2 Pɩɛr Sɛbɛ 1 - A NAAŊMƖN PƲLƖ̃-TA-PAALAA

A PUORFƲ

¹ A maa Sɩmɔ̃ Pɩɛr na ɩ a *Jeeju-Kirisi tʋ̃tʋnɔ, ɩ nɩ a ʋ *nɩ-tʋnaa, ɩ̃ tɩɩrɛ a sɛbɛ na kʋrɔ a nyɩmɩ na wõ a puorfʋ ƴɛrɩ̃ na kʋ nyɩ a nason a sɩ kaarɩ̃, a yi a Jeeju-Kirisi torfʋ ɩnɛ, a ʋlɔ na ɩ a sɩ Naaŋmɩn nɩ a sɩ Fafaara.

² A sũofʋ nɩ a pɩɛnfʋ á lɛ dɔɔl nyɩ, a mɩnɛ nyɩ na bɔ̃w a Naaŋmɩn nɩ a sɩ Nɩ-kpɛ̃ɛ *Jeeju.

A BƲƆL-KPƐ̃Ɛ ƲLƆ A NAAŊMƖN NA BƲƆL SƖ

³ A Nɩ-kpɛ̃ɛ de na a ʋ fãgã kʋ nɩ sɩ a ala a jaa na sɛw nɩ a sɩ baafʋ pʋɔ, a sɩ na mɩ ƴɔnɔ ʋ, a mɩnɛ sɩ na bɔ̃w a ʋlɔ na bʋɔl sɩ, a sɩ na lãa pɔw taa nɩ ʋ a ʋ yo-yifʋ nɩ a ʋ son ɩfʋ.

⁴ A ala ɩnɛ ʋ pʋlɩ̃ nɩ sɩ a pʋlɩ̃-vɛlɛ na ma bɛrmɛ ɩɛ wa, a mɩnɛ a nyɩ na tʋɔ pɔw nɩ a Naaŋmɩn a ʋ wãa, ɩ̃ cɩ̃ɛ a sãwfʋ ʋlɔ na sãwna a tẽw.

⁵ A asɩmɛ ɩnɛ, nyɩ́ ƴɔ̃w fãgã ɩ̃ dɔɔl a dẽdẽ cenfʋ a nyɩ ƴɔ̃w-nyãa juu, ɩ̃ lɛ dɔɔl a bɔ̃wfʋ a nyɩ dẽdẽ cenfʋ juu.

⁶ Nyɩ́ lɛ ƴɔ̃w fãgã ɩ̃ dɔɔl a mɩ̃ɛ-tɛrɛfʋ a nyɩ bɔ̃wfʋ juu, ɩ̃ lɛ dɔɔl a su-varkpara a nyɩ mɩ̃ɛ-tɛrɛfʋ juu, ɩ̃ mɩ ɩ a Naaŋmɩn ƴɔ̃wfʋ a lɛ dɔɔl a nyɩ su-varkpara juu.

⁷ Nyɩ́ lɛ dɔɔl a yɛɛr nʋfʋ a nyɩ Naaŋmɩn ƴɔ̃wfʋ juu, ɩ̃ pãa dɔɔl a nɩbɛ ba jaa nʋfʋ a nyɩ yɛɛr nʋfʋ juu.

⁸ A ala ɩ a ana yele be na a nyɩ jie ɩ̃ waa, aa bara nyɩ lɛ ɩ̃ ma kʋ nyɩ wɔmɔ wa, ɩ̃-cɛ a na tɔw nyɩ na ƴɔ̃w a nyɩ na bɔ̃w a sɩ Nɩ-kpɛ̃ɛ *Jeeju-Kirisi vɩlaa.

⁹ Ɩ̃-cɛ a nɩrɛ ʋlɔ na ma tɛrɛ a ana yele wa jɔ̃w na, a-na-ɩ a ʋ nyɛfʋ nyɩrɩ̃ na pab. Ʋ hiinʼã ɩ̃ ma cãa bɔ̃wnaa a mɩnɛ a Naaŋmɩn na pɛw a ʋ korĩ-cɛ maal-faar bar wa.

¹⁰ Ala-ɩ̃-sɔ yɛɛr, nyɩ́ lɛ nyɩrɛ miile a nyɩ baafʋ pʋɔ áa Naaŋmɩn sɩrɩ̃ na bʋɔl nyɩ, ɩ̃ mɩ vɛl nyɩ ir. A-na-ɩ a nyɩmɩ maala a lɛ, daar ma be be fɩ̃ɩ a nyɩ na lo a fãa pʋɔ wa.

