1 Pɩɛr Sɛbɛ 2 - A NAAŊMƖN PƲLƖ̃-TA-PAALAA

A KUBIR-MIMIR BA NA KPARʼƖ̃ A DACIN

¹ Ala-ɩ̃-sɔ nyɩ́ jaar a maal-bebe bʋrɔ bʋrɔ a jaa bar, lãa nɩ a bɛlɩ̃fʋ, a poe ayi tɛrɛfʋ, a nyuur, nɩ a cilũ.

² A mɩnɛ a bi-pɩɩlsɩ na ma ꞌlaar a bɩrɛ, a nyɩmɩ mɩ, nyɩ́ mɩ ꞌlaar a sɩɛ bʋrɩ̃ na ɩ a cɛcɛ, a mɩnɛ a nyɩ na tʋɔ karɩ̃ pɔw a faafʋ.

³ A-na-ɩ a mɩnɛ a Naaŋmɩn Sɛbɛ na yel: “Nyɩ ꞌlɛmʼã nyɛ a mɩnɛ a Nɩ-kpɛ̃ɛ na nʋmɔ.”

⁴ Nyɩ́ taw pɩɛl ʋ. Ʋ ɩ na a kubir-mimir ʋlɔ a nɩbɛ na jaar bar, ɩ̃-cɛ a Naaŋmɩn de ʋ, ʋ ɩ ʋ bõ-son.

⁵ Nyɩ́ taw pɩɛl ʋ, mɩ ɩ a kubi-mimie a Naaŋmɩn na tʋɔ de mɛ nɩ a ʋ Sɩɛ yir, ɩ̃ a nyɩ na mɩ ɩ a baar-lorbo bala a Naaŋmɩn na ow kpee, a nyɩ na loro a sɩɛ pʋɔ baba kʋrɔ ʋ, a baba ala na nʋmɔ ʋ, a yi a *Jeeju-Kirisi jie.

⁶ A-na-ɩ a Naaŋmɩn Sɛbɛ yelʼã: “Nyɩ́ nyɛ, ɩ̃ binʼã a *Sɩ̃ɔ-tẽw pʋɔ a kubir son ʋlɔ ɩ̃ na vɛl ir ƴɔ̃w a dacin-gbɛr pʋɔ. A ʋlɔ na ƴɔ̃w ʋ a nyãa, vĩ kɔ̃ be na kpɛ ʋ fɩ̃ɩ wa.”

⁷ Ala-ɩ̃-sɔ, ʋ ɩ na bõ-son a bala na ƴɔ̃w ʋ a nyãa jie, ɩ̃-cɛ a bala jie na ma ƴɔ̃w ʋ a nyãa wa, ʋ lɩɛbʼã ɩ “A kubir a mɛmɩɛrbɛ na dãa jaar bar, na lɩɛb ɩ a kubir ʋlɔ ba na de ƴɔ̃w a dacin-gbɛr pʋɔ.”

⁸ A mɩ yelʼã go: “A ɩ na a kubir ʋlɔ a nɩbɛ na ŋmeere a gbɛɛ, nɩ a kʋsɩpan ʋlɔ na maala ba a ba fara loro.” Ba ma ŋmeere na a gbɛɛ a-na-ɩ ba wõw na a toor a Naaŋmɩn ƴɛr-son ɩnɛ, ɩ̃ a ala ɩnɛ a Naaŋmɩn na dãa biin ba.

⁹ Ɩ̃-cɛ a nyɩmɩ, nyɩ ɩ na a bal-bʋrɔ ʋlɔ a Naaŋmɩn na vɛl ir, a Jamana baar-lorbo, nɩ a nɩbɛ bala a Naaŋmɩn na ow a kpee, a nyɩ na ɩ a ʋ mɩ̃ɛ bal ʋ na sɔ. Ʋ vɛl nyɩ na ir mɩ bʋɔl nyɩ yi nɩ a libe pʋɔ, a nyɩ kpɛ a ʋ nɔ-kofʋ cãa pʋɔ, a nyɩ na hier a ʋ tʋ̃-vɛlɛ ʋ na maal.

¹⁰ A korĩ-cɛ, nyaa dãa ɩ bal bõ-ƴen wa, ɩ̃-cɛ a ƴɛ̃ƴɛrɩ̃, nyɩ ɩ na a Naaŋmɩn bal nɩbɛ. Nyaa mɩ dãa pɔw a Naaŋmɩn nã-bɔ̃wfʋ wa, ɩ̃-cɛ a ƴɛ̃ƴɛrɩ̃ na nyɩ pɔw ʋ na.

NYƖ́ MAALA A NAAŊMƖN TƲ̃TƲNBƆ TƲ̃-BIE

¹¹ Ɩ̃ yɛ-nʋnɩsɩ, ɩ̃ kpãkpana nyɩ na, a nyɩmɩ na ɩ a sáanba yʋɔrɔ ka a tẽw pʋɔ, a nyɩ na bɔ̃w tɛrɛ nyɩ mɩ̃ɛ a ɩ̃gan buur yele jie, na ma jɛbɛ nɩ a nyɩ sɩɛ.

