1 Timote Sɛbɛ 2 - A NAAŊMƖN PƲLƖ̃-TA-PAALAA

A NAAŊMƖN PUORFƲ ƳƐRƖ̃

¹ A dãdãw bom ɩ̃ na bʋɔrɔ ɩ na a nyɩ na puoro a Naaŋmɩn, sʋɔrɔ nɩ ʋ, ɩ̃ mɩ sʋɔrɔ ƴɔnɔ a nɩbɛ, puoro nɩ ʋ a nɩbɛ ba jaa ɩnɛ.

² Nyɩ́ sʋɔrɔ ƴɔnɔ a jamansɩ nɩ a fãgã deme ba jaa, a mɩnɛ sɩ na tʋɔrɔ tɛrɛɛ a pɩɛnfʋ jɩnɛɛ nɩ jom, ƴɔnɔ nɩ a Naaŋmɩn mɩ cere nɩ dẽdẽ a sɩ maalfʋ pʋɔ.

³ A ala ɩ na bõ-son, ɩ̃ mɩ vɩɛlɛ a sɩ Fafaara Naaŋmɩn jie,

⁴ na bʋɔrɔ a nɩbɛ ba jaa ba pɔw a faafʋ, ɩ̃ mɩ wa bɔ̃w a yel-mɩ̃ɛ sɔr.

⁵ A-na-ɩ a Naaŋmɩn bõ-ƴen tẽtẽ ɩ̃ be be, ɩ̃ *lɔlʋɔrɔ bõ-ƴen tɛw mɩ be be a Naaŋmɩn nɩ a nɩbɛ sɔɔlɩ̃sɔw. Ʋ ɩ na a nɩrɛ ʋlɔ na ɩ a *Jeeju-Kirisi,

⁶ na tɩɩr a ʋ mɩ̃ɛ a kũu pʋɔ naa ʋ da nɩ a nɩbɛ ba jaa ɩ̃ faa ba. A nɔhɔ̃ a *Jeeju miilʼɩ̃ a Naaŋmɩn pʋ-tɩɛrʋ̃ a daar ʋlɔ na sɛw.

⁷ Yel-mɩ̃ɛ ɩ̃ yele, maa ŋmaa jiri wa, a Naaŋmɩn ƴɔ̃w ma na ɩ̃ ɩ a ƴɛƴɛrɛ nɩ a *nɩ-tʋnaa a ala ɩnɛ, mɩ mana nɩ a nɩ-bʋrɔ bʋrɔ a ƴɔ̃w-nyãa nɩ yel-mɩ̃ɛ.

⁸ Ala-ɩ̃-sɔ ɩ̃ bʋɔrɔ na, a jiir a jaa, a dabsɩ bá jã a nur puoro nɩ a Naaŋmɩn nɩ su-cɛcɛ, kɔ̃ nyɛ suur cɩɩrɛ nɩ taa wa.

⁹ Ɩ̃ mɩ bʋɔrɔ na a pɔɔbɔ ba ma su a yele ala na sɛw, a mɩnɛ ba kɔ̃ wa cʋrɔ a dabsɩ fere nɩ, ma wobʼɩ̃ a juu nyɩrɩ̃ kãka, ƴɔnɔ nɩ a sɛlmɛ yele, mɩɩ a lɛr-nyɩlɩsɩ, mɩ suure nɩ a cẽcene ala na nyɩrɩ̃ kpɛmɛ a dafʋ wa.

¹⁰ Ɩ̃-cɛ a ala na sɛw nɩ a pɔɔbɔ bala na puoro a Naaŋmɩn ɩ na ba maala tʋ̃-vɛlɛ.

¹¹ A sɛw na a pɔw ʋ wur a ʋ mɩ̃ɛ, ɩ̃ ma sine cɛlɛ nɩ a Naaŋmɩn ƴɛrɩ̃.

¹² Maa kʋ a pɔw a sɔr ʋ na mana a ƴɛrɩ̃, mɩɩ ʋ tɛrɛ a kpɛ̃w a daba jie wa, ɩ̃-cɛ ú sine.

¹³ A-na-ɩ a *Adã ba dãa de nĩe mɛ, ɩ̃ pãa bɩɛr mɛ a Awa.

¹⁴ Ɩ̃ aa mɩ dãa ɩ a Adã ba bɛlɩ̃ wa, ɩ̃-cɛ a pɔw ba bɛlɩ̃, ʋ kpɛ a maal-fãa pʋɔ.

¹⁵ Ɩ̃-cɛ ʋ na pɔw na a faafʋ a mɩnɛ ʋ na ɩ a bi-dɔɔrɔ, a ala ɩ ba wurʼã a ba mɩ̃ɛ, bɔ̃w tɛrɛ nɩ a ƴɔ̃w-nyãa nɩ a nʋfʋ, mɩ ɩ nɩ cɛcɛ.