1 Timote Sɛbɛ 1 - A NAAŊMƖN PƲLƖ̃-TA-PAALAA

A PUORFƲ

^1-2 A maa Pol ɩ̃ tɩɩrɛ a sɛbɛ na kʋrɔ a Timote na ɩ a ɩ̃ bi-tɔr a ƴɔ̃w-nyãa pʋɔ, a maa na ɩ a *Jeeju-Kirisi *nɩ-tʋnaa a sɩ Fafaara Naaŋmɩn, nɩ a Jeeju-Kirisi ʋlɔ juu sɩ na dɔɔl a sɩ tɩɛrɩ̃sɩ na tʋ̃. A sũofʋ nɩ a nã-bɔ̃wfʋ nɩ a pɩɛnfʋ na yi a sɩ Sãa Naaŋmɩn nɩ a sɩ Nɩ-kpɛ̃ɛ Jeeju-Kirisi sɛ̃, á be a fʋ jie.

A MƖ̃Ɛ-TƐRƐFƲ A JAAN-KPEESƖ ƖNƐ

³ A mɩnɛ ɩ̃ na dãa yel fʋ a lɛdaar ɩ̃ na dãa cere a Masɛdɔn-tẽw, ɩ̃ cãa na bʋɔrɔ fʋ jɛ a be a Ɛfɛɛsɩ-tẽw pʋɔ, a mɩnɛ a fʋ na tʋɔ mɔ̃w a bala na tɛrɛ a jaan-kpeesɩ bar,

⁴ a mɩnɛ a ba kɔ̃ cɛlɩ̃ a kpurĩsɩ pʋɔ, nɩ a ba sãa-kʋnbɔ yoe sɔrfʋ pʋɔ na ma tɛrɛ tɛw wa. A ala waara nɩ a cɩɩrɩ̃fʋ tɛw, ɩ̃ ma sũono a ala a Naaŋmɩn na gbɛɛrɩ̃ a cere nii-sɔw wa. A nɩbɛ ƴɔ̃w-nyãa pʋɔ ba na bɔ̃w a ala.

⁵ A kpãkpanfʋ ʋlɔ par ɩ na a ba na tɛrɛ a nʋfʋ na yire a su-cɛcɛ pʋɔ, mɩ tɛrɛ nɩ a mɩ̃ɛ-bɔ̃wfʋ na vɩɛlɛ, nɩ a yel-mɩ̃ɛ ƴɔ̃w-nyãa.

⁶ A nɩŋmɛɛ ma bɔ̃w cɛl a ala wa, ɩ̃ vɩɛ kpɛ a ƴɛr-pɔrsɩ pʋɔ,

⁷ bʋɔrɔ ba ɩ a ƴɛr-kpɛn-manba, ɩ̃-cɛ baa mɩ bɔ̃w a ba mɩ̃ɛ ƴɛrɩ̃sɩ par wa, nɩ a ala ba na ma kpãkpana a nɩbɛ wa.

⁸ Sɩ bɔ̃w na ka a ƴɛr-kpɛn ɩ na bõ-son a ala ɩ sɩ nyɔw ʋ na a mɩnɛ a na sɛw.

⁹ A-na-ɩ sɩ bɔ̃w ka aa ɩ nɩ-toraa ɩnɛ ba ƴɔ̃w a ƴɛr-kpɛn wa, ɩ̃-cɛ ba ƴɔ̃w na a ƴɛr-kpɛn a nɩ-burbur, a to-wownbo, a nɩ-kpansɩ, a nɩ-faar, a bala na ma jɔrɔ a Naaŋmɩn, mɩɩ a puorfʋ yele wa, a bala na kʋrɔ a ba sãa, mɩɩ a ba mã, nɩ a nɩ-kʋrbɔ ba jaa ɩnɛ.

¹⁰ Ba mɩ ƴɔ̃w na a ƴɛr-kpɛn a bala na ɩ a pepebe, a dabsɩ bala na maala taa a vĩ tʋmɔ, a bala na ƴaba a nɩbɛ, a jir-ŋmarba, a bala na pɔrɔ ŋmara nɩ a jiri, nɩ a maal-bie a jaa na vara a jaan-son ƴɛrɩ̃,

¹¹ A lɛ a ƴɛr-son na be a maal-vɩlaa Naaŋmɩn na kʋ ma, miile nɩ a ʋ yo-yifʋ.

