1 Kɔrɛ̃tɩ Sɛbɛ 13 - A NAAŊMƖN PƲLƖ̃-TA-PAALAA

A NƲFƲ PAR

¹ Ɩ̃ na tʋɔ na ƴɛrɛ a tẽw na ƴɛr-bʋrɔ bʋrɔ nɩ a sɩ-tʋnɩsɩ ƴɛrɩ̃, ɩ̃-cɛ a maa ma tɛrɛ a nʋfʋ wa, a ɩ̃ ƴɛrɩ̃sɩ naa lɩɛbʼã wɔ̃ taa nɩ kur ba na ŋmeere ʋ pɔɔrɔ a gɔmɔ, mɩɩ gbẽlɩ̃bir ba na ŋmeere ꞌlẽgerem ꞌlẽgerem.

² Ɩ̃ na tʋɔ na ɩ a *Naaŋmɩn pʋ-tɩɛrʋ̃-bʋʋrɔ mɩ bɔ̃wnɔ nɩ a yel-sɔɔlsɩ a jaa, ɩ̃ mɩ tʋɔ tɛrɛ a ƴɔ̃w-nyãa maala nɩ a tan a ba ir cere, ɩ̃-cɛ a maa ma tɛrɛ a nʋfʋ wa, maa ɩ bom wa.

³ Ɩ̃ na tʋɔ na de a ɩ̃ yele a jaa po a nɩbɛ, ɩ̃ mɩ de a ɩ̃ mɩ̃ɛ ƴɔ̃w a vũumɩ ʋ dɩ, ɩ̃-cɛ a maa ma tɛrɛ a nʋfʋ wa, aa dɔɔlɔ ma bom wa.

⁴ A nʋfʋ tɛrɛ na su-nyɔwraa, nɩ a pʋ-pɩlaa. ꞌWaa tɛrɛ nyuur wa; ꞌwaa mɩ bʋɔrɔ yuor wa. A nʋfʋ ma bʋɔrɔ ju-kpɛ̃ɛ wa;

⁵ ꞌwaa maala vĩ tʋmɔ wa; ꞌwaa ꞌwuoro a ʋ mɩ̃ɛ tɛw wa; ꞌwaa mɩ nyɛrɛ suur fɔfɔw wa; ꞌwaa ƴɔnɔ nɩrɛ pʋɔ wa.

⁶ A nʋfʋ ma bʋɔrɔ gõgolĩ-tʋmɔ wa, ɩ̃-cɛ yel-mɩ̃ɛ ma nʋmɔ ʋ.

⁷ A nʋfʋ tɛrɛ na su-balaa a yele a jaa jie. Ʋ ma tɛrɛ na a ƴɔ̃w-nyãa a daar a jaa, mɩ tɛrɛ a tɩɛrʋ̃ son a yele a jaa pʋɔ, ɩ̃ ma mɩ sɔw a won a jaa.

⁸ A nʋfʋ ma tɛrɛ baarfʋ daar wa. A ala ɩ a Naaŋmɩn pʋ-tɩɛrʋ̃ bʋʋfʋ ʋ, ʋ na tɔlʼã, a ƴɛr-bɔ̃w-faarsɩ na mɩ baarʼã, ɩ̃ a bɔ̃wfʋ mɩ na mɩ tɔlʼã.

⁹ A-na-ɩ a sɩ bɔ̃wfʋ bɔrʼã, ɩ̃ a sɩ Naaŋmɩn pʋ-tɩɛrʋ̃ bʋʋfʋ mɩ ɓɔr.

¹⁰ Ɩ̃-cɛ a lɛdaar a ala na ɩ a cɛcɛ na tara, a ala na ɓɔr ma lɛ beree wa.

¹¹ A lɛdaar ɩ̃ na dãa cãa ɩ a bibile, a bibi-ƴɛrɩ̃sɩ ɩ̃ ma dãa ƴɛrɛ, tɛrɛ nɩ a bibi-yɛ̃, tɩɛrɛ nɩ a bibi-tɩɛrɩ̃sɩ. Ɩ̃-cɛ a mɩnɛ ɩ̃ na ɩ a nɩ-kpɛ̃ɛ baar, ɩ̃ barʼã a ala na ɩ a bibi-tʋmɔ.

¹² A ala sɩ na nyɛ a ƴɛ̃ƴɛrɩ̃ wɔ̃ na taa nɩ bom sɩ na nyɛ caaraa pʋɔ na ma bɔ̃w nyɩr wa, ɩ̃-cɛ a daar wa ta, sɩ na nyɛ ʋ na gbelẽgbelẽ. A ƴɛ̃ƴɛrɩ̃ na, a ɩ̃ bɔ̃wfʋ bɔrʼã, ɩ̃-cɛ a ʋna daarʼãa pʋɔ, ɩ̃ na bɔ̃w na a jaa, a mɩnɛ a Naaŋmɩn na mɩ bɔ̃w ma.

¹³ A ƴɛ̃ƴɛrɩ̃ na yele ata ɩ̃ be be: a ƴɔ̃w-nyãa, a tɩɛrʋ̃ son, nɩ a nʋfʋ; ɩ̃-cɛ a ana yele ata pʋɔ, a bõ-kpɛ̃ɛ ɩ na a nʋfʋ.