¹¹ A nɔhɔ̃, nyɩ na nyɛ na a sɔr kpɛ a sɩ Nɩ-kpɛ̃ɛ nɩ a sɩ Fafaara Jeeju-Kirisi fãw pʋɔ vɩlaa, a fãw ʋlɔ na ma tɛrɛ a baarfʋ daar wa.

¹² Ala-ɩ̃-sɔ, a mɩnɛ nyɩ na saarɩ̃ bɔ̃w a yele asɩmɛ, ɩ̃ mɩ ɩraa a cĩcĩ a yel-mɩ̃ɛ ʋlɔ pʋɔ nyɩ na be a ƴɛ̃ƴɛrɩ̃, ɩ̃-cɛ ɩ̃ na cãa na jawra nyɩ a ana yele a daar a jaa.

¹³ A lɛdaar ɩ̃ na cãa vʋʋrɔ, ɩ̃ nyɛ na a ɩ ma son ɩ̃ na jawra nyɩ a ɩ̃ kpãkpanfʋ pʋɔ.

¹⁴ A-na-ɩ ɩ̃ bɔ̃w na ka maa yaarɩ̃ bara a ɩ̃gan naa, a mɩnɛ a sɩ Nɩ-kpɛ̃ɛ Jeeju-Kirisi na dãa yel ma.

¹⁵ Ala-ɩ̃-sɔ ɩ̃ na dɩ nɩ nyɩ na a tuo, a mɩnɛ a maa wa saarɩ̃ cen, ɩ̃-cɛ a nyɩ na cãa bɔ̃w a ana yele a daar a jaa.

A BALA NA NYƐ A KIRISI CÃA KPƐ̃Ɛ

¹⁶ A-na-ɩ a lɛdaar sɩ na dãa man nyɩ a mɩnɛ a sɩ Nɩ-kpɛ̃ɛ *Jeeju-Kirisi na nyɩrʼɩ̃ a kpɛ̃w, aa ɩ kpurĩsɩ na yi a nɩbɛ tɩɛrɩ̃sɩ pʋɔ sɩ de manʼɩ̃ nyɩ wa, ɩ̃-cɛ sɩ be na be nyɛ a ʋ kpɛ̃ɛ ɩfʋ nɩ a sɩ mimie.

¹⁷ Ʋ pɔw na a yo-yifʋ nɩ a ju-kpɛ̃ɛ a Sãa Naaŋmɩn jie a lɛdaar sɩ na wõ a ʋna kɔkɩr na yi a Naaŋmɩn ji-nyɩlaa pʋɔ na yel: “A nanɩ ɩ̃ ɩ a ɩ̃ Bi-nʋnaa na kpɛ ma a nyãa.”

¹⁸ Sɩmɩ mɩ̃ɛ dãa na be nɩ ʋ a be a tã-ciiraa juu, ɩ̃ wõ a kɔkɩr ʋlɔ na dãa yi a saa juu.

¹⁹ Ala-ɩ̃-sɔ, sɩ nyɩrɩ̃ na sɔw a ƴɛrɩ̃ ʋlɔ a Naaŋmɩn ƴɛr-hierbe na dãa hier. A na vɩɛlɛ na a nyɩ na cɛlɛ a ʋna ƴɛrĩ, a-na-ɩ ʋ wɔ̃ na taa nɩ a cãa na caara a ji-liwraa pʋɔ lɛɛ… wa tara nɩ a lɛdaar a wɩɛr na caara, ɩ̃ a bi-vɩɛ ŋmarbir na mɩ caarɩ̃ a nyɩ sube pʋʋr.

²⁰ Nyɩ́ bɔ̃w nɩ a nanɩ sɛr: nɩrɛ kãw ma be be na tʋɔrɔ mana a Naaŋmɩn ƴɛr-bir par ʋ yẽ wa,

²¹ a-na-ɩ a Naaŋmɩn ƴɛr-bir kãw ma yi nɩrɛ pʋ-tɩɛrʋ̃ pʋɔ wa, ɩ̃-cɛ a Naaŋmɩn Sɩɛ ɩ̃ tɔw a nɩbɛ a ba ƴɛr a Naaŋmɩn ƴɛrɩ̃.