1 Kɔrɛ̃tɩ Sɛbɛ 2 - A NAAŊMƖN PƲLƖ̃-TA-PAALAA

A KIRISI BA NA KPA A NƖ-KƲ-DAA JUU ƳƐRƖ̃

¹ Yɛɛr, a lɛ ɩ̃ na dãa wɩ a nyɩ sɛ̃ na ɩ̃ ƴɛrɛ a Naaŋmɩn ƴɛr-sɔɔlaa kʋrɔ nyɩ, maa dãa wɩ nɩ kpaarfʋ mɩɩ bɔ̃bɔ̃wnɔ ƴɛr-bie wa.

² A-na-ɩ a lɛ ɩ̃ na dãa be a nyɩ sɔ̃w, ɩ̃ nyɛ na a ɩ son ɩ̃ kɔ̃ ƴɛr ƴɛr-kpee ɩ̃ a ala ma ɩ a *Jeeju-Kirisi ƴɛrɩ̃ tɛw ʋ wa, a ʋlɔ ba na kpa a nɩ-kʋ-daa juu.

³ Balfʋ nɩ dãbɩ̃ɛ nɩ mĩfʋ ɩ̃ dãa be nɩ a nyɩ sɛ̃.

⁴ A ɩ̃ ƴɛrɩ̃sɩ ɩ̃ na dãa ƴɛrɛ mɩ hiere nɩ, ma dãa ɩ a tẽw na pʋɔ yɛ̃-ƴɛrɩ̃sɩ wa, ɩ̃-cɛ a miile na a Naaŋmɩn Sɩɛ tʋmɔ nɩ a ʋ kpɛ̃w,

⁵ a mɩnɛ a nyɩ kɔ̃ ƴɔ̃w a nɩbɛ kpaarfʋ a nyãa wa, ɩ̃-cɛ a na ɩ a Naaŋmɩn kpɛ̃w nyɩ ƴɔ̃w a nyãa.

A NAAŊMƖN KPAARFƲ

⁶ Ɩ̃-cɛ sɩ ƴɛrɛ na a kpaarfʋ ƴɛrɩ̃ nɩ a bala na bɩ a Naaŋmɩn sɔr pʋɔ, ɩ̃ aa ɩ a tẽw na kpaarfʋ ʋ wa; aa mɩ ɩ a tẽw na nɩ-bɛrɛ kpaarfʋ ʋ wa, a-na-ɩ ba na lo na daar kãw.

⁷ Ɩ̃ sɩ mana na a Naaŋmɩn kpaarfʋ na ɩ a ƴɛr-bɔ̃w-faaraa na sɔɔlɩ̃ a nɩbɛ jie, a ʋlɔ a Naaŋmɩn na dãa gbɛɛrɩ̃ a sɩ yo-yifʋ ɩnɛ ɩ̃ ma dãa maal a tẽw sɛr wa.

⁸ A kpaarfʋ ʋlɔ, a tẽw na nɩ-kpɛ̃ɛ kãw ma bɔ̃w ʋ wa. A ala dãa ɩ ba bɔ̃w ʋ na, ba kãa dãa kpa a Nɩ-kpɛ̃ɛ ʋlɔ na yi a yuor yaal a nɩ-kʋ-daa juu wa.

⁹ Ɩ̃ a ala sɩ na mana ɩ na a mɩnɛ a Naaŋmɩn Sɛbɛ na yel: “A Naaŋmɩn gbɛɛrɩ̃ na a ala a nɩrɛ mimir na ma dãa nyɛ wa, a toor na ma mɩ dãa wõ wa; a bom ʋlɔ a nɩrɛ na ma mɩ dãa tɩɛrʼɩ̃ wa, ala a Naaŋmɩn gbɛɛrɩ̃ a bala na nʋnɔ ʋ ɩnɛ.”

¹⁰ Ɩ̃ a Naaŋmɩn de na a ʋ Sɩɛ miilʼɩ̃ sɩ a ana yele, a-na-ɩ a Naaŋmɩn Sɩɛ cɛ̃pɛrɛ na a yele a jaa, a ala saarɩ̃ ɩ a ala na sɔɔlɩ̃ a Naaŋmɩn pʋɔ ʋ.

¹¹ A nɩrɛ jie, ala na tʋɔ bɔ̃w a ala na be a ʋ pʋ̃ɔ, ɩ̃ a ala ma ɩ a ʋ mɩ̃ɛ sɩɛ ʋ wa? A lɛ ʋ mɩ a Naaŋmɩn jie. Nɩrɛ ma mɩ bɔ̃wnɔ a Naaŋmɩn yele, ɩ̃ a ala ma ɩ a ʋ Sɩɛ tɛw ʋ wa.

¹² A sɩmɩ, saa pɔw a tẽw na yɛ̃ wa, ɩ̃-cɛ a Sɩɛ ʋlɔ na yi a Naaŋmɩn jie sɩ pɔw, a mɩnɛ a sɩ na tʋɔ bɔ̃w nɩ a yele ala a Naaŋmɩn na kʋ sɩ a ʋ maal-vɩlaa ɩnɛ.

¹³ Sɩ maa de a ƴɛr-bie ala na yi a nɩbɛ kpaarfʋ pʋɔ mana nɩ a ana yele wa, ɩ̃-cɛ a ƴɛr-bie ala a Naaŋmɩn Sɩɛ na kʋ sɩ sɩ ma de mana nɩ. A nɔhɔ̃, sɩ ma de na a Naaŋmɩn Sɩɛ yele mana kʋrɔ a bala na tɛrɛ a ʋna Sɩɛ.

¹⁴ A nɩrɛ ʋlɔ na ma tɛrɛ a Naaŋmɩn Sɩɛ wa ma tʋɔrɔ pɔwrɔ a yele ala na yire a ʋ jie wa. A ʋna nɩrɛ jie, a ɩ na dãbol yele. ꞌWaa tʋɔrɔ bɔ̃wnɔ a par wa, a-na-ɩ a Naaŋmɩn Sɩɛ tɛw ba na tʋɔ bɔ̃w nɩ a yele ala par.

¹⁵ A nɩrɛ ɩ̃ tɛrɛ a Naaŋmɩn Sɩɛ, ʋ na tʋɔ na jʋʋr a bom lɛ bɔ̃w a par. Ɩ̃-cɛ nɩrɛ ma tʋɔrɔ bɔ̃wnɔ a ʋlɔ mɩ̃ɛ maalfʋ par wa.

¹⁶ A mɩnɛ a na yel a Naaŋmɩn Sɛbɛ pʋɔ: “Ala ɩ̃ dãa bɔ̃w a Nɩ-kpɛ̃ɛ tɩɛrʋ̃, na tʋɔ jaan ʋ a yɛ̃?” Ɩ̃-cɛ a sɩmɩ, sɩ tɛrɛ na a *Kirisi tɩɛrʋ̃.