1 Pɩɛr Sɛbɛ 4 - A NAAŊMƖN PƲLƖ̃-TA-PAALAA

A BAA-KƲRAA NƖ A BAA-PAALAA

¹ Ala-ɩ̃-sɔ, a mɩnɛ a *Kirisi na nyɛ a nãw a ʋ ɩ̃gan pʋɔ, a nyɩmɩ mɩ, nyɩ́ tɛrɛ a ʋna nãw nyɛfʋ tɩɛrʋ̃ mɩ, a na gbɛɛrɩ̃ nyɩ a nyɩ jɛb ɩnɛ, a-na-ɩ a ʋlɔ na nyɛ a nãw a ʋ ɩ̃gan pʋɔ, ʋ ŋmaa na yi a maal-fãa pʋɔ.

² A daar ʋlɔ na cɛ nyɩ a ka a tẽw pʋɔ, nyaa sɛw nyɩ cere tuure nɩ a ala a nyɩ ɩ̃gan buur na bʋɔrɔ wa, ɩ̃-cɛ nyɩ́ cere tuure nɩ a ala a Naaŋmɩn pʋ-tɩɛrʋ̃ na bʋɔrɔ.

³ A korĩ-cɛ, nyɩ pɔw na a daar ʋlɔ na sɛw nyɩ, na nyɩ maalʼɩ̃ a ala a tɩbɛ deme na nʋ. Nyɩ dãa na be a pebfʋ pʋɔ, a ɩ̃gan buur yele pʋɔ, a dãa kʋfʋ pʋɔ, a kpokpo dɩb dɩfʋ pʋɔ, a dãa nyufʋ duo-taa jiir, nɩ a baar lofʋ ala na ciire a Naaŋmɩn nii-sɔw pʋɔ.

⁴ Ɩ̃ a ƴɛ̃ƴɛrɩ̃, ba ko na nʋɔr a mɩnɛ ba na nyɛ nyɩ a nyɩ maa lɛ cãa pɔw ba cere nɩ a ba burbur yaw maalfʋ pʋɔ wa, a ba pãa kpɛrɛ nyɩ.

⁵ Ɩ̃-cɛ ba na manʼã a ba maalfʋ a Naaŋmɩn nii-sɔw, na gbɛɛrɩ̃ a nɩ-mimie nɩ a nɩ-kũusɩ ƴɛrɩ̃ guorfʋ ɩnɛ baar.

⁶ A ala ɩnɛ ba dãa man a ƴɛr-son kʋ a bala na kpi, a mɩnɛ a bala na pɔw a ƴɛrɩ̃ guorfʋ a ba ɩ̃gan buur pʋɔ a nɩbɛ kaarɩ̃ na mɩ tʋɔ na pɔw a baafʋ ʋlɔ na ɩ a Naaŋmɩn ben, a ba sɩɛ pʋɔ.

A NAAŊMƖN YEL-BƆ̃W-TƐRBƐ

⁷ A yele a jaa baarfʋ daar tara na. Ala-ɩ̃-sɔ, nyɩ́ bɔ̃w tɛrɛ nyɩ mɩ̃ɛ cɛlɛ nɩ a Naaŋmɩn sʋɔrfʋ.

⁸ A ala na ɩ a kpɛ̃ɛ ɩ na, nyɩ́ nyɩrɛ nʋnɔ taa bõ-ƴene-ƴene, a-na-ɩ a nʋfʋ ma piw na a maal-fãa yaw tɛɛlɛ.

⁹ Nyɩ́ bɔ̃w diere taa a nyɩ yie pʋɔ, kɔ̃ tɛrɛ hũhunfʋ wa.

¹⁰ Nyɩ jaa fɛw bõ-ƴene-ƴene na ɩ a Naaŋmɩn yel-bɔ̃w-tɛrbɛ ʋ na kʋ a tʋɔfʋ bʋrɔ bʋrɔ, nyɩ́ de a ʋna tʋɔfʋ naa ʋ na kʋ nyɩ, tʋnɔ sũono nɩ taa.

