2 Kɔrɛ̃tɩ Sɛbɛ 8 - A NAAŊMƖN PƲLƖ̃-TA-PAALAA

A SŨOFƲ ƲLƆ A NAAŊMƖN NA BƲƆRƆ

¹ Yɛɛr, sɩ bʋɔrɔ na nyɩ bɔ̃w a mɩnɛ a Naaŋmɩn sũofʋ na dãa maal a Masɛdɔn *duo-puorbo sɔ̃w.

² A mɩnɛ ba na lo a won kpɛ̃ɛ pʋɔ a dãa na kpɛmɛ ba, ɩ̃-cɛ ba cãa na sɛw nɩ a nʋ̃ɔ na ƴala, ɩ̃ a mɩnɛ ba na mɩ saarɩ̃ be a nã-kpɛ̃ɛ pʋɔ, ɩ̃ ba cãa na pɛlɩ̃ a pʋɔ sũono nɩ a gãw a lɛ.

³ Ɩ̃ na tʋɔ na yel nyɩ á ba maalʼã a ala ba na tʋɔ, ɩ̃ lɛ dɔɔl.

⁴ A bala mɩ̃ɛ ɩ̃ sʋɔr sɩ lɔbɔ nɩ a nur, á sɩ kʋ ba sɔr a ba kpaarɩ̃ taa ɩ̃ tɩɩr bom kʋ a Jude wɩɛr popuorbo.

⁵ A ba maalfʋ dãa na gãw a ala sɩ na tɩɛrɛ. Ba de na a ba mɩ̃ɛ kʋ a Nɩ-kpɛ̃ɛ sɛr, ɩ̃ pãa mɩ de a ba mɩ̃ɛ kʋ sɩ, tu nɩ a Naaŋmɩn pʋ-tɩɛrʋ̃.

⁶ Ala-ɩ̃-sɔ a sɩ sʋɔr a Tɩtɩ á ú wɩ na baar a ʋna tʋ̃-vɩlaa a nyɩ sɔw, a-na-ɩ a ʋlɔ ɩ̃ dãa nyɔw.

⁷ A Naaŋmɩn yele a jaa nyɩ na tɛrɛ waa na a nyɩ jie: a ƴɔ̃w-nyãa ʋ mɩɩ, a Naaŋmɩn ƴɛrɩ̃ ƴɛrfʋ ʋ, a bɔ̃wfʋ, a ɓĩɓinfʋ a yele a jaa pʋɔ, nɩ a nyɩ nʋfʋ nyɩ na nʋ sɩ. A lɛ ʋ mɩ, nyɩ́ ɩ a ana yɛ̃-bɔ̃wfʋ tʋmɔ a mɩ waa a nyɩ jie.

⁸ Aa ɩ ƴɛr-kpɛ̃w ɩ̃ kʋrɔ nyɩ wa, ɩ̃-cɛ ɩ̃ miile nyɩ na a mɩnɛ a nɩŋmɛɛ na ɓĩɓin a Jude deme sũofʋ ɩnɛ, ɩ̃ na mɩ tʋɔ jʋʋr a nyɩ nʋfʋ a ala ɩ yel-mɩ̃ɛ be na tɔ.

⁹ Nyɩ bɔ̃w na a sɩ Nɩ-kpɛ̃ɛ *Jeeju-Kirisi wɩɛfʋ. Ʋ dãa na ɩ a naaba, ɩ̃ lɩɛb ɩ a nãw sʋbɔ a nyɩ ɩnɛ, a mɩnɛ a nyɩ na tʋɔ le a ʋ nãw ɩnɛ.

¹⁰ A ƴɛrɩ̃ nanɩ pʋɔ, nyɩ́ nyɛ a ala ɩ̃ na tɩɛrɛ: a vɩɛlɛ na a nyɩ na cãa cere nɩ a ala nyɩ na nyɔw a dɩ̃ɛw. A-na-ɩ nyɩmɩ ɩ̃ dãa de nĩe be a ana tʋmɔ pʋɔ, ɩ̃ nyɩmɩ mɩ dãa de nĩe guor a ala maalfʋ.

¹¹ Ala-ɩ̃-sɔ, nyɩ́ cãa cere nɩ a maalfʋ wa ta nɩ a baarfʋ daar. A mɩnɛ nyɩ na dãa ɓĩɓine a bɔfʋ daar, nyɩ́ lɛ cãa wɔ̃ a lɛ a maalfʋ pʋɔ, tu nɩ a ala nyɩ na tɛrɛ.

