1 Jã Sɛbɛ 4 - A NAAŊMƖN PƲLƖ̃-TA-PAALAA

A MƖNƐ SƖ NA BƆ̃WNƆ A NAAŊMƖN SƖƐ NƖ A SƖ SAN-SƲBƆ SƖƐ

¹ Ɩ̃ badɛɛ, nyɩ taa wa sɔwrɔ a bala ba jaa na yele áa Naaŋmɩn Sɩɛ ba tɛrɛ ƴɛrʼɩ̃ wa, ɩ̃-cɛ nyɩ́ jʋʋr ba je kãa, a ala ɩ ba sɩrɩ̃ na tɛrɛ a Naaŋmɩn Sɩɛ, a-na-ɩ jir-ŋma-ƴɛr-hierbe yaw yɛrʼã pɔw a tẽw.

² Nyɛ a mɩnɛ nyɩ na tʋɔrɔ bɔ̃wnɔ a ʋlɔ na tɛrɛ a Naaŋmɩn Sɩɛ: a ʋlɔ na cã yel áa *Jeeju-Kirisi wa na ka a tẽw pʋɔ tɛrɛ a nɩrɛ ɩ̃gan, sɩrɩ̃ na tɛrɛ a Naaŋmɩn Sɩɛ.

³ Ɩ̃ a ʋlɔ na ma sɔw cã yel a nɔhɔ̃ a *Jeeju ɩnɛ wa, ma tɛrɛ a Naaŋmɩn Sɩɛ wa, ɩ̃-cɛ a ʋna sɩɛ ʋ na tɛrɛ ɩ na a *Kirisi San-Sʋbɔ. Nyɩ dãa na wõ á ʋ na wa na a ka a tẽw pʋɔ, ɩ̃ a ƴɛ̃ƴɛrɩ̃ na ʋ gɔrʼã be ka.

⁴ Ɩ̃ bibiir, nyɩ ɩ na a Naaŋmɩn ben, ɩ̃ nyɩ tʋɔ na a jir-ŋma-ƴɛr-hierbe bala, a-na-ɩ a Sɩɛ ʋlɔ na be a nyɩ pʋ̃ɔ gãw na a ʋlɔ na be ka a tẽw pʋɔ.

⁵ A bala, ba ɩ na a tẽw na nɩbɛ, ala-ɩ̃-sɔ a ba ƴɛrɩ̃sɩ ɩ a tẽw na ben, ɩ̃ a tẽw na nɩbɛ ma sɔw na a ba ƴɛrɩ̃.

⁶ A sɩmɩ, sɩ ɩ na a Naaŋmɩn ben. A ʋlɔ na bɔ̃w a Naaŋmɩn ma sɔw na a sɩ ƴɛrɩ̃, ɩ̃ a ʋlɔ na ma ɩ a Naaŋmɩn ben wa, maa sɔw a sɩ ƴɛrɩ̃ wa. A nɔhɔ̃, sɩ na tʋɔ na bɔ̃w a ʋlɔ na tɛrɛ a yel-mɩ̃ɛ Sɩɛ, nɩ a ʋlɔ na tɛrɛ a jiri sɩɛ.

A NAAŊMƖN Ɩ NA A NƲFƲ

⁷ Ɩ̃ badɛɛ, nyɩ́ ɩ a sɩ nʋnɔ taa, a-na-ɩ a nʋfʋ yi na a Naaŋmɩn jie. A nɩrɛ lɛ na tɛrɛ a nʋfʋ ɩ na a Naaŋmɩn bile, ɩ̃ mɩ bɔ̃w a Naaŋmɩn.

⁸ A ʋlɔ na ma tɛrɛ a nʋfʋ wa ma bɔ̃w a Naaŋmɩn wa, a-na-ɩ a Naaŋmɩn ɩ na a nʋfʋ.

⁹ Nyɛ a mɩnɛ a Naaŋmɩn na miil a ʋ nʋfʋ a sɩ jie: ʋ tʋ̃ na a ʋ Bi-daadaa ʋ wa a ka a tẽw na pʋɔ a mɩnɛ a sɩ na tʋɔ pɔw a baafʋ a ʋ ɩnɛ.

