2 Kɔrɛ̃tɩ Sɛbɛ 2 - A NAAŊMƖN PƲLƖ̃-TA-PAALAA

¹ Ala-ɩ̃-sɔ, a maa mɩ̃ɛ nyɛ na a sɛw ɩ̃ na bar a be wɩfʋ, a mɩnɛ a sɩ sube kɔ̃ lɔɔ wa sãw wa.

² A-na-ɩ a maa sãw nyɩ a suur, ala lɛ be be na lɛ kʋ ma a nʋ̃ɔ, ɩ̃ ma ɩ a nyɩmɩ ɩ̃ na sãw a suur wa?

³ A ala ɩnɛ ɩ̃ dãa sɛb a sɛbɛ a nɔhɔ̃ tɩɩr kʋ nyɩ, a mɩnɛ ɩ̃ kɔ̃ɔ dãa wɩ a nyɩ sɛ̃ lɛ pɔw a su-sãwfʋ a bala jie ɩ̃ na dãa sɛw ɩ̃ pɔw a nʋ̃ɔ wa. A-na-ɩ ɩ̃ bɔ̃w nyɩ na nyɩ jaa bɔ̃w ka a maa wa pɔw a nʋ̃ɔ, a ma mɩ ɩ na a nyɩ jaa nʋ̃ɔ.

⁴ Ɩ̃ sɛbʼã a sɛbɛ na nɩ won, nɩ a nãw na nyɩrɩ̃ be a ɩ̃ suur pʋɔ, nɩ a mɔtɔ̃-kʋ̃ɔ yaw. Aa ɩ ɩ̃ bʋɔrɔ na ɩ̃ sãw nyɩ suur wa, ɩ̃-cɛ ɩ̃ bʋɔrɔ na nyɩ bɔ̃w a mɩnɛ ɩ̃ na tɩɩ nʋnɔ nyɩ.

A NƖRƐ FÃA BA NA SƐW NA BAR KƲ Ʋ

⁵ A ala ɩ a nɩrɛ sãw na, aa ɩ maa tɛw jie ʋ sãw wa, ɩ̃-cɛ a nyɩ jaa jie ʋ. Ɩ̃ aa ɩ a nyɩ jaa fɛw jie ʋ wa, a mɩnɛ ɩ̃ kɔ̃ wa ƴaba dɔɔlɔ wa.

⁶ A nɩrɛ ʋlɔ kpãafʋ sɛw ʋ na, a-na-ɩ a kpãafʋ ʋlɔ yi na a nɩ-yaw jie a nyɩ sɔ̃w.

⁷ Ɩ̃ a ƴɛ̃ƴɛrɩ̃, nyɩ sɛw na na lɩɛb de bar kʋ ʋ, ɩ̃ ɓaalɩ̃ ʋ, a mɩnɛ a su-sãwfʋ kɔ̃ wa nyɩrɩ̃ gãw ʋ wa.

⁸ Ala-ɩ̃-sɔ, ɩ̃ sʋɔrɔ nyɩ na bɩlɛ, a nyɩ lɛ de ʋ, miile nɩ ʋ a nyɩ nʋnɔ ʋ na.

⁹ A ala ɩnɛ mɩ ɩ̃ dãa sɛb a sɛbɛ tɩɩr kʋ nyɩ, bʋɔrɔ ɩ̃ bɩɩr nyɩ je kãa, a ala ɩ nyɩ wono ma na a toor a yele a jaa pʋɔ.

¹⁰ A ala ɩ nyɩ de na a nɩrɛ fãa kãw ʋ na maal bar kʋ ʋ, a maa mɩ, a lɛ ʋ. A-na-ɩ a ala ɩ a fãa kãw be na be ɩ̃ sɛw na de bar kʋ a nɩrɛ, ɩ̃ na de na bar kʋ ʋ, a ɩ̃ nʋfʋ ɩnɛ a nyɩ jie a *Kirisi nii-sɔw,

¹¹ a mɩnɛ a sɩ kɔ̃ bar a Satã ʋ kpɛ sɩ wa, a-na-ɩ sɩ bɔ̃w na a ʋ gõgolĩfʋ tʋmɔ vɩlaa.

A POL SUUR NA DAMA Ʋ A TOROWASƖ-TẼW PƲƆ

¹² A lɛ ɩ̃ na ta a Torowasɩ-tẽw a *Kirisi ƴɛr-son ƴɛrfʋ ɩnɛ, a Nɩ-kpɛ̃ɛ sũofʋ saa na a sɔr yuo ma a ʋ tʋmɔ ɩnɛ,

¹³ ɩ̃-cɛ ɩ̃ suur ma dãa ɓãa wa, a-na-ɩ maa dãa nyɛ a ɩ̃ yɛbɛ Tɩtɩ wa, ala-ɩ̃-sɔ ɩ̃ puor ba ɩ̃ de a Masɛdɔn sɔr cere.

A TƲƆFƲ SƖ NA TƐRƐ A JEEJU-KIRISI PƲƆ

¹⁴ Naaŋmɩn sɔ pɛwfʋ, a ʋlɔ na tɔwrɔ sɩ a daar a jaa, a mɩnɛ sɩ na pɔw a tʋɔfʋ a *Kirisi pʋɔ, kpaarɩ̃ taa ŋmeere nɩ a cɛlɩ̃sɩ, cere nɩ. A sɩmɩ a Naaŋmɩn ma de ƴɔ̃w a sɩ na maala a nɩbɛ a ba bɔ̃w a Kirisi yuor a jiir a jaa, wɔ̃ taa nɩ kã-nƴuu na nyuure.

¹⁵ Sɩ ɩ na a kã-nyu-vɩlaa ʋlɔ a Kirisi na tɩɩrɛ kʋrɔ a Naaŋmɩn. A lɛ sɩ be a nɩbɛ bala jie na be a faafʋ sɔr pʋɔ, nɩ a bala mɩ jie na be a wɛfʋ sɔr pʋɔ mɩ.

¹⁶ Kũu kã-nƴuu ʋ ɩ a bala na be a wɛfʋ sɔr pʋɔ, ɩ̃-cɛ baafʋ kã-nƴuu ʋ ɩ a bala na be a faafʋ sɔr pʋɔ. Ɩ̃ ala na tʋɔ maal a tʋ̃-lɛ mɔɔ?

¹⁷ Saa wɔ̃ taa nɩ a yaw jie bala na ma yʋɔrɔ nɩ a Naaŋmɩn ƴɛrɩ̃ bʋɔrɔ nɩ a libie wa, ɩ-cɛ, a mɩnɛ a Naaŋmɩn na tʋ̃ sɩ, sɩ ma ƴɛrɛ na a cãa pʋɔ a ʋ nii-sɔw, a mɩnɛ sɩ na ɩ a Kirisi nɩbɛ.