1 Kɔrɛ̃tɩ Sɛbɛ 15 - A NAAŊMƖN PƲLƖ̃-TA-PAALAA

A KIRISI KŨU-PƲƆ-IRFƲ ƳƐRƖ̃

¹ Yɛɛr, a ƴɛ̃ƴɛrɩ̃ na, ɩ̃ bʋɔrɔ na ɩ̃ jaw nyɩ a ƴɛr-son ʋlɔ ɩ̃ na dãa ƴɛr kʋ nyɩ ɩ̃ a nyɩ mɩ sɔw de ɩ̃ mɩ ɩraa a be cĩcĩ.

² Nyɩ na pɔw na a faafʋ a ƴɛrɩ̃ ʋlɔ ɩnɛ a ala ɩ̃ ɩ nyɩ bɔ̃w na nyɔw ʋ a mɩnɛ ɩ̃ na dãa ƴɛr kʋ nyɩ. A ala ma ɩ lɛ v wa, a nyɩ sɔwfʋ na ɩ na pɔrɔ.

³ Ɩ̃ dãa na man a ala na ɩ a ƴɛrɩ̃ juu ɩ̃ na mɩ dãa pɔw kʋ nyɩ, na yel áa *Kirisi kpi na a sɩ maal-faar ɩnɛ tu nɩ a mɩnɛ a Naaŋmɩn Sɛbɛ na dãa yel,

⁴ a ba ũu v, ɩ̃ ʋ lɛ ir a kũu pʋɔ a bibie ata dayen, tu nɩ a mɩnɛ a Naaŋmɩn Sɛbɛ na dãa yel.

⁵ Ɩ̃ mɩ dãa na yel nyɩ a mɩnɛ ʋ na nyɩr a Pɩɛr, ɩ̃ lɛ nyɩr a *nɩ-tʋnɩsɩ pie-nʼayi bala.

⁶ A ala ɩ̃ baar, ʋ nyɩrʼã a ʋ *par-tuurbe kɔɔr anuu nɩ dɔɔlaa. A ba yaw jie cãa na a ƴɛ̃ƴɛrɩ̃, ɩ̃-cɛ a banʋmɔ kpi.

⁷ Ɩ̃ ʋ lɛ nyɩrʼã a Jakɩ, ɩ̃ lɛ nyɩr a nɩ-tʋnɩsɩ ba jaa.

⁸ Ɩ̃ a mɩnɛ a ala a jaa na tɔl baar, ʋ mɩ nyɩrʼã a maa mɩ̃ɛ wɔ̃ taa nɩ bile ba na ɓɔr dɔw.

⁹ Ɩ̃ ɩ na a nɩ-tʋnɩsɩ par-pɔɔrɔ na ma mɩ sɛw a ba na bʋɔl ma *nɩ-tʋnaa wa, a-na-ɩ ɩ̃ dãa na hʋɔl a Naaŋmɩn *duo-puorbo.

¹⁰ Ɩ̃-cɛ a Naaŋmɩn sũofʋ ɩ̃ saa ɩ̃ ɩ a ʋlɔ ɩ̃ na ɩ a dɩnaa, ɩ̃ a ʋ sũofʋ ʋ na sũo ma ma lo wa. Ɩ̃ tʋ̃ na gãw a ɩ̃ tɔ deme ba jaa na ɩ a nɩ-tʋnɩsɩ, ɩ̃-cɛ aa ɩ a ɩ̃ jie a yi wa, ɩ̃ a Naaŋmɩn sũofʋ na be nɩ ma ʋ.

¹¹ Ala-ɩ̃-sɔ, a maa ɩ̃ hiere mɩɩ a bala ʋ, a ʋna ƴɛr-bõ-ƴen sɩ ma hiere yʋɔrɔ nɩ, ɩ̃ a nyɩ ma mɩ sɔw de.

A KŨU-PƲƆ-IRFƲ ƳƐRƖ̃

¹² A ala ɩ sɩ ƴɛrɛ na áa *Kirisi irʼã a kũu pʋɔ, mɩnɛ a ŋmɛɛ a nyɩ sɔ̃w na tʋɔ yel áa kũusɩ ma tʋɔrɔ ire a kũu pʋɔ wa?

¹³ A ala ɩ yel-mɩ̃ɛ ʋ, a Kirisi ma mɩ ir a kũu pʋɔ wa.

¹⁴ Ɩ̃ a ala ɩ a Kirisi ma ir a kũu pʋɔ wa, a sɩ ƴɛrɩ̃sɩ ɩ na pɔrɔ ɩ̃ a nyɩ ƴɔ̃w-nyãa mɩ ɩ a pɔrɔ.

