2 Kɔrɛ̃tɩ Sɛbɛ 6 - A NAAŊMƖN PƲLƖ̃-TA-PAALAA

A POL TUO DƖFƲ A NAAŊMƖN TƲMƆ PƲƆ

¹ A mɩnɛ sɩ na ɩ a Naaŋmɩn lãa-tʋnbɔ, sɩ kpãkpana nyɩ na a nyɩ taa wa bar a Naaŋmɩn wɩɛfʋ ʋlɔ nyɩ na pɔw, ʋ lo wa.

² A-na-ɩ a yelʼã a Naaŋmɩn Sɛbɛ pʋɔ: “A daar ʋlɔ na dãa sɛw, ɩ̃ cɛl fʋ na; a faafʋ bibir, ɩ̃ wa na sũo fʋ.” Nyɩ́ nyɛ a ƴɛ̃ƴɛrɩ̃ na a daar ʋlɔ na sɛw. A faafʋ bibir nɩ a dɩnaa.

³ Saa maala bom na cɩɛrɛ nɩrɛ wa, a mɩnɛ a nɩrɛ kɔ̃ wa hũhune a sɩ tʋmɔ wa.

⁴ Ɩ̃-cɛ a yele a jaa pʋɔ sɩ ɛ̃ɛ na maal miile nɩ a nɩbɛ a mɩnɛ sɩ na ɩ a Naaŋmɩn tʋ̃tʋnbɔ. Sɩ tɛrɛ na su-varkpara yaw a won pʋɔ, a kpowfʋ pʋɔ, nɩ a nãw pʋɔ.

⁵ Ba ŋme sɩ na, ɩ̃ ƴɔ̃w sɩ a kasu pʋɔ. A nɩbɛ dam sɩ na. Sɩ tʋ̃ na a tʋ̃-kpɛn, ɩ̃ a ba mɩ mɔ̃w sɩ a gʋ̃ɔ nɩ a dɩb.

⁶ A ala na miile a sɩ ɩ na a Naaŋmɩn tʋ̃tʋnbɔ ɩ na a sɩ cɛcɛ ɩfʋ, a sɩ bɔ̃wfʋ, a sɩ su-nyɔwraa nɩ a sɩ son ɩfʋ. Ba na mɩ bɔ̃w sɩ na a Naaŋmɩn Sɩɛ ɩnɛ, nɩ a sɩ nʋfʋ na ma tɛrɛ a bɛlɩ̃fʋ wa,

⁷ nɩ a sɩ yel-mɩ̃ɛ ƴɛrɩ̃, nɩ a Naaŋmɩn fãgã sɩ na tɛrɛ. A torfʋ ɩ na a sɩ jɛb yele na be a sɩ dʋrɩ̃ nuu nɩ a sɩ gʋbaa nuu pʋɔ.

⁸ Sɩ pɔw na a ju-kpɛ̃ɛ nɩ a kpɛfʋ, mɩ pɔw nɩ a korfʋ nɩ a pɛwfʋ. Ba de sɩ na a sɩ ɩ bɛbɛlbɛ, ɩ̃-cɛ a sɩ ɩ a yel-mɩ̃ɛ deme.

⁹ Ba maal sɩ na wɔ̃ taa nɩ baa bɔ̃w sɩ wa, ɩ̃-cɛ sɩ ɩ na nɩ-bɔ̃wsɩ, a sɩ wɔ̃ taa nɩ nɩbɛ na pɩɛl kũu, ɩ̃ nyɛ, sɩ cãa na! Sɩ pɔw na a kpãafʋ, ɩ̃-cɛ saa kpi wa.

¹⁰ Ba ma sãw sɩ na a sube, ɩ̃-cɛ sɩ tɛrɛ na a nʋɔ a daar a jaa. Nãw deme sɩ ɩ, ɩ̃ lere nɩ-yaw. Saa tɛrɛ bom wa, ɩ̃-cɛ sɩ ɩ na a yele a jaa deme.

¹¹ Kɔrɛ̃tɩ deme, sɩ ƴɛr nyɩ na cãa pʋɔ, nɩ a sɩ suur ʋ jaa.

¹² Saa kpɛmɛ a sɩ sube a nyɩ jie wa, ɩ̃-cɛ nyɩmɩ ɛ̃ɛ kpɛmɛ a nyɩ sube a sɩ jie.

¹³ Ɩ̃ ƴɛrɛ nɩ nyɩ na a ɩ̃ bibiir kaarɩ̃. Nyɩ́ barʼɩ̃ sɩ nyãa a mɩnɛ sɩ na barʼɩ̃ nyɩ a nyãa. Nyɩ́ ɩ a sɩ kpɛ nyɩ a nyãa.

A MƖNƐ SƖ NA GURE A SƖ MƖ̃Ɛ A TƖBƐ DEME JIE

¹⁴ Nyɩ taa wa mara taa nɩ a bala na ma puoro wa. Bõ a torfʋ nɩ a burbur maalfʋ be taa? Mɩnɛ a cãa nɩ a libe na tʋɔ ɓã taa?

¹⁵ Mɩnɛ a *Kirisi nɩ a Beliya na tʋɔ ɩ ɩ̃ tɛrɛ nɔ-bõ-ƴen? Mɩɩ, bõ a popuoro nɩ a ʋlɔ na ma puoro wa na tʋɔ lãa tɛrɛ?

¹⁶ Mɩnɛ a Naaŋmɩn yir nɩ a tɩbɛ na tʋɔ wõ taa? A-na-ɩ a sɩmɩ ɩ̃ ɩ a Naaŋmɩn-mimir yir, a mɩnɛ a Naaŋmɩn na yel: “Ɩ̃ na wa be nɩ ba na, ɩ̃ yʋɔrɔ a ba sɔ̃w. Ɩ na ɩ na a ba Naaŋmɩn, ɩ̃ a ba ɩ a ɩ̃ nɩbɛ.”

¹⁷ Ala-ɩ̃-sɔ a Nɩ-kpɛ̃ɛ yel: “Nyɩ́ yi a ba sɔ̃w ɩ̃ cɛ ba bar. Nyɩ taa wa sɩɩrɛ bõ-sɔbaa wa, ɩ̃ ɩ̃ na de nyɩ na.

¹⁸ Ɩ̃ na ɩ na a nyɩ Sãa, ɩ̃-cɛ a nyɩ ɩ a ɩ̃ bi-dabsɩ nɩ a ɩ̃ bi-pɔɔbɔ. Lɛ a Nɩ-kpɛ̃ɛ na ɩ a kpɛ̃w a jaa Sʋbɔ yel.”