1 Jã Sɛbɛ 3 - A NAAŊMƖN PƲLƖ̃-TA-PAALAA

A NAAŊMƖN BILE ƖFƲ

¹ Nyɩ́ nyɛ a mɩnɛ a Sãa na tɩɩ nyɩrɩ̃ nʋ sɩ a mɩnɛ ʋ na bʋɔlɔ sɩ a ʋlɔ Naaŋmɩn mɩ̃ɛ bibiir; ɩ̃-cɛ a lɛ sɩ sɩrɩ̃ ɩ. A bom na ɩnɛ a tẽw na nɩbɛ na ma bɔ̃w sɩ wa, ɩ na a mɩnɛ ba na ma mɩ dãa bɔ̃w ʋ wa.

² Ɩ̃ badɛɛ, a ƴɛ̃ƴɛrɩ̃ na sɩ ɩ na a Naaŋmɩn bibiir, ɩ̃ a ala sɩ nɔɔ lɛ ɩrɛ ma yi cãa pʋɔ sɛr wa. Ɩ̃ sɩ bɔ̃w ka a lɛdaar ʋ nɔɔ nyɩrɛ a cãa pʋɔ, sɩ na wɔ̃ na taa nɩ ʋ, a-na-ɩ sɩ na nyɛ ʋ na a mɩnɛ ʋ na be.

³ A nɩrɛ lɛ na tɛrɛ a tɩɛrʋ̃ son ʋlɔ a *Kirisi pʋɔ, ma cɔɔrɔ na a ʋ mɩ̃ɛ ɩrɛ cɛcɛ, a mɩnɛ a *Jeeju-Kirisi mɩ̃ɛ na ɩ a cɛcɛ.

⁴ A nɩrɛ lɛ na maal a fãa sãw na a *Naaŋmɩn ƴɛr-kpɛn, a-na-ɩ a fãa maalfʋ ɩ na a Naaŋmɩn ƴɛr-kpɛn sãwfʋ.

⁵ Nyɩ bɔ̃w ka a Jeeju-Kirisi wa na a ka na ir a maal-faar bar, ɩ̃ maal-fãa fɩ̃ɩ ma be a ʋ pʋɔ wa.

⁶ A nɩrɛ lɛ na be a ʋ pʋɔ ma maala fãa wa. Ɩ̃ a nɩrɛ lɛ na maala a fãa ma nyɛ ʋ wa, ɩ̃ ma mɩ bɔ̃w ʋ wa.

⁷ Ɩ̃ bibiir, nyɩ taa wa sɔw a nɩrɛ wa bɛlɩ̃ nyɩ wa. A ʋlɔ na maal a ala na tor mɩ torʼã, a mɩnɛ a Jeeju-Kirisi na tor.

⁸ Ɩ̃ a ʋlɔ na maala a fãa ɩ na a Satã ben, a-na-ɩ a korĩ-cɛ jaa a Satã ɩ̃ ma maala a fãa. A Naaŋmɩn Bie wa na a ka, na sãw a Satã tʋmɔ bar.

⁹ A nɩrɛ lɛ na ɩ a Naaŋmɩn bile ma barʼã a fãa maalfʋ, a-na-ɩ a Naaŋmɩn wɔmɔ be na a ʋ pʋɔ. ꞌWaa lɛ tʋɔrɔ maala a fãa wa, a-na-ɩ a Naaŋmɩn ɩ na a ʋ Sãa.

¹⁰ A ala na saa a Naaŋmɩn bibiir nɩ a Satã bibiir be a kpee kpee ɩ na: a ʋlɔ na ma maala a ala na tor wa, mɩɩ ma nʋnɔ a ʋ yɛbɛ wa, ma ɩ a Naaŋmɩn ben wa.

A NƲFƲ ƲLƆ NA SƐW

¹¹ A ƴɛrɩ̃ ʋlɔ sɩ na dãa wõ a korĩ-cɛ jaa ɩ na, á sɩ nʋnɔ taa,

¹² ɩ̃ a sɩ kɔ̃ wɔ̃ taa nɩ a Kayɩ̃ na dãa ɩ a Fãa Sʋbɔ ben ɩ̃ kú a ʋ yɛbɛ wa. Ɩ̃ bõ ɩnɛ ʋ kú ʋ? Ʋ kú ʋ na a-na-ɩ a ʋ maalfʋ dãa na ɩ a fãa, ɩ̃ a ʋ yɛbɛ ben dãa tor.