¹⁵ Ɩ̃ jiri sɩ mɩ ŋmara ƴɔnɔ a Naaŋmɩn, a-na-ɩ sɩ ma yelʼã á ʋ ɩ na a Kirisi ʋ ir a kũu pʋɔ. Ɩ̃-cɛ ala ɩ yel-mɩ̃ɛ á kũusɩ maa ir a kũu pʋɔ wa, a Naaŋmɩn ma mɩ maal a Kirisi ʋ ir a kũu pʋɔ wa.

¹⁶ A-na-ɩ a ala ɩ a kũusɩ ma ire a kũu pʋɔ wa, a Kirisi ma mɩ ir a kũu pʋɔ wa.

¹⁷ Ɩ̃ a ala ɩ a Kirisi ma ir a kũu pʋɔ wa, a nyɩ ƴɔ̃w-nyãa na ɩ na pɔrɔ, ɩ̃ nyɩ na cãa na a nyɩ maal-faar pʋɔ.

¹⁸ Ɩ̃ a lɛ mɩ yelʼã áa bala na kpi a Kirisi pʋɔ wɛ na.

¹⁹ A ala ɩ a tẽw na pʋɔ baafʋ tɛw ɩnɛ sɩ tɩɛrɛ nɩ a Kirisi, sɩ ɩ na a nã-kʋrbɔ gãw a nɩbɛ ba jaa.

²⁰ Ɩ̃-cɛ a Kirisi sɩrɩ̃ na ir a kũu pʋɔ, na ʋ miil áa bala na kpi na mɩ irʼã a kũu pʋɔ.

²¹ A mɩnɛ a kũu na yi a nɩ-bõ-ƴen jie, a lɛ ʋ mɩ a kũu-pʋɔ-irfʋ mɩ yi a nɩ-bõ-ƴen jie.

²² A-na-ɩ a mɩnɛ a nɩbɛ ba jaa na be a *Adã bal pʋɔ kpiire, a lɛ ba na mɩ pɔw a baafʋ a Kirisi pʋɔ.

²³ Ɩ̃-cɛ ba jaa tɛrɛ na a ba irfʋ daar. A dãdãw sʋbɔ ɩ na a Kirisi, ɩ̃-cɛ a ʋ nɩbɛ irfʋ daar na ɩ na a ʋ lɛwaa daar.

²⁴ A ala tɔl, a baarfʋ daar na ta na ɩ̃ a Kirisi na sãw na a fãwsɩ a jaa, a tʋɔfʋ a jaa, nɩ a kpɛn a jaa, ɩ̃ pãa de a yele a jaa ƴɔ̃w a Sãa Naaŋmɩn nuumɩ.

²⁵ A-na-ɩ a sɛw na a Kirisi na ɩ a Jamana a tẽw ʋ jaa juu wa tara nɩ a lɛdaar a Naaŋmɩn na tʋɔrɔ a ʋ sama-deme ba jaa ƴɔnɔ a ʋ pulẽe.

²⁶ A san-sʋbɔ ʋlɔ ʋ na baara sãwna ɩ na a kũu.

²⁷ A mɩnɛ a Naaŋmɩn Sɛbɛ na yel: “A Naaŋmɩn na de na a yele a jaa ƴɔ̃w a ʋ pulẽe.” Ɩ̃-cɛ a mɩnɛ a na yel áa yele a jaa be na a Kirisi pulẽe, aa bʋɔrɔ a yel áa Naaŋmɩn mɩ be na tɔ wa, a-na-ɩ a ʋlɔ mɩ̃ɛ ɩ̃ ƴɔ̃w a yele a Kirisi pulẽe.

²⁸ A lɛdaar a Naaŋmɩn na ƴɔnɔ a yele a jaa a beree a Bie pulẽe, a ʋlɔ mɩ̃ɛ na kpɛ na a Naaŋmɩn pulẽe, a mɩnɛ a Naaŋmɩn na tʋɔ ɩ a kpɛ̃ɛ a yele a jaa pʋɔ.

²⁹ A ala ɩ a kũu-pʋɔ-irfʋ ma be wa, bõ a na ɩ a nɩbɛ bala na ƴɔ̃w a ba mʋrɔ ba a kʋ̃ɔ a kũusɩ ɩnɛ? A ala ɩ yel-mɩ̃ɛ ʋ, áa kũusɩ ma ire a kũu pʋɔ wa, ɩ̃ bõ ɩnɛ a nɩbɛ bala ƴɔ̃w a ba mʋr ba a kʋ̃ɔ a kũusɩ ɩnɛ?

³⁰ Ɩ̃ a sɩmɩ mɩ, bõ ɩnɛ sɩ ma mɩ be a jãjĩ pʋɔ a daar a jaa?

