2 Pɩɛr Sɛbɛ 2 - A NAAŊMƖN PƲLƖ̃-TA-PAALAA

A JIR-ŊMA-JAANBA

¹ Jir-ŋma-ƴɛr-hierbe mɩ dãa na be a Naaŋmɩn nɩbɛ sɔ̃w a korĩ-cɛ, a mɩnɛ a jãjaanba na ŋmara a jirsɩ na mɩ be a nyɩ sɔ̃w. Ba na fʋrʼã kpɛ nɩ a ƴɛr-jirsɩ na sãwna a nɩbɛ, jaarʼĩ a Nɩ-kpɛ̃ɛ ʋlɔ na dãa da ba fáa, taw nɩ a sãwfʋ lɔb dɔɔl a ba juumɩ.

² Nɩ-yaw na tu na a ba maal-bi-burbur, a nɩbɛ lɩɛb kpɛrɛ a yel-mɩ̃ɛ sɔr.

³ A-na-ɩ a jãjaanba bala, libi-bʋɔrbɔ ba ɩ, ma ƴɔ̃w a nɔ-kãa bɛlɛ nɩ nyɩ. A ba Ƴɛr-guoro gɔrʼã guor a ba ƴɛrɩ̃ korĩ-cɛ jaa, ɩ̃ a ba sãwfʋ cãa na be waara. A ʋlɔ na wɛlɛ ba ma gur wa.

⁴ A Naaŋmɩn ma dãa bar a sɩ-tʋnɩsɩ bala na dãa maal a fãa wa, ɩ̃-cɛ ʋ lɔb ba na ƴɔ̃w bɔw kpol-kpɛ̃ɛ pʋɔ, a ba lũ ba bin a libe pʋɔ gure nɩ a ƴɛrɩ̃ guorfʋ bibir.

⁵ ꞌWaa mɩ dãa bar a korĩ-cɛ nɩbɛ wa, ɩ̃-cɛ ʋ barʼã a kʋ̃ɔ kpɛ̃ɛ ʋ wa pɔw a nɩ-kpansɩ, ɩ̃ ʋ faa a Nowe na dãa ɩ a torfʋ ƴɛr-hiere, nɩ nɩbɛ anuu-nʼayi tɛw.

⁶ A *Sɔdɔm nɩ a *Gɔmɔɔr ten, a Naaŋmɩn mɩ ƴɔ̃w ba na a ƴɛrɩ̃ sãw nɩ ba a vũu bar, a ba lɩɛb ɩ a tãpɛlɩ̃, a mɩnɛ a na tʋɔ ɩ bõ-miilaa a nɩ-kpansɩ jie, a ala nɔɔ tara ba.

⁷ Ɩ̃-cɛ ʋ faa na a Lɔtɩ na dãa ɩ a nɩ-son, a suur na ma dãa sãw a bana nɩ-kpansɩ burbur maalfʋ ɩnɛ.

⁸ A bibie a jaa, a nɩ-son ʋlɔ na be a ba sɔ̃w ma nyɛ na ɩ̃ mɩ wõ a ala ba na maala, a ʋ su-toraa mɩ dama ʋ a ba burbur ɩnɛ.

⁹ A nɔhɔ̃, a Nɩ-kpɛ̃ɛ ma bɔ̃w faa a bala na ƴɔnɔ ʋ a ba won pʋɔ, ɩ̃ mɩ bɔ̃w a burbur deme tɛrɛfʋ a kpãafʋ pʋɔ, gure nɩ a ƴɛrɩ̃ guorfʋ bibir.

¹⁰ A bala a kpãafʋ na nyɩrɩ̃ tor ɩ na a bala na tuure a ba ɩ̃gan buur tɩɛrɩ̃-kpansɩ, sãwna nɩ a ba mɩ̃ɛ, ɩ̃ mɩ kpɛrɛ a Naaŋmɩn na sɔ ba. A bana jir-ŋma-jaanba maa jɔ vĩ wa; a ba mɩ̃ɛ tɛw ba ma ꞌwuoro. Baa mɩ jɔrɔ a bala na nyɩlɛ a saa juu wa, ɩ̃-cɛ ba ma kpɛrɛ ba na.

¹¹ A ala saarɩ̃ ɩ a sɩ-tʋnɩsɩ ʋ, na tɛrɛ a fãgã nɩ a tʋɔfʋ gãw a jir-ŋma-jaanba bala, ba maa ꞌla kpɛ ƴɔ̃w nɩ a bana nɩ-nyɩlɩsɩ a ƴɛrɩ̃ a Nɩ-kpɛ̃ɛ nii-sɔw wa.