¹² A ala ɩ a nɩrɛ ɓĩɓine na a tɩɩrfʋ ɩnɛ, a Naaŋmɩn ma sɔw na de a ala ʋ na tɛrɛ, ɩ̃ ꞌwaa sooro ʋ a ala ʋ na ma tɛrɛ wa.

¹³ Maa bʋɔrɔ nyɩmɩ nyɩ lo, ɩ̃ a bala pɔw wa, ɩ̃-cɛ a jɛ̃-tar ʋ be be.

¹⁴ A ƴɛ̃ƴɛrɩ̃ na nyɩ tɛraa na ma ɩ wa, na tʋɔrɔ sũono a bala na ma tɛrɛ wa. A bibirɩ̃ kãw nyɩ na mɩ tʋɔ na be a nãw pʋɔ a ba mɩ sũo nyɩ, a mɩnɛ a jɛ̃-taafʋ na be a nyɩ sɔ̃w,

¹⁵ tu nɩ a ala a Naaŋmɩn Sɛbɛ na yel: “A ʋlɔ na dãa wob a yaw ma lɛ nyɩrɩ̃ tɛrɛ wa, ɩ̃-cɛ a ʋlɔ na wob a fɩ̃ɩ ma lɛ faa bom wa.”

A TƖTƖ NƖ A Ʋ LÃA-YƲƆRBƆ

¹⁶ Naaŋmɩn sɔ pɛwfʋ a mɩnɛ a Tɩtɩ na tɛrɛ a ɓĩɓinfʋ a nyɩ sũofʋ ɩnɛ a sɩ kaarɩ̃.

¹⁷ Sɩ sʋɔr ʋ na á ú wɩ a be a nyɩ sɛ̃, ʋ sɔw, ɩ̃-cɛ a ʋlɔ mɩ̃ɛ mɩ dãa na ɓĩɓine a be wɩfʋ.

¹⁸ Sɩ lãa na tʋnɔ nɩ ʋ a yɛbɛ ʋlɔ a *duo-puorbo a jiir a jaa na kpiire a Naaŋmɩn ƴɛr-son hierfʋ ɩnɛ.

¹⁹ Ba mɩ dãa na vɛl ʋ ir ʋ na bɩɛl sɩ a sɩ lãa cen na tʋ̃ a ʋna sũofʋ tʋn, a mɩnɛ a Nɩ-kpɛ̃ɛ yuor na yire, ɩ̃ a sɩ na mɩ miil ba a sɩ ɓĩɓinfʋ.

²⁰ Sɩ maalʼã a lɛ a-na-ɩ saa bʋɔrɔ nɩrɛ ʋ wa hũhune sɩ a ana libi-yaw cenɩfʋ ɩnɛ wa.

²¹ Saa bʋɔrɔ sɩ maal a ala na nʋmɔ a Nɩ-kpɛ̃ɛ tɛw wa, ɩ̃-cɛ sɩ maal a na mɩ nʋmɔ a nɩbɛ.

²² Sɩ lãa na tʋnɔ nɩ ba a sɩ yɛbɛ ƴen sʋbɔ sɩ na jʋʋr gbɛɛ yayaw a yele yaw pʋɔ nyɛ ʋ cãa ɓĩɓine. Ɩ̃ a ƴɛ̃ƴɛrɩ̃, a ʋ ɓĩɓinfʋ lɛ dɔɔlʼã, a mɩnɛ ʋ na nyɩrɩ̃ barʼɩ̃ nyɩ a nyãa.

²³ A ala ɩ a Tɩtɩ ʋ, ʋ ɩ na a ɩ̃ lãa-yʋɔrɔ nɩ a ɩ̃ lãa-tʋnɔ a nyɩ ɩnɛ. Ɩ̃-cɛ a sɩ yɛɛr bala, ba ɩ na a duo-puorbo *nɩ-tʋnɩsɩ a *Kirisi yuor na mɩ yire a ba ɩnɛ.

²⁴ Ala-ɩ̃-sɔ, nyɩ́ miil ba a nyɩ yel-mɩ̃ɛ nʋfʋ, a mɩnɛ a duo-puorbo bala na tʋ̃ ba, na sɩrɩ̃ bɔ̃w ka a sɩ tɛrɛ na yel-mɩ̃ɛ na barʼɩ̃ nyɩ tɩɛrʋ̃.