2 Timote Sɛbɛ 3 - A NAAŊMƖN PƲLƖ̃-TA-PAALAA

A TẼW BAARFƲ DAAR MAAL-FÃA

¹ A sɛw na a fʋ na bɔ̃w ka áa tẽw baarfʋ daar, a won kpɛ̃ɛ na ta na.

² A-na-ɩ a nɩbɛ na ꞌwuoro na a ba mɩ̃ɛ tɛw, nyɩrɩ̃ nʋ a libie, bʋɔrɔ nɩ a yuor nɩ a ju-kpɛ̃ɛ, kpɛrɛ a Naaŋmɩn, wõw nɩ a toor a ba dɔɔrbɔ jie. Ba na bɛlɩ̃ na a puor, ɩ̃ ma ƴɔnɔ a Naaŋmɩn wa.

³ Ba mɩ kpɛ na a bɩcɩɩr, ɩ nɩ a nɩ-bebe nɩ a cicilbe, maala nɩ a burbur, ɩ nɩ a gbor-gbor deme, mɩ ꞌlaarʼɩ̃ a son maalfʋ.

⁴ Ba na mɩ diere na taa a jur, ɩ nɩ a nɩ-kaba kaba, bɛlɛ nɩ a ba mɩ̃ɛ a ju-kpɛ̃ɛ bɔfʋ ɩnɛ, bʋɔrɔ a ala ba na nʋ, gãw a Naaŋmɩn.

⁵ Ba na maala na wɔ̃ taa a Naaŋmɩn ba ƴɔnɔ, ɩ̃-cɛ ba kɔ̃ sɔw a ʋ fãw wa. Taw a fʋ mɩ̃ɛ yi nɩ a bana nɩbɛ sɔ̃w.

⁶ A ba pʋɔ, a ŋmɛɛ ma gũu na kpɛ a yie pʋɔ bɛlɩ̃ a pɔɔ-gẽgemsɩ, na mɩ sɛw nɩ a maal-fãa, a yel-bʋrɔ bʋrɔ vɩláa na mɩ nyɔw.

⁷ Ba ma jaana na a yele a daar a jaa, ɩ̃ ma tʋɔrɔ bɔ̃wnɔ a yel-mɩ̃ɛ ƴɛrɩ̃ fɩ̃ɩ wa.

⁸ A mɩnɛ a Janɛsɩ nɩ a Jãbɛrɛsɩ na dãa var a Mowisi ƴɛrɩ̃, a lɛ a bana nɩbɛ mɩ vara a yel-mɩ̃ɛ. A ba juu bɔrʼã, a ba puorfʋ ma lɛ tor wa.

⁹ Ɩ̃-cɛ baa cere nii-sɔw wa, a-na-ɩ a nɩbɛ ba jaa na bɔ̃w na a ba gẽgem-maalfʋ, wɔ̃ taa nɩ a mɩnɛ ba na dãa bɔ̃w a Janɛsɩ nɩ a Jãbɛrɛsɩ ben.

A POL NA KPÃKPANA A TIMOTE

¹⁰ Ɩ̃-cɛ a fʋ̃ʋ, fʋ nyɛ na a ɩ̃ jaanfʋ bɔ̃w, ɩ̃ mɩ bɔ̃w a ɩ̃ maalfʋ, a ɩ̃ pʋ-tɩɛrɩ̃sɩ, nɩ a ɩ̃ ƴɔ̃w-nyãa, nɩ a mɩnɛ ɩ̃ na tɛrɛ a su-nyɔwraa, a nʋfʋ, ɩ nɩ a nɩ-var.

¹¹ Fʋ mɩ lɛ bɔ̃w na a ɩ̃ kpowfʋ, nɩ a ɩ̃ won; a ala na dãa ta ma a Ãtɩyɔsɩ, a Ɩkɔnɩyɔ̃, nɩ a Lɩsɩtɩ ten pʋʋr. Kpow-wɔ̃ mɩnɛ maa dãa pɔw wa! Ɩ̃-cɛ a Nɩ-kpɛ̃ɛ faa ma na a ala a jaa pʋɔ.

¹² A lɛ ʋ, a bala ba jaa na bʋɔrɔ ba tuure a Naaŋmɩn sɔr vɩlaa a *Jeeju-Kirisi pʋɔ na pɔw na a kpowfʋ.

¹³ Ɩ̃-cɛ a nɩ-bebe nɩ a jɩ-bʋʋrbɔ na cere na nii-sɔw a ba fãa pʋɔ, bɛlɛ nɩ a nɩbɛ, ɩ̃ a ba mɩ bɛlɛ ba.

¹⁴ A ala ɩ a fʋ̃ʋ ʋ, ɩraa cĩcĩ a ala fʋ na jaan bɔ̃w pʋɔ, mɩ tɩɛr ka a ɩ na yel-mɩ̃ɛ, a-na-ɩ fʋ bɔ̃w na a bala na jaan fʋ.

¹⁵ Wa nyɔw nɩ a fʋ bibile daar, fʋ bɔ̃w na a Naaŋmɩn Sɛbɛ ƴɛrɩ̃sɩ, na tʋɔrɔ kʋrɔ fʋ a kpaarfʋ ʋlɔ na miile a faafʋ sɩ na tɛrɛ a Jeeju-Kirisi pʋɔ a ƴɔ̃w-nyãa ɩnɛ.

¹⁶ A Naaŋmɩn Sɛbɛ ƴɛrɩ̃sɩ a jaa yi na a ʋ Sɩɛ tʋmɔ pʋɔ, na sɛw nɩ a nɩbɛ jaanfʋ, miile nɩ ba a ba mabfʋ jie, cɔɔrɔ nɩ ba, ɩ̃ mɩ gbɛɛrɛ nɩ ba a ba na tor.

¹⁷ A nɔhɔ̃, a Naaŋmɩn tʋ̃tʋnɔ na tʋɔ sɩrɩ̃ bɩ, mɩ tɛrɛ a ala na sɛw ʋ a tʋ̃-sono a jaa pʋɔ.