A POL NA PƐWRƐ A NAAŊMƖN

¹² Ɩ̃ pɛwrɛ na a sɩ Nɩ-kpɛ̃ɛ *Jeeju-Kirisi na kʋ ma a fãgã, a-na-ɩ ʋ nyɛ ma na ɩ̃ ɩ nɩ-dẽdẽ, ʋ vɛl ma ir ƴɔ̃w a ʋ tʋmɔ pʋɔ.

¹³ A mɩnɛ ɩ̃ na dãa saarɩ̃ kpɛrɛ a Naaŋmɩn, ɩ nɩ a nɩ-bier hʋɔlɔ nɩ a nɩbɛ a korĩ-cɛ, ɩ̃-cɛ ʋ nyɛ ma na ɩ̃ ɩ ʋ a nãw, a-na-ɩ maa dãa bɔ̃w a ala ɩ̃ na maala wa. Maa mɩ dãa tɛrɛ a ƴɔ̃w-nyãa wa,

¹⁴ ɩ̃ a sɩ Nɩ-kpɛ̃ɛ nyɩrɩ̃ na sũo ma, mɩ kʋ ma a ƴɔ̃w-nyãa nɩ a nʋfʋ ala sɩ na tɛrɛ a Jeeju-Kirisi pʋɔ.

¹⁵ Nyɛ a yel-mɩ̃ɛ ƴɛrɩ̃ na sɛw sɩ sɔw de nɩ a sɩ suur ʋ jaa: a Jeeju-Kirisi wa na ka a tẽw pʋɔ a nɩ-faar faafʋ ɩnɛ. A ba pʋɔ, a maa mɩ̃ɛ ɩ̃ nyɩrɩ̃ ŋme a juu.

¹⁶ A ala ɩnɛ a Naaŋmɩn nyɛ ma na ɩ̃ ɩ ʋ a nãw, ʋ bʋɔrɔ ʋ de nĩe miil a Jeeju-Kirisi su-nyɔwraa ʋ jaa a ɩ̃ jie, ɩ̃ ɩ bõ-tɔɔnaa a bala na bɩɛrɛ waara jie, a bala nɔɔ mɩ tɛrɛ nɩ ʋ a ƴɔ̃w-nyãa, ɩ̃ pɔw a baa-kɔ̃-tɛw.

¹⁷ A Jaman-daadaa, na ma tɛrɛ kũu daar wa, ba na ma mɩ tʋɔrɔ nyɛrɛ wa, na ɩ a Naaŋmɩn bõ-ƴen tɛw, ú pɔw a ju-kpɛ̃ɛ, ɩ̃ a ʋ yuor ú mɩ yire a daar a jaa. *Amɛn.

¹⁸ Ɩ̃ bie Timote, a ƴɛrɩ̃ nɩ a naa ɩ̃ na kʋrɔ fʋ, tuure nɩ a ƴɛrɩ̃sɩ ala a Naaŋmɩn Sɩɛ na dãa kʋ a nɩbɛ a ba de nĩe ƴɛrɛ a fʋ ɩnɛ. Bɔ̃w tɛrɛ a ana ƴɛrɩ̃sɩ a be a fʋ jie, a fʋ jɛbɛ nɩ a jɛb-son,

¹⁹ mɩ tɛrɛ nɩ a ƴɔ̃w-nyãa, nɩ a fʋ mɩ̃ɛ-bɔ̃wfʋ na ma dama wa. A nɩŋmɛɛ ma dãa cɛl a ba mɩ̃ɛ-bɔ̃wfʋ wa, a ba ƴɔ̃w-nyãa sãw.

²⁰ A ba pʋɔ, Imene nɩ Alɛsãdɩrɛ be na tɔ, bala ɩ̃ taw kʋ a Satã ʋ na kpãa ba, a ba kɔ̃ lɛ kpɛrɛ a Naaŋmɩn go wa.