2 Timote Sɛbɛ 1 - A NAAŊMƖN PƲLƖ̃-TA-PAALAA

A PUORFƲ

^1-2 A maa Pol ɩ̃ tɩɩrɛ a sɛbɛ na kʋrɔ a Timote na ɩ a ɩ̃ bi-nʋnaa, a maa na ɩ a *Jeeju-Kirisi *nɩ-tʋnaa, tuure nɩ a Naaŋmɩn pʋ-tɩɛrʋ̃, a mɩnɛ ɩ̃ na mana a baafʋ ƴɛrɩ̃ ʋlɔ a Naaŋmɩn na pʋlɩ̃ nɩ sɩ a Jeeju-Kirisi pʋɔ. A sũofʋ nɩ a nã-bɔ̃wfʋ nɩ a pɩɛnfʋ na yi a sɩ Sãa Naaŋmɩn nɩ a sɩ Nɩ-kpɛ̃ɛ Jeeju-Kirisi sɛ̃, á be a fʋ jie.

A POL NA JAWRA A TIMOTE

³ Ɩ̃ puoro na a Naaŋmɩn ʋlɔ tʋmɔ ɩ̃ na tʋnɔ nɩ a ɩ̃ suur ʋ jaa, a mɩnɛ a ɩ̃ sãa-kʋnbɔ na mɩ dãa maal, a-na-ɩ ɩ̃ ma tɩɛrɛ nɩ fʋ na, sʋɔrɔ nɩ a Naaŋmɩn ƴɔnɔ fʋ a daar a jaa ma gala wa.

⁴ Ɩ̃ cãa na bɔ̃w nɩ a fʋ kuon, ɩ̃ tɩɩ bʋɔrɔ ɩ̃ lɛ nyɛ fʋ, a nʋ̃ɔ na ƴala ma.

⁵ Ɩ̃ lɛ tɩɛrʼɩ̃ na a fʋ ƴɔ̃w-nyãa son ʋlɔ a fʋ mã-kpɛ̃ɛ Lowisi, nɩ a fʋ mã Enisi na dãa de nĩe tɛrɛ. Ɩ̃ a fʋ̃ʋ mɩ, ɩ̃ bɔ̃w na bɔ̃w ka fʋ mɩ tɛrɛ ʋ na.

⁶ Ala-ɩ̃-sɔ ɩ̃ jawra fʋ, a mɩnɛ ɩ̃ na dãa dɔɔl fʋ a nuu a fʋ pɔw a tʋɔfʋ ʋlɔ a Naaŋmɩn jie, pine ʋ a vũu kaarɩ̃, ʋ ꞌlere.

⁷ A-na-ɩ a Sɩɛ na a Naaŋmɩn na kʋ sɩ, ꞌwaa ɩ dãbɩ̃-sɩɛ wa, ɩ̃ a fãgã, a nʋfʋ, nɩ a mɩ̃ɛ-tɛrɛfʋ Sɩɛ ʋ kʋ sɩ.

⁸ Ala-ɩ̃-sɔ, taa jɔrɔ vĩ a sɩ Nɩ-kpɛ̃ɛ ƴɛrɩ̃ ƴɛrfʋ ɩnɛ wa, nɩ a maa ɩnɛ na be a kasu pʋɔ a ʋ ɩnɛ wa, ɩ̃ ɛ̃ɛ sɔw de a Naaŋmɩn fãgã a sɩ lãa dɩrɛ taa a tuo a ʋ ƴɛr-son ɩnɛ.

⁹ A-na-ɩ a Naaŋmɩn faa sɩ na, ɩ̃ mɩ bʋɔl sɩ a sɩ ɩ nɩ-cɛcɛ. Ɩ̃ aa ɩ tʋmɔ sɩ tʋ̃ kʋ ʋ wa, ɩ̃-cɛ a ʋna bʋɔlfʋ yi na a ʋ mɩ̃ɛ pʋ-tɩɛrʋ̃ pʋɔ nɩ a ʋ sũofʋ ʋ na dãa kʋ sɩ a *Jeeju-Kirisi pʋɔ a korĩ-cɛ jaa.

¹⁰ Ɩ̃ a ƴɛ̃ƴɛrɩ̃ na sɩ nyɛ ʋ na a cãa pʋɔ, a mɩnɛ a sɩ Fafaara Jeeju-Kirisi na nyɩr, sãw a kũu lɔw bar, ɩ̃ caarɩ̃ nɩ a ʋ ƴɛr-son a baafʋ na ma tɛrɛ a sãwfʋ wa.

¹¹ A Naaŋmɩn biin ma na ɩ̃ ɩ ƴɛƴɛrɛ, nɩ *nɩ-tʋnaa, nɩ a jãjaana a ʋna ƴɛr-son ɩnɛ.

¹² A ala ɩnɛ ɩ̃ mɩ dɩrɛ a tuo a lɛ, ɩ̃-cɛ aa ɩ ma vĩ wa, a-na-ɩ ɩ̃ bɔ̃w na a sʋbɔ ʋlɔ ɩ̃ na barʼɩ̃ a nyãa. Ɩ̃ mɩ sɩrɩ̃ na bɔ̃w ka a ʋ na tʋɔ na gu a ala ʋ na kʋ ma ɩ̃ tɛɛlɛ, wa ta nɩ a ʋ lɛwaa bibir.

¹³ A ana ƴɛr-sono fʋ na dãa wõ a ɩ̃ jie, bɔ̃w nyɔw tɛɛlɛ, tɛrɛ nɩ a ƴɔ̃w-nyãa nɩ a nʋfʋ ala na be a Jeeju-Kirisi pʋɔ.

¹⁴ Bɔ̃w gu a ʋna jaan-son a Naaŋmɩn na kʋ fʋ, nɩ a ʋ Sɩɛ fãgã na be a sɩ pʋ̃ɔ.

¹⁵ Fʋ bɔ̃w na ka a Ajɩ wɩɛr nɩbɛ ba jaa jaar ma na bar. A Fɩjɛl nɩ a Ɛmɔjɛn mɩ be na tɔ.

¹⁶ A Nɩ-kpɛ̃ɛ, ú bɔ̃w a Onɩsɩfɔɔr yir deme nãw, a-na-ɩ ʋ dãa na wa baalɩ̃ ma gbɛɛ yayaw. A mɩnɛ ɩ̃ na dãa be a kasu pʋɔ a bɔ̃jɔrɩ̃sɩ pʋɔ, ɩ̃-cɛ vĩ ma nyɔw ʋ wa,

¹⁷ ɩ̃ a mɩnɛ ʋ na wa a Orom-tẽw pʋɔ ʋ ɛ̃ɛ na dɩ tuo bɔ ma nyɛ.

¹⁸ Ɩ̃ fʋ mɩ bɔ̃w na vɩlaa a mɩnɛ ʋ na dãa nyɩrɩ̃ sũo ma a Ɛfɛɛsɩ-tẽw pʋɔ. A Nɩ-kpɛ̃ɛ ú sũo ʋ, ú pɔw a Naaŋmɩn nã-bɔ̃wfʋ a ƴɛrɩ̃ guorfʋ dayen.