¹⁰ A nʋfʋ ɩ na: aa ɩ a sɩmɩ ɩ̃ dãa nʋ a Naaŋmɩn wa, ɩ̃-cɛ a ʋlɔ ɩ̃ nʋ sɩ, ɩ̃ tʋ̃ a ʋ Bie ʋ wa ɩ a baar-lo-bom a sɩ maal-faar ir-barfʋ ɩnɛ.

¹¹ Ɩ̃ badɛɛ, a ala ɩ a Naaŋmɩn nʋ sɩ na a nɔhɔ̃, a sɛw na a sɩmɩ mɩ, sɩ mɩ nʋnɔ taa.

¹² Nɩrɛ ma dãa nyɛ a Naaŋmɩn wa. A ala ɩ sɩ nʋnɔ na taa, Naaŋmɩn be na a sɩ pʋ̃ɔ, ɩ̃ a ʋ nʋfʋ na be a sɩ pʋ̃ɔ ma bɔrɔ sɩ wa.

¹³ Sɩ bɔ̃w na ka sɩ be na a ʋ pʋ̃ɔ, ɩ̃ ʋ mɩ be a sɩ pʋ̃ɔ, a-na-ɩ ʋ po sɩ na a ʋ Sɩɛ.

¹⁴ Ɩ̃ sɩ nyɛ na ɩ̃ mɩ mana kʋrɔ a nɩbɛ, áa Sãa tʋ̃ na a ʋ Bie ʋ na ɩ a tẽw nɩbɛ ba jaa Fafaara.

¹⁵ A nɩrɛ lɛ na cã yel áa *Jeeju ɩ na a Naaŋmɩn Bie, Naaŋmɩn be na a ʋ pʋ̃ɔ, ɩ̃ ʋ mɩ be a Naaŋmɩn pʋ̃ɔ.

¹⁶ Sɩ bɔ̃w na a nʋfʋ ʋlɔ a Naaŋmɩn na tɛrɛ nɩ sɩ, ɩ̃ mɩ sɔw de ʋ. A Naaŋmɩn ɩ na nʋfʋ. A ʋlɔ na ɩraa a nʋfʋ pʋɔ be na a Naaŋmɩn pʋ̃ɔ, ɩ̃ a Naaŋmɩn mɩ be a ʋ pʋ̃ɔ.

¹⁷ A ala ɩ a nʋfʋ ma ɓɔr a sɩ pʋ̃ɔ wa, sɩ na barʼã nyãa a ƴɛrɩ̃ guorfʋ bibir, a-na-ɩ a mɩnɛ a *Jeeju-Kirisi na be, lɛ sɩ mɩ be a ka a tẽw na pʋɔ.

¹⁸ A nʋfʋ ma tɛrɛ dãbɩ̃ɛ wa. A nʋfʋ ʋlɔ na ɩ a cɛcɛ ma diw na a dãbɩ̃ɛ bar. A ʋlɔ na jɔrɔ a dãbɩ̃ɛ, a ʋ nʋfʋ bɔrʼã, a-na-ɩ a dãbɩ̃ɛ ma miile na a kpãafʋ na waara.

¹⁹ Sɩ tɛrɛ na a nʋfʋ, a-na-ɩ a Naaŋmɩn de na nĩe nʋ sɩ.

²⁰ A ala ɩ a nɩrɛ yelʼã: “Ɩ̃ nʋnɔ na a Naaŋmɩn,” ɩ̃ ꞌlaar a ʋ yɛbɛ, jir-ŋmara ʋ ɩ. A-na-ɩ a ʋlɔ na ma nʋnɔ a ʋ yɛbɛ ʋ na nyɛ wa, ꞌwaa tʋɔrɔ nʋnɔ a Naaŋmɩn ʋ na ma nyɛ wa.

²¹ A ƴɛr-kpɛ̃w ʋlɔ a *Kirisi na kʋ sɩ ɩ na, áa ʋlɔ na nʋnɔ a Naaŋmɩn sɛw na ʋ mɩ nʋnɔ a ʋ yɛbɛ.