³¹ Yɛɛr, a mɩnɛ nyɩ na bɔ̃w ka a ɩ̃ barʼã tɩɛrʋ̃ a nyɩmɩ na be a sɩ Nɩ-kpɛ̃ɛ *Jeeju-Kirisi pʋɔ, a sɛw na nyɩ mɩ bɔ̃w ka a kũu tor ma na a bibie a jaa.

³² A ala ɩ a tẽw na nɩbɛ tɩɛrɩ̃sɩ tɛw ɩ̃ dãa tɛrɛ jɛbɛ nɩ a nɩbɛ bala na wɔ̃ taa nɩ wɛ-dʋn a ka a Ɛfɛɛsɩ-tẽw pʋɔ, bõ a na ɩ ma? A ala ɩ a kũu-pʋɔ-irfʋ ma be wa, sɩ́ maala a mɩnɛ a sʋkpa kãw na yel: “Sɩ́ dɩrɛ ɩ̃ nyuure, a-na-ɩ a bio sɩ kpiire.”

³³ Nyɩ taa wa ɩ a ba bɛlɛ nyɩ wa: “A lãa-yɔ-burbur ma sãw na a fʋ dẽdẽ ɩfʋ bar.”

³⁴ Nyɩ́ lɩɛb de a nyɩ yɛ̃ ɩ̃ bar a fãa maalfʋ a baar, a-na-ɩ ŋmɛɛ be na a nyɩ sɔ̃w ma bɔ̃w a Naaŋmɩn wa. A sɛw na vĩ ʋ nyɔw nyɩ a ala ɩnɛ.

A ĨGANA ALA A KŨUSƖ NƆƆ IRE NƖ

³⁵ Nɩrɛ na soorʼã á mɩnɛ a kũusɩ na ɩ ɩ̃ ir a kũu pʋɔ? Ɩ̃gan wɔ̃ mɩnɛ ba ir tɛrɛ?

³⁶ A ʋna nɩrɛ naa ɩ na dãbol! A ala fʋ na ma bʋr ma tʋɔrɔ bule ɩ̃ a ala ma ɩ ʋ pʋ̃ɔ na wa.

³⁷ A ala fʋ na ma bʋr ma ɩ a vaar wa. Ci bir tɛw ʋ ɩ, mɩɩ bir kpee, ɩ̃-cɛ a vaar wa pãa tuure.

³⁸ A Naaŋmɩn ma kʋ na a yel-bulisɩ bie a ɩ̃gan ʋlɔ ʋ na bʋɔrɔ, a mɩnɛ a bie ala a jaa na tɛrɛ a ba ɩ̃gana a kpee kpee.

³⁹ A yel-mimie ba jaa ma tɛrɛ ɩ̃gan bõ-ƴen wa. A nɩbɛ ɩ̃gan be na kpee, a wɛ-yele ɩ̃gan be kpee, a wɛ-lili ɩ̃gan mɩ be kpee, a jɩmɛ ɩ̃gan lɛ be kpee go.

⁴⁰ A saꞌlon yele be na be, a tẽw pʋɔ yele mɩ be be. A saꞌlon yele ɩ̃gana vɩlaafʋ be na kpee nɩ a tẽw pʋɔ yele ɩ̃gana.

⁴¹ A mɔtɔ̃w caarɩ̃fʋ be na kpee, a cuu ben mɩ be kpee, a ŋmarbie bene mɩ be kpee. Ɩ̃-cɛ a ŋmarbie sɔ̃w, a bõ-ƴen caarɩ̃fʋ ma gãw na a kãw ben.

⁴² Lɛ a na mɩ be nɩ a kũusɩ na ire a kũu pʋɔ. A ʋna ɩ̃gan ba na ũu ɩ na bõ-sãwnaa, ɩ̃-cɛ a ʋlɔ na ire a kũu pʋɔ ma tɛrɛ sãwfʋ wa.

⁴³ A lɛdaar ba na ma ũu ʋ, ʋ ma ɩ na bõ-kpana, ma tɛrɛ fãgã wa, ɩ̃-cɛ a ʋlɔ wa ir a kũu pʋɔ ʋ ma yi na yuor, mɩ tɛrɛ nɩ a kpɛ̃w.

⁴⁴ A ũufʋ daar, a tẽw pʋɔ ɩ̃gan buur ʋ ma ɩ, ɩ̃-cɛ a kũu-pʋɔ-irfʋ daar, a sɩɛ ɩ̃gan ʋ na lɩɛb ɩ. A ala ɩ̃ ɩ a ɩ̃gan buur be na, a sɩɛ ɩ̃gan na mɩ be na.

