2 Kɔrɛ̃tɩ Sɛbɛ 4 - A NAAŊMƖN PƲLƖ̃-TA-PAALAA

A POL NƲMƆ NA WƆ̃ A YOLO KAARƖ̃

¹ A Naaŋmɩn nã-bɔ̃wfʋ ɩ̃ sɔ-yaa ʋ kʋ sɩ a tʋn naa sɩ na tʋnɔ, ala-ɩ̃-sɔ saa bala wa.

² Sɩ jaarʼã a yel-sɔɔlsɩ na mɩ ɩ a vĩ yele bar. Saa tɛrɛ kpɩɩlʋ̃ʋ wa. Saa mɩ nyanyaana a Naaŋmɩn ƴɛrɩ̃ nɩ bom kãw wa. Ɩ̃-cɛ a Naaŋmɩn nii-sɔw sɩ ma ɛ̃ɛ yi nɩ a yel-mɩ̃ɛ ƴɛrɩ̃ a cãa pʋɔ, miile nɩ a sɩ mɩ̃ɛ a mɩnɛ a nɩbɛ ba jaa na bɔ̃w a ba tɩɛrɩ̃sɩ pʋɔ a sɩ ɩ na yel-mɩ̃ɛ deme.

³ Ɩ̃-cɛ a ala ɩ a ƴɛr-son sɩ na ƴɛrɛ sɔɔlɩ̃ na, a bala na wɛrɛ jie ʋ sɔɔlɩ̃.

⁴ A bala na ma sɔw de a sɩ ƴɛrɩ̃ wa, a ka a tẽw na pʋɔ naaŋmɩn jɔ̃w ba na bar a tɩɛrɩ̃sɩ pʋɔ, a mɩnɛ a ba kɔ̃ tʋɔ nyɛ a ƴɛr-son cãa na ɩ a *Kirisi cãa kpɛ̃ɛ wa, na ɩ a ʋlɔ na miile a mɩnɛ a Naaŋmɩn na be.

⁵ Saa hiere yele nɩ a mɩnɛ sɩ na wɔ̃ wa, ɩ̃-cɛ a *Jeeju-Kirisi ƴɛrɩ̃ sɩ hiere yele nɩ a mɩnɛ ʋ na ɩ a Nɩ-kpɛ̃ɛ, nɩ a mɩnɛ sɩ na mɩ ɩ a nyɩ tʋ̃tʋnbɔ a *Jeeju ɩnɛ.

⁶ A-na-ɩ a Naaŋmɩn ʋlɔ na dãa yel, áa cãa na caara na a libe pʋɔ, a ʋna Naaŋmɩn naa ɩ̃ mɩ caarɩ̃ a ʋ cãa a sɩ sube pʋʋr, a mɩnɛ a sɩ na tʋɔ nyɛ bɔ̃w a Naaŋmɩn cãa kpɛ̃ɛ ʋlɔ sɩ na nyɛ a Kirisi jie.

⁷ A sɩmɩ, sɩ wɔ̃ na taa nɩ a yolo ba na mɛ nɩ a yaaraa, ɩ̃ ƴɔ̃w a Naaŋmɩn na-yele, a na tʋɔ miile áa fãgã kpɛ̃ɛ ʋlɔ na be nɩ sɩ ma ɩ a sɩ ben wa, ɩ̃-cɛ a Naaŋmɩn sɔ.

⁸ A won bʋrɔ bʋrɔ ala kpɛɛrɛ sɩ na, ɩ̃ aa tʋɔ sɩ wa. A tɩɛrɩ̃sɩ mɩ nyanyaa sɩ na, ɩ̃-cɛ aa gãw sɩ wa.

⁹ Ba kpowro sɩ na, ɩ̃-cɛ a Naaŋmɩn ma bar sɩ wa. Ba ŋme sɩ na kpar a tene, ɩ̃-cɛ saa kpi wɛ wa.

¹⁰ Sɩ tɛrɛ na a Jeeju kũu won a sɩ ɩ̃gan pʋɔ a daar a jaa, a mɩnɛ a nɩbɛ na tʋɔ nyɛ a Jeeju baafʋ ʋ mɩ be a sɩ ɩ̃gan pʋɔ.

¹¹ A sɩ baafʋ pʋɔ, sɩ ma pɩɛlʼɩ̃ na a kũu a Jeeju ɩnɛ a daar a jaa, a mɩnɛ a nɩbɛ na tʋɔ nyɛ a Jeeju baafʋ a sɩ ɩ̃gan kpiiraa pʋɔ.

¹² A nɔhɔ̃, a kũu tʋnɔ na a ʋ tʋn a sɩ pʋɔ, ɩ̃-cɛ a baafʋ mɩ tʋnɔ a ʋ tʋn a nyɩ pʋɔ.

¹³ Ɩ̃-cɛ a mɩnɛ a Naaŋmɩn Sɛbɛ na yel: “A ɩ̃ ƴɔ̃w-nyãa tɛrɛfʋ ɩnɛ ɩ̃ ƴɛrɛ,” a sɩmɩ mɩ, sɩ mɩ tɛrɛ na a ʋna Sɩɛ na tɩɩrɛ a ƴɔ̃w-nyãa, ala-ɩ̃-sɔ a sɩ mɩ ƴɛrɛ.

¹⁴ A-na-ɩ sɩ bɔ̃w ka a ʋlɔ na dãa maal a Nɩ-kpɛ̃ɛ Jeeju ʋ ir a kũu pʋɔ, ʋ nɔɔ mɩ maal sɩ na a sɩ mɩ ir a kũu pʋɔ nɩ a Jeeju, cenʼɩ̃ sɩ, lãa nɩ a nyɩmɩ a Naaŋmɩn nii-sɔw.

¹⁵ A ala a jaa maala na a nyɩ ɩnɛ, a mɩnɛ a Naaŋmɩn sũofʋ na cere tara a nɩ-yaw dɔɔlɔ taa, a ba pɛwfʋ na mɩ nyɩrɩ̃ yire kʋrɔ nɩ ʋ a ju-kpɛ̃ɛ.

A POL NA BAR A NYÃA A Ʋ ƳƆ̃W-NYÃA ƖNƐ

¹⁶ Ala-ɩ̃-sɔ sãa bala fɩ̃ɩ wa. A ala saarɩ̃ ɩ a sɩ ɩ̃gan buur sãwna na fɩ̃ɩ fɩ̃ɩ, ɩ̃-cɛ a sɩɛ pʋɔ sɩ ma lɩɛbɛ na ɩrɛ bõ-paalaa a bibie a jaa.

¹⁷ A-na-ɩ a won gẽe naa sɩ na pɔwrɔ a ƴɛ̃ƴɛrɩ̃, tʋnɔ na a tʋn a sɩ ɩnɛ, a sɩ na pɔw a na-ƴel-tɩmɛsɩ daadaa na gãw a sɩ bɔ̃wfʋ a jaa.

¹⁸ A-na-ɩ saa ꞌwuoro a ala sɩ na nyɛrɛ nɩ a mimie wa, ɩ̃-cɛ sɩ ꞌwuoro na a ala sɩ na ma tʋɔrɔ nyɛrɛ wa. A yele ala sɩ na nyɛrɛ nɩ a sɩ mimie ma ɩ ƴel-kamɩsɩ wa; ɩ̃ a ala sɩ na ma nyɛrɛ wa be na be a daar a jaa.