2 Kɔrɛ̃tɩ Sɛbɛ 5 - A NAAŊMƖN PƲLƖ̃-TA-PAALAA

¹ A-na-ɩ sɩ bɔ̃w ka a sɩ ɩ̃gan na ɩ a tẽw na pʋɔ sɛw, wa wɛl, sɩ tɛrɛ na yir ʋlɔ a Naaŋmɩn na kʋ sɩ, ʋ be a saa juu a daar a jaa, a yir ʋlɔ a nɩrɛ nuu na ma mɛ wa.

² Ɩ̃-cɛ a ƴɛ̃ƴɛrɩ̃ na sɩ na cãa be a ka, sɩ ʋʋnɔ na nyɩrɩ̃ bʋɔrɔ nɩ a sɩ saa juu yir pʋɔ kpɛfʋ,

³ a mɩnɛ a sɩ na tɛrɛ a ɩ̃gan bõ-pɔwraa, ɩ̃ a ba kɔ̃ nyɛ sɩ a sɩ ɩ bõ-jaalaa wa.

⁴ A-na-ɩ a lɛ sɩ na cãa be a sɩ ɩ̃gan pʋɔ na wɔ̃ a sɛw kaarɩ̃, sɩ ʋʋnɔ na wɔ̃ taa nɩ tuor sɩ na tuo. Aa ɩ wɔ̃ taa nɩ sɩ bʋɔrɔ na sɩ tɔ a ʋna sɛw naa bar wa, ɩ̃-cɛ yir sɩ bʋɔrɔ, a mɩnɛ a baafʋ na tʋɔ tɛw a bom ʋlɔ na kpiire bar.

⁵ A Naaŋmɩn mɩ̃ɛ ɩ̃ gbɛɛrɩ̃ sɩ a lɩɛbfʋ ʋlɔ ɩnɛ, ɩ̃ de nĩe kʋ sɩ a ʋ Sɩɛ na miile a yele ala na cãa cɛ tuure.

⁶ Ala-ɩ̃-sɔ sɩ barʼã nyãa a daar a jaa, a-na-ɩ sɩ bɔ̃w ka a lɛ sɩ na be a sɩ ɩ̃gan pʋɔ, sɩ jãa na taa nɩ a Nɩ-kpɛ̃ɛ.

⁷ A-na-ɩ a baafʋ sɩ na tɛrɛ a ƴɛ̃ƴɛrɩ̃ na, saa cere ꞌwuoro nɩ a ala sɩ na nyɛrɛ nɩ a sɩ mimie wa, ɩ̃ a ƴɔ̃w-nyãa pʋɔ sɩ cere.

⁸ Sɩ barʼã a nyãa a lɛ, ɩ̃ a na nʋmɔ sɩ na gãw, a sɩ na bar a ɩ̃gan na, ɩ̃ cen na jɛ nɩ a Nɩ-kpɛ̃ɛ.

⁹ Ɩ̃-cɛ sɩ tɩɩ na bʋɔrɔ sɩ maala a nʋmɔ ʋ, a sɩ na be a ɩ̃gan na pʋɔ, mɩɩ a sɩ na bar ʋ ɩ̃ cen.

¹⁰ A-na-ɩ a sɛw na a sɩ jaa fɛw na ɩraa a *Kirisi nii-sɔw a ƴɛrɩ̃ guorfʋ ɩnɛ, a mɩnɛ a sɩ jaa bõ-ƴene-ƴene na pɔw a yar tu nɩ a ala sɩ na wa maala, a vɩlaa mɩɩ a bier, a lɛdaar sɩ na cãa a ɩ̃gan na pʋɔ.

A MƖNƐ A NAAŊMƖN NA DE A KIRISI ƁAALƖ̃ NƖ A NƖBƐ

¹¹ A-na-ɩ sɩ bɔ̃w na a bom na dɩ a Nɩ-kpɛ̃ɛ jɔfʋ, ala-ɩ̃-sɔ sɩ bʋɔrɔ na sɩ lɩɛb a nɩbɛ tɩɛrɩ̃sɩ. A Naaŋmɩn bɔ̃w na a sɩ sube vɩlaa; ɩ̃ mɩ tɩɛrʼã ka a nyɩmɩ mɩ, nyɩ mɩ bɔ̃w sɩ na vɩlaa a nyɩ tɩɛrɩ̃sɩ pʋɔ.

