2 Kɔrɛ̃tɩ Sɛbɛ 11 - A NAAŊMƖN PƲLƖ̃-TA-PAALAA

A POL NƖ A BƐBƐLBƐ TƲMƆ

¹ Ɩ̃ bʋɔrɔ na nyɩ bar ma ɩ̃ ƴɛr nyɩ yayaar ƴɛrɩ̃ fɩ̃ɩ. Ɩ̃-cɛ ɩ̃ bɔ̃w ka nyɩ na kʋ ma na a sɔr.

² Ɩ̃ tɛrɛ nɩ nyɩ na nyuur, a nyuur ʋlɔ na yi a Naaŋmɩn jie. Nyɩ wɔ̃ na taa nɩ a pɔsabil-cɛcɛ ɩ̃ na de kʋ a ʋ baraa bõ-ƴen tɛw, na ɩ a *Kirisi.

³ Ɩ̃ jɔrɔ na dãbɩ̃ɛ a mɩnɛ a waab ʋlɔ na dãa de a ʋ kpɩlfʋ bɛlɛ nɩ a Awa, a nʋmɔ-wa-sɔw ʋ na mɩ tʋɔ na lɛ de a ʋ kpɩlfʋ cʋrʼɩ̃ a nyɩ tɩɛrɩ̃sɩ, a nyɩ na bar a nyɩ yel-mɩ̃ɛ nɩ a nyɩ su-cɛcɛ a Kirisi tunɩfʋ pʋɔ.

⁴ A ala ɩ nɩrɛ wa na hiere a *Jeeju kpee kʋrɔ nyɩ, mɩɩ a nyɩ pɔw a Sɩɛ na be kpee nɩ a ʋlɔ nyɩ na dãa pɔw, mɩɩ ú ƴɛrɛ nyɩ a ƴɛr-son na be kpee nɩ a ʋlɔ nyɩ na dãa pɔw, má nyɩ na sɔw na de ʋ vɩlaa.

⁵ Ɩ̃-cɛ ɩ̃ tɩɛrʼã bɔ̃w ka maa pab bom kãw ɩnɛ a nyɩ nɩ-tʋ̃-vɛlɛ jie wa.

⁶ Ɩ̃ na tʋɔ na bal a ƴɛrɩ̃ ƴɛrfʋ pʋɔ, ɩ̃-cɛ a ala ɩ a bɔ̃wfʋ pʋɔ, maa bal wa, ɩ̃ sɩ ɛ̃ɛ na miil nyɩ a ala a jiir a jaa, nɩ a yele a jaa pʋɔ.

⁷ A mɩnɛ ɩ̃ na dãa ƴɛr nyɩ a Naaŋmɩn ƴɛr-son, pɔrɔ ɩ̃ ƴɛr kʋ nyɩ, wurʼɩ̃ a ɩ̃ mɩ̃ɛ a mɩnɛ ɩ̃ na tʋɔ jɛw nyɩ. Fãa ɩ̃ maal a lɛ mɩɩ?

⁸ Ɩ̃ pɔw na sũofʋ a Naaŋmɩn *duo-puorbo jiir ŋmɛɛ jie, a mɩnɛ ɩ̃ na tʋɔ tʋ̃ a tʋn a nyɩ sɔ̃w.

⁹ Ɩ̃ a lɛ ɩ̃ na dãa be a nyɩ sɔ̃w, ɩ̃ ma tɛrɛ a bom wa, maa dãa ɩ nɩrɛ kãw tuor wa. A-na-ɩ a yɛɛr bala na be a Masɛdɔn dãa na wa nɩ a ala a jaa na sɛw ma, kʋ ma. Ɩ̃ nyɔw na ɩ̃ mɩ̃ɛ a mɩnɛ ɩ̃ kɔ̃ ɩ nɩrɛ tuor wa, ɩ̃ a lɛ, ɩ̃ na lɛ cãa nyɔw a ɩ̃ mɩ̃ɛ.

¹⁰ Ɩ̃ na tʋɔ na yel nɩ a Kirisi yel-mɩ̃ɛ ʋlɔ na be nɩ ma, nɩrɛ ma be na tʋɔ mɔ̃w ma a ʋna pɔl-maalfʋ a Akayi wɩɛr pʋɔ ʋ jaa wa.

