3 Jã Sɛbɛ 1 - A NAAŊMƖN PƲLƖ̃-TA-PAALAA

A PUORFƲ

¹ A maa na ɩ a nɩ-kpɛ̃ɛ ɩ̃ tɩɩrɛ a sɛbɛ na kʋrɔ a Gayisi ɩ̃ na nʋ a Naaŋmɩn yel-mɩ̃ɛ pʋɔ.

² Ɩ̃ baraa, ɩ̃ bʋɔrɔ na a yele a jaa a cere vɩlaa a fʋ jie, ɩ̃ a fʋ ɩ̃gan na kpɛmɛ a mɩnɛ a fʋ sɩɛ na kpɛmɛ.

³ A tɩɩ na nʋmɔ ma a mɩnɛ a yɛɛr na ma waara mana ma a fʋ yel-mɩ̃ɛ tufʋ, a mɩnɛ fʋ na cere a yel-mɩ̃ɛ pʋɔ.

⁴ Bom ma nʋmɔ ma ta a mɩnɛ ɩ̃ na wõ á ɩ̃ bibiir cere na a yel-mɩ̃ɛ pʋɔ wa.

A GAYISI MAAL-VƖLAA A NAAŊMƖN TƲ̃TƲNBƆ JIE

⁵ Ɩ̃ baraa, fʋ ɩ na dẽdẽ a ala fʋ na maala a yɛɛr jie, nɩ a bala na saarɩ̃ ɩ a sáanba jie mɩ.

⁶ Ba ƴɛrʼã a fʋ nʋfʋ ƴɛrɩ̃ a popuorbo sɔ̃w. A na vɩlaa na a ala ɩ fʋ na sũo ba na a ba cenfʋ jie a mɩnɛ a na nʋmɔ a Naaŋmɩn.

⁷ A-na-ɩ a *Kirisi yuor ɩnɛ ba cere, ɩ̃ ma de bom a bala na ma bɔ̃w a Naaŋmɩn jie wa.

⁸ Ala-ɩ̃-sɔ a sɛw na a sɩmɩ, sɩ sũo a nɩ-lɛ nʋmɔ, a mɩnɛ a sɩ na tʋɔ be tɔ a ana yel-mɩ̃ɛ tʋmɔ pʋɔ ba na tʋnɔ.

A JOTIREFE NƖ A DEMETIRI ƳƐRƖ̃

⁹ Ɩ̃ sɛbʼã sɛb-bile kʋ a *duo-puorbo, ɩ̃-cɛ a Jotirefe na nʋ a ba nɩ-kpɛ̃ɛ ɩfʋ ma sɔw a sɩ ƴɛrɩ̃ wa.

¹⁰ Ala-ɩ̃-sɔ, a maa wa wɩ ɩ̃ na bɔ̃w nɩ na a ʋ tʋmɔ a jaa ʋ na maala, nɩ a ʋ ƴɛr-kpansɩ ʋ na ƴɛrɛ ƴɔnɔ sɩ a pɔrɔ. Ɩ̃-cɛ a fãa ala ma sɛw ʋ sɛr wa, a-na-ɩ ʋ ma lɛ jaara na a yɛɛr bala na wɩɛrɛ a be, ɩ̃ ma mɩ vara a bala na bʋɔrɔ ba de ba a sɔr, diwre nɩ ba a popuorbo pʋɔ bara.

¹¹ Ɩ̃ baraa, taa tɔɔnɔ a ala na ma vɩɛlɛ wa, ɩ̃-cɛ tɔɔnɔ a ala na vɩɛlɛ. A ʋlɔ na maala a vɩlaa ɩ na a Naaŋmɩn ben, ɩ̃-cɛ a ʋlɔ na maala a bier ma nyɛ a Naaŋmɩn wa.

¹² A ala ɩ a Demetiri ʋ, a nɩbɛ ba jaa kpiire ʋ na, ɩ̃ a ʋ yel-mɩ̃ɛ mɩ miile na a lɛ. A sɩmɩ mɩ, sɩ mɩ kpiire ʋ na, ɩ̃ fʋ bɔ̃w na a sɩ manfʋ ɩ na a sɩrɛ.

A ƳƐR-BAARAA

¹³ Ɩ̃ tɛrɛ na yele yayaw ɩ̃ na yele fʋ, ɩ̃-cɛ maa bʋɔrɔ ɩ̃ sɛb ƴɔ̃w sɛbɛ pʋɔ tɩɩr kʋ fʋ wa,

¹⁴ ɩ̃, ɩ̃ bʋɔrɔ na ɩ̃ nyɛ fʋ ka nɩ fɩ̃ɩ pʋɔ a sɩ na bʋ taa.

¹⁵ A pɩɛnfʋ ú be a fʋ jie. A fʋ badɛɛ puor fʋ na. Puor a sɩ badɛɛ bõ-ƴene-ƴene.