2 Kɔrɛ̃tɩ Sɛbɛ 1 - A NAAŊMƖN PƲLƖ̃-TA-PAALAA

A PUORFƲ

¹ A maa Pol a Naaŋmɩn na vɛl ir ɩ̃ ɩ a *Jeeju-Kirisi *nɩ-tʋnaa, nɩ a sɩ yɛbɛ Timote, ɩ̃ tɩɩrɛ a sɛbɛ na kʋrɔ a nyɩmɩ Naaŋmɩn deme na be a Kɔrɛ̃tɩ-tẽw, nɩ a popuorbo ba jaa na be a Akayi wɩɛr ʋ jaa.

² A sũofʋ nɩ a pɩɛnfʋ na yi a sɩ Sãa Naaŋmɩn nɩ a sɩ Nɩ-kpɛ̃ɛ Jeeju-Kirisi sɛ̃ á be a nyɩ jie.

A POL NA PƐWRƐ A NAAŊMƖN

³ A Naaŋmɩn sɔ pɛwfʋ, a ʋlɔ na ɩ a sɩ Nɩ-kpɛ̃ɛ *Jeeju-Kirisi Sãa, na mɩ ɩ a nã-bɔ̃wfʋ Sãa nɩ a ɓaalɩ̃fʋ Naaŋmɩn a yele a jaa pʋɔ.

⁴ Ʋ ma ɓaalɩ̃ sɩ na a sɩ won a jaa pʋɔ, a mɩnɛ a sɩ na mɩ tʋɔ ɓaalɩ̃ a bala na be a won bʋrɔ bʋrɔ pʋɔ, nɩ a ʋna ɓaalɩ̃fʋ sɩ na pɔw a ʋ jie.

⁵ A mɩnɛ a *Kirisi won na dɔɔl taa wa ta sɩ, a lɛ ʋ mɩ, a Kirisi ɩnɛ, a ɓaalɩ̃fʋ dɔɔlɔ taa a sɩ jie.

⁶ A ala ɩ sɩ nyɛrɛ na a won, a ɩ na a nyɩ na pɔw a ɓaalɩ̃fʋ nɩ a faafʋ. A ala ɩ sɩ pɔw na a ɓaalɩ̃fʋ a mɩ ɩ na a nyɩ na mɩ pɔw a ɓaalɩ̃fʋ ɩraa nɩ cĩcĩ a lɛdaar nyɩ na beree a won ala pʋɔ sɩ na be.

⁷ Sɩ barʼã tɩɛrʋ̃ a nyɩ ɩnɛ, a-na-ɩ sɩ bɔ̃w na ka a mɩnɛ nyɩ na lãa pɔwrɔ nɩ sɩ a won, a lɛ nyɩ na mɩ lãa pɔw nɩ sɩ a ɓaalɩ̃fʋ.

⁸ Yɛɛr, sɩ bʋɔrɔ na nyɩ bɔ̃w a won wɔ̃ mɩnɛ sɩ na pɔw a Ajɩ wɩɛr: won ʋ, na dãa nyɩrɩ̃ gãw a sɩ fãgã, a saa mɩ dãa bɔ̃w ka sɩ na lɛ baa na wa.

⁹ A dãa na wɔ̃ taa nɩ sɩ sɩrɩ̃ na pɔw a sɩ mɩ̃ɛ kũu ƴɛrɩ̃, ɩ̃ a maalʼã a lɛ a mɩnɛ a sɩ kɔ̃ ma tɩɛrɛ nɩ a sɩ mɩ̃ɛ fãgã wa, ɩ̃-cɛ a sɩ na ma tɩɛrɛ nɩ a Naaŋmɩn ʋlɔ tɛw na ma ire a kũusɩ a kũu pʋɔ tɛw.

¹⁰ Ʋlɔ ɩ̃ faa sɩ a kũu ƴɛr-kpɛ̃ɛ ʋlɔ pʋɔ, ɩ̃ wa lɔɔ faara sɩ. Ɩ̃ sɩ tɛrɛ nɩ ʋ na a tɩɛrʋ̃ son, bɔ̃w nɩ ka a ʋ na lɔɔ faa sɩ na a nɩdaar go,

¹¹ a mɩnɛ nyɩ na sũono sɩ a Naaŋmɩn sʋɔrfʋ pʋɔ. Ɩ̃ a lɛ, a nɩ-yaw na pɛwrɛ na a Naaŋmɩn a sɩ ɩnɛ, a mɩnɛ ʋ na sũo sɩ a ba sʋɔrfʋ ɩnɛ.

A POL NA LƖƐB A Ʋ TƖƐRƖ̃SƖ

¹² Nyɛ a ala na ɩ a sɩ yo-yifʋ, a sɩ mɩ̃ɛ-bɔ̃wfʋ na mɩ man sɩ: a sɩ maalfʋ be na a cãa pʋɔ, ma tɛrɛ bɛlɩ̃fʋ ka a tẽw pʋɔ, wa yele nɩ a nyɩ jie wa. A ala a jaa yi na a Naaŋmɩn jie. Aa yi a nɩrɛ yɛ̃ jie wa, ɩ̃-cɛ a Naaŋmɩn sũofʋ jie a yi.

