1 Kɔrɛ̃tɩ Sɛbɛ 16 - A NAAŊMƖN PƲLƖ̃-TA-PAALAA

A LIBIE CIƐRFƲ A JERUJALƐM POPUORBO ƖNƐ

¹ A ƴɛ̃ƴɛrɩ̃ na, ɩ̃ bʋɔrɔ na ɩ̃ man nyɩ a libie cɩɛrfʋ ƴɛrɩ̃ ala nyɩ na cɩɛrɛ a Jerujalɛm popuorbo ɩnɛ. A mɩnɛ ɩ̃ na dãa yel a Galatɩ *duo-puorbo a ba maal, a nyɩmɩ mɩ, nyɩ́ mɩ maala a lɛ.

² A jɩmaasɩ a jaa, nyɩ jaa bõ-ƴene-ƴene, nyɩ́ ma ir a libie ala nyɩ na ma pɔw ŋmaa, bin kpee, a mɩnɛ a nyɩ kɔ̃ lɛ cɩɛrɛ libie a ɩ̃ wɩfʋ daar wa.

³ Ɩ a lɛdaar ɩ̃ na wɩɛrɛ, ɩ̃ na tʋ na a nɩbɛ bala nyɩ na vɛlɛ ire, nɩ a sɛbsɩ, a ba na cenʼɩ̃ a libie ala tɩɩr a Jerujalɛm.

⁴ A ala sɛw a ɩ̃ mɩ̃ɛ na cen, sɩ na lãa na cen.

A POL YƆFƲ TƖƐRƖ̃SƖ

⁵ A maa wa cen na yi a Masɛdɔn baar, ɩ̃ na ta na a be a nyɩ sɛ̃, a-na-ɩ ɩ̃ bʋɔrɔ na ɩ̃ yi a ʋna wɩɛr.

⁶ A nʋmɔ-wa-sɔw ɩ̃ na kamʼã be a nyɩ jie, mɩɩ ɩ̃ jɛ a be a ꞌwuon ʋ jaa, a mɩnɛ a nyɩ na tʋɔ sũo ma ɩ̃ cen a jie ɩ̃ na lɛ cere.

⁷ A-na-ɩ maa bʋɔrɔ ɩ̃ tɔɔ nyɛ nyɩ ɩ̃ po wa, ɩ̃-cɛ a ala ɩ a Nɩ-kpɛ̃ɛ wa kʋ ma na a sɔr, ɩ̃ na bʋɔrɔ na ɩ̃ kam fɩ̃ɩ a be a nyɩ sɛ̃.

⁸ Ɩ̃ na jɛ na a ka a Ɛfɛɛsɩ-tẽw wa ta nɩ a *Pãtekɔtɩ fɛtɩ daar,

⁹ a-na-ɩ a sɔr kpɛ̃ɛ yuo ma na ɩ̃ na tɩɩ tʋ̃ tʋmɔ, ɩ̃-cɛ a sama-deme waa na.

¹⁰ A ala ɩ a Timote wa ta na a be, nyɩ́ bɔ̃w tɛrɛ ʋ vɩlaa a mɩnɛ ʋ kɔ̃ jɔrɔ dãbɩ̃ɛ a nyɩ sɔ̃w wa, a-na-ɩ a Nɩ-kpɛ̃ɛ tʋmɔ ʋ tʋnɔ a ɩ̃ kaarɩ̃,

¹¹ Ala-ɩ̃-sɔ, nɩrɛ ʋ taa wa kpɛrɛ ʋ wa. Nyɩ́ sũo ʋ ʋ na lɛ tʋɔ lɩɛb wa a ɩ̃ sɛ̃ nɩ ɩ̃gan ɓaar, a-na-ɩ a maa nɩ a ƴɛɛr cɛlɛ ʋ na.

¹² A ala ɩ a sɩ yɛbɛ Apolosi ʋ, ɩ̃ sʋɔr ʋ na gbɛ-yaw ʋ lãa wɩ nɩ a yɛɛr a be a nyɩ sɛ̃, ɩ̃-cɛ ꞌwaa sɔw a be wɩfʋ a ƴɛ̃ƴɛrɩ̃ wa. Daar kãw, a ʋlɔ wa nyɛ a sɔr, ʋ na wɩ na.

A ƳƐR-BAARAA NƖ A PUORFƲ

¹³ Nyɩ́ bɔ̃w jʋʋrɔ, ɩraa nɩ cĩcĩ a ƴɔ̃w-nyãa pʋɔ. Nyɩ́ ɩ dab-ꞌlarɩsɩ, tɛrɛ nɩ a kpɛ̃w.

¹⁴ Nyɩ́ mɩ maala a yele a jaa nɩ nʋfʋ.

¹⁵ Nyɩ bɔ̃w na a Sitefana nɩ a ʋ yir deme, áa Akayi wɩɛr, bala ɩ̃ ɩ a dãdãw deme na kpɛ a puorfʋ pʋɔ, ɩ̃ nyɩ mɩ bɔ̃w na a mɩnɛ ba na de a ba mɩ̃ɛ ƴɔ̃w a tʋmɔ pʋɔ, sũono nɩ a Naaŋmɩn deme. Yɛɛr, ɩ̃ sʋɔrɔ nyɩ na

¹⁶ a nyɩ na wur a nyɩ mɩ̃ɛ a nɩ-lɛ nʋmɔ jie, nɩ a bala ba jaa na pɔw ba tʋnɔ nɩ dɩrɛ nɩ a tuo.

¹⁷ Nʋ̃ɔ nyɔw ma na a Sitefana nɩ a Fortunati nɩ a Akayiki waa ɩnɛ. Ba kʋ ma na a ala na dãa ɓɔr ma a lɛ nyɩ na ma dãa be ka wa.

¹⁸ Ba maal ma na a suur ʋ ɓãa, a mɩnɛ ba na mɩ dãa maal a nyɩ ben ʋ ɓãa. A sɛw na a nyɩ na bɔ̃w nɩ a nɩ-lɛ nʋmɔ.

¹⁹ A *duo-puorbo bala na be a Ajɩ wɩɛr puor nyɩ na. A Akɩlasɩ nɩ a Pɩrɩsɩl nɩ a duo-puorbo bala na ma duoro taa a ba yir pʋɔ mɩ puor nyɩ na vɩlaa a mɩnɛ nyɩ na ɩ a bõ-ƴen a *Kirisi pʋɔ.

²⁰ A yɛɛr ba jaa puor nyɩ na. Nyɩ́ puoro taa woro nɩ taa nɩ a Nɩ-kpɛ̃ɛ yuor.

²¹ A maa Pol mɩ̃ɛ nuu ɩ̃ sɛb a nanɩ puorʼɩ̃ nyɩ.

²² A nɩrɛ ma nʋnɔ a Nɩ-kpɛ̃ɛ wa, a Naaŋmɩn pɔfʋ ú nyɔw ʋ! “Marana ta” — Sɩ Nɩ-kpɛ̃ɛ, wa!

²³ A sũofʋ na yi a Nɩ-kpɛ̃ɛ *Jeeju sɛ̃ ú be a nyɩ jie.

²⁴ A nʋfʋ ɩ̃ na pɔw a *Jeeju-Kirisi sɛ̃ ú be a nyɩ jie nyɩ jaa.