2 Kɔrɛ̃tɩ Sɛbɛ 13 - A NAAŊMƖN PƲLƖ̃-TA-PAALAA

A ƳƐR-BAARAA NƖ A PUORFƲ

¹ A gbɛɛ ata nɩ a nanɩ ɩ̃ be wɩɛrɛ a nyɩ jie. A mɩnɛ a Naaŋmɩn Sɛbɛ na yel: “Nɩbɛ ayi, mɩɩ ata yel-mɩ̃ɛ ƴɛrɩ̃ pʋɔ fʋ sɛw na guor a nɩrɛ ƴɛrɩ̃.”

² A lɛdaar ɩ̃ na dãa be nɩ nyɩ a gbɛɛ ayi pʋɔ, ɩ̃ de na nĩe kpãkpan a bala ba jaa na dãa maal a fãa, nɩ a nɩbɛ ba jaa. A ƴɛ̃ƴɛrɩ̃ na ɩ̃ na jãa nɩ nyɩ, ɩ̃ lɛ bʋɔrɔ na ɩ̃ jaw nyɩ go; a maa wa gɔrɔ wɩɛrɛ, nã-bɔ̃wfʋ ma lɛ beree be wa,

³ a-na-ɩ nyɩ bʋɔrɔ na a bom ʋlɔ na miile áa *Kirisi ɩ̃ ƴɛrɛ a ɩ̃ pʋɔ. A Kirisi ʋlɔ ma bal a nyɩ jie wa, ɩ̃-cɛ ʋ tɛrɛ na kpɛ̃w a nyɩ sɔ̃w.

⁴ Sɩrɛ jaa ʋ, ʋ dãa na bal a lɛdaar ba na kpa ʋ a nɩ-kʋ-daa juu, ɩ̃-cɛ a Naaŋmɩn kpɛ̃w lɛ kʋ ʋ na a baafʋ. A sɩmɩ mɩ na ɩ a Kirisi nɩbɛ, sɩ balʼã, ɩ̃ a Naaŋmɩn kpɛ̃w na mɩ kʋ sɩ na a baafʋ, a mɩnɛ sɩ na tʋɔrɔ tʋnɔ a tʋmɔ a nyɩ sɔ̃w.

⁵ Nyɩ́ jʋʋr bɩɩrʼɩ̃ a nyɩ mɩ̃ɛ je kãa, a ala ɩ nyɩ ire nɩ na a ƴɔ̃w-nyãa. Nyaa bɔ̃w bɔ̃w ka a *Jeeju-Kirisi be na a nyɩ pʋɔ wa…? Ɩ̃ a ala ma ɩ a Naaŋmɩn bibi-kpansɩ nyɩ ɩ wa.

⁶ Ɩ̃-cɛ ɩ̃ bɔ̃w na á nyɩ na nyɛ na bɔ̃w ka a saa ɩ Naaŋmɩn bibi-kpansɩ wa.

⁷ Sɩ sʋɔrɔ na a Naaŋmɩn a nyɩ kɔ̃ wa maal bom bier kãw wa. Aa ɩ sɩ bʋɔrɔ na a nɩbɛ ba jʋʋr sɩ bɔ̃w ka nɩbɛ sɩ ɩ wa, ɩ̃-cɛ a nyɩ ɛ̃ɛ maala a vɩlaa, a ala saarɩ̃ ɩ ba de sɩ na a sɩ ɩ a nɩ-kpansɩ.

⁸ A-na-ɩ saa tʋɔrɔ jɛbɛ nɩ a yel-mɩ̃ɛ wa. A ɓãfʋ tɛw sɩ na tʋɔ ɓã ʋ.

⁹ Nʋ̃ɔ ma nyɔw sɩ na a lɛdaar sɩ na ma bal, ɩ̃-cɛ a nyɩ kpɛmɛ. A ala ɩnɛ sɩ na ma sʋɔrɔ a Naaŋmɩn ɩ na a nyɩ na lɩɛb ɩ cɛcɛ.

¹⁰ A bom na ɩnɛ ɩ̃ na tɩɩr a sɛbɛ na kʋ nyɩ a lɛdaar ɩ̃ na cãa jãa nyɩ ɩ na, a maa wa wɩ ɩ̃ taa wa de a ɩ̃ tʋɔfʋ tana nɩ nyɩ wa. A-na-ɩ a Nɩ-kpɛ̃ɛ ma kʋ ma a tʋɔfʋ na a nyɩ sãwfʋ ɩnɛ wa, ɩ̃-cɛ a nyɩ cɔɔrɩ̃fʋ ɩnɛ ʋ kʋ ma.

¹¹ Yɛɛr, a ƴɛ̃ƴɛrɩ̃ na, sɩ puor nyɩ na. Nyɩ́ lɩɛb ɩ cɛcɛ, kpãkpana nɩ taa, tɛrɛ nɩ nɔ-bõ-ƴen, mɩ tɛrɛ nɩ a su-ɓaar, ɩ̃ a nʋfʋ nɩ a pɩɛnfʋ Naaŋmɩn na be nɩ nyɩ na.

¹² Nyɩ́ puoro taa woro nɩ taa nɩ a Nɩ-kpɛ̃ɛ yuor. A Naaŋmɩn-puorbo ba jaa puor nyɩ na.

¹³ A Nɩ-kpɛ̃ɛ Jeeju-Kirisi sũofʋ, nɩ a Naaŋmɩn nʋfʋ, nɩ a ʋ Sɩɛ kpaarɩ̃fʋ á be a nyɩ jie nyɩ jaa.