1 Kɔrɛ̃tɩ Sɛbɛ 10 - A NAAŊMƖN PƲLƖ̃-TA-PAALAA

A SƖ MƖ̃Ɛ TƐRƐFƲ A TƖBƐ YELE JIE

¹ Yɛɛr, ɩ̃ buɔrɔ na nyɩ cãa bɔ̃w nɩ a ala na dãa ta a sɩ sãa-kʋnbɔ a Mowisi na dãa tɛrɛ a wɛkar pʋɔ. Ba jaa dãa na be a dɔ̃dɔrɩ̃ma pulẽe, ɩ̃ ba jaa mɩ gãw na a Man Jɩ̃ɛw.

² A ba jaa mʋrʼã a kʋ̃ɔ a dɔ̃dɔrɩ̃ma nɩ a man pʋɔ lɩɛb ɩ Mowisi nɩbɛ.

³ Ba jaa mɩ dɩ na a dɩb ala a Naaŋmɩn Sɩɛ na kʋ ba,

⁴ ɩ̃ mɩ nyu a Naaŋmɩn Sɩɛ kʋ̃ɔ ba jaa. A-na-ɩ ba nyu na a kʋ̃ɔ ʋlɔ na dãa yi a Naaŋmɩn Sɩɛ kusɩpan pʋɔ na dãa tuure ba, ɩ̃ a ʋna kusɩpan naa dãa na ɩ a *Kirisi.

⁵ Ɩ̃-cɛ a ba pʋɔ, a yaw jie maalfʋ ma dãa nʋmɔ a Naaŋmɩn wa; ala-ɩ̃-sɔ a ba fa lo kpi a wɛkar pʋɔ.

⁶ A ana yele naa ta na a lɛ na tʋɔ ɩ sɩ bõ-miilaa a sɩ taa ɩ a yel-fã-ꞌlaarba a mɩnɛ ba na dãa wɔ̃ wa.

⁷ Nyɩ taa mɩ ɩ a tɩb-puorbo a mɩnɛ a ba ŋmɛɛ na dãa wɔ̃ wa, a mɩnɛ a Naaŋmɩn Sɛbɛ na yel: “Aa nɩbɛ bala jɛ na dɩ nyu nɩ, ɩ̃ pãa ir ɓolo sɛbɛ nɩ a bɩnɛ.”

⁸ Sɩ taa mɩ maala a burbur gana nɩ taa a ba ŋmɛɛ kaarɩ̃ wa. A bala na maal a lɛ, nɩbɛ ture lɩjɛrʼɩ̃-ata lo na kpi a bibir bõ-ƴen.

⁹ Sɩ taa mɩ bɩɩrɛ a Nɩ-kpɛ̃ɛ a mɩnɛ a ba ŋmɛɛ na dãa maal, a wɩɩr dʋn ba kú wa.

¹⁰ Nyɩ taa mɩ hũhune a Naaŋmɩn a mɩnɛ a ba ŋmɛɛ na mɩ dãa maal, a Wɛwɛlɛ wɛl ba bar wa.

¹¹ A ala a jaa ta ba na, na ɩ sɩ bõ-miilaa ba na mɩ sɛb kpãkpana nɩ a sɩmɩ na be a tẽw baarfʋ daar.

¹² Ala-ɩ̃-sɔ, a ʋlɔ na tɩɛr bɔ̃w ka ʋ ɩraa na cĩcĩ, ú bɔ̃w ɩraa kɔ̃ wa lo wa.

¹³ Bɩɩrfʋ kãw ma ta nyɩ ɩ̃ a ala ma ɩ a ala na ma ta a nɩbɛ ba jaa ʋ wa. Naaŋmɩn ɩ na dẽdẽ. ꞌWaa sɔwrɔ a bɩɩrfʋ ʋlɔ na gãw nyɩ ʋ tara nyɩ wa. Ɩ̃-cɛ a bɩɩrfʋ wa ta nyɩ, ʋ na miil nyɩ na a yifʋ jie, ku nɩ nyɩ a kpɛ̃w ʋlɔ nyɩ na ɩrɛɛ nɩ.

¹⁴ Ala-ɩ̃-sɔ ɩ̃ badɛɛ, nyɩ́ taw yi a tɩbɛ pʋɔ.

¹⁵ Ɩ̃ ƴɛrɛ nɩ nyɩ na a mɩnɛ nyɩ na ɩ a yɛ̃-tɛrbɛ. Nyɩ́ pɛ a ala ɩ̃ na yele je kãa.

¹⁶ A ŋman ʋlɔ sɩ na mɔɔ nyuure nɩ, pɛwrɛ nɩ a Naaŋmɩn a ʋ maal-vɩlaa ɩnɛ, maa lɩɛb sɩ a sɩ ɓã taa ɩ bõ-ƴen nɩ a Kirisi a ʋ jɩ̃ɩ ɩnɛ wa? Ɩ̃ a buru sɩ na mɔɔ ŋmara poro, maa mɩ lɩɛb sɩ a sɩ ɓã taa ɩ bõ-ƴen nɩ a Kirisi a ʋ ɩ̃gan ɩnɛ wa?

¹⁷ A mɩnɛ sɩ na saarɩ̃ waa, ɩ̃ tɛrɛ a bur-bõ-ƴen tɛw, a lɩɛb sɩ na a sɩ ɩ ɩ̃gan bõ-ƴen, a-na-ɩ sɩ jaa ma po na a ʋna bur-bõ-ƴen.

