2 Timote Sɛbɛ 4 - A NAAŊMƖN PƲLƖ̃-TA-PAALAA

¹ Ɩ̃ kpãkpana fʋ na a Naaŋmɩn nɩ a *Jeeju-Kirisi nii-sɔw, a ʋlɔ nɔɔ guoro a nɩ-mimie nɩ a kũusɩ ƴɛrɩ̃. Ɩ̃ mɩ tɩɛrɛ nɩ na a lɛdaar ʋ na waara ɩrɛ a jamana.

² Ala-ɩ̃-sɔ ɩ̃ yele fʋ, cɛlɛ tɔ a daar a jaa, hiere a Naaŋmɩn ƴɛrɩ̃, a lɛ a sɔr na yuo nɩ a lɛ ʋ na ma mɩ yuo wa. Gala ba, mɩɩ fule ƴɔnɔ ba, kpãkpana nɩ ba, tɛrɛ nɩ a su-varkpara jaana nɩ ba.

³ A-na-ɩ daar nɔɔ ta na a nɩbɛ kɔ̃ lɛ sɔwrɔ a jaan-son wa, ɩ̃ ba na maala na a ala na nʋmɔ ba, woorʼɩ̃ a jãjaanba duo, a ba jaana ba a ala ba na bʋɔrɔ.

⁴ Ba kɔ̃ lɛ cãa cɛlɛ a yel-mɩ̃ɛ wa, ɩ̃-cɛ ba na lɩɛbʼã cɛlɛ a kpurĩsɩ.

⁵ Ɩ̃-cɛ a fʋ̃ʋ, bɔ̃w tɛrɛ a fʋ mɩ̃ɛ a yele a jaa pʋɔ, dɩrɛ nɩ a tuo, bɔ̃w tʋnɔ a Naaŋmɩn ƴɛr-son ƴɛrfʋ tʋmɔ, maala nɩ a ala a jaa a Naaŋmɩn na ƴɔ̃w fʋ.

⁶ A ala ɩ a maa ʋ, a daar ta na ɩ̃ na lɩɛb ɩ a baar-lo-bom. A ɩ̃ Naaŋmɩn tẽw cenfʋ daar ta na.

⁷ Ɩ̃ jɛbʼã a jɛb-son, ɩ̃ mɩ jɔ a ɩ̃ dãw-taa jɔa baar. Ɩ̃ mɩ dãa na bɔ̃w gu a Naaŋmɩn ƴɛr-son.

⁸ A ƴɛ̃ƴɛrɩ̃ na, a ɩ̃ tʋɔfʋ bom gure ma na, na ɩ a torfʋ yar a Nɩ-kpɛ̃ɛ ʋlɔ na ɩ a Goguor-dẽdẽ na kʋrɔ ma a ʋ waa bibir dayen. Ɩ̃ aa ɩ maa tɛw ʋ kʋrɔ wa, ɩ̃-cɛ a bala ba jaa na sɩrɩ̃ cɛlɛ a ʋ nyɩrfʋ dayen.

A POL ƳƐR-BAARAA

⁹ Ƴɔ̃w fãgã ɩ̃ wa a ɩ̃ sɛ̃ pʋrpʋr,

¹⁰ a-na-ɩ a Demasɩ bar ma na ɩ̃ cen a Tɛsaloniki-tẽw a-na-ɩ ʋ nyɩrɩ̃ na nʋ a tẽw na yele. A Kɩrɛsɛ̃ mɩ cen a Galatɩ-tẽw, ɩ̃ a Tɩtɩ mɩ cen a Dalmasɩ-tẽw.

¹¹ A Luki ʋ yẽ tɛw ɩ̃ be nɩ ma. Taw a Markɩ tɛrɛ wa nɩ, a-na-ɩ ɩ̃ nyɛ na bɔ̃w ka ʋ na tʋɔ na sũo ma a tʋmɔ pʋɔ.

¹² Ɩ̃ tʋ̃ na a Tɩsɩkɩ bar ʋ cen a Ɛfɛɛsɩ-tẽw.

¹³ A fʋ̃ʋ wa waara, fʋ tɛrɛ de a kparʋ ɩ̃ na bar a Torowasɩ-tẽw a Karpɩsɩ yir, mɩ tɛrɛ de nɩ a ɩ̃ sɛbsɩ, ɩ̃ taa wa hiine a sɛbsɩ ala ba na maalʼɩ̃ a gan wa.

¹⁴ A Alɛsãdɩrɛ na ɩ a jujuure maal ma na bier ma ɩ wa. A Nɩ-kpɛ̃ɛ na ya ʋ na tu nɩ a ala ʋ na maal.

¹⁵ A fʋ̃ʋ mɩ, tɛrɛ a fʋ mɩ̃ɛ a ʋ jie, a-na-ɩ ʋ nyɩrɩ̃ na jɛbʼɩ̃ sɩ a ƴɛrɩ̃sɩ ala sɩ na ƴɛr ɩnɛ.

¹⁶ A mɩnɛ ba na bʋɔl ma ɩ̃ cen a ƴɛrɩ̃ guorfʋ jie a dãdãw, nɩrɛ ma dãa be be na ɓã ma wa. Ba jaa jaar ma na bar. A Naaŋmɩn, ʋ taa wa ƴɔnɔ ba ƴɛrɩ̃ a ala ɩnɛ wa.

¹⁷ Ɩ̃-cɛ a Nɩ-kpɛ̃ɛ dãa na ɩraa cĩcĩ a ɩ̃ lõboorɩ̃, ɩ̃ kʋ ma fãgã ɩ̃ tʋɔ ƴɛr a Naaŋmɩn ƴɛrɩ̃ vɩlaa vɩlaa, a nɩ-bʋrɔ bʋrɔ jaa wonaa. Ɩ̃ a Naaŋmɩn faa ma na a gbeen nʋɔrɩ̃.

¹⁸ A Nɩ-kpɛ̃ɛ na faa ma na a maal-bebe a jaa pʋɔ, ɩ̃ maal ma ɩ̃ kpɛ a ʋ saa juu fãw pʋɔ vɩlaa. A ʋlɔ ɩ̃ sɔ a yo-yifʋ a daar a jaa fɛw. *Amɛn.

A PUOR-TAA

¹⁹ Puor a Pɩrɩsɩ, nɩ a Akɩlasɩ, nɩ a Onɩsɩfɔɔr yir deme kʋ ma.

²⁰ A Erasɩtɩ jɛ na be a Kɔrɛ̃tɩ-tẽw, ɩ̃ a lɛ ɩ̃ na yi a Mile-tẽw a dãa na ꞌwɔbɔ a Torofim.

²¹ Yɔ̃w fãgã ɩ̃ wa ɩ̃-cɛ a aar daar wa ta. A Ubulu nɩ a Pʋdɛ̃, a Linisi, a Kiloja, nɩ a yɛɛr ba jaa puoro fʋ na.

²² A Nɩ-kpɛ̃ɛ ú be nɩ fʋ a sɩɛ pʋɔ. A Naaŋmɩn sũofʋ ú be a nyɩ jie.