¹¹ A ala ɩ a nɩrɛ ɩ na a ƴɛƴɛrɛ, ú ƴɛrɛ a ƴɛrɩ̃sɩ ala a Naaŋmɩn na kʋ ʋ. A ala mɩ ɩ a nɩrɛ ɩ na a tʋ̃tʋnɔ, ú tʋnɔ nɩ a fãgã ʋlɔ a Naaŋmɩn na kʋ ʋ, a mɩnɛ a yele a jaa pʋɔ, a Naaŋmɩn na pɔw a ju-kpɛ̃ɛ a *Jeeju-Kirisi ɩnɛ. A Naaŋmɩn ʋlɔ ɩ̃ sɔ a ju-kpɛ̃ɛ nɩ a kpɛ̃w a daar a jaa. *Amɛn.

A KIRISI BILE NÃW NYƐFƲ

¹² Ɩ̃ badɛɛ, nyɩ taa ɩ a nʋɔr ko nyɩ a won kpɛ̃w na wɔ̃ a vũu kaarɩ̃ na wa bɩɩrɛ nyɩ wa, wɔ̃ taa nɩ aa dãa sɛw a ta nyɩ wa.

¹³ Ɩ̃ nyɩ́ ɛ̃ɛ cɩlɛ, a-na-ɩ nyɩ pɔw na a *Kirisi a ʋ nãw pʋɔ, a mɩnɛ a nyɩ na pɔw a nʋ̃ɔ cɩlɛ nɩ a lɛdaar a ʋ cãa kpɛ̃ɛ na nyɩrɛ.

¹⁴ A bala wa tʋrɔ nyɩ a Kirisi ɩnɛ, a na ɩ nyɩ na nʋ̃ɔ, a-na-ɩ a Naaŋmɩn cãa kpɛ̃ɛ na ɩ a ʋ Sɩɛ be na a nyɩ jie.

¹⁵ Nɩrɛ kãw ʋ taa wa be a nyɩ sɔ̃w nyɛrɛ a nãw a-na-ɩ nɩ-kʋrɔ ʋ ɩ, mɩɩ nyanyuur, mɩɩ nɩ-bier, mɩɩ tɔrɔ-ƴɔnɔ sʋbɔ wa.

¹⁶ Ɩ̃-cɛ, a nɩrɛ wa nyɛrɛ a nãw a Kirisi bile ʋ na ɩ ɩnɛ, ʋ taa wa ɩ a vĩ nyɔw ʋ wa, ɩ̃ ú ɛ̃ɛ pɛwrɛ a Naaŋmɩn, a Kirisi yuor v na tɛrɛ ɩnɛ.

¹⁷ A ƴɛrɩ̃ guorfʋ daar ta na, a Naaŋmɩn na nyɔw a ƴɛrɩ̃ guorfʋ nɩ a ʋ nɩbɛ. Ɩ̃-cɛ a ala ɩ a sɩ jie a nyɔw, mɩnɛ a na pãa wɔ̃ a bala na wõw a Naaŋmɩn ƴɛr-son ƴɛrɩ̃ a toor jie?

¹⁸ A mɩnɛ a Naaŋmɩn Sɛbɛ na yel: “A ala ɩ a nɩ-toraa faafʋ kpɛmɛ na, mɩnɛ a nɩ-kpana nɩ a maal-fãa sʋbɔ faafʋ na pãa be?”

¹⁹ Ala-ɩ̃-sɔ, a bala na nyɛrɛ a nãw tuure nɩ a Naaŋmɩn pʋ-tɩɛrʋ̃, sɛw na ba cere nɩ a ba vɩlaa maalfʋ, de nɩ a ba mɩ̃ɛ ƴɔ̃w a ba Mɛmɩɛrɛ na ɩ a dẽdẽ nuumɩ.