2 Jã Sɛbɛ 1 - A NAAŊMƖN PƲLƖ̃-TA-PAALAA

A PUORFƲ

¹ A maa na ɩ a ni-diere ɩ̃ tɩɩrɛ a sɛbɛ na kʋrɔ a Pɔw ʋlɔ a Naaŋmɩn na vɛl ir, nɩ a ʋ bibiir ɩ̃ na nʋ a Naaŋmɩn yel-mɩ̃ɛ pʋɔ. Aa ɩ maa ɩ̃ yẽ ɩ̃ nʋ nyɩ wa, ɩ̃-cɛ a bala ba jaa na bɔ̃w a yel-mɩ̃ɛ mɩ nʋ nyɩ na,

² a-na-ɩ a yel-mɩ̃ɛ be na a sɩ pʋɔ, ɩ̃ ʋ na be nɩ sɩ na a daar a jaa.

³ A sũofʋ, a nã-bɔ̃wfʋ, nɩ a pɩɛnfʋ na yi a Sãa Naaŋmɩn nɩ a *Jeeju-Kirisi na ɩ a Sãa Bi-daba sɛ̃, na be na a sɩ jie, a mɩnɛ sɩ na be a yel-mɩ̃ɛ nɩ a nʋfʋ pʋɔ.

A YEL-MƖ̃Ɛ NƖ A NƲFƲ PAR

⁴ Nʋ̃ɔ tɩɩ na nyɔw ma a mɩnɛ ɩ̃ na nƴɛ a fʋ bibiir ŋmɛɛ a ba cere a yel-mɩ̃ɛ pʋɔ a Sãa na man sɩ.

⁵ Ɩ̃ a ƴɛ̃ƴɛrɩ̃ na, maa sɛbɛ fʋ ƴɛr-kpɛ̃w paalaa wa, ɩ̃-cɛ a ɩ na a ʋlɔ sɩ na pɔw a korĩ-cɛ na yel á sɩ nʋnɔ taa sɩ jaa.

⁶ A nʋfʋ ɩ na á sɩ cere tuure nɩ a *Naaŋmɩn ƴɛr-kpɛn. A par ɩ na a ʋna ƴɛr-kpɛ̃w nyɩ na dãa wõ a korĩ-cɛ na yel á nyɩ cere a nʋfʋ pʋɔ.

⁷ A bɛbɛlbɛ yayaw yɛrʼã pɔw a tẽw. Ba maa sɔw áa *Jeeju-Kirisi sɩrɩ̃ na lɩɛb tɛrɛ a nɩrɛ ɩ̃gan wa. Bɛbɛlbɛ nɩ a *Kirisi sama-deme ba ɩ.

⁸ Nyɩ́ tɛrɛ nyɩ mɩ̃ɛ kɔ̃ wa bar a sɩ tʋmɔ a lo wa, ɩ̃-cɛ nyɩ́ bɔ̃w ɩraa, na nyɩ pɔw a nyɩ yar a jaa.

⁹ A nɩrɛ lɛ na ma ɩraa a Kirisi jaanfʋ pʋɔ wa, ɩ̃ dɔɔlɔ, faa na a Naaŋmɩn, ɩ̃-cɛ a ʋlɔ na ɩraa a ʋna jaanfʋ pʋɔ pɔw na a Sãa nɩ a Bie.

¹⁰ A nɩrɛ wa wɩ a nyɩ jie ɩ̃ ma wɩ nɩ a ʋna jaanfʋ wa, nyɩ taa sɔw de ʋ a nyɩ yir wa, ɩ̃ nyɩ taa mɩ tɩɩ soor ʋ a jãa wa,

¹¹ a-na-ɩ a ʋlɔ na wa soor ʋ a jãa, be na tɔ a ʋ burbur pʋɔ.

A ƳƐR-BAARAA

¹² Ɩ̃ tɛrɛ na yele yayaw na yel nyɩ, ɩ̃-cɛ maa bʋɔrɔ ɩ̃ sɛb ƴɔ̃w a sɛbɛ pʋɔ tɩɩr kʋ nyɩ wa, ɩ̃, ɩ̃ bʋɔrɔ na ɩ̃ wɩ a nyɩ sɛ̃ a sɩ na tʋɔ tor taa bʋ, a nʋ̃ɔ na nyɩrɩ̃ nyɔw sɩ.

¹³ A fʋ yɛ-pɔw bibiir a Naaŋmɩn na mɩ vɛl ir, puor fʋ na.