¹¹ Bõ ɩnɛ? A-na-ɩ maa nʋnɔ nyɩ wa mɩɩ? A Naaŋmɩn bɔ̃w na.

¹² Ɩ̃ na cãa na maala a ala ɩ̃ na maala a ƴɛ̃ƴɛrɩ̃, ɩ̃ na tʋɔ var a sɔr a bala jie na bʋɔrɔ a yo-yifʋ, yele nɩ a tʋ̃-bõ-ƴen sɩ tʋnɔ.

¹³ A nɩbɛ bala ɩ na a *nɩ-tʋnɩsɩ burbur, ŋmara nɩ a jiri a ba tʋmɔ pʋɔ, ɩ̃ ma lɩɛb a ba mɩ̃e wɔ̃ taa nɩ a Kirisi nɩ-tʋnɩsɩ.

¹⁴ Bom ma be be na ɩ nɔ-kofʋ bom wa, a-na-ɩ a Satã mɩ̃ɛ ma lɩɛbʼã wɔ̃ taa nɩ a Naaŋmɩn cãa sɩ-tʋnaa kaarɩ̃.

¹⁵ Ala-ɩ̃-sɔ, aa tʋɔrɔ dũune nɩ sɩ a ala ɩ a ʋ tʋ̃tʋnbɔ ma mɩ lɩɛbʼã a ba mɩ̃ɛ wɔ̃ taa nɩ a tʋ̃tʋ̃-torisɩ. A ba baarfʋ daar ba na pɔw na a yar tu nɩ a ba tʋmɔ ba na tʋ̃.

A POL NA MAN A Ʋ WON

¹⁶ Ɩ̃ lɛ yelʼã go, nɩrɛ kãw ʋ taa wa de ma ɩ̃ ɩ dãbol wa. Mɩɩ nyɩ̃ de ma ɩ̃ ɩ a dãbol, ɩ̃ na mɩ tʋɔ bɔ yuor fɩ̃ɩ.

¹⁷ Sɩrɛ jaa, a ala ɩ̃ na ƴɛrɛ a ƴɛ̃ƴɛrɩ̃ ma yi a Nɩ-kpɛ̃ɛ jie wa, ɩ̃-cɛ a yi na dãbol ƴɛrɩ̃sɩ pʋɔ, a mɩnɛ ɩ̃ na bar a ɩ̃ mɩ̃ɛ ɩ̃ ɩ a yo-bʋɔrɔ.

¹⁸ A-na-ɩ a yaw jie ma bʋɔrɔ na a yuor a ɩ̃gan buur pʋɔ, a maa mɩ, ɩ̃ na bʋɔrɔ na a yuor.

¹⁹ A nyɩmɩ na ɩ a nɩ-kpaarsɩ, nyɩ ma sɔw na de a dãbolo vɩlaa!

²⁰ A ala ɩ a nɩrɛ de nyɩ na a nyɩ ɩ a gbãgbaar, mɩɩ ʋ ŋmama nyɩ, bɛlɛ nɩ nyɩ, mɩɩ de nɩ a ʋ mɩ̃ɛ ʋ ɩ a nɩ-kpɛ̃ɛ, nara nɩ nyɩ a pɔrɔ, a ʋlɔ nyɩ ma de vɩlaa.

²¹ Ɩ̃-cɛ ɩ̃ yele na a ɩ̃ vĩ ɩnɛ, saa tɛrɛ kpɛ̃w na maal a lɛ wa. Ɩ̃-cɛ a ala ɩ̃ ɩ a nɩrɛ ꞌla na bʋɔrɔ a yuor a bom kãw ɩnɛ, (ɩ̃ ƴɛrɛ na a dãbol kaarɩ̃) a maa mɩ, ɩ̃ na mɩ ꞌla na maal a lɛ.

²² A ala ɩ Eburo nɩbɛ ba ɩ, a ala ɩ̃ mɩ ɩ, mɩɩ *Ɩsɩrayɛl nɩbɛ ba ɩ, a maa mɩ, a lɛ ʋ. A ala ɩ a Abʋraham bal nɩbɛ ba ɩ, a ala ɩ̃ mɩ ɩ.

