1 Kɔrɛ̃tɩ Sɛbɛ 5 - A NAAŊMƖN PƲLƖ̃-TA-PAALAA

A BURBUR NA BE A KƆRƐ̃TƖ DUO-PUORBO SƆ̃W

¹ Ba ƴɛrɛ na a jiir a jaa á gã-ta-burbur be na a nyɩ sɔ̃w. A ʋna burburʼãa ma mɩ tʋɔrɔ beree a nɩ-bʋlsɩ mɩ̃ɛ sɔ̃w wa. A-na-ɩ a nyɩ sɔ̃w, kãw ma de na a ʋ sãa pɔw gana nɩ.

² Ɩ̃ a nyɩ cãa vʋnɔ! Nãw ɛ̃ɛ na dãa sɛw ʋ nyɔw nyɩ, a nyɩ diw a ʋlɔ na maal a lɛ bar a nyɩ sɔ̃w.

³ A ala ɩ a maa ʋ, a ala saarɩ̃ ɩ a mɩnɛ ɩ̃ na jãa nɩ nyɩ a ɩ̃gan buur pʋɔ, ɩ̃-cɛ ɩ̃ be nɩ nyɩ na a sɩɛ pʋɔ; a nɩrɛ ʋlɔ na maal a lɛ, ɩ̃ gɔrʼã guor a ʋ ƴɛrɩ̃, wɔ̃ taa nɩ ɩ̃ be na a nyɩ sɔ̃w.

⁴ A lɛdaar nyɩ nɔɔ duoro taa nɩ a Nɩ-kpɛ̃ɛ *Jeeju-Kirisi yuor, ɩ̃ a maa wa be nɩ nyɩ a sɩɛ pʋɔ, ɩ̃ a sɩ Nɩ-kpɛ̃ɛ Jeeju-Kirisi kpɛ̃w mɩ be nɩ sɩ,

⁵ nyɩ́ de a daba ʋlɔ ƴɔ̃w a Satã nuu pʋɔ, ʋ na wɛl a ʋ ɩ̃gan, ɩ̃ a ʋ sɩɛ na pɔw a faafʋ a bibir ʋlɔ a Nɩ-kpɛ̃ɛ na guoro a ƴɛrɩ̃sɩ.

⁶ A nyɩ yo-bɔb ma vɩɛlɛ wa. Nyaa bɔ̃w ka a tabɩr fɩ̃ɩ ma tʋɔ na maal a buru ʋ jaa ʋ vʋ̃ wa?

⁷ Nyɩ́ ir a tabɩr kʋraa na ɩ a maal-fãa a nyɩ sɔ̃w bar, a mɩnɛ a nyɩ na tʋɔ ɩ a bur-paalaa na ma tɛrɛ tabɩr wa. A lɛ nyɩ sɩrɩ̃ wɔ̃, a-na-ɩ ba de na a *Kirisi na ɩ a sɩ Pakɩ fɛtɩ baar-lo-pele lo nɩ a baar.

⁸ Ala-ɩ̃-sɔ, a sɩ *Pakɩ fɛtɩ ʋlɔ a Kirisi na cɔɔrɩ̃ kʋ sɩ, sɩ taa dɩrɛ nɩ ʋ a buru ʋlɔ na tɛrɛ a tabɩr kʋraa na ɩ a bier nɩ a fãa maalfʋ wa. Ɩ̃-cɛ nyɩ́ ɩ a sɩ ɛ̃ɛ dɩrɛ nɩ ʋ a bur-pʋɔr na miile a sɩ cɛcɛ ɩfʋ nɩ a sɩ yel-mɩ̃ɛ tɛrɛfʋ.

⁹ A sɛbɛ ʋlɔ ɩ̃ na dãa sɛb nyɩ, ɩ̃ dãa na yel a nyɩ taa wa lãwna taa nɩ a burbur-maalba wa.

¹⁰ Maa dãa bʋɔrɔ ɩ̃ yel a burbur-maalba ba jaa na be ka a tẽw na pʋɔ wa; mɩɩ a bala na ma jɩɛlɛ a yele, mɩɩ a nyanyube, mɩɩ a tɩbɛ deme jaa wa. A ala dãa ɩ a lɛ ʋ, a naa dãa na sɛw a nyɩ yi ka a tẽw na pʋɔ.

¹¹ Ɩ̃ dãa na bʋɔrɔ ɩ̃ yel a nyɩ taa lãwna taa nɩ a ʋlɔ na yel á sɩ yɛbɛ ʋ ɩ a Kirisi pʋɔ, ɩ̃ cãa maala a burbur, mɩɩ cãa jɩɛlɛ a yele, mɩɩ cãa ɩ a tɩɩb sʋbɔ, cãa kpɛrɛ a nɩbɛ, a dãa cãa kʋrɔ ʋ, mɩɩ cãa ɩ a nyanyuur. Nyɩ taa tɩɩ mɩ dɩ nɩ a nɩ-lɛ bom wa.

^12-13 Aa ɩ ɩ̃ tʋn ʋ ɩ̃ na guor a bala na ma ɩ a sɩ nɩbɛ wa ƴɛrɩ̃sɩ wa. Naaŋmɩn na guor a ba ƴɛrɩ̃. Aa ɩ a bala na ɩ a sɩ nɩbɛ nyɩ sɛw na ma guoro wa? A mɩnɛ a Naaŋmɩn Sɛbɛ na yel: “Nyɩ́ diw a bier sʋbɔ bar a nyɩ sɔ̃w.”