¹² Nyɩ́ ɩ a nyɩ maalfʋ a vɩɛlɛ a bala na ma puoro wa jie, a mɩnɛ a bala wa saarɩ̃ kpɛrɛ nyɩ yele nɩ á nɩ-bebe nyɩ ɩ, ɩ̃-cɛ a nyɩ tʋ̃-vɛlɛ na maal ba a ba pɛwrɛ a Naaŋmɩn a ʋ waa bibir.

¹³ A Nɩ-kpɛ̃ɛ ɩnɛ, nyɩ́ wur a nyɩ mɩ̃ɛ a tẽw pʋɔ fãgã deme ba jaa jie: a ala ɩ a jaman-kpɛ̃ɛ ʋ,

¹⁴ mɩɩ a ten bʋrɔ bʋrɔ jamansɩ ʋ na biin a ba na kpãana a bala na maala a bier, ɩ̃ mɩ kpiire a bala na maala a vɩlaa.

¹⁵ A-na-ɩ a Naaŋmɩn pʋ-tɩɛrʋ̃ ɩ na a nyɩ na maal a vɩlaa, kpalʼɩ̃ a bala na ɩ a dãbolo nɩ a gẽgemsɩ nʋɔr.

¹⁶ Nyɩ́ cere a mɩnɛ nyɩ na sɔ a nyɩ mɩ̃ɛ, ɩ̃-cɛ nyɩ taa de a nyɩ mɩ̃ɛ sɔfʋ piw nɩ a maal-bebe wa, ɩ̃ nyɩ́ ɛ̃ɛ maala a mɩnɛ nyɩ na ɩ a Naaŋmɩn tʋ̃tʋnbɔ.

¹⁷ Nyɩ́ ƴɔnɔ a nɩbɛ ba jaa, nʋnɔ nɩ a yɛɛr na be a *Kirisi pʋɔ. Nyɩ́ mɩ jɔrɔ a Naaŋmɩn ƴɔnɔ nɩ a jaman-kpɛ̃ɛ.

A KIRISI WON TƆƆNFƲ

¹⁸ A nyɩmɩ na ɩ a tʋ̃tʋnbɔ, nyɩ́ wur a nyɩ mɩ̃ɛ bɔ̃w jɔrɔ nɩ a nyɩ nɩ-bɛrɛ; aa ɩ a bala na ɩ a nɩ-sono nɩ a su-ɓaara deme tɛw wa, ɩ̃-cɛ nyɩ́ mɩ jɔrɔ a bala ben na mɩ kpɛmɛ.

¹⁹ A na ɩ nyɩ na bõ-son a ala ɩ nyɩ dɩ na tuo a kpãafʋ won pʋɔ a pɔrɔ a nyɩ Naaŋmɩn jɔfʋ ɩnɛ.

²⁰ A-na-ɩ a ala ɩ nyɩ maalʼã a fãa ɩ̃ pɔw a kpãafʋ, bõ a na lɛ ɩ nyɩ? Ɩ̃-cɛ a ala ɩ nyɩ maalʼã a vɩlaa ɩ̃ lɛ pɔw a won ɩraa nɩ cĩcĩ, a ala ɩ na bõ-son a Naaŋmɩn nii-sɔw.

²¹ A ala ɩnɛ a Naaŋmɩn ir nyɩ, a-na-ɩ a *Kirisi mɩ̃ɛ pɔw na a won a nyɩ ɩnɛ, na ɩ nyɩ bõ-tɔɔnaa, a nyɩ na tuure a ʋ gbɛ-pɛlɛ.

²² ꞌWaa dãa maal fãa wa. Baa mɩ dãa wõ jiri a ʋ nʋɔr pʋɔ wa.

²³ A mɩnɛ ba na tʋ ʋ, ꞌwaa mɩ lɩɛb tʋ wa. A mɩnɛ ʋ na pɔw a won, ꞌwaa ƴɛr ba bier wa, ɩ̃-cɛ ʋ de na a ʋ mɩ̃ɛ kʋ a Ʋlɔ na tor a ʋ ƴɛrɩ̃ guorfʋ pʋɔ.

²⁴ A Kirisi ʋlɔ mɩ̃ɛ de na a sɩ maal-faar a ʋ ɩ̃gan pʋɔ do nɩ a nɩ-kʋ-daa juu, a mɩnɛ a sɩ na tʋɔ kpi a sɩ maal-faar pʋɔ, ɩ̃ lɛ ir ɩ nɩ-torisɩ a sɩ maal-bie pʋɔ. A ʋ ɩ̃gan sãwfʋ ɩnɛ a nyɩ wʋlɩ̃sɩ kpaar.

²⁵ A-na-ɩ nyɩ dãa na wɔ̃ taa nɩ a piir na bɔrɔ, ɩ̃-cɛ a ƴɛ̃ƴɛrɩ̃ na, nyɩ lɩɛbʼã wa a ʋlɔ na ɩ a Dɔ-cɩɩnaa sɛ̃ na gure a nyɩ sɩɛ.