1 Timote Sɛbɛ 3 - A NAAŊMƖN PƲLƖ̃-TA-PAALAA

A ALA NA SƐW NƖ A NI-DIERE

¹ Ba ma yelʼã, áa nɩrɛ ɩ̃ bʋɔrɔ ʋ ɩ a ni-diere, á tʋ̃-son ʋ bʋɔrɔ. Sɩrɛ jaa ʋ.

² Ɩ̃-cɛ a ni-diere ʋlɔ sɛw na ʋ ɩ nɩrɛ na ma tɛrɛ mabfʋ jie wa, na mɩ tɛrɛ pɔw bõ-ƴen, tɛrɛ nɩ a yɛ̃, ɩ̃ mɩ ɩ a cɛcɛlɛ. A sɛw na ʋ bɔ̃w a yele cɔɔrɩ̃fʋ, ɩ̃ ɩ nɩrɛ na diere a sáanba, ɩ̃ mɩ tʋɔrɔ jaana a nɩbɛ.

³ Ʋ taa ꞌlaar a dãa wa, ʋ taa mɩ ɩ suur sʋbɔ wa, ɩ̃ ú ɩ su-ɓaar sʋbɔ. Ʋ taa ɩ cɩcɩɩrɛ wa, mɩɩ nyɩrɩ̃ ꞌlaar a libie wa.

⁴ Ʋ bɔ̃w ꞌwuoro a ʋ mɩ̃ɛ yir, maal a ʋ bibiir a ba wur a ba mɩ̃ɛ, ƴɔnɔ nɩ ʋ.

⁵ A-na-ɩ a ala ɩ a nɩrɛ ma bɔ̃w cɛlɛ a ʋ mɩ̃ɛ yir deme wa, mɩnɛ ʋ na ɩ ɩ̃ tʋɔ ꞌwuoro a Naaŋmɩn *duo-puorbo?

⁶ Ʋ taa ɩ nɩrɛ na kpɛ a paalʋ̃ wa, a mɩnɛ ʋ kɔ̃ wa bʋɔrɔ a yuor ɩ̃ lo a kpãafʋ ʋlɔ pʋɔ ba na ƴɔ̃w a Satã wa.

⁷ A sɛw na ʋ ɩ nɩrɛ a bala na ma puoro wa na ƴɔnɔ, a mɩnɛ a ba kɔ̃ wa kpɛrɛ ʋ, ɩ̃ ʋ wa lo a Satã cakpo pʋɔ wa.

A NAAŊMƖN YEL-ꞌWUORBO ƳƐRƖ̃

⁸ A lɛ ʋ mɩ, a bala na ɩ a yel-ꞌwuorbo a nyɩ sɔ̃w sɛw na ba ɩ nɩ-hɛlɛlɛ, kɔ̃ ŋmɩlɛ wa. Ba taa ɩ dã-ꞌlaarba wa. Ba taa mɩ ɩ bɛbɛlbɛ bʋɔrɔ nɩ a libi-yaw wa.

⁹ Bá bɔ̃w tɛrɛ a ba mɩ̃ɛ-bɔ̃wfʋ vɩlaa, ɩraa nɩ a puorfʋ ƴɛrɩ̃ ʋlɔ pʋɔ a Naaŋmɩn na miil sɩ.

¹⁰ A sɛw na a ba na de nĩe jʋʋr ba je kãa, ɩ̃ a bala mɔɔ nyɛ bom a ba jie wa, bá pãa bar ba a ba tʋ̃ a Naaŋmɩn tʋmɔ.

¹¹ A ala ɩ a pɔɔbɔ ʋ mɩ, a sɛw na a ba mɩ ɩ nɩ-hɛlɛlɛ, kɔ̃ ɩ nɩ-korbo wa. Bá tɛrɛ a yɛ̃, ɩ nɩ nɩ-dẽdẽsɩ a yele a jaa pʋɔ.

¹² A sɛw na a yel-ꞌwuorbo a nyɩ sɔ̃w na tɛrɛ pɔw bõ-ƴen tɛw, ɩ̃ bɔ̃w cɛlɛ tɔ a ba bibiir nɩ a ba yir deme vɩlaa.

¹³ A-na-ɩ a bala tʋ̃ a Naaŋmɩn tʋmɔ a vɩlaa, ba na pɔw na a yo-vɩlaa, mɩ pɔw nɩ a ꞌlafʋ a ba ƴɔ̃w-nyãa ba na tɛrɛ a *Jeeju-Kirisi pʋɔ.

A PUORFƲ ƳƐRƖ̃ Ɩ NA BÕ-KPƐ̃Ɛ

¹⁴ Ɩ̃ sɛbʼã a yele asɩmɛ tɩɩr kʋ fʋ, bʋɔrɔ ɩ̃ wɩ a fʋ sɛ̃ fɔfɔw.

¹⁵ Ɩ̃-cɛ a maa wa kama, a sɛw na a fʋ na bɔ̃w a mɩnɛ na sɛw a nɩbɛ bala na ɩ a Naaŋmɩn yir deme na maala a ba sɔ̃w. A bala, ba ɩ na a baafʋ Naaŋmɩn *duo-puorbo na tɩɛ a yel-mɩ̃ɛ a luur kaarɩ̃.

¹⁶ A nɩbɛ ba jaa bɔ̃w na bɔ̃w ka a puorfʋ ƴɛrɩ̃ ʋlɔ a Naaŋmɩn na miil sɩ ɩ na bõ-kpɛ̃ɛ: A *Kirisi, ba nyɛ ʋ na ʋ nyɩr ɩ a nɩsaa salaa. A Naaŋmɩn Sɩɛ miilʼã a ʋ torfʋ. A Naaŋmɩn sɩ-tʋnɩsɩ nyɛ ʋ na. A nɩbɛ hierʼã a ʋ ƴɛrɩ̃ a ten bʋrɔ bʋrɔ yɔ nɩ. Ba sɔw na a ʋ ƴɛrɩ̃ a tẽw ʋ jaa pʋɔ. A Naaŋmɩn de ʋ na do nɩ a saa juu.