⁴⁵ A lɛ a mɩ yel a Naaŋmɩn Sɛbɛ pʋɔ: “A dab-dãdãw na ɩ a *Adã, a Naaŋmɩn mɛ ʋ na ʋ ɩ nɩ-mimir.” Ɩ̃-cɛ a par-pɔɔrɔ Adã ɩ na Sɩɛ na tɩɩrɛ a baafʋ.

⁴⁶ Aa ɩ a sɩɛ ɩ̃gan ɩ̃ ma de nĩe wa wa, ɩ̃-cɛ a tẽw pʋɔ ɩ̃gan ɩ̃ ma wa, ɩ̃ a sɩɛ ɩ̃gan pãa tu.

⁴⁷ A dãdãw Adã ɩ na a tẽw pʋɔ nɩrɛ ba na mɛ nɩ a tẽw tãbuulĩ, ɩ̃ a gbɛɛ ayi Adã yi na a saa juu.

⁴⁸ A bala na ɩ a tẽw na nɩbɛ wɔ̃ na taa nɩ a ʋlɔ ba na mɛ nɩ a tãbuulĩ, ɩ̃ a saa juu nɩbɛ mɩ wɔ̃ taa nɩ a ʋlɔ na yi a saa juu.

⁴⁹ A mɩnɛ sɩ na mɩ wɔ̃ taa nɩ a ʋlɔ ba na mɛ nɩ a tãbuulĩ, a lɛ sɩ nɔɔ mɩ wɔ̃ taa nɩ a ʋlɔ na yi a saa juu.

⁵⁰ Yɛɛr, nyɛ a ala ɩ̃ na buɔrɔ ɩ̃ yel nyɩ. A ɩ̃gan buur nɩbɛ ma tʋɔrɔ beree nɩ a Naaŋmɩn a ʋ fãw pʋɔ wa, ɩ̃ a ʋlɔ na ɩ a bõ-kpiiraa ma tʋɔrɔ beree nɩ a ala na ma kpiire wa.

⁵¹ Nyɩ́ cɛlɛ! Ɩ̃ na miil nyɩ na ƴɛr-sɔɔlaa. Aa ɩ sɩ jaa na kpi wa, ɩ̃-cɛ a lɛdaar ba nɔɔ pɛɛlɛ a baarfʋ daar ɩl, sɩ jaa na nalɩ̃ na

⁵² a jie naan, a mɩnɛ a nɩrɛ na ma ŋme a bere. A-na-ɩ ba nɔɔ pɛɛlʼã a ú, ɩ̃ a kũusɩ ir a kũu pʋɔ ma lɛ nyɛrɛ a sãwfʋ wa, ɩ̃ a sɩmɩ, sɩ na nalɩ̃ na.

⁵³ A-na-ɩ a sɛw na a bõ-sãwnaa ʋlɔ ʋ lɩɛb ɩ a ʋlɔ na ma sãwna wa, ɩ̃ a bõ-kpiiraa ʋlɔ ʋ lɩɛb ɩ a ʋlɔ na ma tʋɔrɔ kpiire wa.

⁵⁴ A lɛdaar a bõ-sãwnaa ʋlɔ na lɩɛbɛ ɩrɛɛ a ʋlɔ na ma sãwna wa, ɩ̃ a bõ-kpiiraa ʋlɔ mɩ lɩɛbɛ ɩrɛɛ a ʋlɔ na ma tʋɔrɔ kpiire wa, a na pãa na ɩ a mɩnɛ a Naaŋmɩn Sɛbɛ na yel: “A tʋɔfʋ diw na a kũu ir bar.”

⁵⁵ “Kũu wee! Nyɩnɛ a fʋ tʋɔfʋ be? Ɩ̃ nyɩnɛ a fʋ kúfʋ lɔw mɩ be?”

⁵⁶ A kũu lɔw ʋ na ma kú nɩ ɩ na a maal-fãa, ɩ̃ a maal-fãa ma pɔw na a ʋ kpɛ̃w a ƴɛr-kpɛn pʋɔ.

⁵⁷ Ɩ̃-cɛ Naaŋmɩn sɔ puorfʋ, a ʋlɔ na kʋ sɩ a tʋɔfʋ a sɩ Nɩ-kpɛ̃ɛ *Jeeju-Kirisi ɩnɛ.

⁵⁸ Ala-ɩ̃-sɔ ɩ̃ yɛ-nʋnɩsɩ, nyɩ́ ɩraa cĩcĩ kɔ̃ dama wa. Nyɩ́ nyɩrɛ tʋnɔ a Nɩ-kpɛ̃ɛ tʋmɔ, a mɩnɛ nyɩ na bɔ̃w ka a tʋmɔ ala nyɩ na tʋnɔ a Nɩ-kpɛ̃ɛ ɩnɛ ma ɩ pɔrɔ wa.