¹⁸ Nyɩ́ tɩɛr a Ɩsɩrayɛl puorfʋ tʋmɔ nyɛ. A bala na dɩrɛ a baar lofʋ yele maa ɓã taa ɩ bõ-ƴen nɩ a Naaŋmɩn na sɔ a baar-lofʋ jie wa?

¹⁹ Bõ ɩ̃ bʋɔrɔ ɩ̃ yel a lɛ? Áa baar-lo-bom ɩ na bom, mɩɩ áa tɩɩb ɩ na bom mɩɩ?

²⁰ Aa ɩ lɛ ɩ̃ yel wa. Ɩ̃ ɩ̃ yelʼã á ana yele a tɩbɛ deme na ma loro nɩ a baar, á aa ɩ Naaŋmɩn ba ma kʋrɔ wa; a kɔ̃tɔnsɩ ba ma kʋ. Ɩ̃ maa bʋɔrɔ nyɩ ɩ bõ-ƴen nɩ a kɔ̃tɔnsɩ wa.

²¹ Nyaa tʋɔrɔ nyuure nɩ a Nɩ-kpɛ̃ɛ ŋman nɩ a kɔ̃tɔnsɩ ŋman wa. Nyaa mɩ tʋɔrɔ tune a Nɩ-kpɛ̃ɛ ŋman pʋɔ, nɩ kɔ̃tɔnsɩ ŋman pʋɔ wa.

²² Mɩɩ sɩ bʋɔrɔ sɩ maal a Nɩ-kpɛ̃ɛ nyuur ʋ ir? Nyɩ tɩɛrʼã beeka sɩ tɛrɛ na kpɛ̃w gãw ʋ mɩɩ?

NYƖ́ MAALA A YELE A JAA KÃKARA NƖ A NAAŊMƖN

²³ A ŋmɛɛ ma yelʼã á baa ciire bom maalfʋ wa. Sɩrɛ jaa ʋ, ɩ̃-cɛ aa ɩ a yele a jaa ɩ̃ vɩɛlɛ a maalfʋ wa. Bom ma ciire maalfʋ ʋlɔ wa, ɩ̃-cɛ aa ɩ a yele a jaa ɩ̃ sũono a nɩbɛ a ba karɛɛ wa.

²⁴ Nɩrɛ kãw ʋ taa maala a ala na nʋmɔ a ʋ mɩ̃ɛ wa, ɩ̃-cɛ ú maala a ala na nʋmɔ a ʋ tɔ sʋbɔ.

²⁵ Nyɩ tɛrɛ na sɔr na ŋmaa a nɩn lɛ ba na daara a daa pʋɔ, kɔ̃ bʋɔrɔ nyɩ bɔ̃w a nɩn ʋlɔ yifʋ jie a nyɩ tɩɛrɩ̃sɩ damfʋ ɩnɛ wa.

²⁶ A-na-ɩ a Naaŋmɩn Sɛbɛ yelʼã: “A Nɩ-kpɛ̃ɛ ɩ̃ sɔ a tẽw, nɩ a yele a jaa na be a ʋ juu.”

²⁷ A nɩrɛ ʋlɔ na ma puoro wa wa bʋɔl fʋ dɩb ɩnɛ a fʋ wa sɔw cen, dɩ a bom lɛ ʋ na bine a fʋ nii-sɔw, kɔ̃ soor ʋ bom kãw a fʋ tɩɛrɩ̃sɩ damfʋ ɩnɛ wa.

²⁸ Ɩ̃-cɛ a nɩrɛ wa yel fʋ á tɩɩb nɩn ʋ, taa wa ꞌwɔbɔ wa. A ʋlɔ na yel, nɩ a ʋ tɩɛrʋ̃ damfʋ ɩnɛ, fʋ sɛw na jaar.

²⁹ Aa ɩ a fʋ̃ʋ mɩ̃ɛ tɩɛrʋ̃ damfʋ ɩnɛ wa, ɩ̃-cɛ a ʋlɔ na yel fʋ ɩnɛ ʋ. Nyɩ na tʋɔ na soor ma: “A ala ɩ̃ ɩ ɩ̃ tɛrɛ na a sɔr maala a bom a lɛ, bõ ɩnɛ a nɩrɛ na lɛ tʋɔ koro ma a ʋ tɩɛrɩ̃sɩ damfʋ ɩnɛ?

³⁰ A ala ɩ̃ ɩ ɩ̃ puorʼã a Naaŋmɩn ɩ̃ dɩrɛ a bom, bõ ɩnɛ a nɩrɛ na lɛ koro ma a ala ɩ̃ na sʋɔr a Naaŋmɩn ƴɔ̃w ɩ̃ dɩrɛ ɩnɛ?”

³¹ Ala-ɩ̃-sɔ, a nyɩmɩ dɩrɛ a dɩb, mɩɩ a bom nyɩ nyuure, mɩɩ a bom jaa lɛ nyɩ na maala, nyɩ́ maala kʋrɔ nɩ a Naaŋmɩn a ju-kpɛ̃ɛ.

³² Nyɩ taa wa maala bom a wa cɩɛrɛ a Jufisɩ, mɩɩ a nɩ-bʋlsɩ, mɩɩ a Naaŋmɩn-puorbo wa.

³³ Nyɩ́ maala a ɩ̃ kaarɩ̃. Ɩ̃ bʋɔrɔ na ɩ̃ maala a yele a jaa a na nʋmɔ a nɩbɛ ba jaa. Maa bʋɔrɔ ɩ̃ mɩ̃ɛ bom wa, ɩ̃ ɩ̃ bʋɔrɔ na a nɩbɛ ba jaa son, a mɩnɛ a ba na tʋɔ pɔw a faafʋ.