛlɛ a ʋ ƴɛrɩ̃.

⁴⁵ Nɔɛ ko na a popuorbo bala na ɩ a Jufisɩ na dãa bɩɛl a Pɩɛr a ba lãa wɩ, a mɩnɛ ba na nyɛ a Naaŋmɩn ʋ mɩ tɩɩr a ʋ Sɩɛ ʋ suu pɔw a nɩ-bʋlsɩ,

⁴⁶ a-na-ɩ ba wõ na a ba ƴɛrɛ a ƴɛr-bɔ̃w-faarsɩ pɛwrɛ nɩ a Naaŋmɩn. A lɛ, a Pɩɛr yelʼã:

⁴⁷ “Sɩ na tʋɔ na mɔ̃w a nɩbɛ na a kʋ̃ɔ mʋrfʋ mɩɩ? A-na-ɩ ba mɩ pɔw na a Naaŋmɩn Sɩɛ a sɩ kaarɩ̃”,

⁴⁸ ɩ̃ na ʋ ƴɔ̃w a ba de a *Jeeju-Kirisi yuor mʋrʼɩ̃ ba a kʋ̃ɔ, ɩ̃ a ba sʋɔr ʋ a ʋ jɛ be fɩ̃ɩ a ba sɛ̃.