¹² A jãjaanba bala wɔ̃ na taa nɩ wɛ-yele na ma bɔ̃w yɛ̃ wa, ba na dɔw ka a tẽw pʋɔ a nɩbɛ na nyɔwrɔ kʋrɔ. Ba ma kpɛrɛ na a yele ala ba na ma bɔ̃w a par wa. Ba na mɩ wɛ na a bana wɛ-yele kaarɩ̃.

¹³ A kpowfʋ na ɩ a ba yar, a mɩnɛ ba na mɩ kpow a nɩŋmɛɛ. Ba tɩɛrʼã beeka áa vɩɛlɛ na a ba na maal a vĩ tʋmɔ a mɔtɔ̃w. Ba ma ɩ na vĩ nɩ hũhunfʋ a nyɩ sɔ̃w. A lɛdaar ba na ma be nɩ nyɩ a fɛtɩ jie, a ma ɩ ba na nʋ̃ɔ a ba na bɛlɩ̃ a nɩbɛ.

¹⁴ Ba ma ꞌwuoro na a pɔɔbɔ a ꞌwuor-fãa, ɩ̃ maa bɛw a maal-fãa maalfʋ wa. Ba ma bɛlɛ na a bala na bal, ɩ̃ mɩ mɩlɩ̃ nɩ a yele jɩɛlfʋ. Ba be na a Naaŋmɩn pɔfʋ pʋɔ.

¹⁵ Ba barʼã a sɔr toraa ɩ̃ bɔr, ɩ̃ tu a Balam na ɩ a Bosoor bi-daba sɔr, na dãa nʋ a libie na yi a ʋ gõgolĩfʋ tʋmɔ pʋɔ.

¹⁶ Ɩ̃-cɛ ba gal ʋ na a ʋ to-wõwfʋ ɩnɛ. Bʋ̃ɔ ɩ̃ de a nɩrɛ kɔkɩr ƴɛrʼɩ̃ a ʋna Naaŋmɩn ƴɛr-hiere, gɔw nɩ ʋ a ʋ dãbol tʋmɔ bar.

¹⁷ A nɩbɛ bala wɔ̃ na taa nɩ kʋlsɩ na sɩr, mɩɩ a uulũu a sɛsɛb na de cere nɩ. A Naaŋmɩn irʼã ji-liwraa na nyɩrɩ̃ sɔb bar ba.

¹⁸ Yo-bɔb ƴɛr-pɔrsɩ ba ma ƴɛrɛ bɛlɛ nɩ a nɩbɛ. A ɩ̃gan buur tɩɛrɩ̃sɩ nɩ a burbur maalfʋ ba ma de bɛlɛ nɩ a bala na cãa faara a ba mɩ̃ɛ a bala na bɔrɔ sɔ̃w.

¹⁹ Ba ma pʋlɩ̃ nɩ ba na á ba na ir ba na yi nɩ a gbãgbaar pʋɔ, ɩ̃-cɛ a bala mɩ̃ɛ lɛ ɩ na a ala gbãgbaar na cere nɩ ba a kũu pʋɔ. A-na-ɩ a nɩrɛ lɛ ɩ na a bom ʋlɔ na tʋɔ ʋ gbãgbaar.

²⁰ A ala ɩ a nɩbɛ bala na dãa cɩ̃ɛ a tẽw pʋɔ yel-kpansɩ pʋɔ a mɩnɛ ba na bɔ̃w a *Jeeju-Kirisi na ɩ a Nɩ-kpɛ̃ɛ nɩ a Fafaara, lɛ lɩɛbʼã bar a ana yele a lɛ nyɔɔr ba ɩ̃ tʋɔ ba, a ba baarfʋ daar ben na kpɛmɛ na gãw a nyɔwfʋ daar ben.

²¹ A dãa na sa ba a ba kãa dãa bɔ̃w a sɔr toraa wa, a mɩnɛ ba na lɛ bɔ̃w ʋ baar, ɩ̃ lɛ lɩɛb ŋmaa yi ɩ̃ bar a ƴɛr-son ba na dãa pɔw.

²² A ala na ta ba miilʼã a yel-mɩ̃ɛ ʋlɔ a sʋkpa na yel, áa báa lɩɛbʼã cen na dɩ a ala ʋ na dãa ti bar. Ɩ̃ a duo ba na so a kʋ̃ɔ na lɛ lɩɛbʼã cen mamarʼɩ̃ a mɛmɛɛr.