¹³ A-na-ɩ bõ-kpee ma be be a sɩ sɛbsɩ pʋʋr, ɩ̃ ma ɩ a ala nyɩ na ꞌwuoro bɔ̃wnɔ nɩ a par wa.

¹⁴ Wa ta nɩ a ƴɛ̃ƴɛrɩ̃ na, nyɩ wõ na a sɩ ƴɛrɩ̃sɩ ŋmãa tɛw. Ɩ̃-cɛ ɩ̃ tɩɛrʼã ka a sɩ Nɩ-kpɛ̃ɛ *Jeeju waa bibir, nyɩ na bɔ̃w na a par a jaa, ɩ̃ nyɩ na mɩ bɔ̃w na ka a sɩmɩ ɩnɛ nyɩ na tʋɔ cɩlɛ, a mɩnɛ a sɩmɩ na mɩ cɩlɛ a nyɩ ɩnɛ.

¹⁵ Ala-ɩ̃-sɔ, a mɩnɛ ɩ̃ na dãa bar a nyãa, bɔ̃w ka a na ɩ nyɩ na nʋ̃ɔ a ɩ̃ be wɩfʋ, ɩ̃ dãa na tɩɛr bɔ̃w ka ɩ̃ na de nĩe wɩ a nyɩ sɛ̃. Ɩ̃ dãa na bʋɔrɔ ɩ̃ maal nyɩ a vɩlaa gbɛɛ ayi.

¹⁶ A ɩ̃ dãdãw wɩfʋ a be a nyɩ sɛ̃ naa dãa na ɩ a ɩ̃ Masɛdɔn-tẽw cenfʋ, ɩ̃ a tuuraa naa dãa na lɛ ɩ a ɩ̃ be lɩɛbfʋ daar. A ala ɩ̃ baar, nyɩ naa dãa na sũo ma a Jude wɩɛr cenfʋ.

¹⁷ A mɩnɛ ɩ̃ na guoro a ala, ɩ̃ guorʼã ƴɔ̃w bar lɛ mɩɩ? Mɩɩ, nɩrɛ guorfʋ ʋ, a mɩnɛ ɩ̃ na tʋɔ sɔw a “ɔɔ” nɩ a “Kpee” ƴɔ̃w mɩɩ?

¹⁸ A mɩnɛ a Naaŋmɩn na ɩ a dẽdẽ, a sɩ ƴɛrɩ̃ sɩ na ƴɛr nyɩ kɔ̃ tʋɔ ɩ “ɔɔ” nɩ “Kpee” wa.

¹⁹ A Naaŋmɩn Bie *Jeeju-Kirisi ƴɛrɩ̃ a maa, nɩ a Sɩlasɩ, nɩ a Timote na dãa ƴɛr a nyɩ sɔ̃w ma dãa ɩ a “ɔɔ” nɩ a “Kpee” wa, ɩ̃-cɛ a Jeeju-Kirisi ʋlɔ ɩ̃ ɩ a “ɔɔ” ʋlɔ a Naaŋmɩn na kʋ sɩ.

²⁰ A-na-ɩ a Naaŋmɩn pʋlɩ̃fʋ a jaa tɛrɛ na a ba “ɔɔ” a Jeeju sɛ̃, ala-ɩ̃-sɔ a ʋlɔ ɩnɛ, sɩ ma yelʼã a “*Amɛn,” kʋrɔ nɩ a Naaŋmɩn a ju-kpɛ̃ɛ.

²¹ A ɩ na a ʋna Naaŋmɩn na ow sɩ a kpee, a sɩmɩ nɩ a nyɩmɩ, ɩ̃ maal sɩ a sɩ ɩraa cĩcĩ a *Kirisi pʋɔ,

²² mɩ yɔ̃w sɩ a ʋ yuor jɩbaa, ɩ̃ lɛ kʋ sɩ a ʋ Sɩɛ a sɩ sube pʋʋr na miile a yele ala na cãa cɛ tuure.

²³ Ɩ̃ de na a Naaŋmɩn ʋ ɩ a ɩ̃ yel-mɩ̃ɛ ƴɛr-mana, ṹ kpãa ma a ala ɩ jiri ɩ̃ na ŋmaa: a nyɩ cɩ̃ɛfʋ ɩnɛ ɩ̃ bar a Kɔrɛ̃tɩ-tẽw gɔr wɩfʋ.

²⁴ Saa bʋɔrɔ sɩ fɛr nyɩ a nyɩ ƴɔ̃w-nyãa pʋɔ wa, a-na-ɩ a ala ɩ a nyɩ ƴɔ̃w-nyãa pʋɔ ʋ, nyɩ bɔ̃w na ɩraa cĩcĩ. Ɩ̃-cɛ sɩ bʋɔrɔ na sɩ lãa tʋnɔ taa a nyɩ na pɔw a nʋ̃ɔ.