1 Jã Sɛbɛ 5 - A NAAŊMƖN PƲLƖ̃-TA-PAALAA

A MƖNƐ SƖ NA TƲƆ A TẼW

¹ A nɩrɛ lɛ na sɔw bɔ̃w ka a *Jeeju ɩ na a *Kirisi, ɩ na a Naaŋmɩn bile, ɩ̃ a ʋlɔ na nʋnɔ a sãa mɩ nʋnɔ na a ʋ bie.

² Nyɛ a mɩnɛ sɩ na bɔ̃w ka sɩ nʋnɔ na a Naaŋmɩn bibiir: a ɩ na a mɩnɛ sɩ na nʋnɔ a Naaŋmɩn, ɩ̃ mɩ jɔrɔ a ʋ ƴɛr-kpɛn.

³ A-na-ɩ a nʋfʋ ʋlɔ sɩ na tɛrɛ nɩ a Naaŋmɩn ɩ na a sɩ na jɔrɔ a ʋ ƴɛr-kpɛn. Ɩ̃ a ʋ ƴɛr-kpɛn ma nyɩrɩ̃ kpɛmɛ sɩ a jɔfʋ wa,

⁴ a-na-ɩ a ʋlɔ a Naaŋmɩn na dɔw tɛrɛ na a tʋɔfʋ a tẽw na ɩnɛ. Ɩ̃ a tʋɔfʋ ʋlɔ sɩ na tʋɔ nɩ a tẽw yi na a sɩ ƴɔ̃w-nyãa pʋɔ.

⁵ Ala ɩ a ʋlɔ na tʋɔ a tẽw? A ʋlɔ tɛw na tɛrɛ a ƴɔ̃w-nyãa, bɔ̃w ka a Jeeju ɩ na a Naaŋmɩn Bie ʋ.

A NAAŊMƖN YEL-MƖ̃Ɛ MANFƲ A Ʋ BIE ƖNƐ

⁶ A *Jeeju-Kirisi ɩ na a ʋlɔ na dãa wa. Ɩ̃ a mɩnɛ ʋ na wa, ba mʋr ʋ na a kʋ̃ɔmɩ, ɩ̃ a ʋ jɩ̃ɩ mɩ deer. Aa ɩ a kʋ̃ɔ tɛw ʋ wa nɩ wa, ɩ̃-cɛ a kʋ̃ɔ nɩ a jɩ̃ɩ jaa ʋ. Ɩ̃ a Naaŋmɩn Sɩɛ mana na a ala ɩ na yel-mɩ̃ɛ, a-na-ɩ a Naaŋmɩn Sɩɛ ɩ na a yel-mɩ̃ɛ.

⁷ A yel-mɩ̃ɛ manfʋ ɩ na jiir ata:

⁸ a Naaŋmɩn Sɩɛ, a kʋ̃ɔ, nɩ a jɩ̃ɩ, ɩ̃ a jaa ata tɛrɛ na nɔ-bõ-ƴen.

⁹ Sɩ ma sɔw na a nɩrɛ yel-mɩ̃ɛ manfʋ, ɩ̃-cɛ a Naaŋmɩn yel-mɩ̃ɛ manfʋ gãw na a lɛ, a-na-ɩ a ɩ na a Naaŋmɩn yel-mɩ̃ɛ manfʋ ʋlɔ ʋ na dãa man a ʋ Bie ɩnɛ.

¹⁰ A ʋlɔ na sɔw de a Naaŋmɩn Bie tɛrɛ na a ʋna yel-mɩ̃ɛ manfʋ a ʋ suur pʋɔ. Ɩ̃ a ʋlɔ na jaar, de na a Naaŋmɩn ʋ ɩ jir-ŋmara, a-na-ɩ ꞌwaa sɔw a ʋna yel-mɩ̃ɛ manfʋ a Naaŋmɩn na man a ʋ Bie ɩnɛ wa.