¹² Aa ɩ sɩ pɛwrɛ na a sɩ mɩ̃ɛ a nyɩ jie go wa, ɩ̃-cɛ sɩ bʋɔrɔ na sɩ kʋ nyɩ sɔr a nyɩ na bar tɩɛrʋ̃ a sɩ ɩnɛ, a mɩnɛ nyɩ na tʋɔrɔ yele a bala na bar a suur pʋɔ yele, ɩ̃ bʋɔrɔ a yuor a ɩ̃gan pʋɔ.

¹³ A ala ɩ saa bɔ̃w yɛ̃ wa, a Naaŋmɩn ɩnɛ ʋ, ɩ̃ a ala ɩ sɩ bɔ̃w na a yɛ̃, a nyɩmɩ ɩnɛ ʋ.

¹⁴ A-na-ɩ a *Kirisi nʋfʋ fɛrɛ sɩ na, a-na-ɩ sɩ bɔ̃w na bɔ̃w ka a nɩ-bõ-ƴen kpi na a nɩbɛ ba jaa ɩnɛ, a lɛ yelʼã, áa nɩbɛ ba jaa kpi na.

¹⁵ Ʋ kpi na a nɩbɛ ba jaa ɩnɛ a mɩnɛ a bala na cãa a mimie kɔ̃ sɔ a ba mɩ̃ɛ baafʋ wa, ɩ̃-cɛ ʋ na ɩ a ʋlɔ na kpi ɩ̃ ir a kũu pʋɔ a ba ɩnɛ ben.

¹⁶ Ala-ɩ̃-sɔ, wa nyɔw nɩ a dɩnaa, saa lɛ ꞌwuoro a nɩrɛ tuure nɩ a nɩrɛ tɩɛrʋ̃ wa. A ala saarɩ̃ ɩ sɩ dãa na ꞌwuor a Kirisi nɩ a nɩrɛ tɩɛrʋ̃, ƴɛ̃ƴɛrɩ̃ na, saa lɛ maala a lɛ go wa.

¹⁷ A ala ɩ a nɩrɛ be na a Kirisi pʋɔ ʋ ɩ na a nɩ-paalaa; a yel-koro tɔlʼã, ɩ̃ a yel-paala lɛ wa.

¹⁸ A ala a jaa yi na a Naaŋmɩn jie, a ʋlɔ na de a Kirisi ɓaalɩ̃ sɩ a sɩ lɛ ɓã taa nɩ ʋ, ɩ̃ mɩ kʋ sɩ a ʋna ɓaalɩ̃fʋ tʋn a nɩbɛ jie.

¹⁹ A-na-ɩ a Naaŋmɩn ma lɛ sooro a nɩbɛ a ba cɛfʋ jiir wa, ɩ̃-cɛ ʋ dãa na be a Kirisi pʋɔ ɓaalɩ̃ a nɩbɛ ba jaa, a ba lɛ lɩɛb ɓã taa nɩ ʋ, ɩ̃ mɩ kʋ sɩ a ʋna ɓaalɩ̃fʋ ƴɛrɩ̃ a sɩ ƴɛrɛ.

²⁰ Ala-ɩ̃-sɔ sɩ ɩ na a Kirisi fãw deme ʋ na biin, a sɩ wɔ̃ taa nɩ a ʋlɔ mɩ̃ɛ ɩ̃ ƴɛrɛ nɩ nyɩ. Sɩ sʋɔrɔ nyɩ na nɩ a Kirisi yuor bɩlɛ, nyɩ́ lɩɛb ɓã taa nɩ a Naaŋmɩn.

²¹ A Kirisi ma dãa maal fãa fɩ̃ɩ wa, ɩ̃-cɛ a Naaŋmɩn lɩɛb ʋ ʋ ɩ a maal-fãa a sɩ ɩnɛ, a mɩnɛ sɩ na tʋɔ pɔw a Naaŋmɩn torfʋ a ʋ jie.