²³ Ɩ̃ ƴɛrɛ na wɔ̃ taa nɩ nɩrɛ na bɔr juu! A *Kirisi tʋ̃tʋnbɔ ba ɩ mɩɩ? A maa ɩ̃ ɩ a ala gãw ba. Ɩ̃ tʋ̃ na tʋ̃-kpɛn gãw ba, ɩ̃ kpɛ a kasu pʋɔ mɩ gãw ba. Ɩ̃ mɩ nyɩrɩ̃ na pɔw a fɔbfʋ, ɩ̃ mɩ fɩɛlɩ̃ a kũu gbɛɛ yayaw.

²⁴ Gbɛɛ anuu a Jufisɩ fɔb ma nɩ a kpaara gbɛɛ lɩjaayi for bir.

²⁵ Gbɛɛ ata a Orom nɩbɛ pɔb ma nɩ a dãɓɩlsɩ. Gbɛ-daa a nɩ-bʋlsɩ mɩ lɔb ma nɩ a kʋsɩɛ bʋɔrɔ ba kú. Gbɛɛ ata a gbor mɩ bɔrʼɩ̃ ma a kʋ̃ɔ pʋɔ; a gbɛ-daa ɩ̃ be na a kʋ̃ɔ pʋɔ maal bibir bõ-ƴen.

²⁶ A ɩ̃ yɔfʋ pʋɔ, a daar a jaa ɩ̃ nyɛ na a jãjĩ bʋrɔ bʋrɔ: a jãjĩ ala na yi a man paalfʋ, a nyanyube a sɔr pʋɔ, a ɩ̃ mɩ̃ɛ bal nɩbɛ, a tẽ-bʋrɔ bʋrɔ nɩbɛ, a ten pʋɔ, a wɛkar pʋɔ, a man pʋɔ, lãa nɩ a jãjĩ ʋlɔ na yi a ɩ̃ yɛɛr burbur jie.

²⁷ Ɩ̃ tʋ̃ na a tʋ̃-kpɛn nyɛ nɩ a won; daar yayaw ɩ̃ galɩ̃ na a gʋ̃ɔ; a kɔ̃ nɩ a kʋ̃ɔ-nyuur mɩ nyɔw ma; ɩ̃ mɩ lũ a nʋɔr gbɛɛ yayaw; a aar mɩ ŋme ma; a cẽcen mɩ ɓɔr ma.

²⁸ A ala a jaa pʋɔ, a bibie a jaa ɩ̃ cãa na tuo a tuor ʋlɔ na ɩ a *duo-puorbo na be a jiir a jaa tɩɛrɩ̃sɩ.

²⁹ A nɩrɛ wa bal, ɩ̃ ma mɩ balʼã a ʋ ɩnɛ. A nɩrɛ wa faa lo a fãa pʋɔ, a ma mɩ wʋlɔ ma na.

³⁰ A ala ɩ a sɛw na ɩ̃ na bɔ a yuor, ɩ̃ na bɔ na a ala ɩnɛ ɩ̃ na bal.

³¹ A Naaŋmɩn na ɩ a Nɩ-kpɛ̃ɛ *Jeeju-Kirisi Sãa, ú pɔw a pɛwfʋ a daar a jaa. Ʋlɔ ɩ̃ bɔ̃w á maa ŋmara jiri wa.

³² A lɛ ɩ̃ na dãa be a Damasɩ-tẽw pʋɔ, a tẽw ʋlɔ jamana na tuure a jamana Arɛtasɩ ƴɔ̃w na a sɔdaalsɩ a ba gure a tẽw dɔ̃dɔɛ a ɩ̃ nyɔwfʋ ɩnɛ.

³³ Ɩ̃-cɛ ba ƴɔ̃w ma na a kpɛ̃jɛrɩ̃ pʋɔ, tur bar a bɔw na be a tẽw dacin ju-sɔ̃w, ɩ̃ suu nɩ a miir, na ɩ̃ cɩ̃ɛ a jamana nuumɩ.