¹³ Ɩ̃ yɛɛr, nyɩ taa wa ɩ a nʋɔr ko nyɩ, a ala ɩ a tẽw na nɩbɛ wa ꞌlaar nyɩ na.

¹⁴ Sɩ bɔ̃w ka sɩ yi na a kũu pʋɔ ɩ̃ kpɛ a baafʋ pʋɔ, a-na-ɩ sɩ nʋnɔ na a sɩ yɛɛr. A ʋlɔ na ma nʋnɔ a ʋ yɛbɛ wa, cãa na be a kũu pʋɔ.

¹⁵ A nɩrɛ lɛ na ꞌlaara a ʋ yɛbɛ ɩ na nɩ-kʋrɔ. Ɩ̃ nyɩ bɔ̃w ka nɩ-kʋrɔ lɛ ma tɛrɛ a baa-kɔ̃-tɛw wa.

¹⁶ A mɩnɛ sɩ na ɩrɛ ɩ̃ wa bɔ̃wnɔ a nʋfʋ ɩ na, áa *Jeeju-Kirisi tɩɩrʼã a ʋ baafʋ a sɩ ɩnɛ. Ɩ̃ a sɩmɩ mɩ sɛw na na tɩɩr a sɩ baafʋ a sɩ yɛɛr ɩnɛ.

¹⁷ A ala ɩ a nɩrɛ lɛ tɛrɛ na a ala na sɛw ʋ a ka a tẽw pʋɔ, ɩ̃ nyɛ a ʋ yɛbɛ ʋ be a nãw pʋɔ, ɩ̃ a ꞌwaa bɔ̃w ʋ a nãw wa, mɩnɛ ʋ na ɩ ɩ̃ tʋɔ yel áa Naaŋmɩn nʋfʋ be na a ʋ pʋ̃ɔ?

¹⁸ Ɩ̃ bibiir, nyɩ taa ɩ a sɩ nʋfʋ tɔɔ ɩ a nɔ-vaar nɩ a ƴɛr-bie tɛw wa, ɩ̃-cɛ a sɛw na a ɩ a maal-bie nɩ yel-mɩ̃ɛ.

A NAAŊMƖN BIBIIR NYÃA-BARFƲ

¹⁹ A nɔhɔ̃ sɩ na bɔ̃w na bɔ̃w ka sɩ be na a yel-mɩ̃ɛ pʋɔ, ɩ̃ a sɩ sube na mɩ ɓãa na a Naaŋmɩn nii-sɔw.

²⁰ A-na-ɩ a ala saarɩ̃ ɩ a sɩ suur dama sɩ na, a Naaŋmɩn bɛrmɛ na gãw a sɩ suur, ɩ̃ mɩ bɔ̃w a yele a jaa.

²¹ Ɩ̃ badɛɛ, a ala ɩ a sɩ suur mɔɔ dama sɩ wa, sɩ na barʼã nyãa ɩ̃ pɩɛlɛ a Naaŋmɩn.

²² A bom lɛ sɩ na sʋɔrɔ ʋ, sɩ na pɔw na, a-na-ɩ sɩ jɔrɔ na a ʋ ƴɛr-kpɛn, ɩ̃ mɩ maala a ala na nʋmɔ ʋ.

²³ Nyɩ́ nyɛ a ala ʋ na kpãkpan sɩ, á sɩ ƴɔ̃w a ʋ Bie *Jeeju-Kirisi a nyãa, tɩɛrɛ nɩ a ʋ yuor, ɩ̃ mɩ nʋnɔ taa tuure nɩ a ƴɛr-kpɛ̃w ʋlɔ a *Kirisi na dãa kʋ sɩ.

²⁴ A ʋlɔ na jɔrɔ a *Naaŋmɩn ƴɛr-kpɛn be na a Naaŋmɩn pʋɔ, ɩ̃ a Naaŋmɩn mɩ be a ʋ pʋɔ. Ɩ̃ sɩ bɔ̃w ka ʋ be na a sɩ pʋɔ, a ʋ Sɩɛ ʋ na kʋ sɩ ɩnɛ.