¹¹ Nyɛ a ʋna yel-mɩ̃ɛ manfʋ. A Naaŋmɩn kʋ sɩ na a baa-kɔ̃-tɛw, ɩ̃ a ʋna baafʋ be na a ʋ Bie pʋɔ.

¹² A ʋlɔ na tɛrɛ a Bie mɩ tɛrɛ na a ʋna baafʋ; ɩ̃ a ʋlɔ na ma tɛrɛ a Naaŋmɩn Bie wa, ma tɛrɛ a ʋna baafʋ wa.

A BAAFƲ ƲLƆ SƖ NA TƐRƐ A KIRISI PƲƆ

¹³ Ɩ̃ sɛbʼã a yele asɩmɛ kʋ a nyɩmɩ na ƴɔ̃w a Naaŋmɩn Bie a nyãa tɩɛrɛ nɩ ʋ, a nyɩ na tʋɔ bɔ̃w ka nyɩ tɛrɛ na a baa-kɔ̃-tɛw.

¹⁴ Sɩ barʼã nyãa a Naaŋmɩn nii-sɔw, a-na-ɩ sɩ bɔ̃w ka a sɩmɩ sʋɔr a bom lɛ tu nɩ a ʋ pʋ-tɩɛrʋ̃, ʋ na cɛl sɩ na,

¹⁵ ɩ̃ a ala ɩ sɩ bɔ̃w ka ʋ ma cɛlɛ na a sɩ sʋɔrfʋ a jaa, sɩ mɩ bɔ̃w na ka sɩ pɔw na a yele ala sɩ na sʋɔr.

¹⁶ A ala ɩ a nɩrɛ nyɛ na a ʋ yɛbɛ ʋ maala a maal-fãa kãw na ma cere nɩ ʋ a kũu pʋɔ wa, ú sʋɔr Naaŋmɩn ɩ̃ a Naaŋmɩn na kʋ ʋ na a baafʋ. A nanɩ ɩ na a bala tɛw maal-faar na ma cere nɩ ba a kũu pʋɔ wa. A-na-ɩ maal-fãa kãw be na be na cere nɩ a nɩrɛ a kũu pʋɔ, ɩ̃ maa yel á nyɩ sʋɔr Naaŋmɩn a ala ɩnɛ wa.

¹⁷ A burbur a jaa ɩ na maal-fãa, ɩ̃-cɛ a maal-fãa kãw be na be na ma cere nɩ a nɩrɛ a kũu pʋɔ wa.

¹⁸ Sɩ bɔ̃w ka a ʋlɔ a Naaŋmɩn na dɔw maa cãa cere a maal-fãa pʋɔ wa, a-na-ɩ a Naaŋmɩn Bie gu ʋ na, ɩ̃ a Fãa Sʋbɔ ma tʋɔrɔ maala ʋ bom wa.

¹⁹ Sɩ bɔ̃w ka sɩ ɩ na a Naaŋmɩn ben, ɩ̃ a tẽw na nɩbɛ ba jaa be na a Fãa Sʋbɔ nuumɩ.

²⁰ Sɩ mɩ bɔ̃w na ka a Naaŋmɩn Bie wa na kʋ sɩ a bɔ̃wfʋ, a sɩ na tʋɔ bɔ̃w nɩ a ʋlɔ na ɩ a Yel-mɩ̃ɛ Sʋbɔ. Sɩ be na a Yel-mɩ̃ɛ Sʋbɔ pʋ̃ɔ, a mɩnɛ sɩ na be a ʋ Bie *Jeeju-Kirisi pʋ̃ɔ. A ʋlɔ ɩ a Yel-mɩ̃ɛ Naaŋmɩn nɩ a baa-kɔ̃-tɛw.

²¹ Ɩ̃ bibiir, nyɩ́ tɛrɛ nyɩ mɩ̃ɛ a naaŋmɩn-kpansɩ jie!